ថ្ងៃ សុក្រ ទី ០៣ ខែ ធ្នូ ឆ្នាំ ២០២១

ពិតជា​អ​ច្ឆ​រិ​យៈ ! ព្រះប្រមុខរដ្ឋ​ដែលមាន​សញ្ជាតិ​លើសពី​១​អាច​នឹង​ឡាយព្រះហស្តលេខា​លើ​ព្រះរាជក្រម​ប្រកាស​ឲ្យ​ប្រើ​ច្បាប់​ធម្មនុញ្ញ​ស្តីពី​វិសោធនកម្ម​តម្រូវ​ឲ្យ​ថ្នាក់ដឹកនាំ​៤​ស្ថាប័ន​មាន «​សញ្ជាតិ​ខ្មែរ​តែមួយ​» ?

កាលពីដើម​ខែតុលា ឆ្នាំ​២០២១​កន្លងទៅ​ថ្មីៗ​នេះ សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​បាន​ផ្តើមគំនិត​ក្នុងការ​ធ្វើ​វិសោធនកម្មរដ្ឋធម្មនុញ្ញ និង​ច្បាប់​ដែលមាន​ការពាក់ព័ន្ធ​ដើម្បី​កំណត់​ឲ្យ​ប្រធាន​ក្រុមប្រឹក្សាធម្មនុញ្ញ ប្រធានព្រឹទ្ធសភា ប្រធានរដ្ឋសភា និង​នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​ត្រូវតែ​ជា​ឥស្សរជន​ដែលមាន «​សញ្ជាតិ​ខ្មែរ​តែមួយ​» ។

​គំនិត​ផ្តួចផ្តើម​របស់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​បែបនេះ​បាន​កើតមានឡើង​បន្ទាប់ពី​លោក សម រង្ស៊ី អះអាងថា​ជា​ប្រធានស្តីទី​គណបក្ស​សង្គ្រោះ​ជាតិ​ធ្វើលិខិត​អំពាវនាវ​មួយ​ចុះ​ថ្ងៃទី​០៥ ខែតុលា ឆ្នាំ​២០២១​ពី​សហរដ្ឋអាមេរិក​ចោទប្រកាន់ថា សម្តេច​អគ្គមហាសេនាបតី​តេ​ជោ ហ៊ុន សែន ចង់​រត់ចោលស្រុក​ក្រោយពី​បាន​ទិញ​សញ្ជាតិ និង​លិខិតឆ្លងដែន​ពី​ប្រទេស Cyprus នៅ​ទ្វីបអឺរ៉ុប ។ ភ្លាមៗ​នៅ​ថ្ងៃ​ដដែល​នេះដែរ គណបក្ស​ប្រជាជន​កម្ពុជា​ក៏បាន​ចេញ​សេចក្តីថ្លែងការណ៍​ប្រកាស​បដិសេធ​ចំពោះ​ព័ត៌មាន​ដែលថា សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា និង​ជា​ប្រធាន​គណបក្ស​ប្រជាជន​កម្ពុជា​បាន​ទិញ​សញ្ជាតិ​បរទេស និង​លិខិតឆ្លងដែន​ពី​ប្រទេស Cyprus ។

​ជា​ទម្លាប់ និង​ក្លាយជា​វប្បធម៌​ធម្មតា​ទៅហើយ​សម្រាប់​ប្រទេស​កម្ពុជា​បច្ចុប្បន្ននេះ គឺ​គំនិត​ផ្តួចផ្តើម​របស់​សម្តេច​អគ្គមហាសេនា​តី​តេ​ជោ ហ៊ុន សែន ក្នុង​ការធ្វើ​វិសោធនកម្ម​រដ្ឋធម្មនុញ្ញ និង​ច្បាប់​ដែលមាន​ការពាក់ព័ន្ធ​ដើម្បី​កំណត់​ឲ្យ​ប្រធាន​ក្រុមប្រឹក្សាធម្មនុញ្ញ ប្រធានព្រឹទ្ធសភា ប្រធានរដ្ឋសភា និង​នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ត្រូវតែ​ជា​ឥស្សរជន​ដែលមាន «​សញ្ជាតិ​ខ្មែរ​តែមួយ​» ត្រូវបាន​ទទួល​នូវ​ការ​ថ្លែងការណ៍​គាំទ្រ​ពី​គណបក្ស​ប្រជាជន​កម្ពុជា និង​ញត្តិ​គាំទ្រ​ពី​គ្រប់​ម​ជ្ឍ​ដ្ឋា​ន​ស្ថាប័នរដ្ឋ រួមទាំង​ស្ថាប័ន​តុលាការ និង​លក្ខណៈ​បុគ្គល ដ្បិត​ស្ថាប័នរដ្ឋ​ទាំងមូល​ត្រូវបាន​គ្រប់គ្រង និង​កាន់កាប់​អំណាច​ដោយ​គណបក្ស​ប្រជាជន​កម្ពុជា​ទាំងស្រុង ។​

​បន្ទាប់ពី​ទ្រង់​ទទួលបាន​មតិ​របស់​ក្រុមប្រឹក្សាធម្មនុញ្ញ​តាម​ស្មារតី​លិខិត​លេខ​០៦៣/០១/២០២១ ចុះ​ថ្ងៃទី​១១ ខែតុលា ឆ្នាំ​២០២១ អំពី​ការផ្តួចផ្តើម​គំនិត​ធ្វើ​វិសោធនកម្ម​មាត្រា​១៩​ថ្មី មាត្រា​៨២​ថ្មី មាត្រា​១០៦​ថ្មី (​មួយ​) មាត្រា​១១៩​ថ្មី និង​មាត្រា​១៣៧​ថ្មី នៃ​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា និង​មាត្រា​៣ និង​មាត្រា​៤ នៃ​ច្បាប់​ធម្មនុញ្ញ​បន្ថែម​សំដៅ​ធានា​នូវ​ដំណើរការ​ជា​ប្រក្រតី​នៃ​ស្ថាប័ន​ជាតិ​ដើម្បី​កំណត់​ឲ្យ​ប្រធានរដ្ឋសភា ប្រធានព្រឹទ្ធសភា នាយករដ្ឋមន្ត្រី និង​ប្រធាន​ក្រុមប្រឹក្សាធម្មនុញ្ញ​ត្រូវតែ​ជា​ឥស្សរជន​ដែលមាន «​សញ្ជាតិ​ខ្មែរ​តែមួយគត់​» រួចមក ព្រះករុណា​ព្រះបាទ​សម្តេច​ព្រះបរមនាថ នរោត្តម សីហមុនី ព្រះមហាក្សត្រ​នៃ​ព្រះរាជាណាចក្រ​កម្ពុជា បានចេញ​រាជសារ​នៅ​ថ្ងៃ​ដដែល​ប្រគល់ជូន​សម្តេច​អគ្គមហាសេនា​តី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​នូវ​លិខិត​របស់​ឯកឧត្តម​កិត្តិ​នីតិកោសល​បណ្ឌិត អ៊ឹម ឈុនលឹម ប្រធាន​ក្រុមប្រឹក្សាធម្មនុញ្ញ ដើម្បី​ចាត់ការ​តាម​នីតិវិធី ។

​ពង្រាងច្បាប់​ធម្មនុញ្ញ​ស្តីពី​វិសោធនកម្ម​មាត្រា​១៩​ថ្មី មាត្រា​៨២​ថ្មី មាត្រា​១០៦​ថ្មី (​មួយ​) មាត្រា​១១៩​ថ្មី និង​មាត្រា​១៣៧​ថ្មី នៃ​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា និង​មាត្រា​៣ និង​មាត្រា​៤ នៃ​ច្បាប់​ធម្មនុញ្ញ​បន្ថែម​សំដៅ​ធានា​នូវ​ដំណើរការ​ជា​ប្រក្រតី​នៃ​ស្ថាប័ន​ជាតិ​ដើម្បី​កំណត់​ឲ្យ​ប្រធានរដ្ឋសភា ប្រធានព្រឹទ្ធសភា នាយករដ្ឋមន្ត្រី និង​ប្រធាន​ក្រុមប្រឹក្សាធម្មនុញ្ញ​ត្រូវតែ​ជា​ឥស្សរជន​ដែលមាន «​សញ្ជាតិ​ខ្មែរ​តែមួយគត់​»​នោះ បាន​ធ្លាក់​ដល់​សមត្ថកិច្ច​រប​ស់​គណៈកម្មាធិការ​អចិន្ត្រៃយ៍​នៃ​រដ្ឋសភា​នីតិកាល​ទី​៦​រួចហើយ ។

​បច្ចុប្បន្ន ស្ថាប័នរដ្ឋ​សំខាន់ៗ​រួមមាន ក្រុមប្រឹក្សាធម្មនុញ្ញ (​ឯកឧត្តម​កិត្តិ​នីតិកោសល​បណ្ឌិត អ៊ឹម ឈុនលឹម ជា​ប្រធាន​) ព្រឹទ្ធសភា (​សម្តេច​វិបុល​សេនា​ភក្តី សាយ ឈុំ ជា​ប្រធាន​) រដ្ឋសភា (​សម្តេច​អគ្គ​មហា​ពញា​ចក្រី ហេង សំរិន ជា​ប្រធាន​) និង​រាជរដ្ឋាភិបាល (​សម្តេច​អគ្គមហាសេនាបតី​តេ​ជោ ហ៊ុន សែន ជា​នាយករដ្ឋមន្ត្រី​) …​សុទ្ធតែ​ត្រូវបាន​គ្រប់គ្រង និង​ដឹកនាំ​ដោយ​គណបក្ស​ប្រជាជន​កម្ពុជា ។ នេះ​ជា​លើក​ទី​១​ហើយ​ចាប់តាំងពី​បានធ្វើ​សច្ចាប្រណិធាន​ចូលកាន់​មុខតំណែង ដែល​រដ្ឋសភា​នីតិកាល​ទី​៦​មាន​អាសនៈ​ចំនួន​១២៥​មកពី​គណបក្ស​ប្រជាជន​កម្ពុជា​តែមួយគត់​រៀបចំ​អនុម័ត​ការធ្វើ​វិសោធនកម្ម​រដ្ឋធម្មនុញ្ញ​ដែលជា​ច្បាប់កំពូល​នៃ​ព្រះរាជាណាចក្រ​កម្ពុជា ។

​អនុលោម​តាម​ស្មារតី​នៃ​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា គឺ​ច្បាប់​ធម្មនុញ្ញ​ស្តីពី​វិសោធនកម្ម​មាត្រា​១៩​ថ្មី មាត្រា​៨២​ថ្មី មាត្រា​១០៦​ថ្មី (​មួយ​) មាត្រា​១១៩​ថ្មី និង​មាត្រា​១៣៧​ថ្មី នៃ​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា និង​មាត្រា​៣ និង​មាត្រា​៤ នៃ​ច្បាប់​ធម្មនុញ្ញ​បន្ថែម​សំដៅ​ធានា​នូវ​ដំណើរការ​ជា​ប្រក្រតី​នៃ​ស្ថាប័ន​ជាតិ​ដើម្បី​កំណត់​ឲ្យ​ប្រធានរដ្ឋសភា ប្រធានព្រឹទ្ធសភា នាយករដ្ឋមន្ត្រី និង​ប្រធាន​ក្រុមប្រឹក្សាធម្មនុញ្ញ​ត្រូវតែ​ជា​ឥស្សរជន​ដែលមាន «​សញ្ជាតិ​ខ្មែរ​តែមួយគត់​» នៅពេល​ទទួល​បានការ​អនុម័ត​ពី​រដ្ឋសភា និង​ទទួលបាន​ការពិនិត្យ​យល់ព្រម​ពី​ព្រឹទ្ធសភា​ចប់សព្វគ្រប់​ហើយ​នោះ ព្រះមហាក្សត្រ​នៃ​ព្រះរាជាណាចក្រ​កម្ពុជា​ដែលជា​ព្រះប្រមុខរដ្ឋ​មួយជីវិត​នឹងត្រូវ​ឡាយព្រះហស្តលេខា​នៅលើ​ព្រះរាជក្រម​ប្រកាស​ឲ្យ​ប្រើ​ច្បាប់​ធម្មនុញ្ញ​នោះ ។ ដូច្នេះ ព្រះប្រមុខរដ្ឋ​ដែលមាន​សញ្ជាតិ​លើសពី​១​បច្ចុប្បន្ន​នឹង​ក្លាយជា​តួអង្គ​ឡាយព្រះហស្តលេខា​នៅលើ​ព្រះរាជក្រម​ប្រកាស​ឲ្យ​ប្រើ​ច្បាប់​ធម្មនុញ្ញ​ស្តីពី​វិសោធនកម្ម​មាត្រា​១៩​ថ្មី មាត្រា​៨២​ថ្មី មាត្រា​១០៦​ថ្មី (​មួយ​) មាត្រា​១១៩​ថ្មី និង​មាត្រា​១៣៧​ថ្មី នៃ​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា និង​មាត្រា​៣ និង​មាត្រា​៤ នៃ​ច្បាប់​ធម្មនុញ្ញ​បន្ថែម​សំដៅ​ធានា​នូវ​ដំណើរការ​ជា​ប្រក្រតី​នៃ​ស្ថាប័ន​ជាតិ​ដើម្បី​កំណត់​ឲ្យ​ប្រធានរដ្ឋសភា ប្រធានព្រឹទ្ធសភា នាយករដ្ឋមន្ត្រី និង​ប្រធាន​ក្រុមប្រឹក្សាធម្មនុញ្ញ​ត្រូវតែ​ជា​ឥស្សរជន​ដែលមាន «​សញ្ជាតិ​ខ្មែរ​តែមួយគត់​» (Sic!) ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.