ថ្ងៃ សុក្រ ទី ១៩ ខែ សីហា ឆ្នាំ ២០២២

​រឿង​កាត់​ដី​បឹង​ឲ្យ​ឯកឧត្តម​ឧកញ៉ា ! ផ្ទៃដី​បឹង​ជើងឯក​ជាង​១២​ហិកតា​ទៀត ត្រូវបាន​រាជរដ្ឋាភិបាល​​ កាត់ ធ្វើ​អនុ​ប​យោគ និង​ប្រទានកម្ម​ជា​កម្មសិទ្ធិ​ជូន​ឯកឧត្តម​ឧកញ៉ា ឡោក ហ៊ួ​រ និង​ក្រសួងមហាផ្ទៃ​

​ឈានចូល​មកដល់​ដើមឆ្នាំ​២០២២​ភ្លាម រាជរដ្ឋាភិបាល​កម្ពុជា ដែលមាន​សម្តេច​អគ្គមហាសេនាបតី​តេ​ជោ ហ៊ុន សែន ជា​ប្រមុខ បានសម្រេច​កាត់​ផ្ទៃដី​ទំហំ​ជាង​១២​ហិកតា​បន្ថែមទៀត ចេញពី​ផ្ទៃ​បឹង​ជើងឯក ដែលជា​ទ្រព្យសម្បត្តិ​សាធារណៈ​របស់​រដ្ឋ ហើយ​ធ្វើ​អនុ​ប​យោគ​ទៅជា​ទ្រព្យសម្បត្តិ​ឯកជន​របស់​រដ្ឋ និង​ប្រទានកម្ម​ជា​កម្មសិទ្ធិ​ជូន​ឯកឧត្តម​ឧកញ៉ា ឡោក ហ៊ួ​រ (​ទទួលបាន​ចំណែក​ផ្ទៃដី​ទំហំ ១០៦ ៤២៩​ម៉ែត្រក្រឡា​) និង​ជូន​ក្រសួងមហាផ្ទៃ ដែលមាន​សម្តេច​ក្រឡាហោម ស ខេង ឧបនាយករដ្ឋមន្ត្រី និង​ជា​រដ្ឋមន្ត្រី (​ទទួលបាន​ចំណែក​ផ្ទៃដី​ទំហំ ១៨ ១២៦​ម៉ែត្រក្រឡា​) ។

​ផ្ទៃដី​ទំហំ ១៨ ១២៦​ម៉ែត្រក្រឡា ស្ថិតនៅ​ភូមិ​ទួល​រកា​៣ សង្កាត់​ចាក់អង្រែ​ក្រោម ខណ្ឌមានជ័យ រាជធានី​ភ្នំពេញ ត្រូវបាន​រាជរដ្ឋាភិបាល​សម្រេចកា​ត់​ចេញពី​ផ្ទៃ​បឹង​ជើងឯក ហើយ​ធ្វើ​អនុ​ប​យោគ​ពី​ទ្រព្យសម្បត្តិ​សាធារណៈ​របស់​រដ្ឋ ទៅជា​ទ្រព្យសម្បត្តិ​ឯកជន​របស់​រដ្ឋ និង​ផ្តល់ជូន​ក្រសួងមហាផ្ទៃ ដោយ​អនុក្រឹត្យ​លេខ​៤៩ អនក្រ​.​បក ចុះ​ថ្ងៃទី​០៩ ខែមីនា ឆ្នាំ​២០២២ ។ កាលពី​អំឡុង​ចុងឆ្នាំ​២០១៩​កន្លងទៅ ក្រសួងមហាផ្ទៃ​ក៏​ធ្លាប់​ទទួលបាន​ចំណែក​ផ្ទៃដី​បឹង​ជើងឯក ទំហំ ១០​ហិកតា រួចហើយ​ផងដែរ សម្រាប់​សាងសង់​អគ្គស្នងការដ្ឋាន​នគរ​បាល​ជាតិ ទំហំ ៥​ហិកតា​, អគ្គស្នងការដ្ឋាន​អត្តសញ្ញាណ​កម្ម ទំហំ ១​ហិកតា​, សាលា​រដ្ឋបាល​មូលដ្ឋាន ទំហំ ២​ហិកតា និង​មន្ទីរពេទ្យ​នគរបាលជាតិ ទំហំ ២​ហិកតា ដោយ​អនុក្រឹត្យ​លេខ​១៤២​អនក្រ​.​បក ចុះ​ថ្ងៃទី​២០ ខែកញ្ញា ឆ្នាំ​២០១៩ ។

​ផ្ទៃដី​ចំនួន​២​ទីតាំង សរុប​ទំហំ ១០៦ ៤២៩​ម៉ែត្រក្រឡា ស្ថិតនៅ​សង្កាត់​ចាក់អង្រែលើ និង​សង្កាត់​ចាក់អង្រែ​ក្រោម ខណ្ឌមានជ័យ រាជធានី​ភ្នំពេញ ត្រូវបាន​រាជរដ្ឋាភិបាល​សម្រេចកា​ត់​ចេញពី​ផ្ទៃ​បឹង​ជើងឯក ហើយ​ធ្វើ​អនុ​ប​យោគ​ពី​ទ្រព្យសម្បត្តិ​សាធារណៈ​របស់​រដ្ឋ ទៅជា​ទ្រព្យសម្បត្តិ​ឯកជន​របស់​រដ្ឋ និង​ប្រទានកម្ម​ជូន​ឯកឧត្តម​ឧកញ៉ា ឡោក ហ៊ួ​រ ជា​កម្មសិទ្ធិ (​ពន្ធ និង​អាករ​ផ្សេងៗ​ជា​បន្ទុក​របស់​រដ្ឋ​) ដោយ​អនុក្រឹត្យ​លេខ​៥៧​អនក្រ​.​បក ចុះ​ថ្ងៃទី​២៣ ខែមីនា ឆ្នាំ​២០២២ ។

​ឯកឧត្តម​ឧកញ៉ា ឡោក ហ៊ួ​រ បច្ចុប្បន្ន​កាន់តំណែង​ជា​អ្នកតំណាងរាស្ត្រ​មណ្ឌល​ខេត្តបាត់ដំបង មកពី​គណបក្ស​ប្រជាជន​កម្ពុជា (CPP) ។ លោក ឡោក ហ៊ួ​រ ទទួលបាន​ការតែងតាំង​គោរមងារ​ជា ឧកញ៉ា ដោយ​ព្រះរាជក្រឹត្យ​លេខ នស​/​រកត​/១២៩៩/២០៨ ចុះ​ថ្ងៃទី​០៨ ខែធ្នូ ឆ្នាំ​១៩៩៩ ។ ក្រៅពី​មាន​គោរមងារ​ជា​ឧកញ៉ា គឺ​ឧកញ៉ា ឡោក ហ៊ួ​រ ក៏​ជា​នាយ​នគរបាលជាតិ​កម្ពុជា​នៃ​ក្រសួងមហាផ្ទៃ អត្តលេខ​៦៧២២២ ឋានន្តរស័ក្តិ​ថ្នាក់​ឧ​ត្ត​ម​សេនីយ៍​ឯក (​ផ្កាយ​៣) ម្នាក់​ដែរ (​ឡើង​ឋានន្តរស័ក្តិ​ថ្នាក់​ឧ​ត្ត​ម​សេនីយ៍​ឯក ដោយ​ព្រះរាជក្រឹត្យ​លេខ នស​/​រកត​/១២០៩/១២២៦ ចុះ​ថ្ងៃទី​២៥ ខែធ្នូ ឆ្នាំ​២០០៩) ។ ឯកឧត្តម​ឧកញ៉ា ឡោក ហ៊ួ​រ ធ្លាប់មាន​រឿងអាស្រូវ​ពាក់ព័ន្ធ​នឹង​បញ្ហា​ទំនាស់​ដីធ្លី​ជាមួយ​ប្រជាពលរដ្ឋ ជា​ហូរហែ ។

​ផ្ទៃ​បឹង​ជើងឯក និង​ប្រឡាយ ស្ថិតនៅក្នុង​ខណ្ឌមានជ័យ និង​ខណ្ឌដង្កោ រាជធានី​ភ្នំពេញ និង​ស្រុក​តាខ្មៅ (​បច្ចុប្បន្ន​ក្រុង​តាខ្មៅ​) ខេត្តកណ្តាល មាន​ទំហំ​សរុប​ចំនួន ៥២០​ហិកតា ធ្លាប់​ត្រូវបាន​រាជរដ្ឋាភិបាល​កំណត់​ជា​សម្បត្តិ​សាធារណៈ​របស់​រដ្ឋ ដោយ​អនុក្រឹត្យ​លេខ​១២៤​អនក្រ​.​បក ចុះ​ថ្ងៃទី​០៣ ខែកញ្ញា ឆ្នាំ​២០០៨ ។ មកដល់​ដើមឆ្នាំ​២០១២ ត្រូវបាន​រាជរដ្ឋាភិបាល​សម្រេច​កែ​សម្រួល​នី​យាម​កា​មួយចំនួន​នៃ​ផ្ទៃ​បឹង​ជើងឯក និង​ប្រឡាយ រួមមាន​លេខ A៥៨, A៥៩, A៦០ និង A៦១ ទៅជា​និយាម​កា​ថ្មី​តែមួយ​ចំណុច​លេខ A៧៨ វិញ ដោយ​អនុក្រឹត្យ​លេខ​២៦​អនក្រ​.​បក ចុះ​ថ្ងៃទី​១៥ ខែកុម្ភៈ ឆ្នាំ​២០១២ ។

​បន្ទាប់ពី​កំណត់​ជា​ទ្រព្យសម្បត្តិ​សាធារណៈ​របស់​រដ្ឋ​រួចហើយ ផ្ទៃ​បឹង​ជើងឯក និង​ប្រឡាយ ក៏ត្រូវ​បាន​រាជរដ្ឋាភិបាល​សម្រេចកា​ត់​ចេញ​ជា​ហូរហែ ធ្វើ​អនុ​ប​យោគ​ពី​ទ្រព្យសម្បត្តិ​សាធារណៈ​របស់​រដ្ឋ ទៅជា​ទ្រព្យសម្បត្តិ​ឯកជន​របស់​រដ្ឋ និង​ប្រទានកម្ម​ជូនទៅ​ស្ថាប័នរដ្ឋ ក្រុមហ៊ុន ឈ្មួញ​ជា​អ្នកឧកញ៉ា​-​ឧកញ៉ា និង​មន្ត្រី​មានបុណ្យ​ស័ក្តិ​គ្រាក់ៗ​ជា​កម្មសិទ្ធិ តរៀងមក ជាអាទិ៍ ៖

១-​ក្រុមហ៊ុន អ័​រ​គី​ដេ វីឡា ៤ ឯ​.​ក (Orkide Villa) ដែល​គេ​ស្គាល់​ថា​ជា​ក្រុមហ៊ុន​ឯកជន​របស់​លោកស្រី ហ៊ុន ម៉ា​ណា កូនបង្កើត​របស់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ទទួលបាន​ចំណែក​ផ្ទៃដី​ទំហំ ៣៧៤ ៦៧៨​ម៉ែត្រក្រឡា ស្ថិតនៅ​ភូមិ​ខ្វា ភូមិ​ម័ល និង​ភូមិ​សំបួរ សង្កាត់​ដង្កោ ខណ្ឌដង្កោ រាជធានី​ភ្នំពេញ ដោយ​អនុក្រឹត្យ​លេខ​១២​អនក្រ​.​បក ចុះ​ថ្ងៃទី​០៧ ខែកុម្ភៈ ឆ្នាំ​២០១៨ ។​

២-​ឧកញ៉ា ខូវ គឹម​បាក់ ទទួលបាន​ចំណែក​ផ្ទៃដី​ទំហំ ១០០ ៧៥៦​ម៉ែត្រក្រឡា ក្នុងនោះ​ផ្ទៃដី​ទំហំ ៩៨ ៤៩៨​ម៉ែត្រក្រឡា ស្ថិតនៅ​ភូមិ​ខ្វា ភូមិ​ម័ល និង​ភូមិ​សំបួរ សង្កាត់​ដង្កោ ខណ្ឌដង្កោ រាជធានី​ភ្នំពេញ ដោយ​អនុក្រឹត្យ​លេខ​១២​អនក្រ​.​បក ចុះ​ថ្ងៃទី​០៧ ខែកុម្ភៈ ឆ្នាំ​២០១៨ និង​ផ្ទៃដី​ទំហំ ២ ២៥៨​ម៉ែត្រក្រឡា ដោយ​អនុក្រឹត្យ​លេខ​១៤២​អនក្រ​.​បក ចុះ​ថ្ងៃទី​២០ ខែកញ្ញា ឆ្នាំ​២០១៩ ។ លោក ខូវ គឹម​បាក់ ជា​ឈ្មួញ​រកស៊ី​ដ៏​សកម្ម​ម្នាក់​ដែល​គាំទ្រ​គណបក្ស​ប្រជាជន​កម្ពុជា ហើយ​ត្រូវបានតែងតាំង​គោរមងារ​ជា​ឧកញ៉ា ដោយ​ព្រះរាជក្រឹត្យ​លេខ ជ​ស​/​រកត​/០៧៩៩/០៨ ចុះ​ថ្ងៃទី​០៥ ខែកក្កដា ឆ្នាំ​១៩៩៩ ។

៣-​ក្រុមហ៊ុន ING Holding Co.,Ltd. ដែល​គេ​ស្គាល់​ថា​ជា​ក្រុមហ៊ុន​របស់​ឧកញ៉ា អ៊ឹង ប៊ុន​ហ៊ូ​វ​, ឧកញ៉ា លឹម រស់ និង​ឧកញ៉ា លឹម ប៊ុន​សួរ ទទួលបាន​ចំណែក​ផ្ទៃដី​ទំហំ ១៩០​ហិកតា ដោយ​អនុក្រឹត្យ​លេខ​១៤៨​អនក្រ​.​បក ចុះ​ថ្ងៃទី​០១ ខែវិច្ឆិកា ឆ្នាំ​២០១៨ ។

៤-​ក្រសួងមហាផ្ទៃ ទទួលបាន​ចំណែក​ផ្ទៃដី​ទំហំ ១០​ហិកតា ដោយ​អនុក្រឹត្យ​លេខ​១៤២​អនក្រ​.​បក ចុះ​ថ្ងៃទី​២០ ខែកញ្ញា ឆ្នាំ​២០១៩ ។

៥-​ក្រសួង​រៀបចំ​ដែនដី នគរូបនីយកម្ម និង​សំណង់ ទទួលបាន​ចំណែក​ផ្ទៃដី​ទំហំ ៣២ ១២៣​មែត្រ​ក្រឡា ដោយ​អនុក្រឹត្យ​លេខ​១៤២​អនក្រ​.​បក ចុះ​ថ្ងៃទី​២០ ខែកញ្ញា ឆ្នាំ​២០១៩ ។​

៦-​អ្នកឧកញ៉ា ភាព ហៀក ដែល​គេ​ស្គាល់​ថា​ជា​ប្រធាន​ក្រុមប្រឹក្សាភិបាល​ក្រុមហ៊ុន ជីបម៉ុង គ្រុប ទទួលបាន​ចំណែក​ផ្ទៃដី​ទំហំ ១២ ៤២៦​មែត្រ​ក្រឡា ដោយ​អនុក្រឹត្យ​លេខ​១៤២​អនក្រ​.​បក ចុះ​ថ្ងៃទី​២០ ខែកញ្ញា ឆ្នាំ​២០១៩ ។ លោកស្រី ភាព ហៀក គឺជា​ឈ្មួញ​រកស៊ី​ដ៏​សកម្ម​លេចធ្លោ​នាពេល​បច្ចុប្បន្ននេះ ធ្លាប់​ទទួលបាន​ការតែងតាំង​គោរមងារ​ជា ឧកញ៉ា ដោយ​ព្រះរាជក្រឹត្យ​លេខ នស​/​រកត​/១០០៧/៥១១ ចុះ​ថ្ងៃទី​១២ ខែតុលា ឆ្នាំ​២០០៧ និង​ក្រោយមក ទទួលបាន​ការផ្តល់​គោរមងារ​ជា អ្នកឧកញ៉ា ដោយ​ព្រះរាជក្រឹត្យ​លេខ​នស​/​រកត​/០៩២០/៩៤៦ ចុះ​ថ្ងៃទី​០៣ ខែកញ្ញា ឆ្នាំ​២០២០ ។

៧-​ឧកញ៉ា លី ប៉ោ​យូ អគ្គនាយក​កាស៊ីណូ​ពិភពថ្មី ទទួលបាន​ចំណែក​ផ្ទៃដី​ទំហំ ៣៨ ៨៥៦​ម៉ែត្រក្រឡា ដោយ​អនុក្រឹត្យ​លេខ​១៤២​អនក្រ​.​បក ចុះ​ថ្ងៃទី​២០ ខែកញ្ញា ឆ្នាំ​២០១៩ ។ លោក លី ប៉ោ​យូ ទទួលបាន​ការតែងតាំង​គោរមងារ​ជា ឧកញ៉ា ដោយ​ព្រះរាជក្រឹត្យ​លេខ នស​/​រកត​/០៨០៦/៣៥៧ ចុះ​ថ្ងៃទី​២១ ខែសីហា ឆ្នាំ​២០០៦ ។​

៨-​លោក ឃុន ទី ទទួលបាន​ចំណែក​ផ្ទៃដី​ទំហំ ២ ៥២៨​ម៉ែត្រក្រឡា ដោយ​អនុក្រឹត្យ​លេខ​១៤២​អនក្រ​.​បក ចុះ​ថ្ងៃទី​២០ ខែកញ្ញា ឆ្នាំ​២០១៩ ។

៩-​លោកជំទាវ លាង វួ​ច​ឆេង ភរិយា​របស់​សព​សម្តេច​ឧ​ត្ត​ម​ទេព​ញាណ ហ៊ុន ណេង បងប្រុស​បង្កើត​សម្តេច​អគ្គមហាសេនាបតី​តេ​ជោ ហ៊ុន សែន ទទួលបាន​ចំណែក​ផ្ទៃដី​ទំហំ ៣៩ ៥៧០​ម៉ែត្រក្រឡា ដោយ​អនុក្រឹត្យ​លេខ​១៤២​អនក្រ​.​បក ចុះ​ថ្ងៃទី​២០ ខែកញ្ញា ឆ្នាំ​២០១៩ ។

១០-​ឧកញ៉ា អ៊ឹង ស៊ីស្រ៊ន ទទួលបាន​ចំណែក​ផ្ទៃដី​ទំហំ ៦៥ ៧២០​ម៉ែត្រក្រឡា ដោយ​អនុក្រឹត្យ​លេខ​១៤២​អនក្រ​.​បក ចុះ​ថ្ងៃទី​២០ ខែកញ្ញា ឆ្នាំ​២០១៩ ។ លោកជំទាវ អ៊ឹង ស៊ីស្រ៊ន ទទួលបាន​ការតែងតាំង​គោរមងារ​ជា ឧកញ៉ា ដោយ​ព្រះរាជក្រឹត្យ​លេខ នស​/​រកត​/១០០៧/៥១០ ចុះ​ថ្ងៃទី​១២ ខែតុលា ឆ្នាំ​២០០៧ ។​

១១-​អ្នកឧកញ៉ា លាង ឃុន អគ្គនាយក​ក្រុមហ៊ុន ជីបម៉ុង គ្រុប​, សហ​ស្ថាបនិក និង ជា​ប្រធាន​ក្រុមប្រឹក្សាភិបាល​ក្រុមហ៊ុន Khmer Beverages ដែលជា​ក្រុមហ៊ុនផលិតស្រាបៀរ​កម្ពុ​ជា​, ភេសជ្ជៈ​ប៉ូវ​កម្លាំង Wurkz, ទឹកបរិសុទ្ធ​កម្ពុជា​, ទឹកក្រូច Ize… និង​ឧកញ៉ា ថៃ ជា​ហួត ប្រធាន​ក្រុមប្រឹក្សាភិបាល​ក្រុមហ៊ុន ប៉េង ហួត គ្រុប និង​ជា​អគ្គនាយក​ក្រុមហ៊ុន​បុរី ប៉េង ហួត ទទួលបាន​ចំណែក​ផ្ទៃដី​សរុប​រួមគ្នា​ទំហំ ១ ៩០៤ ២១១​ម៉ែត្រក្រឡា ស្ថិតនៅ​សង្កាត់​ជើងឯក និង​សង្កាត់​ដង្កោ ខណ្ឌដង្កោ និង​សង្កាត់​ចាក់អង្រែ​ក្រោម ខណ្ឌមានជ័យ រាជធានី​ភ្នំពេញ ដោយ​អនុក្រឹត្យ​លេខ​១៥៩​អនក្រ​.​បក ចុះ​ថ្ងៃទី​៣១ ខែតុលា ឆ្នាំ​២០១៩ ។ លោក លាង ឃុន ធ្លាប់​ទទួលបាន​ការតែងតាំង​គោរមងារ​ជា ឧកញ៉ា ដោយ​ព្រះរាជក្រឹត្យ​លេខ នស​/​រកត​/១០០៦/៤០៤ ចុះ​ថ្ងៃទី​០៥ ខែតុលា ឆ្នាំ​២០០៦ និង​ក្រោយមក​ក៏​ទទួលបាន​ការផ្តល់​គោរមងារ​ជា អ្នកឧកញ៉ា ដោយ​ព្រះរាជក្រឹត្យ​លេខ នស​/​រកត​/០៩២០/៩៤៧ ចុះ​ថ្ងៃទី​០៣ ខែកញ្ញា ឆ្នាំ​២០២០ ។ លោក ថៃ ជា​ហួត ទទួលបាន​ការតែងតាំង​គោរមងារ​ជា ឧកញ៉ា ដោយ​ព្រះរាជក្រឹត្យ​លេខ នស​/​រកត​/០៥០៨/៥០២ ចុះ​ថ្ងៃទី​០៩ ខែឧសភា ឆ្នាំ​២០០៨ ។​

​សរុបសេចក្តី​មក គិត​ត្រឹម​ថ្ងៃទី​២៣ ខែមីនា ឆ្នាំ​២០២២ គឺ​ផ្ទៃ​បឹង​ជើងឯក មាន​ទំហំ​សរុប​ចំនួន ៥២០​ហិកតា ដែលជា​ទ្រព្យសម្បត្តិ​សាធារណៈ​របស់​រដ្ឋ​នោះ ត្រូវបាន​រាជរដ្ឋាភិបាល​កាត់ចេញ ធ្វើ​អនុ​ប​យោ​គជា​ទ្រព្យសម្បត្តិ​ឯកជន​របស់​រដ្ឋ និង​ប្រទានកម្ម​ជា​កម្មសិទ្ធិ​ជូនទៅ​ស្ថាប័នរដ្ឋ​មួយចំនួន ក្រុមហ៊ុន ឈ្មួញ​ជា​អ្នកឧកញ៉ា​-​ឧកញ៉ា និង​មន្ត្រី​មានអំណាច​គ្រាក់ៗ​អស់​ចំនួន​យ៉ាងតិច ៤ ៧០១ ៩៤២​ម៉ែត្រក្រឡា (​ប្រមាណ​ជាង​៤៧០​ហិកតា​) បាត់ទៅហើយ ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.