យោងតាមសំណើរបស់រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ( ដនស ) រាជរដ្ឋាភិបាលកម្ពុជាដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខ បានសម្រេចធ្វើអនុបយោគផ្ទៃបឹងមេទឹកបែកក្អម ទំហំ៥៣ហិកតា ៩៦អា និង៦៦សង់ទីអា ស្ថិតនៅឃុំព្រែកអញ្ចាញ និងបឹងមេទឹកអំពៅឌៀប ទំហំ១២៨ហិកតា ៤៤អា និង៩១សង់ទីអា ស្ថិតក្នុងឃុំសំបួរមាស ស្រុកមុខកំពូល ខេត្តកណ្តាល ពីសម្បត្តិសាធារណៈរបស់រដ្ឋ មកជាសម្បត្តិឯកជនរបស់រដ្ឋ ដោយអនុក្រឹត្យលេខ ២៥អនក្រ.បក ចុះថ្ងៃទី០១ ខែកុម្ភៈ ឆ្នាំ២០២២ ។
ការធ្វើអនុបយោគផ្ទៃបឹងមេទឹកទាំងពីរ ទំហំជិត២០០ហិកតា ស្ថិតនៅស្រុកមុខកំពូល ខេត្តកណ្តាល ពីសម្បត្តិសាធារណៈរបស់រដ្ឋ មកជាសម្បត្តិឯកជនរបស់រដ្ឋ នេះ គឺកើតឡើងក្រោយរយៈពេលប្រមាណជាង០១ខែប៉ុណ្ណោះ បន្ទាប់ពីផ្ទៃបឹងមេទឹកទាំងពីរ ត្រូវបានកំណត់ជាសម្បត្តិសាធារណៈរបស់រដ្ឋ ដោយអនុក្រឹត្យលេខ ២៤៣អនក្រ.បក ចុះថ្ងៃទី១៤ ខែធ្នូ ឆ្នាំ២០២១ ។
មជ្ឈដ្ឋានអ្នកតាមដានកិច្ចការសង្គមនៅកម្ពុជា បានធ្វើការព្យាករណ៍ទុកថា ការធ្វើអនុបយោគផ្ទៃបឹងមេទឹកបែកក្អម និងបឹងមេទឹកអំពៅឌៀប ទំហំជិត២០០ហិកតា ស្ថិតនៅស្រុកមុខកំពូល ខេត្តកណ្តាល ពីសម្បត្តិសាធារណៈរបស់រដ្ឋ មកជាសម្បត្តិឯកជនរបស់រដ្ឋ បែបនេះ គឺអាចនឹងក្លាយទៅជាកម្មវត្ថុនៃការកាត់ដោះដូរ លក់ ឬជួលរយៈពេលយូរ ទៅឲ្យបុគ្គលឯកជន ឬនីតិបុគ្គលក្រោមស្លាក « អភិវឌ្ឍន៍ »ដោយមិនឆ្លងកាត់ការដាក់ដេញថ្លៃជាសាធារណៈឲ្យមាន « តម្លាភាព » ជាក់ជាមិនខានឡើយ ៕
