ថ្ងៃ ចន្ទ ទី ២៩ ខែ វិច្ឆិកា ឆ្នាំ ២០២១

ដី​គម្រប​ព្រៃឈើ​ក្លាយជា​កម្មសិទ្ធិ​បុគ្គល​ឯកជន ! ដី​គម្រប​ព្រៃឈើ​ជាង​១៧២​ហិកតា​នៅ​ស្រុក​បន្ទាយស្រី ខេត្តសៀមរាប ត្រូវបាន​រាជរដ្ឋាភិបាល​កាត់​ឆ្វៀល​ប្រគល់​ឲ្យ​អ្នកឧកញ៉ា ឡេង ភ​ត្រា ហៅ ឡេង ណា​វ៉ា​ត្រា ធ្វើជា​កម្មសិទ្ធិ​

យោងតាម​សំណើ​របស់​រដ្ឋមន្ត្រីក្រសួង​កសិកម្ម រុក្ខាប្រមាញ់ និង​នេសាទ រាជរដ្ឋាភិបាល​កម្ពុជា​ដែលមាន​សម្តេច​អគ្គមហាសេនាបតី​តេ​ជោ ហ៊ុន សែន ជា​ប្រមុខ​បានសម្រេច​កាត់​ឆ្វៀល​ដី​ទំហំ​១៧២​ហិកតា ០៣​អា ស្ថិតនៅ​ក្នុងភូមិ​រំចេក ឃុំ​រំចេក និង​ភូមិ​ខ្នារ ឃុំ​ខ្នារ​សណ្តាយ ស្រុក​បន្ទាយស្រី ខេត្តសៀមរាប ចេញពី​គម្រប​ព្រៃឈើ​ឆ្នាំ​២០០២ ធ្វើ​អនុ​ប​យោគ​ជា​ដីឯកជន​របស់​រដ្ឋ និង​ផ្តល់​សិទ្ធិ​ជូន​អ្នកឧកញ៉ា ឡេង ភ​ត្រា ហៅ ឡេង ណា​វ៉ា​ត្រា ធ្វើជា​កម្មសិទ្ធិ ដោយ​ស្មារតី​អនុក្រឹត្យ​លេខ​១២០​អនក្រ​.​បក ចុះ​ថ្ងៃទី​២៣ ខែកក្កដា ឆ្នាំ​២០២១ ។​

​ប្រការ​គួរ​ឲ្យ​ចាប់អារម្មណ៍​ផងដែរ​នោះ គឺ​នៅត្រង់ថា ស្មារតី​អនុក្រឹត្យ​លេខ​១២០​អនក្រ​.​បក ចុះ​ថ្ងៃទី​២៣ ខែកក្កដា ឆ្នាំ​២០២១​របស់​រាជរដ្ឋាភិបាល​កម្ពុជា​ដែល​បាន​កាត់​ឆ្វៀល​ដី​គម្រប​ព្រៃឈើ​ធ្វើ​ប្រទានកម្ម​ជា​កម្មសិទ្ធិ​ជូន​អ្នកឧកញ៉ា ឡេង ភ​ត្រា បានបញ្ជាក់​អំពី​ទីតាំង​ដី​នៅ​ភូមិ​រំចេក ឃុំ​រំចេក និង​ភូមិ​ខ្នារ ឃុំ​ខ្នារ​សណ្តាយ ស្រុក​បន្ទាយស្រី ខេត្តសៀមរាប ប៉ុន្តែ​ប្លង់​គំនូស​បង្ហាញ​ទីតាំង​ដី​ដែលជា​ឧបសម្ព័ន្ធ​នៃ​អនុក្រឹត្យ​របស់​រាជរដ្ឋាភិបាល​កម្ពុជា​បែរជា​សរសេរថា ភូមិ​រំចេក ឃុំ​រំចេក និង​ភូមិ​សណ្តាយ ឃុំ​ខ្នារ​សណ្តាយ ស្រុក​បន្ទាយស្រី ខេត្តសៀមរាប​ទៅវិញ (Sic!) ។​

​លោក ឡេង ភ​ត្រា ហៅ ឡេង ណា​វ៉ា​ត្រា នាយក​ក្រុមហ៊ុន​អចលនទ្រព្យ ឡេង ណា​វ៉ា​ត្រា ធ្លាប់​ទទួលបាន​ការផ្តល់​គោរមងារ​ជា​ឧកញ៉ា ដោយ​ព្រះរាជក្រឹត្យ​លេខ​នស​/​រកត​/០៧១៨/៦៩៨ ចុះ​ថ្ងៃទី​០៦ ខែកក្កដា ឆ្នាំ​២០១៨ និង​រយៈពេល​ជាង​២​ឆ្នាំ​ក្រោយមក ឧកញ៉ា ឡេង ណា​វ៉ា​ត្រា ក៏​ទទួលបាន​ការផ្តល់​គោរមងារ​ថ្មី​ជា «​អ្នកឧកញ៉ា​» ដោយ​ព្រះរាជក្រឹត្យ​លេខ​នស​/​រកត​/០១២១/០៦៩ ចុះ​ថ្ងៃទី​២២ ខែមករា ឆ្នាំ​២០២១ ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.