ថ្ងៃ ចន្ទ ទី ១០ ខែ ឧសភា ឆ្នាំ ២០២១

​ពោះ​ក៏​ធំ ថ្លើម​ក៏​ធំ​របស់លោក​ផ្កាយ​២ ! ជុំគ្នា​ផឹកស៊ី រាំច្រៀង ប៉ាត​ម្សៅ​អបអរ​ឆ្នាំ​ថ្មី​សម័យ COVID-19 ឈានដល់​ចាប់ខ្លួន​ផ្កាយ​២​ប៉ូលិស​ម្នាក់ និង​បក្ខពួក​

សេចក្តីរាយការណ៍​ពី​កម្លាំង​សមត្ថកិច្ច​បាន​ឲ្យ​ដឹងថា នាយ​នគរបាលជាតិ​ឋានន្តរស័ក្តិ​ថ្នាក់​ឧ​ត្ត​ម​សេនីយ៍​ទោ (​ផ្កាយ​២) ម្នាក់ ដែលជា​ម្ចាស់​បន្ទប់​ជួល​នៅ​ចំណុច​ផ្ទះ​លេខ​៥៨ ផ្លូវ​វេ​ង​ស្រេង ភូមិ​ដំណាក់​ធំ​២ សង្កាត់​ស្ទឹងមានជ័យ ខណ្ឌមានជ័យ រាជធានី​ភ្នំពេញ និង​គ្នីគ្នា​ចំនួន​២​នាក់​ទៀត​ដែល​បម្រើ​ការងារ​នៅផ្ទះ​លោក​ឧ​ត្ត​ម​សេនីយ៍​ប៉ូលិស​រូបនោះ ត្រូវបាន​សមត្ថកិច្ច​ចាប់ខ្លួន​វាយខ្នោះ​កាលពី​វេលា​ម៉ោង​២១ និង​៣០​នាទី​នា​រាត្រី​ថ្ងៃទី​១៦ ខែមេសា ឆ្នាំ​២០២១ ជា​ថ្ងៃ​ចុងក្រោយ​នៃ​ពិធីបុណ្យ​ចូលឆ្នាំថ្មី​ប្រពៃណី​ជាតិខ្មែរ ព្រោះតែ​ពួកគេ​នាំគ្នា​ផឹកស៊ី រាំច្រៀង និង​លេង​ប៉ាត​ម្សៅ ព្រមទាំង​ផ្សាយ​ផ្ទាល់ (Live) តាម​បណ្តាញ​សង្គម Facebook ខណៈ​ភូមិសាស្ត្រ​រាជធានី​ភ្នំពេញ​ត្រូវបាន​អាជ្ញាធរ​ធ្វើ​ការបិទ​ខ្ទប់ (Lockdown) ។

​នាយ​នគរបាលជាតិ​ដែល​ត្រូវ​សមត្ថកិច្ច​ចាប់ខ្លួន​នោះ គឺ​លោក​ឧ​ត្ត​ម​សេនីយ៍​ទោ អ៊ុង ចាន់​ធួ​ក អាយុ​៤៧​ឆ្នាំ ក្របខ័ណ្ឌ​មន្ត្រី​នគរបាលជាតិ​កម្ពុ​ជា​ក្រសួងមហាផ្ទៃ​អត្តលេខ​៧៣៥៥៧ មាន​តួនាទី​ជា​អនុប្រធាន​សេនាធិការ​នៃ​សេនាធិការដ្ឋាននៃអគ្គស្នងការដ្ឋាន​នគរ​បាល​ជាតិ និង​គូកន​ចំនួន​២​នាក់​ទៀត​ដែលជា​អ្នកបម្រើ​ការងារ​នៅផ្ទះ​លោក​ឧ​ត្ត​ម​សេនីយ៍ គឺ​រួមមាន ៖ ១-​ឈ្មោះ កុក ឃី ភេទ​ប្រុស អាយុ​៣៥​ឆ្នាំ និង ២-​ឈ្មោះ ឡាយ ភា​រុណ ភេទ​ប្រុស អាយុ​២៨​ឆ្នាំ ។

​របាយការណ៍​របស់​ស​ម​ត្ថ​កិច្ច​បាន​ឲ្យ​ដឹង​ទៀតថា លោក​ឧ​ត្ត​ម​សេនីយ៍​ទោ​ប៉ូលិស អ៊ុង ចាន់​ធួ​ក និង​គូកន​ទាំងពីរ​នាក់​បានធ្វើ​សកម្មភាព​ប្រមូលផ្តុំ​កម្មករ និង​ប្រជាពលរដ្ឋ​ប្រមាណ​ពី​៣០​នាក់​ទៅ​៤០​នាក់ ដែល​ស្នាក់នៅ​ផ្ទះជួល​របស់ខ្លួន​នាំគ្នា​ផឹកស៊ី រាំច្រៀង និង​លេង​ប៉ាត​ម្សៅ​យ៉ាង​កងរំពង ។

​ប្រភពព័ត៌មាន​ពី​មន្ត្រីជាន់ខ្ពស់​បាន​ឲ្យ​ដឹង​ដែរ​ថា ប្រមុខ​រាជរដ្ឋាភិបាល​កម្ពុជា​កំពុង​ធ្វើ​ពង្រាង​ព្រះរាជក្រឹត្យ​ទូលថ្វាយ​សម្តេចព្រះ​មហាក្សត្រ​ដើម្បី​សុំ​ដកហូត​បុណ្យស័ក្តិ និង​បណ្តេញ​លោក​ឧ​ត្ត​ម​សេនីយ៍​ទោ អ៊ុង ចាន់​ធួ​ក ពី​ក្របខ័ណ្ឌ​មន្ត្រី​នគរបាលជាតិ ព្រមទាំង​នឹងមាន​វិធានការ​ផ្លូវច្បាប់​យ៉ាង​តឹងរ៉ឹង​ទៀតផង ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.