ថ្ងៃ អាទិត្យ ទី ០៧ ខែ សីហា ឆ្នាំ ២០២២

ឧ​ត្ត​ម​មន្ត្រី​ឡើង​ថ្នាក់​ផ្កាយ ! ចៅហ្វាយ​ខេត្តសៀមរាប​ដែលមាន​ក្របខ័ណ្ឌ​ដើម​ជា​ទាហាន​ទទួលបាន​ការដំឡើងឋាន​ន្ត​រ​ស័ក្តិ​ឧ​ត្ត​ម​សេនីយ៍​ឯក (​ផ្កាយ​៣) ហើយ

ឯកឧត្តម ទៀ សីហា ដែលមាន​ក្របខ័ណ្ឌ​ដើម​ជា​នាយទាហាន​ថ្នាក់​ឧ​ត្ត​ម​សេនីយ៍​នៃ​កងយោធពល​ខេមរភូមិន្ទ​ក្រសួងការពារជាតិ អត្តលេខ​០១៩៨៦៤ និង​កំពុងកាន់​មុខតំណែង​ជា​អភិបាល​នៃ​គណៈ​អភិបាលខេត្ត​សៀមរាប​ក្នុង​ក្របខ័ណ្ឌ​ថ្មី​ជា​ឧ​ត្ត​ម​មន្ត្រី​នៃ​មន្ត្រីរដ្ឋបាល​ជាន់ខ្ពស់​ក្រសួងមហាផ្ទៃ​នោះ ទទួលបាន​ការដំឡើង​ឋានន្តរស័ក្តិ​ថ្នាក់​ឧ​ត្ត​ម​ស​នី​យ៍​ឯក (​ផ្កាយ​៣) ហើយ ដោយ​ព្រះរាជក្រឹត្យ​លេខ​នស​/​រកត​/០១២២/០២៤ ចុះ​ថ្ងៃទី​០៧ ខែមករា ឆ្នាំ​២០២២ ។

​ឯកឧត្តម ទៀ សីហា ដែល​គេ​ស្គាល់​ថា ជា​កូនប្រុស​បង្កើត​របស់​ស​ម្តេច​ពិជ័យ​សេនា​នាយ​ឧ​ត្ត​ម​សេនីយ៍​ផ្កាយ​មាស​៤ ទៀ បាញ់ ឧបនាយករដ្ឋមន្ត្រី រដ្ឋមន្ត្រី​ក្រសួងការពារជាតិ មានឈ្មោះ​ដើម​ថា «​ទៀ ទី​ហា​» ។

​លោក ទៀ ទី​ហា មាន​ក្របខ័ណ្ឌ​ដើម​ជា​នាយទាហាន​នៃ​កងយោធពល​ខេមរភូមិន្ទ​ក្រសួងការពារជាតិ អត្តលេខ​០១៩៨៦៤ ទទួលបាន​ការដំឡើង​ឋានន្តរស័ក្តិ​ថ្នាក់​ឧ​ត្ត​ម​សេនីយ៍​ត្រី (​ផ្កាយ​១) ដោយ​ព្រះរាជក្រឹត្យ​លេខ​នស​/​រកត​/០៤១១/៣៧៣ ចុះ​ថ្ងៃទី​១៣ ខែមេសា ឆ្នាំ​២០១១ និង​ប្រមាណ​៣​ឆ្នាំ​ក្រោយមក លោក​ឧ​ត្ត​ម​សេនីយ៍​ត្រី ទៀ ទី​ហា ក៏​ទទួលបាន​ការដំឡើងឋាន​ន្ត​រ​ស័ក្តិ​ថ្នាក់​ឧ​ត្ត​ម​សេនីយ៍​ទោ (​ផ្កាយ​២) ដោយ​ព្រះរាជក្រឹត្យ​លេខ​នស​/​រកត​/០៤១៤/៤២៦ ចុះ​ថ្ងៃទី​០៤ ខែមេសា ឆ្នាំ​២០១៤ ។

​លើសពីនេះ លោក​ឧ​ត្ត​ម​សេនីយ៍ ទៀ ទី​ហា ក៏បាន​កាន់តំណែង​ជា​ប្រធាន​គណៈកម្មាធិការ​សហភាព​សហព័ន្ធ​យុវជន​ក​ម្ណុ​ជា​ខេត្តសៀមរាប (​ស​.​ស​.​យ​.​ក​.​សរ​) ផងដែរ ខណៈ​ឪពុក​របស់លោក​តំណែង​ជា​ឧបនាយករដ្ឋមន្ត្រី រដ្ឋមន្ត្រី​ក្រសួងការពារជាតិ​ផង អ្នកតំណាងរាស្ត្រ​មណ្ឌល​ខេត្តសៀមរាប​ផង និង​ជា​សមាជិក​គណៈអចិន្ត្រៃយ៍​នៃ​គណៈកម្មាធិការ​កណ្តា​លគ​ណ​បក្ស​ប្រជាជន​កម្ពុជា​ផង (​បច្ចុប្បន្ន​ជា​អនុប្រធាន​គណបក្ស​ប្រជាជន​កម្ពុជា​) ។

​បន្ទាប់ពី​បាន​ឡើង​ឋានន្តរ​ស័​ក្តុ​ថ្នាក់​ឧ​ត្ត​ម​សេនីយ៍​ទោ (​ផ្កាយ​២) ប្រមាណ​២​ឆ្នាំ លោក​ឧ​ត្ត​ម​សេនីយ៍ ទៀ ទី​ហា ក៏​ទទួលបាន​ការតែងតាំង​ជា​ជំនួយការ​របស់​ឪពុក​ខ្លួន​ដែលជា​ឧបនាយករដ្ឋមន្ត្រី រដ្ឋមន្ត្រី​ក្រសួងការពារជាតិ មាន​ឋានៈ​ស្មើ​អគ្គនាយក បន្ថែម​លើ​មុខងារ​បច្ចុប្បន្ន ដោយ​ព្រះរាជក្រឹត្យ​លេខ​នស​/​រកត​/០៣១៦/២៨៦ ចុះ​ថ្ងៃទី​១១ ខែមីនា ឆ្នាំ​២០១៦ ពោលគឺ​មាន​ឋានៈ​ជា «​ឯកឧត្តម​» ។

​ឈានចូល​មកដល់​ពាក់​កណ្តាល​ឆ្នាំ​២០១៧ នាយទាហាន​ថ្នាក់​ឧ​ត្ត​ម​សេនីយ៍​នៃ​កងយោធពល​ខេមរភូមិន្ទ​ក្រសួងការពារជាតិ អត្តលេខ​០១៩៨៦៤ ដែល​ធ្លាប់មាន​ឈ្មោះថា «​ទៀ ទី​ហា​» ក៏ត្រូវ​បាន​ផ្ទេរ​ក្របខ័ណ្ឌ​ពី​នាយទាហាន​ថ្នាក់​ឧ​ត្ត​ម​សេនីយ៍​ទោ មក​ឋានន្តរស័ក្តិ​ឧ​ត្ត​ម​មន្ត្រី​ថា្នក់​លេខ​៣​នៃ​ក្របខ័ណ្ឌ​មន្ត្រីរដ្ឋបាល​ជាន់ខ្ពស់​ក្រសួងមហាផ្ទៃ លេចចេញ​ឈ្មោះ​ថ្មី​ថា «​ទៀ សីហា​» ដោយ​ព្រះរាជក្រឹត្យ​លេខ​នស​/​រកត​/០៦១៧/៥១៥ ចុះ​ថ្ងៃទី​២០ ខែមិថុនា ឆ្នាំ​២០១៧ និង​នៅ​ថ្ងៃ​ដំណាលគ្នា​នេះដែរ លោក ទៀ សីហា ដែល​ទើប​ប្រែ​ពី​ឈ្មោះ «​ទៀ ទី​ហា​» ក៏ត្រូវ​បានតែងតាំង​មុខតំណែង​ជា​អភិបាលរង​នៃ​គណៈ​អភិបាលខេត្ត​សៀមរាប ដោយ​អនុក្រឹត្យ​លេខ​៦៥៩​អនក្រ​.​ត​ត ចុះ​ថ្ងៃទី​២០ ខែមិថុនា ឆ្នាំ​២០១៧ ។​

​រយៈពេល​ជាង​១​ឆ្នាំ​ក្រោយមក​បន្ទាប់ពី​កាន់តំណែង​ជា​អភិបាលរង​នៃ​គណៈ​អភិបាលខេត្ត​សៀមរាប លោក ទៀ សីហា ឋានន្តរស័ក្តិ​ឧ​ត្ត​ម​មន្ត្រី​ថ្នាក់​លេខ​៣ ក៏​ទទួលបាន​ការតែងតាំង​ជា​អភិបាល​នៃ​គណៈ​អភិបាលខេត្ត​សៀមរាប ដោយ​ព្រះរាជក្រឹត្យ​លេខ​នស​/​រកត​/១២១៨/១៣៥៦ ចុះ​ថ្ងៃទី​០៦ ខែធ្នូ ឆ្នាំ​២០១៨ ។​

​សរុបសេចក្តី​មក ទោះបី​បាន​ផ្ទេរ​ពី​ក្របខ័ណ្ឌ​ដើម​ជា​នាយទាហាន​ថ្នាក់​ឧ​ត្ត​ម​សេនីយ៍​នៃ​កងយោធពល​ខេមរភូមិន្ទ​ក្រសួងការពារជាតិ មកជា​ឧ​ត្ត​ម​មន្ត្រី​ថ្នាក់​លេខ​៣​នៃ​ក្របខ័ណ្ឌ​មន្ត្រីរដ្ឋបាល​ជាន់ខ្ពស់​ក្រសួងមហាផ្ទៃ ដើម្បី​បាន​កាន់​មុខតំណែង​ជា​អភិបាល​នៃ​គណៈ​អភិបាលខេត្ត​សៀមរាប​រួចហើយ​ក៏ដោយ ក៏​ឯកឧត្តម ទៀ សីហា អាចមាន​លទ្ធភាព​ឡើង​ឋានន្តរស័ក្តិ​ថ្នាក់​ឧ​ត្ត​ម​សេនីយ៍​ឯក (​ផ្កាយ​៣) នៅក្នុង​ក្របខ័ណ្ឌ​ដើម​យ៉ាង​រលូន ។

​មជ្ឈដ្ឋាន​នានា​នឹង​បន្ត​រង់ចាំ​តាមដាន​មើល​តទៅ​ទៀតថា តើ​ឯកឧត្តម ទៀ សីហា អាចមាន​លទ្ធភាព​ឡើង​ឋានន្តរស័ក្តិ​ថ្នាក់​ឧ​ត្ត​ម​មន្ត្រី​ក្នុង​ក្របខ័ណ្ឌ​មន្ត្រីរដ្ឋបាល​ជាន់ខ្ពស់​ក្រសួងមហាផ្ទៃ​ដែលជា​ក្របខ័ណ្ឌ​ថ្មី​បច្ចុប្បន្ន​ដែរឬទេ ? ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.