ថ្ងៃ អាទិត្យ ទី ១៤ ខែ សីហា ឆ្នាំ ២០២២

​សំឡេង​កាប់​ឈើ​កក្រើក​ព្រៃ​ស្វាគមន៍​អភិបាល​ក្រុមហ៊ុន​ថ្មី ? សកម្មភាព​កាប់​ឈើ​កក្រើក​ព្រៃ​លើដី​សម្បទាន​សេដ្ឋកិច្ច​របស់​ក្រុមហ៊ុន PNT នៅ​ខេត្តព្រះវិហារ​

​កាលពី​ថ្ងៃទី​២៤ ខែមិថុនា ឆ្នាំ​២០២២​កន្លងទៅ​ថ្មីៗ​នេះ លោក​មេធាវី ស៊ុន លៀង​ហេង សមាជិក​គណៈមេធាវី​នៃ​ព្រះរាជាណាចក្រ​កម្ពុជា (BAKC) អត្តលេខ​១៩៩៣ ប្រធានការិយាល័យ​មេធាវី ដឹ ខ័​រ (The CORE Law Office) ជា​មេធាវី​តំណាង​ដោយ​អាណត្តិ​ឲ្យ​លោក Tseng Kuo-Chan ប្រធាន​ក្រុមប្រឹក្សាភិបាល និង​អភិបាល​ក្រុមហ៊ុន PNT Co.,Ltd. បានចេញ​លិខិត​ជូនដំណឹង​មួយ​ធ្វើការ​កោះអញ្ជើញ​លោក សយ សុផល នាយក​ក្រុមហ៊ុន ម៉ា​យឃ​ល ឡូ​ជី​ស្ទីក (​ខេ​ម​បូ​ឌា​) ឲ្យ​មក​ចូលរួម​ដោះស្រាយ​ករណី​ការកាប់​ឆ្ការ និង​ការប្រមូល​ផល​-​អនុផល​ព្រៃឈើ​លើដី​សម្បទាន​សេដ្ឋកិច្ច​របស់​ក្រុមហ៊ុន PNT Co.,Ltd. នៅ​ថ្ងៃទី​០៧ ខែកក្កដា ឆ្នាំ​២០២២​ខាងមុខនេះ ។

​លិខិត​ជូនដំណឹង​ចុះ​ថ្ងៃទី​២៤ ខែមិថុនា ឆ្នាំ​២០២២​របស់លោក​មេធាវី ស៊ុន លៀង​ហេង ក្នុងនាម​ជា​មេធាវី​តំណាង​ឲ្យ​ក្រុមហ៊ុន PNT Co.,Ltd. ក៏បាន​ស្នើ​ឲ្យ​លោកនាយក​ក្រុមហ៊ុន ម៉ា​យឃ​ល ឡូ​ជី​ស្ទីក (​ខេ​ម​បូ​ឌា​) បញ្ឈប់​សកម្មភាព​កាប់បំផ្លាញ និង​សកម្មភាព​ប្រមូល​ផល​-​អនុផល​ព្រៃឈើ​លើដី​សម្បទាន​សេដ្ឋកិច្ច​របស់​ក្រុមហ៊ុន PNT Co.,Ltd. ស្ថិតនៅ​ឃុំ​រៀបរយ ស្រុក​រវៀង ខេត្តព្រះវិហារ (​តំបន់​ព្រៃ​ឡង់​) ផងដែរ ។

​ក្រុមហ៊ុន PNT Co.,Ltd. ទទួលបាន​សិទ្ធិ​គ្រប់គ្រង និង​អភិវឌ្ឍន៍​ដី​សម្បទាន​សេដ្ឋកិច្ច​ពី​រាជរដ្ឋាភិបាល​កម្ពុជា ទំហំ ៧ ២០០​ហិកតា ស្ថិតនៅ​ឃុំ​រៀបរយ ស្រុក​រវៀង ខេត្តព្រះវិហារ ហើយ​ក្រុមហ៊ុន PNT Co.,Ltd. នេះ​ក៏បាន​ប្រគល់​សិទ្ធិ​ឲ្យ​ទៅ​ក្រុមហ៊ុន ម៉ា​យឃ​ល ឡូ​ជី​ស្ទីក (​ខេ​ម​បូ​ឌា​) ដែលមាន​លោក សយ សុផល ជា​នាយក​ក្រុមហ៊ុន ធ្វើការ​ប្រមូល​ផល​-​អនុផល​ព្រៃឈើ​លើដី​សម្បទាន​សេដ្ឋកិច្ច​របស់​ក្រុមហ៊ុន PNT Co.,Ltd. តាម​លិខិត​ប្រគល់​សិទ្ធិ ចុះ​ថ្ងៃទី​០១ ខែធ្នូ ឆ្នាំ​២០១៧ និង​កិច្ចសន្យា ចុះ​ថ្ងៃទី​២៧ ខែឧសភា ឆ្នាំ​២០១៩ ។

​ចាប់តាំងពី​ទទួលបាន​សិទ្ធិ​គ្រប់គ្រង និង​អភិវឌ្ឍន៍​ដី​សម្បទាន​សេដ្ឋកិច្ច​ជិត​១​ម៉ឺន​ហិកតា​ពី​រាជរដ្ឋាភិបាល​កម្ពុជា​នៅ​ស្រុក​រវៀង ខេត្តព្រះវិហារ​មក ត្រូវបាន​ក្រុម​សហគមន៍​ព្រៃ​ឡង់​រាយការណ៍​ឲ្យ​ដឹងថា មាន​សកម្មភាព​កាប់​ឈើ​ឡើង​កក្រើក​ព្រៃ​លើដី​សម្បទាន​សេដ្ឋកិច្ច និង​ដឹកជញ្ជូន​ឈើ​ចូល​តំបន់​ដី​សម្បទាន​សេដ្ឋកិច្ច​របស់​ក្រុមហ៊ុន PNT Co.,Ltd. ដោយ​ប្រភពព័ត៌មាន​ខ្លះ​បាន​បង្ហើប​ឲ្យ​ដឹងថា មានការ​ពាក់ព័ន្ធ​នឹង​ឧកញ៉ា ឡេង ឫទ្ធី ទៀតផង ។

​គិត​ត្រឹម​ថ្ងៃទី​០៤ ខែកក្កដា ឆ្នាំ​២០២២​នេះ គេហទំព័រ​សារព័ត៌មាន ដើមត្នោត មិនទាន់​អាចធ្វើ​ការទំនាក់ទំនង​សុំ​ការបំភ្លឺ​បញ្ជាក់​ពី​ឧកញ៉ា ឡេង ឫទ្ធី ពាក់ព័ន្ធ​នឹង​សកម្មភាព​កាប់​ឈើ​លើដី​សម្បទាន​សេដ្ឋកិច្ច​របស់​ក្រុមហ៊ុន PNT Co.,Ltd. ឬ​ទំនាក់ទំនង​រវាង​ក្រុមហ៊ុន PNT Co.,Ltd. និង​ឧកញ៉ា ឡេង ឫទ្ធី យ៉ាងណាៗ​នោះ​នៅឡើយ​ទេ ។

​ក្រុមហ៊ុន PNT Co.,Ltd. គឺជា​ក្រុមហ៊ុន​ឯកជន​ទទួលខុស​ត្រូវមាន​កម្រិត ចុះបញ្ជី​បើក​ដំណើរការ​នៅ​កម្ពុ​ជានា​ថ្ងៃទី​២៩ ខែឧសភា ឆ្នាំ​២០០៨ និង​ត្រូវបាន​គ្រប់គ្រង​ដោយ​លោក Phan Huu Nam ជនជាតិ​វៀតណាម ជា​អភិបាល​ក្រុមហ៊ុន​រហូតដល់​អំឡុង​ឆ្នាំ​២០១៩ ។ បច្ចុប្បន្ន ក្រុមហ៊ុន PNT Co.,Ltd. ត្រូវបាន​គ្រប់គ្រង​ដោយ​លោក Tseng Kuo-Chan ជា​ប្រធាន​ក្រុមប្រឹក្សាភិបាល និង​ជា​អភិបាល​ក្រុមហ៊ុន ដូច​មានការ​ឯកភាព​ទទួលស្គាល់​តាម​ស្មារតី​លិខិត​លេខ​៥៧៣១ កសក ចុះ​ថ្ងៃទី​១៧ ខែមិថុនា ឆ្នាំ​២០២២​របស់​ក្រសួងកសិកម្ម រុក្ខាប្រមាញ់ និង​នេសាទ ។

​មជ្ឈដ្ឋាន​សហគមន៍​ការពារ​ព្រៃឈើ​នៅ​តំបន់​ព្រៃ​ឡង់ បាន និង​កំពុង​រង់ចាំ​មើល​នូវ​លទ្ធផល​នៃ​ជំនួប​រវាង​មេធាវី​តំណាង​ក្រុមហ៊ុន PNT Co.,Ltd. និង​លោកនាយក​ក្រុមហ៊ុន ម៉ា​យឃ​ល ឡូ​ជី​ស្ទីក (​ខេ​ម​បូ​ឌា​) នៅ​ថ្ងៃទី​០៧ ខែកក្កដា ឆ្នាំ​២០២២​ខាងមុខនេះ តើ​នឹង​អាច​ដោះស្រាយ​ឈានទៅ​បញ្ឈប់​សកម្មភាព​កាប់​ឈើ​ពាក់ព័ន្ធ​នឹង​ដី​សម្បទាន​សេដ្ឋកិច្ច​របស់​ក្រុមហ៊ុន PNT Co.,Ltd. បានដែរ​ឬទេ ឬ​គ្រាន់តែ​ជា «​ល្បិច​ឆ្លើយ​ដាក់គ្នា​» ប៉ុណ្ណោះ ? ៕

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.