ថ្ងៃ សុក្រ ទី ១៩ ខែ សីហា ឆ្នាំ ២០២២

​រឹតតែ​ក្តៅ​ហើយ ! រុស្ស៊ី​វាយប្រហារ​ដោយ​មី​ស៊ី​ល​ស្រោច​ដូច​ទឹកភ្លៀង​ទៅលើ​មូលដ្ឋានទ័ព​អ៊ុយ​ក្រែ​ន​

​ទីភ្នាក់ងារសារព័ត៌មាន Reuters ដែល​ដកស្រង់​ពី​ប្រភព​មន្ត្រី​អ៊ុយ​ក្រែ​ន​បាន​ផ្សព្វផ្សាយ​នៅ​ថ្ងៃទី​២៥ ខែមិថុនា ឆ្នាំ​២០២២​នេះ​ឲ្យ​ដឹងថា រុស្ស៊ី បាន​បាញ់​អាវុធ​មី​ស៊ី​ល​ស្រោច​ដូច​ទឹកភ្លៀង​ទៅលើ​មូលដ្ឋានទ័ព​ជាច្រើន​កន្លែង​នៅ​ភាគ​ខាងលិច និង​ខាងជើង​នៃ​ប្រទេស​អ៊ុយ​ក្រែ​ន ខណៈ​ទីក្រុង Kyiv បាន​បញ្ជា​ឲ្យ​ទាហាន​របស់ខ្លួន​ដកថយ​ចេញពី​ទីក្រុង Sievierodonetsk ក្នុង​តំបន់ Donbas ។

​លោក Maxim Kozytskyi អភិបាល​តំបន់ Lviv ស្ថិតនៅ​ភាគ​ខាងលិច​អ៊ុយ​ក្រែ​ន​បាន Post ព័ត៌មាន​តាម​បណ្តាញ​ទំនាក់ទំនង​សង្គម​ឲ្យ​ដឹងថា រុស្ស៊ី​បាន​បាញ់​មី​ស៊ី​ល​ចំនួន​៦​គ្រាប់ ចេញពី​សមុទ្រ​ខ្មៅ ក្នុងនោះ​មាន​៤​គ្រាប់​បាន​វាយប្រហារ​ចំ​មូលដ្ឋានទ័ព Yavoriv ស្ថិតនៅ​ជិត​ព្រំប្រទល់​ប្រទេស​ប៉ូឡូញ និង​២​គ្រាប់​ទៀត​ត្រូវបាន​បំផ្លាញ ។ រីឯ​លោក Vitaliy Bunechko អភិបាល​តំបន់ Zhytomyr ស្ថិតនៅ​ភាគ​ខាងជើង​អ៊ុយ​ក្រែ​ន​ក៏បាន​អះអាង​ឲ្យ​ដឹង​ដែរ​ថា មី​ស៊ី​ល​រហូតដល់​ទៅ​៣០​គ្រាប់​បាន​វាយប្រហារ​លើ​មូលដ្ឋានទ័ព​មួយកន្លែង​ក្បែរ​ទីក្រុង Zhytomyr ដោយបាន​ផ្តាច់ជីវិត​ទាហាន​ម្នាក់ ខណៈ​មី​ស៊ី​ល​ប្រមាណ​១០​គ្រាប់​ត្រូវបាន​ស្ទាក់ចាប់ និង​បំផ្លាញចោល ។

​ដោយឡែក នៅ​តំបន់ Chernihiv ក៏មាន​សេចក្តីរាយការណ៍​អំពី​សកម្មភាព​រង​ការវាយប្រហារ​ដោយ​អាវុធ​មី​ស៊ី​ល​របស់​រុស្ស៊ី​ផងដែរ ។

​បច្ចុប្បន្ន ទាហាន​រុស្ស៊ី​នៅតែ​បន្ត​ផ្តោត​ការវាយលុក​រុលទៅមុខ​លើ​តំបន់​ភាគខាងត្បូង និង​តំបន់ Donbas ភាគ​ខាងកើត​នៃ​ប្រទេស​អ៊ុយ​ក្រែ​ន ស្របពេល​ទីក្រុង Kyiv បាន​បញ្ជា​ឲ្យ​ទាហាន​ដកថយ​ចេញពី​ទីក្រុង Sievierodonetsk ដែល​លោក Volodymyr Zelenskiy ប្រធានាធិបតី​អ៊ុយ​ក្រែ​ន​ធ្លាប់បាន​ចាត់ទុកជា​ទីក្រុង​យុទ្ធសាស្ត្រ​ដ៏​សំខាន់​ដែល​អាច​កំណត់​អំពី​លទ្ធផល​សង្គ្រាម​ក្នុង​តំបន់ Donbas ទាំងមូល ៕​

Filed in: Feature, អន្តរជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.