ថ្ងៃ ចន្ទ ទី ២៦ ខែ កញ្ញា ឆ្នាំ ២០២២

​រើសយក​មួយណា ម្ខាង​ងារ​ឧកញ៉ា និង​ម្ខាង​ជា​នាយទាហាន ? អ្នកចម្រៀង​ល្បីឈ្មោះ និង​ជា​នាយទាហាន​ស័ក្តិ​៥ ព្រាប សុវត្ថិ ទទួលបាន​ការផ្តល់​គោរមងារ​ជា «​ ឧកញ៉ា​ »

យោងតាម​សេចក្តីក្រាបបង្គំទូលថ្វាយ ​របស់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​ នៃ​ព្រះរាជាណាចក្រ​កម្ពុជា​  ព្រះករុណា​ព្រះបាទ​សម្តេច​ព្រះបរមនាថ នរោត្តម សីហមុនី ព្រះមហាក្សត្រ​ នៃ​ព្រះរាជាណាចក្រ​កម្ពុ​ជា ​ទ្រង់​បាន​ត្រាស់បង្គាប់​ផ្តល់​គោរមងារ​ លោក ព្រាប សុវត្ថិ ជា​ ឧកញ៉ា ដោយ​ព្រះរាជក្រឹត្យ​លេខ​ នស​/​រកត​/០៤២២/៤៤៣ ចុះ​ថ្ងៃទី​២៩ ខែមេសា ឆ្នាំ​២០២២​ កន្លងទៅ​ថ្មីៗ​នេះ ។

​លោក ព្រាប សុវត្ថិ អាយុ​៤៧​ឆ្នាំ ត្រូវបាន​គេ​ស្គាល់​ថា ជា​អ្នកចម្រៀង​ ដ៏​ល្បីឈ្មោះ​នៅ​ប្រទេស​កម្ពុជា និង​ក៏មាន​ក្របខ័ណ្ឌ​ជា​នាយទាហានជាន់ខ្ពស់ នៃ​កងយោធពល​ខេមរភូមិន្ទ​ ក្រសួងការពារជាតិ អត្តលេខ​ ០៤៨៦៩៤ ឋានន្តរស័ក្តិ​ ថ្នាក់​វរសេនីយ៍ឯក ( ​ស័ក្តិ​៥ ) ម្នាក់​ ផងដែរ ។​

​ក្រៅពី​ជា​អ្នកចម្រៀង និង​ជា​នាយទាហាន​ នៃ​កងយោធពល​ខេមរភូមិន្ទ គឺ​លោក ព្រាប សុវត្ថិ ក៏​ជា​សមាជិក​គណបក្ស​ប្រជាជន​កម្ពុជា ( CPP ) ដែល​តែងតែ​ជួយ​ឃោសនា​រក​សំឡេងឆ្នោត​ ជូន​គណបក្ស​ប្រជាជន​កម្ពុជា​ យ៉ា​សកម្ម​ នៅ​រៀងរាល់​ពេល​យុទ្ធនាការ​ឃោសនាបោះឆ្នោត​ ម្តងៗ ។

​កាលពី​ថ្ងៃទី​០៦ ខែមេសា ឆ្នាំ​២០២០​ កន្លងទៅ លោក​វរសេនីយ៍ឯក ព្រាប សុវត្ថិ ជា​នាយរង​ការិយាល័យ​ទី​៥ នៃ​បញ្ជាការដ្ឋាន​កងទ័ពជើងគោក ធ្លាប់បាន​ស្ម័គ្រចិត្ត​បរិច្ចាគ​ប្រាក់បៀវត្សរ៍​ផ្ទាល់ខ្លួន​ចំនួន ៤០០ ០០០ (​ សែសិប​ម៉ឺន ​)​រៀល ចំនួន​០៦ ( ​ប្រាំមួយ ​) ខែ គិត​ចាប់ពី​ខែឧសភា ដល់​ខែតុលា ឆ្នាំ​២០២០ ជូន​គណៈកម្មាធិការ​ជាតិ​ប្រយុទ្ធ​នឹង​ជំងឺ​កូ​វីដ​-១៩ ( COVID-19 )​។

​អនុលោម​តាម​ស្មារតី​អនុក្រឹត្យ​ លេខ​៤៣​អនក្រ​.​បក ចុះ​ថ្ងៃទី​២០ ខែមីនា ឆ្នាំ​២០១៧ ស្តីពី​ការកែសម្រួល​ចំណុច​ទី​១ មាត្រា​២ នៃ​អនុក្រឹត្យ​លេខ​១៥​អនក្រ ចុះ​ថ្ងៃទី​០៥ ខែមេសា ឆ្នាំ​១៩៩៤ គឺ​សប្បុរសជន​ ដែល​បានធ្វើ​អំណោយ​ជូន​រដ្ឋ​ជា​ថវិកា ឬ​សម្ភារៈ​ ដែលមាន​តម្លៃលើស​ពី ៥០០ ០០០ (​ ហាសិប​ម៉ឺន​ ) ដុល្លារ​អាមេរិក​ឡើងទៅ ត្រូវបាន​រាជរដ្ឋាភិបាល​ ស្នើសុំ​ព្រះរាជ​យោបល់​ដ៏​ខ្ពង់ខ្ពស់ ​នៃ​ព្រះករុណា​ជា​អម្ចាស់​ជីវិត​តម្កល់​លើ​ត្បូង ដើម្បី​ទ្រង់​ព្រះរាជទាន​គោរមងារ​ជា «​ ឧកញ៉ា ​» ។ ដូច្នេះ មិន​បានដឹង​ប្រាកដថា តើ​លោក ព្រាប សុវត្ថិ បានទទួល​គោរមងារ​ជា «​ ឧកញ៉ា ​» តាមរយៈ​ការធ្វើ​អំណោយ​ជូន​រដ្ឋ​ ជា​ថវិកា ឬ​សម្ភារៈ ​ដែលមាន​តម្លៃលើស​ពី ៥០០ ០០០ (​ ហាសិប​ម៉ឺន ​) ដុល្លារ​អាមេរិក​ ឡើងទៅ ឬ​យ៉ាងណា​ នោះទេ ។

​លើសពីនេះ នាពេល​កន្លងមក​ មាន​នាយទាហាន​ នៃ​កងយោធពល​ខេមរភូមិន្ទ​ ក្រសួងការពារជាតិ និង​នាយ​នគរបាលជាតិ​កម្ពុជា ​នៃ​ក្រសួងមហាផ្ទៃ​ យ៉ាងហោចណាស់ ​ចំនួន​ ១២៣​នាក់​ហើយ ត្រូវបាន​បញ្ចប់​គោរមងារ «​ ឧកញ៉ា​ » ដោយ​រក្សា​ក្របខ័ណ្ឌ​ ជា​នាយទាហាន ឬ​នាយ​នគរបាលជាតិ និង​ក៏មាន​នាយទាហាន​ ថ្នាក់​ឧ​ត្ត​ម​សេនីយ៍​ នៃ​កងយោធពល​ខេមរភូមិន្ទ​ ក្រសួងការពារជាតិ​ ចំនួន​០៧​នាក់ ធ្លាប់បាន​លាលែង​ចេញពី​ក្របខ័ណ្ឌ​កងយោធពល​ខេមរភូមិន្ទ​ វិញ​ ផងដែរ ដោយ​រក្សាទុក​គោរមងារ​ ជា «​ ឧកញ៉ា ​» ។ ដូច្នេះ តើ​លោក ព្រាប សុវត្ថិ ត្រូវ​សម្រេចចិត្ត​រើសយក​មួយណា​ដែរ ដោយ​ម្ខាង​ងារ​ ជា «​ ឧកញ៉ា ​» និង​ម្ខាង​ជា​ ក្របខ័ណ្ឌ​នាយទាហាន​ នៃ​កងយោធពល​ខេមរភូមិន្ទ ឬក៏​មាន «​ ករណី​ពិសេស​ » អាច​រើស​យកបាន​ទាំងពីរ ? ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.