ថ្ងៃ សុក្រ ទី ១៩ ខែ សីហា ឆ្នាំ ២០២២

​ប្រិយមិត្ត​គួរ​ជ្រាប ! តើ​អ្នកមាន​ទ្រព្យសម្បត្តិ​ស្តុកស្តម្ភ​មួយណា​ ដែល​ទទួលបាន​ការផ្តល់​គោរមងារ​ជា ​ឧកញ៉ា អ្នកឧកញ៉ា និង​លោកអ្នកឧកញ៉ា មុនគេ ?

ចាប់តាំងពី​បង្កើត​ព្រះរាជាណាចក្រ​កម្ពុ​ជាទី​២ និង​រាជរដ្ឋាភិបាល​កម្ពុជា​ ចេញ​អនុក្រឹត្យ​លេខ១៥​អនក្រ.បក ចុះ​ថ្ងៃទី​០៥ ខែមេសា ឆ្នាំ​១៩៩៤ ស្តីពី​ការបង្កើត​មេដាយ​ស្ថាបនា​ជាតិ និង​ប័ណ្ណ​ស្ថាបនា​ជាតិ (​ឧកញ៉ា​) រួចមក «​កាលណោះ ចំពោះ​សប្បុរសជន​ដែល​បានធ្វើ​អំណោយ​ជូន​រដ្ឋ​ជា​ថវិកា ឬ​សម្ភារៈ​ដែលមាន​តម្លៃលើស​ពី​១០០ ០០០ (​ដប់​ម៉ឺន​) ដុល្លារ​អាមេរិក​ឡើងទៅ នឹង​ទទួលបាន​គោរមងារ​ជា ឧកញ៉ា​» គឺ​លោក ជ្រុ​ន យូ​ហាក់ ទទួលបាន​ការផ្តល់​គោរមងារ​ជា «​ឧកញ៉ា​ផល្លា​សម្បត្តិ​» ដំបូង​គេ​បង្អស់ ដោយ​ព្រះរាជក្រឹត្យ​លេខ​ នស​/​រកត​/០៩៩៤/៧៦ ចុះ​ថ្ងៃទី​១០ ខែកញ្ញា ឆ្នាំ​១៩៩៤ ។ បច្ចុប្បន្ន ឈ្មោះ​ឧកញ៉ា​ផល្លា​សម្បត្តិ ជ្រុ​ន យូ​ហាក់ ក៏​ត្រូវបាន​រាជរដ្ឋាភិបាល​ដាក់​ជា​ឈ្មោះ​វិថី​មួយ​ខ្សែ ​នៅ​រាជធានី​ភ្នំពេញ គឺ​ផ្លូវ​លេខ ​២៩៤ ។

​ចំពោះ​អ្នកមាន​ទ្រព្យសម្បត្តិ​ស្តុកស្តម្ភ​ ដែល​ទទួលបាន​គោរមងារ​ជា «​អ្នកឧកញ៉ា​» ដំបូង​គេ​បង្អស់ (​លំដាប់​ទី​១) គឺ​លោក ហួត វ៉ាន់​ថន ដែល​គេ​ស្គាល់​ថា ​ជា​អគ្គនាយក​ក្រុមហ៊ុន ហួត​ត្រា​កូ (​ដោយ​ព្រះរាជក្រឹត្យ​លេខ​ នស​/​រកត​/០១៩៥/០២ ចុះ​ថ្ងៃទី​២១ ខែមករា ឆ្នាំ​១៩៩៥) ។ លំដាប់​ទី​២ គឺ​លោក ប៉ោ សំអឿន (​ដោយ​ព្រះរាជក្រឹត្យ​លេខ ​នស​/​រកត​/០៦៩៦/៣៩ ចុះ​ថ្ងៃទី​០៥ ខែមិថុនា ឆ្នាំ​១៩៩៦) ។ លំដាប់​ទី​៣ គឺ​ឯកឧត្តម ច័ន្ទ សារុន (​ដោយ​ព្រះរាជក្រឹត្យ​លេខ​​ នស​/​រកត​/០៩៩៦/៦៧ ចុះ​ថ្ងៃទី​០៣ ខែកញ្ញា ឆ្នាំ​១៩៩៦) ។ លំដាប់​ទី​៤ គឺ​លោក ហេង ខេង​សេង (​ដោយ​ព្រះរាជក្រឹត្យ​លេខ​ នស​/​រកត​/០៥០០/០៨៣ ចុះ​ថ្ងៃទី​០៦ ខែឧសភា ឆ្នាំ​២០០០) និង​លំដាប់​ទី​៥ គឺ​លោក ហ៊ុន តូ ដែល​គេ​ស្គាល់​ថា​ ជា​ក្មួយ​របស់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា (​ដោយ​ព្រះរាជក្រឹត្យ​លេខ ​នស​/​រកត​/០៥០០/០៨៤ ចុះ​ថ្ងៃទី​០៦ ខែ​ឧសភ ឆ្នាំ​២០០០) ។

​ដោយឡែក ចំពោះ​អ្នកទទួលបាន​ការផ្តល់​គោរមងារ​ជា «​លោកអ្នកឧកញ៉ា​» គឺ​លោក យោគ រាជ (​ដោយ​ព្រះរាជក្រឹត្យ​លេខ ​នស​/​រកត​/១២៩៦/៨៦ ចុះ​ថ្ងៃទី​១៦ ខែធ្នូ ឆ្នាំ​១៩៩៦) ។

​ស្មារតី​អនុក្រឹត្យ​លេខ​ ១៥​អនក្រ.បក ចុះ​ថ្ងៃទី​០៥ ខែមេសា ឆ្នាំ​១៩៩៤ ស្តីពី​ការបង្កើត​មេដាយ​ស្ថាបនា​ជាតិ និង​បណ្ណ​ស្ថាបនា​ជាតិ (​ឧកញ៉ា​) ត្រូវបានធ្វើ​ការកែសម្រួល​ឡើងវិញ​ហើយ ដោយ​អនុក្រឹត្យ​លេខ​៤៣​អនក្រ​.​បក ចុះ​ថ្ងៃទី​២០ ខែមីនា ឆ្នាំ​២០១៧ ស្តីពី​ការកែសម្រួល​ចំណុច​ទី​១ មាត្រា​២ នៃ​អនុក្រឹត្យ​លេខ​ ១៥​អនក្រ.បក ចុះ​ថ្ងៃទី​០៥ ខែមេសា ឆ្នាំ​១៩៩៤ ខណៈ​បច្ចុប្បន្ននេះ​អ្នកទទួលបាន​គោរមងារ​ជា «​ឧកញ៉ា​» មាន​ចំនួន​ដល់​ខ្ទង់ពាន់​នាក់ និង​គោរមងារ​ជា «​អ្នកឧកញ៉ា​» មាន​ចំនួន​ដល់​ជាង​២០​នាក់ ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.