ថ្ងៃ សុក្រ ទី ១៩ ខែ សីហា ឆ្នាំ ២០២២

​រឿង «​ ស្តាយ​ងារ​ ឧកញ៉ា​ » ! ឧកញ៉ា ​មួយចំនួន​មិនទាន់​តាំង​ព្រះរាជក្រឹត្យ​ស្រួលបួល​ផង ក៏ត្រូវ​បានបញ្ចប់​គោរមងារ​វិញ​ ព្រោះតែ​ជា​នាយទាហាន និង​នាយ​នគរបាលជាតិ​

ប្រិយមិត្ត​ពិតជា​ធ្លាប់បាន​ស្តាប់​ចម្រៀង​មួយ​បទ​មាន​ចំណងជើង​ថា «​ ស្តាយ​ឈ្មោះ​និស្សិត ​» ប៉ុន្តែ​នៅទីនេះ គេហទំព័រ​សារព័ត៌មាន ​ដើមត្នោត សូម​លើកយក​អត្ថបទ​រឿង «​ ស្តាយ​ងារ​ឧកញ៉ា​ » មក​អត្ថាធិប្បាយ​ដូចតទៅ ៖

​យោងតាម​សេចក្តីក្រាបបង្គំទូលថ្វាយ​របស់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី ​នៃ​ព្រះរាជាណាចក្រ​កម្ពុជា និង​សម្តេច​វិបុល​សេនា​ភក្តី សាយ ឈុំ ប្រមុខរដ្ឋស្តីទី​ ក្នុង​ព្រះបរមនាម និង​តាម​ព្រះរាជ​ត្រាស់បង្គាប់ បាន​ឡាយព្រះហស្តលេខា និង​ចុះហត្ថលេខា​នៅលើ​ព្រះរាជក្រឹត្យ​បញ្ចប់​គោរមងារ «​ ឧកញ៉ា ​» ពី​នាយទាហាន ​នៃ​កងយោធពល​ខេមរភូមិន្ទ​ ក្រសួងការពារជាតិ និង​នាយ​នគរបាលជាតិ​កម្ពុជា​ នៃ​ក្រសួងមហាផ្ទៃ​យ៉ាងហោចណាស់​ចំនួន​ ១២៣​នាក់​ហើយ គិត​ត្រឹម​ថ្ងៃទី​២១ ខែកុម្ភៈ ឆ្នាំ​២០២០​ កន្លងទៅ ។

​ក្នុងចំណោម​នាយទាហាន និង​នាយ​នគរបាលជាតិ ​ដែលមាន​ងារ​ជា « ​ឧកញ៉ា​ » ហើយ​ត្រូវ​បានបញ្ចប់​គោរមងារ​វិញ​ចំនួន​ ១២៣​នាក់ ដោយ​រក្សា​ក្របខ័ណ្ឌ​ ជា​នាយ​នគរបាលជាតិ ឬ​នាយទាហាន​នោះ គឺមាន​អ្នកខ្លះ​មិនទាន់​ទាំង​ដាក់តាំង​ព្រះរាជក្រឹត្យ​តែងតាំង​ងារ « ​ឧកញ៉ា​ » ស្រួលបួល ពោល​ទទួលបាន​ងារ​ជា​ ឧកញ៉ា មិនទាន់​ដល់​រយៈពេល​មួយឆ្នាំ​ផង តួយ៉ាង ៖

១-​លោក​វរសេនីយ៍ឯក ឯល សិទ្ធិ​គ្រី​យ៉ា នាយ​នគរបាលជាតិ​ជាតិ​ជាន់ខ្ពស់​ នៃ​ក្រសួងមហាផ្ទៃ អត្តលេខ​ ៥៨៧២៣ និង​ដែល​គេ​ស្គាល់​ថា ជា​អគ្គនាយក​ក្រុមហ៊ុន N&Y Real Estate (​ ទទួលបាន​ការតែងតាំង​គោរមងារ​ជា ​ឧកញ៉ា ដោយ​ព្រះរាជក្រឹត្យ​លេខ​ នស​/​រកត​/០៦១៩/៧៨១ ចុះ​ថ្ងៃទី​១១ ខែមិថុនា ឆ្នាំ​២០១៩ ប៉ុន្តែ​ត្រូវ​បញ្ចប់​គោរមងារ​វិញ ដោយ​ព្រះរាជក្រឹត្យ​លេខ​ នស​/​រកត​/០២២០/២២១ ចុះ​ថ្ងៃទី​២១ ខែកុម្ភៈ ឆ្នាំ​២០២០ ក្រោម​សន្ធឹក​អ្នក​អបអរសាទរ​ជូនពរ​ពេល​ទទួលបាន​ងារ​ជា​ ឧកញ៉ា មិនទាន់​បាត់​រលត់​សូរសំឡេង​ផង​) ។

២-​ឯកឧត្តម​ឧ​ត្ត​ម​សេនីយ៍​ត្រី យក់ សុផល នាយទាហាន​ថ្នាក់​ឧ​ត្ត​ម​សេនីយ៍​ នៃ​កងយោធពល​ខេមរភូមិន្ទ​ ក្រសួងការពារជាតិ អត្តលេខ​ ០៧៩៨១៣ ជា​នាយទាហាន​ការពារ​ផ្ទាល់​ នៃ​បញ្ជាការដ្ឋាន​អង្គរក្ស (​ ទទួលបាន​ការតែងតាំង​គោរមងារ​ជា ​ឧកញ៉ា ដោយ​ព្រះរាជក្រឹត្យ​លេខ​ នស​/​រកត​/០២១៩/២៣៩ ចុះ​ថ្ងៃទី​១៦ ខែកុម្ភៈ ឆ្នាំ​២០១៩ ប៉ុន្តែ​ត្រូវ​បញ្ចប់​គោរមងារ​វិញ ដោយ​ព្រះរាជក្រឹត្យ​លេខ​ នស​/​រកត​/០៩១៩/១៤៨០ ចុះ​ថ្ងៃទី​២៦ ខែកញ្ញា ឆ្នាំ​២០១៩) ។

៣-​លោក​វរសេនីយ៍ឯក លី កញ្ញា​រិ​ទ្ធ នាយទាហានជាន់ខ្ពស់ ​នៃ​កងយោធពល​ខេមរភូមិន្ទ​ ក្រសួងការពារជាតិ អត្តលេខ ​១៩២៣០១ ជា​នាយករង​នាយកដ្ឋាន​ការពារ​គីមី​សាស្ត្រ​ នៃ​អគ្គនាយកដ្ឋាន​សម្ភា​រៈប​ច្ចេកទេស​ក្រសួងការពារជាតិ (​ ទទួលបាន​ការតែងតាំង​គោរមងារ​ជា​ ឧកញ៉ា ដោយ​ព្រះរាជក្រឹត្យ​លេខ​ នស​/​រកត​/០១១៩/០៦៤ ចុះ​ថ្ងៃទី​១២ ខែមករា ឆ្នាំ​២០១៩ ប៉ុន្តែ​ត្រូវ​បញ្ចប់​គោរមងារ​វិញ ដោយ​ព្រះរាជក្រឹត្យ​លេខ​ នស​/​រកត​/០៩១៩/១៤៨០ ចុះ​ថ្ងៃទី​២៦ ខែកញ្ញា ឆ្នាំ​២០១៩) …​។​ល​។​

​ជាមួយគ្នានេះ ក៏មាន​នាយទាហាន​ថ្នាក់​ឧ​ត្ត​ម​សេនីយ៍​ នៃ​កងយោធពល​ខេមរភូមិន្ទ​ ក្រសួងការពារជាតិ​ចំនួន ​០៧​នាក់ ត្រូវបាន​លាលែង​ចេញពី​ក្របខ័ណ្ឌ​កងយោធពល​ខេមរភូមិន្ទ​ វិញ​ ដោយ​សូម​រក្សាទុក​គោរមងារ​ជា «​ ឧកញ៉ា​ » ផងដែរ ដោយ​ព្រះរាជក្រឹត្យ​លេខ​ នស​/​រកត​/០៩១៩/១៤៥៣ ចុះ​ថ្ងៃទី​២៣ ខែកញ្ញា ឆ្នាំ​២០១៩ និង​ព្រះរាជក្រឹត្យ​លេខ​ នស​/​រកត​/០៩១៩/១៧៥២ ចុះ​ថ្ងៃទី​២៣ ខែវិច្ឆិកា ឆ្នាំ​២០១៩ ។

​អនុលោម​តាម​ស្មារតី​អនុក្រឹត្យ​លេខ​ ៤៣​អនក្រ​.​បក ចុះ​ថ្ងៃទី​២០ ខែមីនា ឆ្នាំ​២០១៧ ស្តីពី​ការកែសម្រួល​ចំណុច​ទី​១ មាត្រា​២ នៃ​អនុក្រឹត្យ​លេខ​ ១៥​អនក្រ ចុះ​ថ្ងៃទី​០៥ ខែមេសា ឆ្នាំ​១៩៩៤ គឺ​សប្បុរសជន​ ដែល​បានធ្វើ​អំណោយ​ជូន​រដ្ឋ​ជា​ថវិកា ឬ​សម្ភារៈ​ ដែលមាន​តម្លៃលើស​ពី ៥០០ ០០០ (​ ហាសិប​ម៉ឺន ​) ដុល្លារ​អាមេរិក​ឡើងទៅ ត្រូវបាន​រាជរដ្ឋាភិបាល​ស្នើសុំ​ព្រះរាជ​យោបល់​ដ៏​ខ្ពង់ខ្ពស់ ​នៃ​ព្រះករុណា​ជា​អម្ចាស់​ជីវិត​តម្កល់​លើ​ត្បូង ដើម្បី​ទ្រង់​ព្រះរាជទាន​គោរមងារ​ជា «​ ឧកញ៉ា​ » ។

​មជ្ឈដ្ឋាន​អ្នកវិភាគ​កិច្ចការ​សង្គម​នៅ​កម្ពុជា​ បាន​បញ្ចេញ​ទស្សនៈ​ថា ចំពោះ​មន្ត្រីរាជការ ( ​ស៊ីវិល ឬ​ប្រដាប់អាវុធ​ ) ទោះបី​ទទួលបាន​គោរមងារ​ជា​ ឧកញ៉ា​ ក្តី គឺ​មិន​ប៉ះពាល់​ដល់​កិច្ចដំណើរការ​បំពេញការងា​រ​របស់ខ្លួន​ ក្នុង​រាជការ​ទេ លើកលែងតែ​មន្ត្រីរាជកា​រ ​ដែលមាន​ងារ​ជា «​ ឧកញ៉ា ​» ទាំងនោះ​ប្រព្រឹត្ត​ខុសឆ្គង ដូច​ជាមាន​វិសមិតភាព​ការងារ ឬ​រំលោភបំពាន​លើ​មុខងារ តួនាទី​របស់ខ្លួន​ក្នុង​ការងាររាជការ ដែល​ខ្លួន​បាន និង​កំពុង​បំពេញ ។ ដូច្នេះ ប្រសិនបើ​មិនមាន​ការប្រព្រឹត្ត​នូវ​កំហុសឆ្គង​ក្នុងតួនាទី មុខងារ​ទេ គោរមងារ​ជា «​ ឧកញ៉ា​ » មិនចាំបាច់​ជំរុញ​ឲ្យ​មានការ «​ បញ្ចប់​គោរមងារ​ » នោះឡើយ ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.