ថ្ងៃ អាទិត្យ ទី ១៤ ខែ សីហា ឆ្នាំ ២០២២

​ប្រសិទ្ធ​ភាពខ្លាំង និង​រហ័ស ! ត្រឹម​រយៈពេល​០៣​ថ្ងៃ មាន​ស្ថាប័ន​មនុស្សធម៌ និង​សប្បុរសជន​បរិច្ចាគ​ថវិកា​១៣,៥​លាន​ដុល្លារ​ជូន​រាជរដ្ឋាភិបាល ដើម្បី​បំបាត់​គ្រាប់មីន​នៅ​កម្ពុជា តាម​ការអំពាវនាវរ​បស់​នាយករដ្ឋមន្ត្រី​

​ក្រោយ​ការអំពាវនាវ​របស់​ស​ម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ឲ្យ​សប្បុរសជន​ចូលរួម​បំពាត់​គ្រាប់មីន​នៅ​កម្ពុជា កាលពី​ថ្ងៃទី​០១ ខែកក្កដា ឆ្នាំ​២០២២ នៅ​ខេត្តបន្ទាយមានជ័យ ក្នុង​ពិធី​លែង​កូន​ត្រី អបអរសាទរ​ទិវា​ម​ច្ចា​ជាតិ កន្លងទៅ​ថ្មីៗ​រួចមក គឺ​ចាប់តាំងពី​វេលា​រសៀល​នា​ថ្ងៃ​ដដែល មាន​ស្ថាប័ន​មនុស្សធម៌ និង​សប្បុរសជន​បរិច្ចាគ​ថវិកា​ជូន​រាជរដ្ឋាភិបាល​កម្ពុជា​ក្នុង​សកម្មភាព​បោសសម្អាត​មីន និង​គ្រាប់​យុទ្ធភណ្ឌ​មិនទាន់​ផ្ទុះ​ផ្សេងទៀត​នៅ​កម្ពុជា ជា​ហូរហែ ។​

​គិត​ត្រឹម​ថ្ងៃទី​០៣ ខែកក្កដា ឆ្នាំ​២០២២​ម្សិលមិញ​នេះ យ៉ាងហោចណាស់​មាន​ស្ថាប័ន​មនុស្សធម៌ និង​សប្បុរសជន​បាន​បរិច្ចាគ​ថវិកា​ចំនួន ១៣ ៥០០ ០០០​ដុល្លារ​អាមេរិក ជូន​រាជរដ្ឋាភិបាល​កម្ពុជា​រួចហើយ ដើម្បី​ចូលរួម​សកម្មភាព​លុបបំបាត់​គ្រាប់មីន និង​គ្រាប់​យុទ្ធភណ្ឌ​មិនទាន់​ផ្ទុះ​ផ្សេងទៀត​នៅ​កម្ពុជា ។ កាលពី​ថ្ងៃទី​០៣ ខែកក្កដា ឆ្នាំ​២០២២​នេះដែរ សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ក៏បាន​សម្រេច​បង្កើត​នូវ​មូលនិធិ​មួយ​ឈ្មោះថា «​មូលនិធិ​សម្តេច​តេ​ជោ​សម្រាប់​សកម្មភាព​មីន (​ម​.​ស​.​ស​.) – Samdech Techo Fund for Mine Action (STF-MA)» ។

​ក្នុងចំណោម​ស្ថាប័ន​មនុស្សធម៌ និង​សប្បុរសជន​ដែល​បាន​បរិច្ចាគ​ថវិកា​ជូន​រាជរដ្ឋាភិបាល​កម្ពុជា​ក្នុង​សកម្មភាព​មីន​តប​តាម​ការអំពាវនាវ​រប​ស់ស​ម្តេច​អគ្គមហាសេនាបតី​តេ​ជោ​នាយករដ្ឋមន្ត្រី​កន្លងមក គឺមាន​ស្ថាប័ន​មនុស្សធម៌ និង​សប្បុរសជន បាន​បរិច្ចាគ​ថវិកា​ចំនួន​ខ្ទង់លាន​ដុល្លារ​អាមេរិក​គួរ​ឲ្យ​កត់សម្គាល់ គិត​ត្រឹម​ថ្ងៃទី​០៣ ខែកក្កដា ឆ្នាំ​២០២២ រួមមាន​ដូចតទៅ ៖

១-​កាកបាទក្រហមកម្ពុជា ដែលមាន​សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុន សែន ជា​ប្រធាន ចំនួន ២​លាន​ដុល្លារ​អាមេរិក ។

២-​លោកស្រី ហ៊ុន ម៉ា​ណា (​ភរិយា​របស់លោក​ឧ​ត្ត​ម​សេនីយ៍​ឯក ឌី វិជ្ជា អគ្គស្នងការ​រង​នៃ​អគ្គស្នងការដ្ឋាន​នគរ​បាល​ជាតិ​) និង​លោកជំទាវ ហ៊ុន ម៉ាលី (​ភរិយា​របស់​ឯកឧត្តម សុខ ពុទ្ធិ​វុ​ធ រដ្ឋលេខាធិការ​ក្រសួង​ប្រៃសណីយ៍ និង​ទូរគមនាគមន៍​) ត្រូវជា​កូនស្រី​បង្កើត​របស់​សម្តេច​អគ្គមហាសេនាបតី​តេ​ជោ​នាយករដ្ឋមន្ត្រី ចំនួន ១​លាន​ដុល្លារ​អាមេរិក ។

៣-​ក្រុមហ៊ុន ជីបម៉ុង គ្រុប ដែលមាន​អ្នកឧកញ៉ា ភាព ហៀក ជា​ប្រធាន​ក្រុមប្រឹក្សាភិបាល ចំនួន ១​លាន​ដុល្លារ​អាមេរិក ។

៤-​អ្នកឧកញ៉ា ឡេង ភ​ត្រា ហៅ ឡេង ណា​វ៉ា​ត្រា ជា​អគ្គនាយក​ក្រុមហ៊ុន បុរី​ឡេង​ណា​វ៉ា​ត្រា ចំនួន ១​លាន​ដុល្លារ​អាមេរិក ។

៥-​លោក​ឧកញ៉ា ពុង ឃាវ​សែ អគ្គនាយក​ក្រុមហ៊ុន OCIC និង​ធនាគារ​កាណាឌីយ៉ា ចំនួន ១​លាន​ដុល្លារ​អាមេរិក ។

៦-​អ្នកឧកញ៉ា ហុង ពី​វ អគ្គនាយក​ក្រុមហ៊ុន បុរី​ពិភពថ្មី ចំនួន ១​លាន​ដុល្លារ​អាមេរិក ។

៧-​អ្នកឧកញ៉ា ចេ​ន ហ្ស៊ី ប្រធាន​ក្រុមប្រឹក្សាភិបាល​ក្រុមហ៊ុន Prince Holding Groups និង​ធនាគារ Prince ចំនួន ១​លាន​ដុល្លារ​អាមេរិក ។

៨-​អ្នកឧកញ៉ា គិត ម៉េង អគ្គនាយក​ក្រុមហ៊ុន Royal Group ចំនួន ១​លាន​ដុល្លារ​អាមេរិក ។

៩-​ឯកឧត្តម​ឧកញ៉ា ឡាវ ម៉េង​ឃី​ន និង​លោកជំទាវ​ឧកញ៉ា ជឹ​ង សុភាព ហៅ​យាយ​ភូ អគ្គនាយក​ក្រុមហ៊ុន Shukaku Inc. និង​ជា​សមាជិក​ព្រឹទ្ធសភា​នៃ​ព្រះរាជាណាចក្រ​កម្ពុជា ចំនួន ១​លាន​ដុល្លារ​អាមេរិក ។

១០-​ឯកឧត្តម​ឧកញ៉ា លី យ៉ុង​ផាត់ ប្រធាន​ក្រុមប្រឹក្សាភិបាល​ក្រុមហ៊ុន LYP Group និង​ជា​សមាជិក​ព្រឹទ្ធសភា​នៃ​ព្រះរាជាណាចក្រ​កម្ពុជា ចំនួន ១​លាន​ដុល្លារ​អាមេរិក ។

១១-​លោក​ឧកញ៉ា ថៃ ជា​ហួត ប្រធាន​ក្រុមប្រឹក្សាភិបាល​ក្រុមហ៊ុន ប៉េង​ហួត គ្រុប និង​ជា​អគ្គនាយក​ក្រុមហ៊ុន បុរី​ប៉េង​ហួត ចំនួន ១​លាន​ដុល្លារ​អាមេរិក ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.