ថ្ងៃ ពុធ ទី ២៥ ខែ ឧសភា ឆ្នាំ ២០២២

មាន​ហើយ​មាន​ទៀត ! ប្រធាន​ក្រុមប្រឹក្សា​ខណ្ឌ​នៅ​រាជធានី​ភ្នំពេញ និង​ជា​ជំនួយការ​នាយករដ្ឋមន្ត្រី​ម្នាក់​ទទួលបាន​ចំណែក​ផ្ទៃដី​បឹង​តា​មោក (​បឹង​កប់​ស្រូវ​) ជាង​២​ហិកតា​ជា​កម្មសិទ្ធិ​

ប្រធាន​ក្រុមប្រឹក្សា​ខណ្ឌ​ពោធិ៍​សែន​ជ័យ រាជធានី​ភ្នំពេញ និង​ជា​ជំនួយការ​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា មាន​ឋានៈ​ស្មើ​អនុរដ្ឋលេខាធិការ​ម្នាក់ ត្រូវបាន​រាជរដ្ឋាភិបាល​កម្ពុ​ជាស​ម្រេច​ធ្វើ​ប្រទានកម្ម​ផ្ទៃដី​ទំហំ ២២ ០៩៧​ម៉ែត្រក្រឡា ស្ថិតនៅ​ក្នុងភូមិ​ត្រពាំង​ពោធិ៍ សង្កាត់​គោក​រកា ខណ្ឌ​ព្រែក​ព្នៅ រាជធានី​ភ្នំពេញ ជា​កម្មសិទ្ធិ (​ពន្ធ និង​អាករ​ផ្សេងៗ​ជា​បន្ទុក​របស់​រដ្ឋ​) បន្ទាប់ពី​កាត់​ផ្ទៃដី​នេះ​ចេញពី​ផ្ទៃ​បឹង​តា​មោក (​បឹង​កប់​ស្រូវ​) និង​ធ្វើ​អនុ​ប​យោគ​ពី​ទ្រព្យសម្បត្តិ​សាធារណៈ​របស់​ទៅជា​ទ្រព្យសម្បត្តិ​ឯកជន​របស់​រដ្ឋ​រួចមក ដោយ​អនុក្រឹត្យ​លេខ​២៥០​អនក្រ​.​បក ចុះ​ថ្ងៃទី​២១ ខែធ្នូ ឆ្នាំ​២០២១ ។

​មិនទាន់​បានដឹង​ប្រាកដថា តើ​ឯកឧត្តម ក្រូច ផាន ទទួលបាន​ចំណែក​ផ្ទៃដី​បឹង​តា​មោក (​បឹង​កប់​ស្រូវ​) ជាង​២​ហិកតា ធ្វើជា​កម្មសិទ្ធិ ដោយ​ពន្ធ និង​អាករ​ផ្សេងៗ​ជា​បន្ទុក​របស់​រដ្ឋ​បែបនេះ ព្រោះតែ​មូលហេតុ​អ្វី​នោះ​នៅឡើយ​ទេ (​ដោយសារ​ទិញ​បន្ត​ពី​ប្រជាពលរដ្ឋ ឬ​ពី​ស្ថាប័នរដ្ឋ​ណាមួយ ឬ​ដោយសារ​ការកាន់កាប់​ជាក់ស្តែង ឬ​ដោយសារ​ការដោះដូរ​ដី​ជាមួយ​រដ្ឋ ?) ។

​គិត​ត្រឹម​ថ្ងៃទី​២១ ខែធ្នូ ឆ្នាំ​២០២១​កន្លងទៅនេះ ផ្ទៃដី​បឹង​តា​មោក (​បឹង​កប់​ស្រូវ​) ដែល​ទ្រព្យសម្បត្តិ​សាធារណៈ​របស់​រដ្ឋ ស្ថិតនៅ​ភូមិសាស្ត្រ​រាជធានី​ភ្នំពេញ យ៉ាងហោចណាស់​មាន​ទំហំ​ប្រមាណ ១៨ ៤០៤ ៩៦៦,៥​ម៉ែត្រក្រឡា (​ជាង ១ ៨៤០​ហិកតា​) ត្រូវបាន​រាជរដ្ឋាភិបាល​កម្ពុ​ជាកា​ត់​ចេញ​ធ្វើ​អនុ​ប​យោគ​ទៅជា​ទ្រព្យសម្បត្តិ​ឯកជន​របស់​រដ្ឋ និង​ប្រទានកម្ម​ទៅ​ឲ្យ​ស្ថាប័នរដ្ឋ និង​បុគ្គល​ឯកជន (​ជា​មន្ត្រី​របស់​រដ្ឋ និង​អ្នកជំនួញ​…) ជា​ហូរហែ​ធ្វើជា​កម្ម​សិទ្ធ ។

​លោក ក្រូច ផាន ជា​ប្រធាន​ក្រុមប្រឹក្សា​ខណ្ឌ​ពោធិ៍​សែន​ជ័យ រាជធានី​ភ្នំពេញ (​អតីត​ធ្លាប់​ធ្វើជា​ចៅហ្វាយខណ្ឌ​រាប់សិប​ឆ្នាំ​មកហើយ និង​មានទ្រព្យ​សម្បត្តិ​មហាសាល​ដោយសារតែ​ផលប្រយោជន៍​ពី​ដីធ្លី​ដ៏​ច្រើនសន្ធឹក​) ទទួលបាន​ការតែងតាំង​ជា​ជំនួយការ​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា មាន​ឋានៈ​ស្មើ​អនុរដ្ឋលេខាធិការ បន្ថែម​លើ​មុខងារ​បច្ចុប្បន្ន (​មិន​ទទួល​ប្រាក់បៀវត្សរ៍​) ដោយ​ព្រះរាជក្រឹត្យ​លេខ​នស​/​រកត​/០៧១៧/៥៥០ ចុះ​ថ្ងៃទី​០៦ ខែកក្កដា ឆ្នាំ​២០១៧ ទើប​ទទួលបាន​ងារ​ជា «​ឯកឧត្តម​» ទល់​សព្វថ្ងៃ ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.