ថ្ងៃ ចន្ទ ទី ២៦ ខែ កញ្ញា ឆ្នាំ ២០២២

​ឡើង​ឋានៈ​ឯកឧត្តម ! ផ្កាយ​៣​មេបញ្ជាការរង​ប៉េអឹម​ផ្ទៃ​ប្រទេស​ម្នាក់ ដែលជា​ដន្លងដងស្នែង​ផ្កាយ​៤ សៅ សុខា ទទួលបាន​ការតែងតាំង​ជា​ជំនួយការ​នាយករដ្ឋមន្ត្រី មាន​ឋានៈ​ស្មើ​រដ្ឋលេខាធិការ​

​កាលពី​ថ្ងៃទី​២៩ ខែកក្កដា ឆ្នាំ​២០២២​ម្សិលមិញ​នេះ ព្រះករុណា​ព្រះបាទ​សម្តេច​ព្រះបរមនាថ នរោត្តម សីហមុនី ព្រះមហាក្សត្រ នៃ​ព្រះរាជាណាចក្រ​កម្ពុជា ទ្រង់​បាន​ឡាយព្រះហស្តលេខា​នៅលើ​ព្រះរាជក្រឹត្យ​លេខ នស​/​រកត​/០៧២២/៨៨០ ត្រាស់បង្គាប់​តែងតាំង​លោក​ឧ​ត្ត​ម​សេនីយ៍​ឯក ប៉ោ វណ្ណៈ មេបញ្ជាការរង​កងរាជអាវុធហត្ថ​លើ​ផ្ទៃ​ប្រទេស ជា​ជំំ​នួ​យ​ការ​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា ដោយ​ពុំ​ទទួល​ប្រាក់​បំណាច់​មុខងារ មាន​ឋានៈ​ស្មើ​រដ្ឋលេខាធិការ បន្ថែម​លើ​មុខងារ​បច្ចុប្បន្ន តាម​សេចក្តីក្រាបបង្គំទូលថ្វាយ​របស់​សម្តេច​អគ្គមហាសេនាបតី​តេ​ជោ​នាយករដ្ឋមន្ត្រី ។ ពោលគឺ លោក​ឧ​ត្ត​ម​សេនីយ៍​ឯក ប៉ោ វណ្ណៈ ត្រូវមាន​ឋានៈ​ជា «​ឯកឧត្តម​ឧ​ត្ត​ម​សេនីយ៍​ឯក ប៉ោ វណ្ណៈ​» ។​

​លោក ប៉ោ វណ្ណៈ ជា​នាយទាហាន​ថ្នាក់​ឧ​ត្ត​ម​សេនីយ៍ នៃ​កងយោធពល​ខេមរភូមិន្ទ ក្រសួងការពារជាតិ អត្តលេខ​០០១១៣១ អតីត​ជា​មេបញ្ជាការ​កងរាជអាវុធហត្ថ​ខេត្តបាត់ដំបង និង​ត្រូវបាន​គេ​ស្គាល់​ថា ជា​ដន្លងដងស្នែង​ឯកឧត្តម​នាយ​ឧ​ត្ត​ម​សេនីយ៍​ផ្កាយ​មាស​៤ សៅ សុខា អគ្គ​មេបញ្ជាការរង នៃ​អគ្គម​បញ្ជាការដ្ឋាន​កងយោធពល​ខេមរភូមិន្ទ និង​ជា​មេបញ្ជាការ នៃ​បញ្ជាការដ្ឋាន​កងរាជអាវុធហត្ថ​លើ​ផ្ទៃ​ប្រទេស ។ លោក​ឧ​ត្ត​ម​សេនីយ៍ ប៉ោ វណ្ណៈ ក៏​ទទួលបាន​ការតែងតាំង​មុខតំណែង​ថ្មី​ជា មេបញ្ជាការរង នៃ​បញ្ជាការដ្ឋាន​កងរាជអាវុធហត្ថ​លើ​ផ្ទៃ​ប្រទេស ដោយអនុក្រឹត្យលេខ៩៩៤អនក្រ.តត ចុះថ្ងៃទី២៩ ខែសីហា ឆ្នាំ២០១៧ តាំងពីនៅមានឋានន្តរស័ក្តិ ឧត្តមសេនីយ៍ត្រី (ផ្កាយ១) មកម្ល៉េះ ពោលគឺបានមកកាន់មុខតំណែងនៅក្បែរ​ដន្លង​ជា​មេបញ្ជាការ​តែម្តង ។

​លោក​វរសេនីយ៍ឯក ប៉ោ វណ្ណៈ នាយទាហានជាន់ខ្ពស់ នៃ​កងយោធពល​ខេមរភូមិន្ទ ក្រសួងការពារជាតិ អត្តលេខ​០០១១៣១ ទទួលបាន​ការដំឡើង​ឋានន្តរស័ក្តិ​ថ្នាក់​ឧ​ត្ត​ម​សេនីយ៍​ត្រី (​ផ្កាយ​១ ដោយ​ព្រះរាជក្រឹត្យ​លេខ នស​/​រកត​/១២០៨/១៤០៦ ចុះ​ថ្ងៃទី​២៧ ខែធ្នូ ឆ្នាំ​២០០៨ ។

​បន្ទាប់ពី​ទទួលបាន​ការតែងតាំង​មុខតំណែង​ថ្មី​ជា មេបញ្ជាការរង នៃ​បញ្ជាការដ្ឋាន​កងរាជអាវុធហត្ថ​លើ​ផ្ទៃ​ប្រទេស ប្រមាណ​ជិត​០៣​ខែ លោក​ឧ​ត្ត​ម​សេនីយ៍​ត្រី ប៉ោ វណ្ណៈ ក៏​ទទួលបាន​ការដំឡើងឋាន​ន្ត​រ​ស័ក្តិ​ថ្នាក់​ឧ​ត្ត​ម​សេនីយ៍​ទោ (​ផ្កាយ​២) ដោយ​ព្រះរាជក្រឹត្យ​លេខ នស​/​រកត​/១១១៧/១០៣១ ចុះ​ថ្ងៃទី​១៧ ខែវិច្ឆិកា ឆ្នាំ​២០១៧ ។

​រយៈពេល​មិន​ដល់​មួយឆ្នាំ​ក្រោយមកទៀត លោក​ឧ​ត្ត​ម​សេនីយ៍​ទោ ប៉ោ វណ្ណៈ ក៏​ទទួលបាន​ការដំឡើងឋាន​ន្ត​រ​ស័ក្តិ​ថ្នាក់​ឧ​ត្ត​ម​សេនីយ៍​ឯក (​ផ្កាយ​៣) ដោយ​ព្រះរាជក្រឹត្យ​លេខ នស​/​រកត​/០៦១៨/៦០៥ ចុះ​ថ្ងៃទី​០៧ ខែមិថុនា ឆ្នាំ​២០១៨ ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.