ថ្ងៃ ពុធ ទី ២៥ ខែ ឧសភា ឆ្នាំ ២០២២

ផ្កាយ​៣​ប៉ូលិស​អតីត​ឧកញ៉ា​ជាប់ឃុំ ! ទីបំផុត​ឧ​ត្ត​ម​សេនីយ៍​ឯក​ប៉ូលិស​អតីត​ឧកញ៉ា ឌួង ងៀប ត្រូវបាន​តុលាការ​ឃុំខ្លួន​ដាក់ពន្ធនាគារ​ក្នុង​រឿង​ចេញ​សែក​ស្អុយ​មាន​ទំហំ​ទឹកប្រាក់​ជាង​៧​លាន​ដុល្លារ​អាមេរិក​

ទីបំផុត នៅ​ថ្ងៃទី​១៤ ខែកុម្ភៈ ឆ្នាំ​២០២២​ដែលជា​ទិវា​នៃ​សេចក្តីស្រឡាញ់​នេះ លោក​ឧ​ត្ត​ម​សេនីយ៍​ឯក និង​ជា​អតីត​ឧកញ៉ា ឌួង ងៀប អគ្គលេខាធិការរង​នៃ​អគ្គលេខាធិការដ្ឋាន​ក្រសួងមហាផ្ទៃ និង​ជា​អ្នកជំនួញ​ដ៏​សកម្ម​ម្នា​ក់នៅ​កម្ពុជា​ត្រូវបាន​ចៅក្រម​ស៊ើបសួរ​សាលាដំបូង​រាជធានី​ភ្នំពេញ​សម្រេច​ឃុំខ្លួន​ដាក់ពន្ធនាគារ​បណ្តោះអាសន្ន​ក្រោម​ការចោទប្រកាន់​ពីបទ​ឆបោក និង​មិន​បំពេញ​កាតព្វកិច្ច​ចំពោះ​ឧបករណ៍​អាច​ជួញដូរ​បាន មាន​ទំហំ​ទឹកប្រាក់​ជាង​៧​លាន​ដុល្លារ​អាមេរិក បន្ទាប់ពី​សមត្ថកិច្ច​ម​ន្ត្រី​នគរបាល​យុត្តិធម៌​ឃាត់ខ្លួន​នា​ថ្ងៃ​ដដែល ។

​កាលពី​ថ្ងៃទី​១០ ខែកុម្ភៈ ឆ្នាំ​២០២២​កន្លងទៅ​ថ្មីៗ អ្នកនាំពាក្យ​សាលាដំបូង​រាជធានី​ភ្នំពេញ​បាន​បំភ្លឺ​បញ្ជាក់​ឲ្យ​ដឹងថា​ឈ្មោះ ដួង ងៀប ត្រូវបាន​ជនជាតិ​ចិន​ចំនួន​២​នាក់ គឺ​ឈ្មោះ Chih Yu Yen និង​ឈ្មោះ Yao Ching King ដាក់ពាក្យ​ប្តឹង​ពាក់ព័ន្ធ​នឹង​ករណី​លក់​អចលនវត្ថុ​មួយកន្លែង ដែល​អ្នកទិញ​ជាដើម​បណ្តឹង​បានប្រគល់​ប្រាក់​ថ្លៃ​ទិញ​ដី​គ្រប់​ចំនួន​៧ ៣០៥ ០០០ ដុល្លារ​អាមេរិក​ឲ្យ​ជន​ត្រូវ​ចោទ​ឈ្មោះ ដួង ងៀប រួចរាល់ ប៉ុន្តែ​ជន​ត្រូវ​ចោទ​មិនមាន​ដីធ្លី​ប្រគល់​ឲ្យ​ទៅ​អ្នកទិញ​នោះឡើយ ។

​មន្ត្រី​អ្នកនាំពាក្យ​សាលាដំបូង​រាជធានី​ភ្នំពេញ​បានបញ្ជាក់​ឲ្យ​ដឹង​ទៀតថា ក្នុងដំណាក់កាល​សម្រប​សម្រួល​ដោះស្រាយ​ទំនាស់​នេះ លោក​ឧ​ត្ត​ម​សេនីយ៍​ឯក ដួង ងៀប បានចេញ​មូល​ប្ប​ទា​នប​ត្រ​ចំនួន​៣​សន្លឹក​មានតម្លៃ​ទឹកប្រាក់​សរុប​ចំនួន​៧ ៣០៥ ០០០​ដុល្លារ​អាមេរិក ។ លុះ​ដល់ពេល​ដើមបណ្តឹង​ទៅ​បើកប្រាក់​នៅ​ធនាគារ​ក៏ត្រូវ​បាន​ធនាគារ​បញ្ជាក់ថា មូល​ប្ប​ទា​នប​ត្រ​ទាំង​៣​សន្លឹក​នោះ​គ្មាន​សាច់ប្រាក់​ទេ ។​

​លោក ឌួង ងៀប ដែលជា​អ្នកជំនួញ​ដ៏​សកម្ម​ម្នាក់​នៅ​កម្ពុជា​ធ្លាប់​ទទួលបាន​ការតែងតាំង​គោរមងារ​ជា​ឧកញ៉ា ដោយ​ព្រះរាជក្រឹត្យ​លេខ​នស​/​រកត​/០៥០៨/៥៥៧ ចុះ​ថ្ងៃទី​២០ ខែឧសភា ឆ្នាំ​២០០៨ ។ ក្រៅពី​មាន​ងារ​ជា​ឧកញ៉ា​នោះ គឺ​ឧកញ៉ា ដួង ងៀប ក៏​ជា​នាយ​នគរបាល​ថ្នាក់​ឧ​ត្ត​ម​សេនីយ៍​ឯក (​ផ្កាយ​៣) អត្តលេខ​០៥៥៣ ក្នុង​ក្របខ័ណ្ឌ​មន្ត្រី​នគរបាលជាតិ​កម្ពុ​ជា​ក្រសួងមហាផ្ទៃ​ផងដែរ ។

​លោក​ឧ​ត្ត​ម​សេនីយ៍ ដួង ងៀប ទទួលបាន​ការតែងតាំង​មុខតំណែង​ជា​អគ្គលេខាធិការរង​នៃ​អគ្គលេខាធិការដ្ឋាន​ក្រសួងមហាផ្ទៃ​តាំងពី​មាន​ឋានន្តរស័ក្តិ​ថ្នាក់​ឧ​ត្ត​ម​សេនីយ៍​ត្រី (​ផ្កាយ​១) មកម្ល៉េះ ដោយ​អនុក្រឹត្យ​លេខ​៩០៦​អនក្រ​.​ត​ត ចុះ​ថ្ងៃទី​១០ ខែមិថុនា ឆ្នាំ​២០១៤ ។

​ក្រោយមក លោក​ឧ​ត្ត​ម​សេនីយ៍​ឯក ដួង ងៀប ក៏ត្រូវ​បានបញ្ចប់​គោរមងារ​ជា​ឧកញ៉ា​វិញ​ត្រឹម​រក្សា​ក្របខ័ណ្ឌ​ជា​នាយ​នគរបាល​ថ្នាក់​ឧ​ត្ត​ម​សេនីយ៍​ក្រសួងមហាផ្ទៃ​ដដែល ដោយ​ព្រះរាជក្រឹត្យ​លេខ​នស​/​រកត​/១១១៩/១៧៥១ ចុះ​ថ្ងៃទី​២៣ ខែវិច្ឆិកា ឆ្នាំ​២០១៩ ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.