ថ្ងៃ សុក្រ ទី ១៩ ខែ សីហា ឆ្នាំ ២០២២

​ដង្ហែ​គាំទ្រ​បាន​ផល​ឡើង​កូដ ! «​អាចារ្យ​អេ » ទទួលបាន​ការតែងតាំង​ជាទី​ប្រឹក្សា​ផ្ទាល់​នាយករដ្ឋមន្ត្រី មាន​ឋានៈ​ស្មើ​រដ្ឋលេខាធិការ

​កាលពី​ថ្ងៃទី​២២ ខែកក្កដា ឆ្នាំ​២០២២​ម្សិលមិញ​នេះ ព្រះករុណា​ព្រះបាទ​សម្តេច​ព្រះបរមនាថ នរោត្តម សីហមុនី ព្រះមហាក្សត្រ​នៃ​ព្រះរាជាណាចក្រ​កម្ពុជា ទ្រង់​បាន​ឡាយព្រះហស្តលេខា​នៅលើ​ព្រះរាជក្រឹត្យ​លេខ នស​/​រកត​/០៧២២/៨៣០ ត្រាស់បង្គាប់​តែងតាំង និង​ផ្តល់​ឋានៈ​លោក សេង ប៊ុន​វេ​ង ជាទី​ប្រឹក្សា​ផ្ទាល់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា មាន​ឋានៈ​ស្មើ​រដ្ឋលេខាធិការ ដោយ​ពុំ​ទទួល​ប្រាក់​បំណាច់​មុខងារ តាម​សេចក្តីក្រាបបង្គំទូលថ្វាយ​របស់​សម្តេច​អគ្គមហាសេនាបតី​តេ​ជោ ហ៊ុន សែន ។

​លោក សេង ប៊ុន​វេ​ង ហៅ «​អាចារ្យ​អេ​» ត្រូវបាន​គេ​ស្គាល់​ថា ជា​អគ្គនាយក​វិទ្យុ អេ​ប៊ី​ស៊ី កម្ពុជា ១០៧.៥​មេ​ហ្គា​ហឺត ដែល​ផ្សព្វផ្សាយ​ព័ត៌មាន​លំអៀង​ទៅរក​និន្នាការ​គណបក្ស​ប្រជាជន​កម្ពុជា (CPP) ជា​គណបក្សនយោបាយ​កាន់កាប់​អំណាច​នៅ​កម្ពុជា ។

«​អាចារ្យ​អេ​» ធ្លាប់​ត្រូវបាន​លោក ហូរ វ៉ាន់ តំណាង​ឲ្យ​អតីត​គណបក្ស​សង្គ្រោះ​ជាតិ (CNRP) ដាក់ពាក្យ​បណ្តឹង​ទៅកាន់​អយ្យការ​អម​សាលាដំបូង​រាជធានី​ភ្នំពេញ​កាលពី​អំឡុង​ខែកក្កដា ឆ្នាំ​២០១៣ ដោយ​ប្តឹង​ចោទប្រកាន់​ពីបទ​ញុះញង់​ឲ្យ​ប្រព្រឹត្ត​បទឧក្រិដ្ឋ លើ​មេដឹកនាំ និង​អ្នកគាំទ្រ​គណបក្ស​សង្គ្រោះ​ជាតិ ប្រព្រឹត្ត​នៅ​រាជធានី​ភ្នំពេញ កាលពី​ថ្ងៃទី​២៣ ខែកក្កដា ឆ្នាំ​២០១៣ ។

​ទោះយ៉ាងណា​ក៏ដោយ ពាក្យបណ្តឹង​របស់​អតីត​គណបក្ស​សង្គ្រោះ​ជាតិ​នោះ មិនអាច​ចាត់ការ​ទៅលើ​លោក សេង ប៊ុន​វេ​ង ហៅ «​អាចារ្យ​អេ​» បានឡើយ ហើយ​រឹតតែ​ធ្វើ​ឲ្យ «​អាចារ្យ​អេ​» បាន​ឱកាស «​ឡើង​កូដ​» ថែមទៀត ក្រោម​ការ​បីបាច់​ជ្រោមជ្រែង​ដោយ​គណបក្ស​ប្រជាជន​កម្ពុជា ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.