ថ្ងៃ សុក្រ ទី ១៩ ខែ សីហា ឆ្នាំ ២០២២

​ល្បិច​ឃាតក ! កាំភ្លើង​កែច្នៃ ក្លាយជា​អាវុធ​ធ្វើឃាត​អតីត​នាយករដ្ឋមន្ត្រី​ជប៉ុន​

​បុរស​ខ្មាន់កាំភ្លើង​ដៃ​ឆៅ​ដែលជា​ជនសង្ស័យ​ក្នុង​អំពើ​បាញ់ប្រហារ​ទៅលើ​លោក Shinzo Abe អតីត​នាយករដ្ឋមន្ត្រី​ជប៉ុន នៅពេល​លោក​ថ្លែង​សុន្ទរកថា​ក្នុង​យុទ្ធនាការ​ឃោសនាបោះឆ្នោត​សភា​ជាន់ខ្ពស់​ជប៉ុន​នៅ​ទីក្រុង Nara ភាគ​ខាងលិច​ប្រទេស​ជប៉ុន រហូតដល់​បណ្តាល​ឲ្យ​ទទួលមរណភាព​ក្រោយពេល​បញ្ជូន​ទៅដល់​មន្ទី​រ​ពេទ្យ​កាលពី​ថ្ងៃទី​០៨ ខែកក្កដា ឆ្នាំ​២០២២ ត្រូវបាន​សមត្ថកិច្ច​ប៉ូលិស​ចាប់ខ្លួន​ភ្លាមៗ​នៅ​កន្លែងកើតហេតុ គឺមាន​ឈ្មោះ Yamagami Tetsuya អាយុ​៤១​ឆ្នាំ ជា​អតីត​សមាជិក​កង​ម្លាំ​ង​ស្វ័យការពារ​ជប៉ុន និង​បច្ចុប្បន្ន​គ្មាន​ការងារ​ធ្វើ ។​

​ទីភ្នាក់ងារសារព័ត៌មាន Reuters ដែល​ដកស្រង់​ពី​ប្រភព​របស់​ប៉ូលិស​បាន​ផ្សព្វផ្សាយ​នៅ​ថ្ងៃទី​០៩ ខែកក្កដា ឆ្នាំ​២០២២​ឲ្យ​ដឹងថា ជនសង្ស័យ​បាន​សារភាព​ប្រាប់​ប៉ូលិស​ថា ខ្លួន​មាន​កំហឹង និង​មានគំនិត​តាម​ប៉ង​សម្លាប់​លោក Shinzo Abe ដោយសារតែ​លោក Shinzo Abe មាន​ទំនាក់ទំនង និង​ជ្រោមជ្រែង​ដល់​អង្គការ​សាសនា​មួយ ដែល​នាំ​ឲ្យ​ម្តាយ​របស់ខ្លួន​ត្រូវបាន​ហ៊ុំព័ទ្ធ​សេដ្ឋកិច្ច​ឈានទៅ​ក្ស័យធន ។ ប៉ុន្តែ ទោះយ៉ាងណា​ប៉ូលិស​មិនបាន​បង្ហើប​ប្រាប់​ឲ្យ​ដឹង​អំពី​ឈ្មោះ​របស់​អង្គការ​សាសនា​នោះឡើយ ។

​អាវុធ​ដែល​ជនសង្ស័យ​ជា​ឃាតក​ឈ្មោះ Yamagami Tetsuya យកមកប្រើ​ប្រាស់​ជា​មធ្យោបាយ​ធ្វើឃាត​លោក Shinzo Abe (​បាញ់ប្រហារ​ចំនួន​២​គ្រាប់​ពី​ខាងក្រោយ​លោក Shinzo Abe គឺ​១​គ្រាប់​ចំ​បេះដូង និង​១​គ្រាប់​ទៀត​ចំក​) គឺជា​កាំភ្លើង​កែច្នៃ​ដោយ​ជនសង្ស័យ​ផ្ទាល់​តែម្តង ។ កាំភ្លើង​កែច្នៃ​នោះ​មាន​ប្រវែង​ប្រមាណ​៤០​សង់ទីម៉ែត្រ និង​ទទឹង​ប្រមាណ​២០​សង់ទីម៉ែត្រ រុំ​ព័ទ្ធ​ដោយ​ស្កុ​ត​សឹងតែ​ពេញ​តួ​កាំភ្លើង ។

​ដូច​តាម​ចម្លើយសារភាពរ​បស់ជនស​ង្ស័​យ​ជា​ឃាតក គឺមាន​កាំភ្លើង​កែច្នៃ​ជាច្រើន​ដើម​ត្រូវបាន​សមត្ថកិច្ច​ប៉ូលិស​ឆែកឆេរ​រកឃើញ​នៅ​លំនៅឋាន​របស់​ជនសង្ស័យ ។ គ្រាប់កាំភ្លើង ត្រូវបាន​ជនសង្ស័យ​ទំនាក់ទំនង​ទិញ​តាមរយៈ Online ។

​បណ្តា​ប្រិយមិត្ត​បណ្តាញ​ព័ត៌មាន​សង្គម Facebook បាននាំគ្នា​បញ្ចេញមតិ​យោបល់​ថា កាំភ្លើង​ជា​មធ្យោបាយ​ធ្វើឃាត​លោក Shinzo Abe នោះ ត្រូវបាន​ជនសង្ស័យ​ជា​ឃាតក​កែច្នៃ​របៀប​បន្លំ​ជាមួយនឹង​រូបរាង​កាមេរ៉ា (Camera) របស់​អ្នកសារព័ត៌មាន ដើម្បី​ឲ្យ​ខ្លួន (​ជនសង្ស័យ​) មានឱកាស​បាន​ទៅជិត​មុខសញ្ញា គឺ​លោក Shinzo Abe ដែល​ខ្លួន (​ជនសង្ស័យ​) ប៉ង​តាម​សម្លាប់ ងាយស្រួល​ក្នុង​ការធ្វើសកម្មភាព​វាយប្រហារ ។​

​លោក Shinzo Abe កើត​នៅ​ថ្ងៃទី​២១ ខែកញ្ញា ឆ្នាំ​១៩៥៤ ជា​អ្នកនយោបាយ​មកពី​គណបក្ស​ប្រជាធិបតេយ្យ​សេរី ធ្លាប់បាន​កាន់​មុខតំណែង​ជា​នាយករដ្ឋមន្ត្រី​ជប៉ុន​ចំនួន​ពីរលើក គឺ​លើក​ទី​១ ពីថ្ងៃ​ទី​២៦ ខែកញ្ញា ឆ្នាំ​២០០៦ ដល់​ថ្ងៃទី​២៦ ខែកញ្ញា ឆ្នាំ​២០០៧ និង​លើក​ទី​២ ចាប់ពី​ថ្ងៃទី​២៦ ខែធ្នូ ឆ្នាំ​២០១២ ដល់​ថ្ងៃទី​១៦ ខែកញ្ញា ឆ្នាំ​២០២០ ។ លោក ទទួលមរណភាព​ក្នុង​ជន្មាយុ​៦៧​ឆ្នាំ ដោយ​ការធ្វើឃាត​នា​ថ្ងៃទី​០៨ ខែកក្កដា ឆ្នាំ​២០២២ ៕​

Filed in: Feature, អន្តរជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.