ថ្ងៃ ពុធ ទី ១៩ ខែ មករា ឆ្នាំ ២០២២

​ព្រោះតែ​ប្រយោជន៍​ផ្ទាល់ខ្លួន ? ពាណិជ្ជករ​ម្នាក់​ឈ្មោះ Pierre Ader ដែល​សម្អុយ​កេរ្តិ៍ឈ្មោះ​រាជរដ្ឋាភិបាល​កម្ពុជា​ដ​ល់​ប្រទេស​បារាំង បែរ​ជាមាន​មន្ត្រី «​ក្រោម​ក្លៀក​នាយករដ្ឋមន្ត្រី​» ខ្លះ «​អែបអប​» ឈ្មួញ​បារាំង​រូបនេះ​ទៅវិញ

ដូច​ប្រិយមិត្ត​អ្នកអាន​បាន​ជ្រាប​រួចហើយ​តាមរយៈ​ការផ្សព្វផ្សាយ​របស់​គេហ​ទំព័រសារព័ត៌មាន​ដើមត្នោត​នាពេល​កន្លងមក​បាន​លាត​ត្រដាង​ឲ្យ​ឃើញថា ពាក់ព័ន្ធ​នឹង​សំណុំ​រឿងក្តី​វិវាទ​ផ្ទៃក្នុង​រ៉ាំ​រៃ​របស់​ម្ចាស់​ភាគហ៊ុន​នៃ​ក្រុមហ៊ុន Victoria Angkor Company Limited សរសេរ​កាត់​ថា (VAK) ដែល​វិនិយោគ​លើ​សេវាកម្ម​សណ្ឋាគារ​លំដាប់​ផ្កាយ​៥​មួយ​ឈ្មោះ Victoria Angkor Resort & Spa នៅ​ខេត្តសៀមរាប​នោះ គឺ​បុរស​ជនជាតិ​បារាំង​ឈ្មោះ Pirre Ader ជា​ម្ចាស់​ភាគហ៊ុន​តូច​នៅក្នុង​ក្រុមហ៊ុន VAk (​មាន​ភាគហ៊ុន​ចំនួន​០២%) រួម​ដៃ​ជាមួយ​បុរស​វ័យ​ចំណាស់​ជនជាតិ​បារាំង​ម្នាក់ទៀត​ឈ្មោះ Bernard Gauthier ជា​ម្ចាស់​ភាគហ៊ុន​តូច​ចំនួន​២៣% ក្នុង​ក្រុមហ៊ុន VAK ជា «​មេ​នាំ​ភ្លើង​ប្តឹង​ហើយ​ប្តឹង​ទៀត​» ប្រឆាំងនឹង​លោក Francois Gontier ជា​អ្នកតំណាង​ឲ្យ​ម្ចាស់​ភាគហ៊ុន​ធំ​ចំនួន​៧៥%​ក្នុង​ក្រុមហ៊ុន VAK ទាំង​សំណុំរឿង​រក្សា​ការពារ ទាំង​សំណុំរឿង​រដ្ឋប្បវេណី (​អង្គសេចក្តី​) ទាំង​សំណុំរឿង​ព្រហ្មទណ្ឌ រហូត​ធ្វើ​ឲ្យ​ក្រុមហ៊ុន VAK គ្មាន​ឱកាស និង​លទ្ធភាព​អភិវឌ្ឍន៍​ខ្លួន​បានឡើយ ឬ​និយាយ​តាមរបៀប​សាមញ្ញ​មួយបែប​ទៀតថា ដំណើរការ​ងើប​ក្បាល​មិន​រួច ហើយ​សល់​តែ​បំណុល (​សូម​អាន​ការផ្សព្វផ្សាយ​របស់​គេហ​ទំព័រសារព័ត៌មាន​ដើមត្នោត ចុះ​ថ្ងៃទី​០៧ ខែធ្នូ ឆ្នាំ​២០២១​បន្ថែម​) ។

​គ្រប់​ពាក្យបណ្តឹង​របស់​បុរស​ឈ្មោះ Pierre Ader ដែល​ប្តឹង​ប្រឆាំងនឹង​លោក Francois Gontier ចាប់តាំងពី​អំឡុង​ឆ្នាំ​២០០៩​រហូតដល់​ចុងឆ្នាំ​២០១៨ (​ដំណើរការ​នីតិវិធីរឿងក្តី​អស់​រយៈពេល​ប្រមាណ​ជាង​៩​ឆ្នាំ​) នៅ​ទីបំផុត​គឺ​សុទ្ធតែ​ទទួលបាន​លទ្ធផល «​បរាជ័យ​» ទាំងអស់ ។ លើសពីនេះ ទាំង​បុរស​ឈ្មោះ Bernard Gauthier (​ម្ចាស់​ភាគហ៊ុន​ចំនួន​២៣%) ទាំង​បុរស​ឈ្មោះ Pierre Ader (​ម្ចាស់​ភាគហ៊ុន​ចំនួន​០២%) ត្រូវបាន​ស្ថាប័ន​តុលាការ​នៃ​ព្រះរាជាណាចក្រ​កម្ពុជា​វិនិច្ឆ័យ​សេចក្តីសម្រេច​បញ្ឈប់​ភាគហ៊ុន​ពី​ក្នុង​ក្រុមហ៊ុន VAK ទាំងស្រុង ហើយ​ប្រគល់​សិទ្ធិ​ឲ្យ​លោក Francois Gontier គ្រប់គ្រង​ក្រុមហ៊ុន VAK បន្ត តាម​អំណាច​សាលដីកា​រដ្ឋប្បវេណី​លេខ​៣៧២(​ឈ​) ចុះ​ថ្ងៃទី​១៤ ខែធ្នូ ឆ្នាំ​២០១៧ របស់​តុលាការ​កំពូល ។ ទោះយ៉ាងណា​ក្តី ក្រុមហ៊ុន VAK មិនទាន់​ទទួលបាន​នូវ​ការធ្វើ​បច្ចុប្បន្នភាព​ចុះបញ្ជី​រប​ស់​ខ្លួន​នៅ​ក្រុមប្រឹក្សា​អភិវឌ្ឍន៍​កម្ពុជា (CDC) និង​នៅ​ក្រសួងពាណិជ្ជកម្ម (MOC) ជា​ផ្លូវការ​នៅឡើយ ចាប់តាំងពី​អំឡុង​ឆ្នាំ​២០០៣​រហូតមកដល់​បច្ចុប្បន្ន​នេះ​ដោយសារ​មាន​បណ្តឹង​ទប់ស្កាត់​ពី​សំណាក់​បុរស​ឈ្មោះ Pierre Ader ។

​ទាក់ទង​នឹង​ពាក្យបណ្តឹង​ចុះ​ថ្ងៃទី​២១ ខែសីហា ឆ្នាំ​២០០៩​របស់​បុរស​ឈ្មោះ Pierre Ader ដែល​ប្តឹង​ប្រឆាំងនឹង​លោក Francois Gontier ចោទប្រកាន់​ពីបទ​រំលោភ​លើ​ទំនុកចិត្ត​នោះ ត្រូវបាន​ស្ថាប័ន​តុលាការ​កំពូល​វិនិច្ឆ័យ​សេចក្តីសម្រេច​ឲ្យ​លោក Francois Gontier រួចផុត​ពីបទ​ចោទប្រកាន់​ជា​ស្ថាពរ តាម​អំណាច​សាលដីកា​ព្រហ្មទណ្ឌ​លេខ​៣៩០ ចុះ​ថ្ងៃទី​០៧ ខែកញ្ញា ឆ្នាំ​២០១៨ ។ មិនតែប៉ុណ្ណោះ ពាក់ព័ន្ធ​នឹង​ពាក្យបណ្តឹង​របស់​បុរស​ឈ្មោះ Pierre Ader ដែល​ប្តឹង​ប្រឆាំងនឹង​លោក Francois Gontier ចោទប្រកាន់​ពីបទ​ល្មើស​ព្រហ្មទណ្ឌ​នេះដែរ ធ្លាប់​ត្រូវបាន​រាជរដ្ឋាភិបាល​កម្ពុជា​ដែលមាន​សម្តេច​អគ្គមហាសេនាបតី​តេ​ជោ ហ៊ុន សែន ជា​ប្រមុខ បានសម្រេច​បញ្ឈប់​សំណុំ​រឿងក្តី​ព្រហ្មទណ្ឌ និង​ទុក​លទ្ធភាព​ឲ្យ​គូភាគី​ប្តឹងផ្តល់​គ្នា​ក្នុង​រឿង​វិវាទ​ពាណិជ្ជកម្ម​ជា​រឿង​រដ្ឋប្បវេណី​វិញ តាម​ស្មារតី​លិខិត​លេខ​៣៦៣​សជណ ចុះ​ថ្ងៃទី​១៦ ខែមិថុនា ឆ្នាំ​២០១៥ របស់​ទីស្តីការគណៈរដ្ឋមន្ត្រី ។

​កិច្ច​អន្តរាគមន៍​របស់​រាជ​រដ្ឋាភិបាល​កម្ពុជា​ក្នុង​សំណុំរឿង​ព្រហ្មទណ្ឌ​នៅ​ស្ថាប័ន​តុលា​ការដែល​កើតចេញពី​ពាក្យបណ្តឹង​ចោទប្រកាន់​របស់​បុរស​ម្ចាស់​ភាគហ៊ុន​តូច​ក្នុង​ក្រុមហ៊ុន VAK ឈ្មោះ Pierre Ader តាម​ស្មារតី​លិខិត​លេខ​៦៦៣​សជណ ចុះ​ថ្ងៃទី​១៦ ខែមិថុនា ឆ្នាំ​២០១៥​របស់​ទីស្តីការគណៈរដ្ឋមន្ត្រី​នោះ បានធ្វើ​ឲ្យ​បុរស​ឈ្មោះ Pierre Ader ដែល​ធ្លាប់មាន​ទំនាក់ទំនង​ល្អ​ជាមួយ​មន្ត្រី​មានអំណាច និង​មាន​ឥទ្ធិពល​ស្ថិតនៅ «​ក្រោម​ក្លៀក​សម្តេច​អគ្គមហាសេនាបតី​តេ​ជោ​នាយករដ្ឋមន្ត្រី​» ខ្លះ សម្តែង​នូវ​ការក្តៅក្រហាយ​យ៉ាងខ្លាំង​ក្លា​រហូត​ឈានទៅ​ធ្វើ​សកម្មភាព «​សម្អុយ​កេរ្តិ៍ឈ្មោះ​រាជរដ្ឋាភិបាល​កម្ពុជា​» ដល់​ប្រទេស​បារាំង​យ៉ាងសកម្ម​ទៀតផង ។

​ប្រភព​ស្និទ្ធ​នឹង​សមាជិក​ម្ចាស់​ភាគហ៊ុន​មួយចំនួន​នៃ​ក្រុមហ៊ុន Electricite et Eaux de Madagascar សរសេរ​កាត់​ថា (EEM) ដែល​ចុះបញ្ជី​ពាណិជ្ជកម្ម​នៅ​ប្រទេស​បារាំង និង​ជា​ក្រុមហ៊ុន​មាន​ម្ចាស់​ភាគហ៊ុន​ធំ​ចំនួន​៧៥%​នៅក្នុង​ក្រុមហ៊ុន VAK ចុះបញ្ជី​ពាណិជ្ជកម្ម​ក្រោម​ច្បាប់​នៃ​ព្រះរាជាណាចក្រ​កម្ពុជា​នោះបាន​ឲ្យ​ដឹងថា នៅ​ទឹកដី​ប្រទេស​បារាំង បុរស​ឈ្មោះ Pierre Ader បាន​សម្អុយ​កេរ្តិ៍ឈ្មោះ រាជរដ្ឋាភិបាល​កម្ពុជា​ពាក់ព័ន្ធ​នឹង​កិច្ច​អន្តរាគមន៍​របស់​រាជ​រដ្ឋាភិបាល​កម្ពុជា តាម​ស្មារតី​លិខិត​លេខ​៦៦៣​សជណ ចុះ​ថ្ងៃទី​១៦ ខែមិថុនា ឆ្នាំ​២០១៥​របស់​ទីស្តីការគណៈរដ្ឋមន្ត្រី​ថា រំលោភ​លើ​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា និង​មន្ត្រីរាជការ​សាធារណៈ​នៅ​ប្រទេស​កម្ពុជា​ប្រព្រឹត្ត​អំពើពុករលួយ​ទទួល​ប្រាក់​សំណូក​ចំនួន​១​លាន​ដុល្លារ​អាមេរិក​ពី​លោក Francois Gontier (Sic!) ។

​ប្រការ​គួរ​ឲ្យ​ចាប់អារម្មណ៍​ផង និង​ហួសចិត្ត​បំផុត​ផង​នោះ គឺ​នៅត្រង់ថា ទោះបី​បុរស​ឈ្មោះ Pierre Ader បានធ្វើ​សកម្មភាព​សម្អុយ​កេរ្តិ៍ឈ្មោះ​រាជរដ្ឋាភិបាល​កម្ពុជា​នៅលើ​ទឹកដី​ប្រទេស​បារាំង​ពេញបន្ទុក​ពាក់ព័ន្ធ​នឹង​កិច្ច​អន្តរាគមន៍​របស់​រាជ​រដ្ឋាភិបាល​កម្ពុជា​យ៉ាងណាក្តី បែរ​ជាមាន​មន្ត្រី​មាន​ឥទ្ធិពល និង​មានអំណាច​ស្ថិត «​ក្រោម​ក្លៀក​សម្តេច​អគ្គមហាសេនាបតី​តេ​ជោ​នាយករដ្ឋមន្ត្រី​» មួយចំនួន​ប្រឹងប្រែង «​អែបអប​» ឈ្មួញ​ជនជាតិ​បារាំង​រូបនេះ​យ៉ាងសកម្ម (​បុរស​ឈ្មោះ Pierre Ader មិន​ត្រឹមតែ​ជា​ម្ចាស់​ភាគហ៊ុន​តូច​នៅក្នុង​ក្រុមហ៊ុន VAK ប៉ុណ្ណោះ​ទេ គឺជា​អភិបាល​ក្រុមហ៊ុន Fine Sky Investment Cambodia Limited មាន​ទីតាំង​ស្ថិតនៅ​រាជធានី​ភ្នំពេញ និង​ជា​ម្ចាស់​ភាគហ៊ុន​នៃ​ក្រុមហ៊ុន Heritage Ltd. ដែល​វិនិយោគ​លើ​សេវាកម្ម​សណ្ឋាគារ​ឈ្មោះ Heritage Suite Hotel ស្ថិតនៅ​ខេត្តសៀមរាប ទៀតផង​) ទៅវិញ (Resic!) ។​

​មជ្ឈដ្ឋាន​អ្នកច្បាប់​ឯករាជ និង​អ្នកវិភាគ​កិច្ចការ​សង្គម​នៅ​កម្ពុជា​បាន​បញ្ចេញ​ទស្សនៈ​ថា អនុលោម​តាម​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា គឺ​ស្ថាប័ន​នីតិប្រតិបត្តិ (​រាជរដ្ឋាភិបាល​) មិនអាច​ជ្រៀត​ជ្រែកចូល ឬ​រំលោភ​លើ​ឯករាជ្យភាព​នៃ​អំណាចតុលាការ​បានទេ ប៉ុន្តែ​ប្រាកដ​ណាស់​ប្រមុខ​រាជរដ្ឋាភិបាល​អាចធ្វើ​យុត្តិសាស្ត្រ (​នយោបាយ​យុត្តិធម៌​) ដើម្បី​សើរើ​ស្វែងរក​យុត្តិធម៌​ជូន​ភាគី​ណាមួយ​ដែល​រង​អំពើ​អយុត្តិធម៌ ជាពិសេស​រួមទាំង​វិនិយោគិន​បរទេស​សុចរិត​ផង (​តាម​ស្មារតី​លិខិត សជណ របស់​ទីស្តីការគណៈរដ្ឋមន្ត្រី​) បាន ។ លើសពីនេះ ភាគី​ឈ្មោះ Pierre Ader បាន​សម្អុយ​កេរ្តិ៍ឈ្មោះ​រាជរដ្ឋាភិបាល​កម្ពុជា​ទៅហើយៗ​ក៏​មានន័យថា ឈ្មោះ Pierre Ader បាន​សម្អុយ​កេរ្តិ៍ឈ្មោះ​ស្ថាប័ន​តុលាការ​កម្ពុជា​ផងដែរ ពីព្រោះ​ស្ថាប័ន​តុលាការ​កំពូល​បាន​វិនិច្ឆ័យ​សេចក្តីសម្រេច​ឲ្យ​លោក Francois Gontier បាន​រួចផុត​ពីបទ​ចោទប្រកាន់​ជា​ស្ថាពរ តាម​អំណាច​សាលដីកា​ព្រហ្មទណ្ឌ​លេខ​៣៩០ ចុះ​ថ្ងៃទី​០៧ ខែកញ្ញា ឆ្នាំ​២០១៨ ។

​អ្នកវិភាគ​កិច្ចការ​សង្គម​នៅ​កម្ពុជា និង​អ្នកតាមដាន​សំណុំ​រឿងក្តី​ពាក់ព័ន្ធ​នឹង​វិវាទ​ផ្ទៃក្នុង​ក្រុមហ៊ុន VAK ដ៏​រ៉ាំ​រៃ​នោះ បាន​សំណូមពរ​ចំពោះ​ឯកឧត្តម កើត រិ​ទ្ធ រដ្ឋមន្ត្រី​ក្រសួងយុត្តិធម៌ និង​ជា​សមាជិក​ឧ​ត្ត​ម​ក្រុមប្រឹក្សា​នៃ​អង្គចៅក្រម មេត្តា​ត្រួត​ពិនិត្យមើល​សកម្មភាព​របស់​បុរស​ពាណិជ្ជករ​ជនជាតិ​បារាំង​ឈ្មោះ Pierre Ader ដែល​ព្យាយាម​សម្អុយ​កេរ្តិ៍ឈ្មោះ​រាជរដ្ឋាភិបាល​កម្ពុជា និង​ស្ថាប័ន​តុលាការ​នៃ​ព្រះរាជាណាចក្រ​កម្ពុជា​ផង ៕​

Filed in: Feature, តុលាការ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.