ថ្ងៃ ពុធ ទី ២៥ ខែ ឧសភា ឆ្នាំ ២០២២

ជ្រុះ​តំណែង​ទាំង​ព្រម ! កូនប្រុស​ឯកឧត្តម សុខ ឥសាន ត្រូវបាន​ដកហូត​តំណែង​ពី​ទីប្រឹក្សា​ផ្ទាល់​នាយករដ្ឋមន្ត្រី និង​ពី​រដ្ឋលេខាធិការ​ក្រសួងទេសចរណ៍​យ៉ាង​តក់ក្រហល់​

ឯកឧត្តម​បណ្ឌិត សុខ សុ​ក្រឹ​ត្យា ដែល​គេ​ស្គាល់​ថា ជា​កូនប្រុស​ឯកឧត្តម សុខ ឥសាន សមាជិក​ព្រឹទ្ធសភា​នៃ​ព្រះរាជាណាចក្រ​កម្ពុជា និង​ជា​អ្នកនាំពាក្យ​របស់​គណបក្ស​ប្រជាជន​កម្ពុជា (CPP)​នោះ ត្រូវបាន​សម្តេច​វិបុល​សេនា​ភក្តី សាយ ឈុំ ប្រមុខរដ្ឋស្តីទី ក្នុង​ព្រះបរមនាម និង​តាម​ព្រះរាជ​ត្រាស់បង្គាប់​ព្រះករុណា​ព្រះបាទ​សម្តេច​ព្រះបរមនាថ នរោត្តម សីហមុនី ព្រះមហាក្សត្រ​នៃ​ព្រះរាជាណាចក្រ​កម្ពុជា ចុះហត្ថលេខា​នៅលើ​ព្រះរាជក្រឹត្យ​លេខ​នស​/​រកត​/០៣២២/២៨០ ចុះ​ថ្ងៃទី​២៣ ខែមីនា ឆ្នាំ​២០២២ ត្រាស់បង្គាប់​បញ្ចប់​មុខតំណែង​ពី​រដ្ឋលេខាធិការ​ក្រសួងទេសចរណ៍ និង​ពី​ទីប្រឹក្សា​ផ្ទាល់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា មាន​ឋានៈ​ស្មើ​រដ្ឋមន្ត្រី​វិញ​ហើយ តាម​សេចក្តីក្រាបបង្គំទូលថ្វាយ​របស់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ។

​ការបញ្ចប់​មុខតំណែង​ឯកឧត្តម សុខ សុ​ក្រឹ​ត្យា ពី​រដ្ឋលេខាធិការ​ក្រសួងទេសចរណ៍ និង​ពី​ទីប្រឹក្សា​ផ្ទាល់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា មាន​ឋានៈ​ស្មើ​រដ្ឋមន្ត្រី ទាំង​តក់ក្រហល់​នេះ​មិនត្រូវ​បានបញ្ជាក់​អំពី​មូលហេតុ​ពិតប្រាកដ​ណាមួយ​នៅឡើយ​ទេ ។

​ឯកឧត្តម សុខ សុ​ក្រឹ​ត្យា ធ្លាប់​ទទួលបាន​ការតែងតាំង​មុខតំណែង​ជា​រដ្ឋលេខាធិការ​ក្រសួងទេសចរណ៍ ដោយ​ព្រះរាជក្រឹត្យ​លេខ​នស​/​រកត​/១២១៩/១៩០៣ ចុះ​ថ្ងៃទី​១៧ ខែធ្នូ ឆ្នាំ​២០១៩ ។

​មុនពេល​ទទួល​បានកា​រតែង​តាំង​មុខតំណែង​ជា​រដ្ឋលេខាធិការ​ក្រសួងទេសចរណ៍​នោះ គឺ​លោក សុខ សុ​ក្រឹ​ត្យា ធ្លាប់​ទទួលបាន​ការតែងតាំង​ជាទី​ប្រឹក្សា​ផ្ទាល់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា មាន​ឋានៈ​ស្មើ​រដ្ឋមន្ត្រី ដោយ​ព្រះរាជក្រឹត្យ​លេខ​នស​/​រកត​/១១១៩/១៦៧៨ ចុះ​ថ្ងៃទី​០៩ ខែវិច្ឆិកា ឆ្នាំ​២០១៩ ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.