ថ្ងៃ ពុធ ទី ១៩ ខែ មករា ឆ្នាំ ២០២២

ឪពុក​មើលរំលង​ផ្កាយ​លើ​ស្មា​កូន​យូរពេក​ហើយ​ទេ​ដឹង ? ឯកឧត្តម​ឧ​ត្ត​ម​សេនីយ៍ ហ៊ុន ម៉ា​ណែ​ត ពាក់​ផ្កាយ «​ក្រិន​» ត្រឹម​៣ មិន​ខ្ចី​ឡើង​៤ មិន​ស័ក្តិសម​នឹង​មុខតំណែង​សោះ

អស់​រយៈពេល​ជាង​៣​ឆ្នាំ​ហើយ​ដែល​ឯកឧត្តម​ឧ​ត្ត​ម​សេនីយ៍​ឯក ហ៊ុន ម៉ា​ណែ​ត នាយទាហានជាន់ខ្ពស់​នៃ​កងយោធពល​ខេមរភូមិន្ទ​ក្រសួងការពារជាតិ អត្តលេខ​០៣៣៨៨៣ និង​ត្រូវជា​កូនប្រុស​ច្បង​របស់​សម្តេច​អគ្គមហាសេនាបតី​តេ​ជោ​នាយ​ឧ​ត្ត​ម​សេនីយ៍​ផុត​លេខ​ផ្កាយ​មាស​៥ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ទទួលបាន​ការតែងតាំង​ជា​អគ្គ​មេបញ្ជាការរង​នៃ​កងយោធពល​ខេមរភូមិន្ទ បន្ថែម​លើ​មុខងារ​បច្ចុប្បន្ន (​ដោយ​ព្រះរាជក្រឹត្យ​លេខ​នស​/​រកត​/០៧១៨/៦៩៥ ចុះ​ថ្ងៃទី​០៦ ខែកក្កដា ឆ្នាំ​២០១៨) និង​ទទួលបាន​ការតែងតាំង​ជា​មេបញ្ជាការ​កងទ័ពជើងគោក បន្ថែម​លើ​មុខងារ​បច្ចុប្បន្ន (​ដោយ​ព្រះរាជក្រឹត្យ​លេខ​នស​/​រកត​/០៩១៨/៩៣៣ ចុះ​ថ្ងៃទី​០៦ ខែកញ្ញា ឆ្នាំ​២០១៨) ប៉ុន្តែ​ឯកឧត្តម​ឧ​ត្ត​ម​សេនីយ៍​យោធា​រូបនេះ​នៅតែមាន​ឋានន្តរស័ក្តិ​ត្រឹម​ថ្នាក់​ឧ​ត្ត​ម​សេនីយ៍​ឯក (​ផ្កាយ​៣) រហូតទល់​សព្វថ្ងៃ​ទោះបីជា​បាន​ឡើង​មុខតំណែង​ជំនួស​តំណែង​ឯកឧត្តម​នាយ​ឧ​ត្ត​ម​សេនីយ៍​ផ្កាយ​មាស​៤ មាស សុភា នាយទាហានជាន់ខ្ពស់​នៃ​កងយោធពល​ខេមរភូមិន្ទ​ក្រសួងការពារជាតិ អត្តលេខ​០០០០១៦ អតីត​ជា​អគ្គមេបញ្ជាការ​រង​នៃ​កងយោធពល​ខេមរភូមិន្ទ និង​ជា​មេបញ្ជាការ​កងទ័ពជើងគោក (​បច្ចុប្បន្ន​ជា ទេសរដ្ឋមន្ត្រី​ទទួលបន្ទុក​បេសកកម្ម​ពិសេស​) ក៏ដោយ ។

​ការទទួលបាន​មុខតំណែង​ជា​អគ្គ​មេបញ្ជាការរង​នៃ​កងយោធពល​ខេមរភូមិន្ទ និង​ជា​មេបញ្ជាការ​កងទ័ពជើងគោក​ជំនួសមុខ​តំណែង​របស់​ឯកឧត្តម​នាយ​ឧ​ត្ត​ម​សេនីយ៍​ផ្កាយ​មាស​៤ មាស សុភា នេះ គឺមាន​រយៈពេល​ប្រមាណ​៥​ឆ្នាំក្រោយ បន្ទាប់ពី​ឯកឧត្តម​ឧ​ត្ត​ម​សេនីយ៍ ហ៊ុន ម៉ា​ណែ​ត ទទួលបាន​ការដំឡើង​ឋានន្តរស័ក្តិ​ថ្នាក់​ឧ​ត្ត​ម​សេនីយ៍​ឯក (​ផ្កាយ​៣) ដោយ​ព្រះរាជក្រឹត្យ​លេខ​នស​/​រកត​/០៦១៣/៦៧១ ចុះ​ថ្ងៃទី​១៩ ខែមិថុនា ឆ្នាំ​២០១៣ ។

​នៅក្រោយពេល​ទទួលបាន​ការដំឡើង​ឋានន្តរស័ក្តិ​ថ្នាក់​ឧ​ត្ត​ម​សេនីយ៍​ឯក (​ផ្កាយ​៣) នា​ពាក់កណ្តាល​ឆ្នាំ​២០១៣​រួចមក ឯកឧត្តម​ឧ​ត្ត​ម​សេនីយ៍​ឯក ហ៊ុន ម៉ា​ណែ​ត ធ្លាប់បាន​បង្កើត​នូវ​រូបភាព និង​សកម្មភាព​ដ៏​គួរ​ឲ្យ​ចាប់អារម្មណ៍ និង​ប្លែក​ហួស​ពី​ការគិត​រហូតដល់​ទទួល​រង​ការផ្សព្វផ្សាយ​ពី​គេហទំព័រ​សារព័ត៌មាន​ដើមត្នោត​ទៀតផង គឺ «​ការពាក់​ឯកសណ្ឋាន​ភ្ជាប់​នឹង​ឋានន្តរស័ក្តិ​ផ្កាយ​២​លើ​ស្មា ខណៈ​ខ្លួន​មាន​ឋានន្តរស័ក្តិ​ថ្នាក់​ផ្កាយ​៣» អស់​រយៈពេល​ដល់​កម្រិត​គិត​ជា​ឆ្នាំ ។

​បើ​និយាយ​អំពី​មុខតំណែង​គិត​ត្រឹម​ឆ្នាំ​២០២១​នៅក្នុង​គណបក្ស​ប្រជាជន​កម្ពុជា (CPP) វិញ គឺ​ឯកឧត្តម​ឧ​ត្ត​ម​សេនីយ៍​ឯក ហ៊ុន ម៉ា​ណែ​ត ជា​សមាជិក​គណៈអចិន្ត្រៃយ៍​លំដាប់​លេខ​រៀង​ទី​៣៧​នៃ​គណៈកម្មាធិការ​កណ្តាល និង​ជា​ប្រធាន​យុវជន​គណបក្ស​ប្រជាជន​កម្ពុជា​ថ្នាក់កណ្តាល (​តែងតាំង និង​ដំឡើង​ឋានៈ ដោយ​សេចក្តីសម្រេច​លេខ​៤០៩/២០​សស​.​គក ចុះ​ថ្ងៃទី​០៨ ខែមិថុនា ឆ្នាំ​២០២០) ខណៈ​ក្នុងចំណោម​សមាជិក​គណៈអចិន្ត្រៃយ៍​នៃ​គណៈកម្មាធិការ​កណ្តាល​គ​ណ​បក្ស​ប្រជាជន​កម្ពុជា​ដែលមាន​ក្របខ័ណ្ឌ​ដើម​ជា​នាយទាហាន និង​ជា​នាយ​នគរបាលជាតិ សុទ្ធ​តែមាន​ឋានន្តរស័ក្តិ​ថ្នាក់​នាយ​ឧ​ត្ត​ម​សេនីយ៍ (​ផ្កាយ​៤) យ៉ាង​ទាប​បំផុត រួមមាន​ជាអាទិ៍ ៖ ១-​សម្តេច​ពិជ័យ​សេនា ទៀ បាញ់​, ២-​លោកជំទាវ​កិត្តិ​សង្គហ​បណ្ឌិត ម៉ែន សំអន​, ៣-​ឯកឧត្តម កែ គឹមយ៉ាន​, ៤-​ឯកឧត្តម ប៉ុល សារឿន​, ៥-​ឯកឧត្តម គន់ គីម​, ៦-​ឯកឧត្តម មាស សុភា​, ៧-​ឯកឧត្តម​សន្តិ​បណ្ឌិត នេ​ត សាវឿន​, ៨-​ឯកឧត្តម ប្រាក់ សុខុន​, ៩-​ឯកឧត្តម វង្ស ពិ​សេន​, ១០-​ឯកឧត្តម សៅ សុខា និង ១១-​ឯកឧត្តម ឥត សារ៉ាត់ ។

​បច្ចុប្បន្ន ឯកឧត្តម​ឧ​ត្ត​ម​សេនីយ៍​ឯក ហ៊ុន ម៉ា​ណែ​ត អាយុ​៤៤​ឆ្នាំ បាន និង​កំពុង​កាន់កាប់​មុខតំណែង និង​តួនាទី​យ៉ាងច្រើន​គួរសម រួមមាន ៖ ១-​អគ្គមេបញ្ជាការ​រង​នៃ​កងយោធពល​ខេមរភូមិន្ទ​, ២-​មេបញ្ជាការ​កងទ័ពជើងគោក​, ៣-​មេបញ្ជាការ​បញ្ជាការដ្ឋាន​ជាតិ​កម្លាំង​ពិសេស​ប្រឆាំង​ភេរវកម្ម​, ៤-​មេបញ្ជាការរង​នៃ​បញ្ជាការដ្ឋាន​អង្គរក្ស​, ៥-​អនុប្រធាន​គណៈកម្មកា​រ​សម្រាប់​ដោះស្រាយ​បញ្ហា​កូដកម្ម បាតុកម្ម​នៅតាម​គ្រប់​មុខសញ្ញា​, ៦-​អនុប្រធាន​ប្រចាំការ​នៃ​ក្រុមការងារ​ពិសេស​ថ្នាក់ជាតិ​ទទួលបន្ទុក​កិច្ចការ​អធិបតេយ្យ​នៃ​ព្រះរាជាណាចក្រ​កម្ពុជា​, ៧-​អនុប្រធាន​ក្រុមការងារ​ស្រាវជ្រាវ ផ្តល់យោបល់​ផ្នែក​អភិបាលកិច្ច​សន្តិសុខ​, ៨-​សមាជិក​ក្រុមប្រឹក្សា​កំណែទម្រង់​កងយោធពល​ខេមរភូមិន្ទ​…​។​ល​។

​កាលពី​ថ្ងៃទី​០២ ខែធ្នូ ឆ្នាំ​២០២១​កន្លងទៅ​ថ្មីៗ​នេះ សម្តេច​អគ្គមហាសេនាបតី​តេ​ជោ​នាយ​ឧ​ត្ត​ម​សេនីយ៍​ផុត​លេខ​ផ្កាយ​មាស​៥ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា និង​ជា​ប្រធាន​គណបក្ស​ប្រជាជន​កម្ពុជា (CPP) បច្ចុប្បន្ន បានប្រកាស​នៅ​ខេត្ត​ព្រះសីហនុ​ធ្វើការ​គាំទ្រ​ឯកឧត្តម​ឧ​ត្ត​ម​សេនីយ៍​ឯក ហ៊ុន ម៉ា​ណែ​ត ត្រូវជា​កូនប្រុស​ច្បង​ជា​បេក្ខជន​នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​នាពេល​អនាគត ហើយក៏​ត្រូវបាន​មន្ត្រីក្រោមឱវាទ​របស់​ស​ម្តេច​អគ្គមហាសេនាបតី​តេ​ជោ ហ៊ុន សែន ប្រកាស​គាំទ្រ​តាមរបៀប «​បន្ទរ​តាម​» យ៉ាង​ព្រោងព្រាត ។

​មជ្ឈដ្ឋាន​អ្នកវិភាគ​កិច្ចការ​សង្គម​នៅ​កម្ពុជា​បាន​បញ្ចេញ​ទស្សនៈ​ថា យោងតាម​វប្បធម៌​នៃ​ការកាន់កាប់​មុខ​តំំ​ណែ​ង និង​ការដំឡើង​ឋានន្តរស័ក្តិ​មន្ត្រីរាជការ​ទាំង​ស៊ីវិល ទាំង​កម្លាំងប្រដាប់អាវុធ​នៅ​កម្ពុជា​ប​ច្ច​ប្បន្ន​ក្រោម​ការដឹកនាំ​របស់​សម្តេច​អគ្គមហាសេនាបតី​តេ​ជោ ហ៊ុន សែន ជា​នាយករដ្ឋមន្ត្រី គឺ​ឯកឧត្តម​ឧ​ត្ត​ម​សេនីយ៍​ឯក ហ៊ុន ម៉ា​ណែ​ត គួរ​ត្រូវបាន​ដំឡើង​ឋានន្តរស័ក្តិ​ថ្នាក់​នាយ​ឧ​ត្ត​ម​សេនីយ៍ (​ផ្កាយ​៤) មិនគួរណា​ឪពុក​ជា​នាយករដ្ឋមន្ត្រី «​មើលរំលង​» ផ្កាយ​លើ​ស្មា​របស់​កូន​យូរ​ដល់​ម្ល៉ឹង​ឡើយ ខណៈ​ឋានន្តរស័ក្តិ​ថ្នាក់​ត្រឹម​ផ្កាយ​៣​របស់​ឯកឧត្តម​ឧ​ត្ត​ម​សេនីយ៍ ហ៊ុន ម៉ា​ណែ​ត មិន​ស័ក្តិសម​នឹង​មុខតំណែង​ដែល​ទទួលបាន​ទាល់តែសោះ​នោះ ដោយ​ក្រោម​ហេតុផល​ដូចតទៅ ៖

១-​តំណែង​ក្នុង​គណបក្ស​ប្រជាជន​កម្ពុជា ជា​សមាជិក​គណៈអចិន្ត្រៃយ៍​នៃ​គណៈកម្មាធិការ​កណ្តាល​គ​ណ​បក្ស​ពាក់​ត្រឹម​ផ្កាយ​៣​តែម្នាក់ឯង ខណៈ​សមាជិក​គណៈអចិន្ត្រៃយ៍​ច្រើន​នាក់​ទៀត​ដែលមាន​ក្របខ័ណ្ឌ​ដើម​ជា​នាយទាហាន និង​នាយ​នគរបាលជាតិ​សុទ្ធតែ​ពាក់​ផ្កាយ​៤​យ៉ាង​ទាប​បំផុត​គ្រប់ៗ​គ្នា ។​

២-​តំណែង​ជា​អគ្គមេបញ្ជាការ​រង​នៃ​កងយោធពល​ខេមរភូមិន្ទ និង​ជា​មេបញ្ជាការ​កងទ័ពជើងគោក ដែល​ជំនួសមុខ​តំណែង​របស់​ឯកឧត្តម​នាយ​ឧ​ត្ត​ម​សេនីយ៍​ផ្កាយ​មាស​៤ មាស សុភា បែរជា​ខ្លួន «​ត្រឹម​ពាក់​ផ្កាយ​» ។

៣-​ឡើង​ឋានន្តរស័ក្តិ​ថ្នាក់​ឧ​ត្ត​ម​សេនីយ៍​ឯក (​ផ្កាយ​៣) តាំងពី​ពាក់កណ្តាល​ឆ្នាំ​២០១៣ គឺមាន​រយៈពេល​ប្រមាណ​ជាង​៨​ឆ្នាំ​មកហើយ ។ ដូច្នេះ ស័ក្តិសម​នឹង​ទទួលបាន​ការដំឡើងឋាន​ន្ត​រ​ស័ក្តិ​ថ្នាក់​នាយ​ឧ​ត្ត​ម​សេនីយ៍ (​ផ្ក​យ​៤) តាម​ការគួរ ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.