ថ្ងៃ សុក្រ ទី ០៧ ខែ តុលា ឆ្នាំ ២០២២

​ឧកញ៉ា​ប៉ះ​ក្តី​ជាមួយ​ភរិយា​មេទ័ព ! ឧកញ៉ា​ម្នាក់​ឈ្នះក្តី​រឿង​ដីធ្លី​ជាង​១០០​ហិកតា​លើ​ភរិយា​មេ​ទ័ពជើងទឹក​មូលដ្ឋាន​សមុទ្រ ប៉ុន្តែ​នៅ​បារម្ភ​ការពារ​ដីធ្លី​របស់ខ្លួន​មិនបាន​

ដីធ្លី​មួយកន្លែង​ទំហំ​ជាង​១០០​ហិកតា​ស្ថិតនៅ​ឃុំ​រាម ស្រុក​ព្រៃនប់ ខេត្ត​ព្រះសីហនុ អតីត​ស្ថិតនៅក្រោម​ការគ្រប់គ្រង​របស់​អង្គភាព​មូលដ្ឋាន​កងទ័ពជើងទឹក​រាម ខេត្ត​ព្រះសីហនុ បាន​ធ្លាក់​ទៅក្នុង​ស្ថានភាព​មានទំនាស់​រវាង​ឧកញ៉ា​ម្នាក់ គឺ​ឧកញ៉ា តែ តាំង​ប៉ ដែល​គេ​ស្គាល់់​ថា​ជា​ប្រធាន​សម្ព័ន្ធ​សហគ្រាស​ធុន​តូច និង​មធ្យម​កម្ពុជា និង​ជា​អគ្គនាយក​ក្រុមហ៊ុន S.T.T International (Cambodia) Public Co.,Ltd. និង​លោកស្រី ដា​ញ់ ផល្លី ដែល​គេ​ស្គាល់​ថា​ជា​ភរិយា​របស់លោក​ឧ​ត្ត​មនា​វី​ឯក អ៊ុក សីហា មេបញ្ជាការរង​កងទ័ព​ជើង​ទឹក និង​ជា​មេបញ្ជាការ​កងទ័ពជើងទឹក​មូលដ្ឋាន​សមុទ្រ នៅ​ស្ថាប័ន​តុលាការ​ចាប់តាំងពី​អំឡុង​ឆ្នាំ​២០១៣​មកម្ល៉េះ ។

​កាលពី​ថ្ងៃទី​១៨ ខែកុម្ភៈ ឆ្នាំ​២០២២​កន្លងទៅ​ថ្មីៗ ឧកញ៉ា តែ តាំង​ប៉ ធ្លាប់បាន​ធ្វើលិខិត​ឆ្លើយតប​មួយច្បាប់​តប​ទៅនឹង​លិខិត​ស្រាយ​បំភ្លឺ​លេខ​០០៤/២០២២​ម​ដស ចុះ​ថ្ងៃទី​១៤ ខែកុម្ភៈ ឆ្នាំ​២០២២​របស់​គណៈកម្មការ​គ្រប់គ្រង​អចលនទ្រព្យ​កងទ័ពជើងទឹក​មូលដ្ឋាន​សមុទ្រ ដោយបាន​បញ្ជាក់​ឲ្យ​ដឹងថា ដី​ទំនាស់​ទំហំ​ជាង​១២០​ហិកតា ស្ថិតនៅ​ឃុំ​រាម ស្រុក​ព្រៃនប់ ខេត្ត​ព្រះសីហនុ​នោះ ឧកញ៉ា​បាន​ទិញ​ពី​អង្គភាព​កងទ័ពជើងទឹក​រាម​នា​អំឡុង​ឆ្នាំ​១៩៩៧ (១០៣​ហិកតា​) និង​ឆ្នាំ​២០០៧ (​ជាង​១៧​ហិកតា​) ដោយមាន​ការឯកភាព​ដឹងឮ​ទទួលស្គាល់​ពី​លោក​ឧ​ត្ត​មនា​វី អ៊ុក សីហា ជា​មេបញ្ជាការ​អង្គភាព​កងទ័ពជើងទឹក​រាម ហើយ​ត្រូវបាន​អង្គភាព​សុរិយោដី​ចុះបញ្ជី​ដីធ្លី​ចេញ​បណ្ណ​កម្មសិទ្ធិ​ជូន​ឧកញ៉ា​ត្រឹមត្រូវ ។ បន្ទាប់ពី​បាន​ទិញ​ដីធ្លី​នោះ​រួចមក ឧកញ៉ា​ក៏​ធ្លាប់បាន​បង់ប្រាក់​ចំនួន​១២៣ ៥០០​ដុល្លារ​អាមេរិក​ជូន​លោក​ឧ​ត្ត​មនា​វី អ៊ុក សីហា ដើម្បី​បញ្ចប់​សកម្មភាព​រំលោភ​បំពាន​ផ្សេងៗ​លើដី​កម្មសិទ្ធិ​របស់​ឧកញ៉ា ។ នៅ​អំឡុង​ឆ្នាំ​២០១៣ លោកស្រី ដា​ញ់ ផល្លី ជា​ភរិយា​របស់លោក​ឧ​ត្ត​មនា​វី អ៊ុក សីហា បានដាក់​ពាក្យ​ប្តឹង​ឧកញ៉ា ទៅ​សាលាដំបូង​ខេត្ត​ព្រះសីហនុ​រហូតដល់​សាលាឧទ្ធរណ៍​ភ្នំពេញ និង​តុលាការ​កំពូល ប៉ុន្តែ​ក៏បាន​ចាញ់ក្តី​ឧកញ៉ា​ជា​ស្ថាពរ​តាម​អំណាច​សាលដីកា​រដ្ឋប្បវេណី​លេខ​៧១«​ណ​» ចុះ​ថ្ងៃទី​២៥ ខែកុម្ភៈ ឆ្នាំ​២០២១​របស់​តុលាការ​កំពូល ។

​ខ្លឹម​សារលិខិត​ឆ្លើយតប​ចុះ​ថ្ងៃទី​១៨ ខែកុម្ភៈ ឆ្នាំ​២០២២​របស់​ឧកញ៉ា តែ តាំង​ប៉ ក៏បាន​បង្ហាញ​នូវ​ជំហរ​ស្នើសុំ​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​មេត្តាជួយ​អន្តរាគមន៍​ទៅ​អាជ្ញា​ធរមាន​សមត្ថកិច្ច​គ្រប់​ជាន់ថ្នាក់​ជួយ​រក​យុត្តិធម៌ និង​ជួយ​ការពារ​ដីធ្លី​របស់​ឧកញ៉ា ពី​ការរំលោភបំពាន​របស់​អ្នកមានអំណាច​បុណ្យស័ក្តិ​ផងដែរ ។​

​ដោយឡែក គណៈកម្មការ​គ្រប់គ្រង​អចលនទ្រព្យ​កងទ័ពជើងទឹក​មូលដ្ឋាន​សមុទ្រ​ក៏បាន​ចេញ​លិខិត​បំភ្លឺ​មួយ​ថ្មី​ទៀត​លេខ​០០៥/២០២២​ម​ដស ចុះ​ថ្ងៃទី​១៩ ខែកុម្ភៈ ឆ្នាំ​២០២២ សម្តែង​នូវ​ការក្តៅក្រហាយ និង​ការមិន​ពេញចិត្ត​យ៉ាងខ្លាំង​ទៅនឹង​លិខិត​ឆ្លើយតប​ចុះ​ថ្ងៃទី​១៨ ខែកុម្ភៈ ឆ្នាំ​២០២២​របស់​ឧកញ៉ា តែ តាំង​ប៉ ដោយ​គណៈកម្មការ​នេះ​ទាមទារ​ឲ្យ​មានការ​បញ្ឈប់​ជាបន្ទាន់​នូវ​ការចេញផ្សាយ​រាល់​ព័ត៌មាន​មិន​ពិត​ធ្វើឡើង​ដោយ​ឧកញ៉ា តែ តាំង​ប៉ (Sic!) ។​

​មជ្ឈដ្ឋាន​អ្នកតាមដាន​សំណុំ​រឿងក្តី​ទំនាស់​ដីធ្លី​រវាង​ឧកញ៉ា និង​ភរិយា​របស់​មេ​ទ័ពជើងទឹក​មូលដ្ឋាន​សមុទ្រ​នេះ បាន​នឹង​កំពុង​ទន្ទឹងរង់ចាំ​ចង់ដឹងថា តើ​ឧកញ៉ា តែ តាំង​ប៉ ការពារ​ដី​ធ្លឺ​ជា​កម្មសិទ្ធិ​របស់ខ្លួន​តា​ម​របៀប​ណាត​ទៅទៀត និង​តើ​ថ្នាក់ដឹកនាំ​គ្រប់​ជាន់ថ្នាក់​នឹង​ជួយ​អន្តរាគមន៍​តាមរបៀប​ណា​ដែរ ?

​លោក តែ តាំង​ប៉ ដែលជា​អ្នកជំនួញ​ដ៏​សកម្ម​ម្នា​ក់នៅ​កម្ពុជា​ទទួលបាន​ការតែងតាំង​គោរមងារ​ជា​ឧកញ៉ា ដោយ​ព្រះរាជក្រឹត្យ​លេខ​នស​/​រកត​/០៧០១/២២៩ ចុះ​ថ្ងៃទី​១១ ខែកក្កដា ឆ្នាំ​២០០១ ៕​

Filed in: Feature, តុលាការ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.