ថ្ងៃ ចន្ទ ទី ២៦ ខែ កញ្ញា ឆ្នាំ ២០២២

​អ្នកឧកញ៉ា​-​ឧកញ៉ា «​សម័យ COVID-19» ! ឆ្នាំ​២០២១ អ្នកមាន​ទ្រព្យ​ស្តុកស្តម្ភ​យ៉ាងតិច​៦៦​នាក់​ត្រូវ​បានផ្តល់​គោរមងារ​ជា​ឧកញ៉ា និង​អ្នកឧកញ៉ា

ឆ្នាំ​២០២១​កន្លងទៅ​ថ្មីៗ​នេះ​ទោះបី​ព្រះរាជាណាចក្រ​កម្ពុជា​ក៏ដូចជា​បណ្តា​ប្រទេស​នានា​លើ​ពិភពលោក​ទទួលរង​ការ​រាតត្បាត​នៃ​ជំងឺ​កូ​វីដ​-១៩ (COVID-19) ដែល​បង្ក​ឲ្យ​មាន​ផលប៉ះពាល់​ធ្ងន់ធ្ងរ​ដល់​ដំណើរការ​សេដ្ឋកិច្ច ពាណិជ្ជកម្ម អាជីវកម្ម​បន្តបន្ទាប់​គ្នា​ពី​ឆ្នាំ​២០២០​យ៉ាងណាក៏ដោយ ក៏មាន​អ្នកមាន​ទ្រព្យសម្បត្តិ​ស្តុកស្តម្ភ​យ៉ាងតិច​ចំនួន​៦៦​នាក់​នៅ​ប្រទេស​កម្ពុជា​ត្រូវបាន​ព្រះករុណា​ព្រះបាទ​សម្តេច​ព្រះបរមនាថ នរោត្តម សីហមុនី ព្រះមហាក្សត្រ​នៃ​ព្រះរាជាណាចក្រ​កម្ពុជា ឬ​សម្តេច​វិបុល​សេនា​ភក្តី សាយ ឈុំ ប្រមុខរដ្ឋស្តីទី ត្រាស់បង្គាប់​ផ្តល់​គោរមងារ​ជា​ឧកញ៉ា (​ចំនួន​៥៦​នាក់​) និង​អ្នកឧកញ៉ា (​ចំនួន​១០​នាក់​) តាម​សេចក្តីក្រាបបង្គំទូលថ្វាយ​របស់​សម្តេច​អគ្គម​ហ​សេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ។

​ក្នុងចំណោម​អ្នកមាន​ទ្រព្យសម្បត្តិ​ស្តុកស្តម្ភ​ចំនួន​១០​នាក់ ដែល​ទទួលបាន​ការផ្តល់​គោរមងារ​ជា «​អ្នកឧកញ៉ា​» នោះ គឺ​ភាគច្រើន​ជា​អ្នកមាន​គោរមងារ​ជា «​ឧកញ៉ា​» ស្រាប់ និង​ភាគតិច​ទទួល​បានការ​ផ្តល់​គោរមងារ​ជា «​អ្នកឧកញ៉ា​» តែម្តង ដោយ​មិន​ឆ្លងកាត់​ងារ​ជា «​ឧកញ៉ា​» ជាមុន​ឡើយ តួយ៉ាង​លោក លី សុខ​ថៃ ជាដើម (​ទទួលបាន​ការផ្តល់​គោរមងារ​ជា​អ្នកឧកញ៉ា ដោយ​ព្រះរាជក្រឹត្យ​លេខ​នស​/​រកត​/០៩២១/៦៣១ ចុះ​ថ្ងៃទី​០៧ ខែកញ្ញា ឆ្នាំ​២០២១) ។

​ស្មារតី​នៃ​អនុក្រឹត្យ​លេខ​៤៣​អនក្រ​.​បក ចុះ​ថ្ងៃទី​២០ ខែមីនា ឆ្នាំ​២០១៧​ស្តីពី​ការកែសម្រួល​ចំណុច​ទី​១ មាត្រា​២ នៃ​អនុក្រឹត្យ​លេខ​១៥​អនក្រ ចុះ​ថ្ងៃទី​០៥ ខែមេសា ឆ្នាំ​១៩៩៤ គឺ​បាន​ចែងថា «​សប្បុរសជន​ដែល​បានធ្វើ​អំណោយ​ជូន​រដ្ឋ​ជា​ថវិកា ឬ​សម្ភារៈ​ដែលមាន​តម្លៃលើស​ពី​១០០ ០០០ (​ដប់​ម៉ឺន​) ដុល្លារ​អាមេរិក​ឡើងទៅ ត្រូវបាន​ជូន​មេដាយ​ស្ថាបនា​ជាតិ​ថ្នាក់​លេខ​១ ។ សប្បុរសជន​ដែល​បានធ្វើ​អំណោយ​ជូន​រដ្ឋ​ជា​ថវិកា ឬ​សម្ភារៈ​ដែលមាន​តម្លៃលើស​ពី​៥០០ ០០០ (​ហាសិប​ម៉ឺន​) ដុល្លារ​អាមេរិក​ឡើងទៅ ត្រូវបាន​រាជរដ្ឋាភិបាល​ស្នើសុំ​ព្រះរាជ​យោបល់​ដ៏​ខ្ពង់ខ្ពស់​នៃ​ព្រះករុណា​ជា​អម្ចាស់​ជីវិត​តម្កល់​លើ​ត្បូង ដើម្បី​ទ្រង់​ព្រះរាជទាន​គោរមងារ​ជា (​ឧកញ៉ា​) ។​» ។

​ទោះយ៉ាងណា ស្មារតី​អនុក្រឹត្យ​លេខ​៤៣​អនក្រ​.​បក ចុះ​ថ្ងៃទី​២០ ខែមីនា ឆ្នាំ​២០១៧​ស្តីពី​ការកែសម្រួល​ចំណុច​ទី​១ មាត្រា​២ នៃ​អនុក្រឹត្យ​លេខ​១៥​អនក្រ ចុះ​ថ្ងៃទី​០៥ ខែមេសា ឆ្នាំ​១៩៩៤ មិនបាន​បញ្ជាក់​លម្អិត​ថា ដើម្បី​ទទួលបាន​គោរមងារ​ជា «​អ្នកឧកញ៉ា​» ដោយ​ឆ្លងកាត់​មាន​ងារ​ជា «​ឧកញ៉ា​» ស្រាប់​ក្តី ឬ​មិនមាន​ងារ​ជា «​ឧកញ៉ា​» ស្រាប់​ក្តី តើ​សប្បុរសជន​ត្រូវធ្វើ​អំណោយ​ជូន​រដ្ឋ​ជា​ថវិកា ឬ​សម្ភារៈ​មានតម្លៃ​ប៉ុន្មាន​សែន​ដុល្លារ​អាមេរិក​ពិតប្រាកដ​នោះឡើយ ។

​ដូច្នេះ អនុលោម​តាម​ស្មារតី​មាត្រាមួយ នៃ​អនុក្រឹត្យ​លេខ​៤៣​អនក្រ​.​បក ចុះ​ថ្ងៃទី​២០ ខែមីនា ឆ្នាំ​២០១៧ ស្តីពី​ការកែសម្រួល​ចំណុច​ទី​១ មាត្រា​២ នៃ​អនុក្រឹត្យ​លេខ​១៥​អនក្រ ចុះ​ថ្ងៃទី​០៥ ខែមេសា ឆ្នាំ​១៩៩៤ គឺ​នៅ​ឆ្នាំ​២០២១​កន្លងទៅ​ថ្មីៗ​នេះ​រាជរដ្ឋាភិបាល​កម្ពុជា​អាច​ទទួលបាន​អំណោយ​ជា​ថវិកា ឬ​សម្ភារៈ​មានតម្លៃ​ជា​ទឹកប្រាក់​យ៉ាងតិច​បំផុត​ចំនួន​៣៣​លាន​ដុល្លារ​អាមេរិក​ពី​អ្នកមាន​ទ្រព្យសម្បត្តិ​ស្តុកស្តម្ភ​ដែល​ទទួលបាន​ការផ្តល់​គោរមងារ​ជា «​ឧកញ៉ា​» ។

​តាម​ការកត់សម្គាល់​ជាក់ស្តែង គឺមាន​ឧកញ៉ា​សម្បូរ​ទ្រព្យសម្បត្តិ​មួយចំនួន​បាន​បរិច្ចាគ​ថវិកា​ជូន​រាជរដ្ឋាភិបាល​កម្ពុជា ឬ​ជូន​កាកបាទក្រហមកម្ពុជារ​ហូត​ដល់​ខ្ទង់លាន​ដុល្លារ​អាមេរិក​ក្នុង​ម្នាក់ៗ ក្នុង​មួយ​លើកៗ​ឯណោះ ដូចជា អ្នកឧកញ៉ា ឡេង ភ​ត្រា (​ហៅ ឡេង ណា​វា​ត្រា​) អ្នកឧកញ៉ា ហុង ពី​វ​, អ្នកឧកញ៉ា គិត ម៉េង និង​អ្នកឧកញ៉ា ចេ​ន ហ្ស៊ី …​។​ល​។

​គួរ​រំលឹក​ជូន​ដែរ​ថា កាលពី​អំឡុង​ឆ្នាំ​២០២០​កន្លងទៅ អ្នកមាន​ទ្រព្យសម្បត្តិ​ស្តុកស្តម្ភ​នៅ​កម្ពុជា​យ៉ាងតិច​ចំនួន​៩១​នាក់ ក្នុងនោះ​ចំនួន​៨១​នាក់​ទទួលបាន​ការផ្តល់​គោរមងារ​ជា «​ឧកញ៉ា​» និង​ចំនួន​១០​នាក់​ទទួលបាន​ការផ្តល់​គោរមងារ​ជា «​អ្នកឧកញ៉ា​» ហើយ​រាជរដ្ឋាភិបាល​កម្ពុជា​អាច​ទទួលបាន​ទឹកប្រាក់​ពី​ការបរិច្ចាគ​យ៉ាងតិច​ចំនួន​ជាង​៤៥​លាន​ដុល្លារ​អាមេរិក ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.