ថ្ងៃ ពុធ ទី ២៥ ខែ ឧសភា ឆ្នាំ ២០២២

ឡើង​ឋានៈ និង​តំណែង​លឿន​គួរសម ! កូនស្រី​មេ ACU ដែល​ធ្លាប់​តាំងស៊ប់​ក្នុង​ក្របខ័ណ្ឌ​មន្ត្រីរាជការ ACU «​ក្រោម​ក្លៀក​» ឪពុក ទទួលបាន​ការតែងតាំង​ជា​រដ្ឋលេខាធិការ​ក្រសួងការបរទេស និង​សហប្រតិបត្តិការ​អន្តរជាតិ​

កូនស្រី​ម្នាក់​របស់​ឯកឧត្តម​កិត្តិ​នីតិកោសល​បណ្ឌិត ឳ​ម យ៉ិនទៀង ទេសរដ្ឋមន្ត្រី ទទួលបន្ទុក​ប្រធាន​អង្គភាព​ប្រឆាំង​អំពើពុករលួយ (ACU) គឺ​លោកស្រី យ៉ិនទៀង ពុទ្ធិ​រស្មី ទទួលបាន​ការតែងតាំង​មុខតំណែង​ថ្មី​ជា​រដ្ឋលេខាធិការ​ក្រសួងការបរទេស និង​សហប្រតិបត្តិការ​អន្តរជាតិ ដោយ​ព្រះរាជក្រឹត្យ​លេខ​នស​/​រកត​/០២២២/១៣៣ ចុះ​ថ្ងៃទី​១១ ខែកុម្ភៈ ឆ្នាំ​២០២២ ដែល​នឹង​ត្រូវមាន​ងារ​ជា «​លោកជំទាវ​» តាម​សេចក្តីក្រាបបង្គំទូលថ្វាយ​របស់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ។

​លោកស្រី យ៉ិនទៀង ពុទ្ធិ​រស្មី ធ្លាប់​ទទួលបាន​ការតាំង​ស៊ប់​ក្នុង​ក្របខ័ណ្ឌ​មន្ត្រីរាជការ​របស់​អង្គភាព​ប្រឆាំង​អំពើពុករលួយ (ACU) ដែលមាន​ឪពុក គឺ​ឯកឧត្តម ឳ​ម យ៉ិនទៀង ជា​ទេសរដ្ឋមន្ត្រី ទទួលបន្ទុក​ប្រធាន​អង្គភាព​ដ៏​មាន​ឥទ្ធិពល​មួយ​នេះ ទៅក្នុង​ឋានន្តរស័ក្តិ​មន្ត្រី​ក្រមការ​ថ្នាក់​លេខ​១៤ នៃ​ក្របខ័ណ្ឌ​មន្ត្រី​ក្រមការ ចាប់ពី​ថ្ងៃទី​១៥ ខែវិច្ឆិកា ឆ្នាំ​២០១២ (​តាំងពី​នៅមាន​អាយុ​២៦​ឆ្នាំ​) ដោយ​អនុក្រឹត្យ​លេខ​២៨​អនក្រ​.​ត​ត ចុះ​ថ្ងៃទី​១១ ខែមករា ឆ្នាំ​២០១៣ ។ ក្រោយមក លោកស្រី យ៉ិនទៀង ពុទ្ធិ​រស្មី​ក៏​ធ្លាប់​ទទួលបាន​ក្របខ័ណ្ឌ​មន្ត្រីរាជការ​នៃ​ទីស្តីការគណៈរដ្ឋមន្ត្រី និង​ធ្លាប់​ទទួលបាន​ការតែងតាំង​ជា​អនុប្រធាននាយកដ្ឋាន​នៃ​លេខាធិការដ្ឋាន​គណៈកម្មាធិកា​រ​ជាតិ​ប្រឆាំង​ភេរវកម្ម ដែល​កូនប្រុស​២​នាក់​ទៀត​របស់​មេ​អង្គភាព​ប្រឆាំង​អំពើពុករលួយ (ACU) ក៏​ធ្លាប់​កាន់​មុខតំណែង​នៅក្នុង​លេខាធិការដ្ឋាន​គណៈកម្មាធិកា​រ​ជាតិ​ប្រឆាំង​ភេរវកម្ម​នេះដែរ គឺ​ឯកឧត្តម យ៉ិនទៀង ពុ​ទ្ធី​រិ​ទ្ធ និង​ឯកឧត្តម យ៉ិនទៀង ពុទ្ធិ​រ៉ា (​បច្ចុប្បន្ន​ជា​រដ្ឋលេខាធិការ​ក្រសួង​ប្រៃសណីយ៍ និង​ទូរគមនាគមន៍​-MPTC) ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.