ថ្ងៃ ចន្ទ ទី ២៦ ខែ កញ្ញា ឆ្នាំ ២០២២

៦០​ឆ្នាំ​ហើយ ! អបអរសាទរ​ខួប​អនុស្សាវរីយ៍​លើក​ទី​៦០​ឆ្នាំ នៃ​ជ័យជម្នះ​របស់​ភាគី​កម្ពុជា​លើ​ភាគី​ថៃ នៅ​តុលាការ​យុត្តិធម៌​អន្តរជាតិ​ក្នុង​សំណុំ​រឿងក្តី​ប្រាសាទព្រះវិហារ​

​ថ្ងៃទី​១៥ ខែមិថុនា ឆ្នាំ​២០២២​នេះ គឺជា​ថ្ងៃ​គម្រប់​ខួប​អនុស្សាវរីយ៍​លើក​ទី​៦០​ឆ្នាំ​នៃ​ជ័យជម្នះ​របស់​ព្រះរាជាណាចក្រ​កម្ពុជា​លើ​ព្រះរាជាណាចក្រ​ថៃ នៅ​តុលាការ​យុត្តិធម៌​អន្តរជាតិ (ICJ) នៅ​ទី​ក្រុងឡាអេ (The Hague) ក្នុង​សំណុំ​រឿងក្តី​ប្រាសាទព្រះវិហារ ស្ថិតនៅ​ខេត្តព្រះវិហារ នៃ​ព្រះរាជាណាចក្រ​កម្ពុជា ។

​សាលក្រម​របស់​តុលាការ​យុត្តិធម៌​អន្តរជាតិ ទីក្រុង​ឡាអេ បានចេញ​សេចក្តីសម្រេច​ចំនួន​៣​ចំណុច​សំខាន់ៗ គឺ ៖ ១-​ប្រាសាទព្រះវិហារ​ស្ថិតក្នុង​ទឹកដី​ក្រោម​អធិបតេយ្យភាព​របស់​ប្រទេស​កម្ពុជា ។ ២-​ប្រទេស​ថៃ​មាន​កាតព្វកិច្ច​ដក​កម្លាំង​ទ័ព ឬ​ប៉ូលិស ឬ​អ្នកថែរក្សា ឬ​ឆ្មាំ​ដទៃទៀត​ដែល​បានដាក់​ពង្រាយ​ក្នុង​ប្រាសាទ ឬ​នៅក្នុង​តំបន់​ក្បែរ​ប្រាសាទ ដែល​ស្ថិតនៅក្នុង​ទឹកដី​ប្រទេស​កម្ពុជា និង ៣-​ប្រទេស​ថៃ​មាន​កាតព្វកិច្ច​ប្រគល់​មក​ឲ្យ​ប្រទេស​កម្ពុជា​វិញ​នៅ​វត្ថុ​ទាំងឡាយ​តាម​ប្រភេទ​ដែល​បានបញ្ជាក់​នៅក្នុង​សេចក្តីស្នើសុំ​របស់​ប្រទេស​កម្ពុជា ដែល​ត្រូវបាន​យក​ចេញពី​ប្រាសាទ ឬ​តំបន់​ប្រាសាទ​ដោយ​អាជ្ញាធរ​ពាក់ព័ន្ធ​របស់​ប្រទេស​ថៃ​ចាប់តាំងពី​កាលបរិច្ឆេទ​នៃ​ការចូល​កាន់កាប់​ប្រាសាទ​នេះ​ដោយ​ប្រទេស​ថៃ​នៅ​ឆ្នាំ​១៩៥៤ ។​

​ទង់ជាតិ​នៃ​ព្រះរាជាណាចក្រ​កម្ពុជា​ត្រូវ​បានដាក់​បង្ហូត​នៅ​ប្រាសាទព្រះវិហារ​នា​ថ្ងៃទី​០៥ ខែមករា ឆ្នាំ​១៩៦៣ ក្រោយ​ការសម្រេចសេចក្តី​របស់​តុលាការ​យុត្តិធម៌​អន្តរជាតិ ទីក្រុង​ឡាអេ ប្រគល់​ប្រាសាទព្រះវិហារ​ឲ្យ​ស្ថិតក្រោម​អធិបតេយ្យភាព​របស់​ប្រទេស​កម្ពុជា ។

​ប្រាសាទព្រះវិហារ ត្រូវបាន​អង្គការ​យូណេស្កូ (UNESCO) ចុះបញ្ជី​ជា​សម្បត្តិ​បេតិកភណ្ឌ​ពិភពលោក នៅ​ថ្ងៃទី​០៧ ខែកក្កដា ឆ្នាំ​២០០៨ នៅ​ប្រទេស​កាណាដា ។​

​ក្រោយពេល​ប្រាសាទព្រះវិហារ ត្រូវបាន​អង្គការ​យូណេស្កូ ចុះបញ្ជី​ជា​សម្បត្តិ​បេតិកភណ្ឌ​ពិភពលោក​ត្រឹម​ប្រមាណ​១​សប្តាហ៍​ប៉ុណ្ណោះ គឺ​នៅ​ថ្ងៃទី​១៥ ខែកក្កដា ឆ្នាំ​២០០៨ កងកម្លាំងប្រដាប់អាវុធ​ព្រះរាជាណាចក្រ​ថៃ​បាន​ចូលមក​ទន្ទ្រាន​ឈ្លានពាន​លើទឹក​ដី​នៃ​ព្រះរាជាណាចក្រ​កម្ពុជា​ក្នុង​បរិវេណ​ជុំវិញ​ប្រាសាទព្រះវិហារ​ដែលជា​អំពើ​រំលោភបំពាន​លើ​សាលក្រម​របស់​តុលាការ​យុត្តិធម៌​អន្តរជាតិ ទីក្រុង​ឡាអេ ចុះ​ថ្ងៃទី​១៥ ខែមិថុនា ឆ្នាំ​១៩៦២ និង​រំលោភបំពាន​លើ​អនុសញ្ញា​ស្តីពី​ការការពារ​បេតិកភណ្ឌ​វប្បធម៌ និង​ធម្មជាតិ​ពិភពលោក ចុះ​ថ្ងៃទី​១៦ ខែវិច្ឆិកា ឆ្នាំ​១៩៧២ យ៉ាងធ្ងន់ធ្ងរ​បំផុត ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.