ថ្ងៃ អាទិត្យ ទី ០៣ ខែ កក្កដា ឆ្នាំ ២០២២

ទើប​ចាត់ការ​កែតម្រូវ ! កំពូល​នាយករដ្ឋមន្ត្រី​ដែលមាន​ខួបកំណើត​២​ដង​ក្នុង​១​ឆ្នាំ សម្រេចចិត្ត​កែតម្រូវ​ថ្ងៃ ខែ ឆ្នាំ​កំណើត​ហើយ

កាលពី​ថ្ងៃ​ពុធ​ម្សិលមិញ​នេះ ក្រុមហ៊ុន​មេធាវី​កម្ពុជា តំណាង​ដោយ​លោក​មេធាវី គី តិច ជា​មេធាវី​តំណាង​ដោយ​អាណត្តិ​របស់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា បានដាក់​ពាក្យសុំ​ជា​ផ្លូវការ​ទៅ​ឯកឧត្តម​ប្រធាន​សាលាដំបូង​រាជធានី​ភ្នំពេញ ដើម្បី​ស្នើសុំ​ឲ្យ​តុលា​ការចេញ​ដីកា​សម្រេច​កែតម្រូវ​ទិន្នន័យ​អត្រានុកូលដ្ឋាន (​ថ្ងៃ ខែ ឆ្នាំ​កំណើត​) របស់​សម្តេច​អគ្គមហាសេនាបតី​តេ​ជោ ហ៊ុន សែន ពីថ្ងៃ​ទី​០៤ ខែមេសា ឆ្នាំ​១៩៥១ ទៅជា​ថ្ងៃ ខែ ឆ្នាំ​ពិតប្រាកដ ថ្ងៃទី​០៥ ខែសីហា ឆ្នាំ​១៩៥២ វិញ ។

​ចាប់តាំងពី​ចូល​បម្រើ​ការងារ​រដ្ឋ​អស់​រយៈពេល​ជាង​៤០​ឆ្នាំ​មក សម្តេច​អគ្គមហាសេនាបតី​តេ​ជោ ហ៊ុន សែន (​ឈ្មោះ​ដើម ហ៊ុន បូ​ណា​ល់ និង​មាន​គោរមងារ​បច្ចុប្បន្ន​ដែល​ផ្លាស់ប្តូរ​ហូរហែ​ពី​សម​មិត្ត លោក ឯកឧត្តម និង​សម្តេច​) បាន​ប្រើប្រាស់​ថ្ងៃ ខែ ឆ្នាំ​កំណើត​ផ្លូវការ គឺ​ថ្ងៃទី​០៤ ខែមេសា ឆ្នាំ​១៩៥១ ខណៈ​បងប្រុស​បង្កើត​ម្នា​ក់រប​ស់ស​ម្តេច​អគ្គមហាសេនាបតី​តេ​ជោ ហ៊ុន សែន គឺ​សម្តេច​ឧ​ត្ត​ម​ទេព​ញាណ ហ៊ុន ណេង (​ឈ្មោះ​ដើម ហ៊ុន ឡុង​សេង ដែល​ទទួលមរណភាព​កាលពី​ថ្ងៃទី​០៥ ខែឧសភា ឆ្នាំ​២០២២) បាន​ប្រើប្រាស់​ថ្ងៃ ខែ ឆ្នាំ​កំណើត​ផ្លូវការ គឺ​ថ្ងៃទី​២៥ ខែវិច្ឆិកា ឆ្នាំ​១៩៥០ ។

​ជាមួយនឹង​ការប្រើប្រាស់​ថ្ងៃ ខែ ឆ្នាំ​កំណើត​ផ្លូវការ ថ្ងៃទី​០៤ ខែមេសា ឆ្នាំ​១៩៥១ សម្តេច​អគ្គមហាសេនាបតី​តេ​ជោ ហ៊ុន សែន (​ដែល​គួរ​ដាក់​រហស្សនាម​ថ្មី​ជា សម្តេច​កំពូល​នាយករដ្ឋមន្ត្រី​) ក៏បាន​ប្រកាស​ឲ្យ​ដឹងផង​ដែរ​អំពី​ថ្ងៃ ខែ ឆ្នាំ​កំណើត ដែល​អះអាង​ពិតប្រាកដ​មួយទៀត ត្រូវ​នឹង​ថ្ងៃទី​០៥ ខែសីហា ឆ្នាំ​១៩៥២ (Sic!) ជាហេតុ​ធ្វើ​ឲ្យ​ម​ជ្ឍ​ដ្ឋា​ន​មន្ត្រីក្រោមឱវាទ​របស់​ស​ម្តេច​កំពូល​នាយករដ្ឋមន្ត្រី​ជូនពរ​ថ្ងៃ​ខួបកំណើត​រហូតដល់​ទៅ​២​ដង​ក្នុង​១​ឆ្នាំ គឺ​ថ្ងៃទី​០៤ ខែមេសា រៀងរាល់ឆ្នាំ​ម្តង និង​ថ្ងៃទី​០៥ ខែសីហា រៀងរាល់ឆ្នាំ​ម្តងទៀត ព្រមទាំង​លើសពីនេះ​ក៏បាន​បង្ហាញ​ឲ្យ​ឃើញ​ដែរ​ថា រវាង​សម្តេច​ឧ​ត្ត​ម​ទេព​ញាណ ហ៊ុន ណេង និង​សម្តេច​កំពូល​នាយករដ្ឋមន្ត្រី​មាន​កម្រិត​អាយុ​បង​-​ប្អូន​គ្នា​ត្រឹម​មិន​ដល់​០៥​ខែ​ពេញលេញ​ផង (Resic!) ។

​សម្តេច​អគ្គមហាសេនាបតី​តេ​ជោ ហ៊ុន សែន ឧ​ត្ត​ម​មន្ត្រី​ថ្នាក់​លេខ​១ ត្រូវបាន​ដាក់​ឲ្យ​ចូលនិវត្តន៍​ក្នុង​ក្របខ័ណ្ឌ​មន្ត្រី​គ្រប់គ្រង​រដ្ឋបាល​នៃ​ទីស្តីការគណៈរដ្ឋមន្ត្រី (​រក្សា​មុខតំណែង​នយោបាយ​នៅ​ដដែល​) ចាប់ពី​ថ្ងៃទី​០១ ខែសីហា ឆ្នាំ​២០១១ ដោយ​ព្រះរាជក្រឹត្យ​លេខ​នស​/​រកត​/០៨១១/៧៩៥ ចុះ​ថ្ងៃទី​១៩ ខែសីហា ឆ្នាំ​២០១១ ខណៈ​សម្តេច​ឧ​ត្ត​ម​ទេព​ញាណ ហ៊ុន ណេង ឧ​ត្ត​ម​មន្ត្រី​ថ្នាក់​លេខ​១ ដែល​ត្រូវជា​បងប្រុស​បង្កើត​សម្តេច​អគ្គមហាសេនាបតី​តេ​ជោ ហ៊ុន សែន បែរជា​ត្រូវ​បានដាក់​ឲ្យ​ចូលនិវត្តន៍​ក្នុង​ក្របខ័ណ្ឌ​មន្ត្រីរដ្ឋបាល​ជាន់ខ្ពស់​ក្រសួងមហាផ្ទៃ​នៅ​ថ្ងៃទី​០១ ខែឧសភា ឆ្នាំ​២០១៣ ដោយ​ព្រះរាជក្រឹត្យ​លេខ​នស​/​រកត​/០៥១៣/៣៤១ ចុះ​ថ្ងៃទី​១៤ ខែមេសា ឆ្នាំ​២០១៣​ទៅវិញ (​តាមពិត​ត្រូវ​ដល់​អាយុ​ចូលនិវត្តន៍​នៅ​ថ្ងៃទី​០១ ខែធ្នូ ឆ្នាំ​២០១០ ប៉ុន្តែ​ត្រូវបាន​ពន្យារពេល​ចូលនិវត្តន៍​ក្នុង​ក្របខ័ណ្ឌ​មុខងារសាធារណៈ​) ។

​អំឡុង​ឆ្នាំ​២០១៣ និង​ឆ្នាំ​២០១៥​កន្លងទៅ គេហទំព័រ​សារព័ត៌មាន ដើមត្នោត ធ្លាប់បាន​ផ្សព្វផ្សាយ​រួចហើយ​អំពី​ការប្រើប្រាស់​ថ្ងៃ ខែ ឆ្នាំ​កំណើត​ផ្លូវការ (​ថ្ងៃទី​០៤ ខែមេសា ឆ្នាំ​១៩៥១) របស់​សម្តេច​អគ្គមហាសេនាបតី​តេ​ជោ ហ៊ុន សែន ដែល​នាំ​ឲ្យ​ម​ជ្ឍ​ដ្ឋា​ន​នានា​មើលឃើញថា សម្តេច​អគ្គមហាសេនាបតី​តេ​ជោ ហ៊ុន សែន មាន​អាយុ​ប្អូន​សម្តេច​ឧ​ត្ត​ម​ទេព​ញាណ ហ៊ុន ណេង ត្រឹម​ប្រមាណ​០៥​ខែ និង​ទទួល​បានការ​ជូនពរ​ខួបកំណើត​ពី​មន្ត្រីក្រោមឱវាទ​រហូតដល់​ទៅ​២​ដង ក្នុង​មួយឆ្នាំ ប៉ុន្តែ​មិនត្រូវ​បាន​សម្តេច​កំពូល​នាយករដ្ឋមន្ត្រី «​អើពើ​»​ឡើយ គឺ​ទើបតែ​មកដល់​ពាក់កណ្តាល​ឆ្នាំ​២០២២​នេះ សម្តេច​កំពូល​នាយករដ្ឋមន្ត្រី​សម្រេចចិត្ត​តាមរយៈ​មេធាវី​តំណាង​ដោយ​អាណត្តិ​ស្នើសុំ​ទៅ​តុលាការ​ឲ្យ​កែតម្រូវ​ទិន្នន័យ​អត្រានុកូលដ្ឋាន (​ថ្ងៃ ខែ ឆ្នាំ​កំណើត​) តែម្តង បន្ទាប់ពី​បាន​ប្រើប្រាស់​ថ្ងៃ ខែ ឆ្នាំ​កំណើត​ផ្លូវ​ការមិន​ពិតប្រាកដ​អស់​រយៈពេល​ជាង​៤០​ឆ្នាំ ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.