ថ្ងៃ ចន្ទ ទី ១២ ខែ មេសា ឆ្នាំ ២០២១

អាច​ដែរឬទេ ? នឹងមាន​អ្នកធំ​រង​ការ​អាម៉ាស់​ក្នុង​សំណុំរឿង​គ្រហស្ថ​ដ៏​មាន​ឥទ្ធិពល និង​ជា​អ្នកលេង​Facebook ដ៏​សម្បើម​ប៉ះ​ជាមួយ​ព្រះសង្ឃ​

ប្រតិកម្ម​តាមរយៈ​សង្ឃ​លិខិត​លេខ​០៣/២១​ម​គខសរ ចុះ​ថ្ងៃទី​១៧ ខែមីនា ឆ្នាំ​២០២១​ដែល​ឡាយព្រះហស្តលេខា​ដោយ​ព្រះ​ភាតា​ក​រោ ជុំ គឹម​ឡេង ព្រះ​មេគណ​ខេត្តសៀមរាប ក្រាបបង្គំ​ទូលថ្វាយ​សម្តេចព្រះ​មហាសុមេធាធិបតី កិត្តិ​ឧទ្ទេស​បណ្ឌិត ន​ន្ទ ង៉ែត សម្តេចព្រះ​សង្ឃនាយក​នៃ​ព្រះរាជាណាចក្រ​កម្ពុជា ដែល​បាន​ស្នើសុំ​ឲ្យ​រាជរដ្ឋាភិបាល​កម្ពុជា​ថ្កោលទោស​ចំពោះ​បុគ្គល ផែង វណ្ណៈ ដែល​បាន​ប្រមាថ​សមាជិក​ថេរ​សភា​សង្ឃ​ខេត្ត និង​មន្ត្រីរដ្ឋបាល​ខេត្តសៀមរាប​នោះ ក៏បាន​នាំ​ឲ្យ​ក្រសួង​ព័ត៌មាន​សម្រេច​លុប​អាជ្ញា​បណ្ណ​អាជីវកម្ម​គេហទំព័រ​របស់លោក ផែង វណ្ណៈ ឈ្មោះ «www.phengvannak.com» ដោយ​ប្រកា​សលេខ​១០៧​ព​.​ម​.​ប្រក ចុះ​ថ្ងៃទី​១៨ ខែមីនា ឆ្នាំ​២០២១ ដោយ​ក្រសួង​ព័ត៌មាន​អះអាងថា «​ម្ចាស់​អាជ្ញា​បណ្ណ​បាន​ជេរប្រមាថ​ចំពោះ​ព្រះសង្ឃ​ធ្វើ​ឲ្យ​ប៉ះពាល់​យ៉ាងធ្ងន់ធ្ងរ​លើ​វិស័យ​ព្រះពុទ្ធសាសនា​ដែលជា​សាសនា​របស់​រដ្ឋ ដែលជា​ការបំពាន​យ៉ាងធ្ងន់ធ្ងរ​លើ​វិជ្ជាជីវៈ និង​កិច្ចសន្យា​អាជីវកម្ម​ដែល​សាមីខ្លួន​បាន​តម្កល់ទុក​នៅ​ក្រសួង​ព័ត៌មាន ។​» ។

​នៅ​ថ្ងៃទី​១៨ ខែមីនា ឆ្នាំ​២០២១​នេះ​ដដែល លោក ផែង វណ្ណៈ​ក៏បាន​ធ្វើលិខិត​សុំទោស​ជា​សាធារណៈ​មួយ​ចំពោះ​ព្រះសង្ឃ​គ្រប់​ព្រះអង្គ​នៅ​ទូទាំង​ព្រះរាជាណាចក្រ​កម្ពុជា និង​ប្រជាពលរដ្ឋ​មួយចំនួន​… ។

​ទោះបី​មាន​លិខិត​សុំទោស​ជា​សាធារណៈ​របស់លោក ផែង វណ្ណៈ ក្តី ក៏​សំណុំរឿង​របស់លោក ផែង វណ្ណៈ បាន​កក្រើក​ទៅដល់​ក្រសួង​ធម្មការ និង​សាសនា ហើយក៏​ត្រូវបាន​ឯកឧត្តម ឈិ​ត សុខុន រដ្ឋមន្ត្រីក្រសួង​ធម្មការ និង​សាសនា ចេញ​លិខិតផ្លូវការ​មួយច្បាប់​លេខ​១២៣/២១​ក​.​ធ​.​ស ចុះ​ថ្ងៃទី​១៩ ខែមីនា ឆ្នាំ​២០២១​គោរព​ជូន​ឯកឧត្តម​ព្រះរាជអាជ្ញា​អម​សាលាដំបូង​ខេត្តកណ្តាល ក្នុងន័យ​ប្តឹង​ស្នើសុំ​ឲ្យ​មានការ​ចាត់វិធានការ​ផ្លូវច្បាប់​ចំពោះ​បុគ្គល​ឈ្មោះ ផែង វណ្ណៈ ពីបទ​ប្រមាថ​ចំពោះ​ព្រះសង្ឃ តាម​មាត្រា​៥១៦, បទ​ញុះញង់​ឲ្យ​មានការ​រើសអើង តាម​មាត្រា​៤៩៦ និង​បទ​គំរាមកំហែង​ថា​នឹង​សម្លាប់ តាម​មាត្រា​២៣៣ នៃ​ក្រមព្រហ្មទណ្ឌ​នៃ​ព្រះរាជាណាចក្រ​កម្ពុជា ។ លិខិតផ្លូវការ​ក្នុង​ទម្រង់​ជា​ពាក្យបណ្តឹង​របស់​ឯកឧត្តម​រដ្ឋមន្ត្រីក្រសួង​ធម្មការ និង​សាសនា បាន​ទៅដល់​ស្ថាប័ន​អយ្យការ​អម​សាលាដំបូង​ខេត្តកណ្តាល​នៅ​ថ្ងៃទី​២២ ខែមីនា ឆ្នាំ​២០២១ ។

​មិនទាន់​បានដឹងថា ស្ថាប័ន​អយ្យការ​អម​សាលាដំបូង​ខេត្តកណ្តាល​ដែលមាន​ឯកឧត្តម លាវ ស្រេង ជា​ព្រះរាជអាជ្ញា ដំណើរការ​នីតិវិធី និង​សម្រេច​បើក​ការ​ស៊ើបសួរ ឬ​ចោទប្រកាន់​ទៅលើ​លោក ផែង វណ្ណៈ ជា​ជនសង្ស័យ ដល់​ដំណាក់​កាលណា​នៅឡើយ​ទេ ។​

​មជ្ឈដ្ឋាន​អ្នកតាមដាន​សំណុំរឿង​លោក ផែង វណ្ណៈ បាន​បញ្ចេញ​ទស្សនៈ​ថា សំណុំរឿង​ដែល​ពាក់ព័ន្ធ​នឹង​លោក ផែង វណ្ណៈ ដែលជា​បុរស​មាន​ទំនាក់ទំនង​ជាមួយ​មនុ​ស្ស​អ្នកមាន​ឥទ្ធិពល​ច្រើន​នាក់​នៅក្នុង​សង្គម​សម័យនេះ ជា​អ្នកលេង​បណ្តាញ​ព័ត៌មាន​សង្គម Facebook «​ដ៏​សម្បើម​» និង​ជា​អ្នកមាន​ទ្រព្យសម្បត្តិ «​គួរសម​» ម្នាក់​ដែរនោះ អាច​នឹងធ្វើ​ឲ្យ​អ្នកធំ​នៅ​កម្ពុជា​មួយចំនួន «​អាម៉ាស់មុខ​» មិន​ខាន ប្រសិនបើ​ស្ថាប័ន​តុលា​ការមិន​ហ៊ាន​ចាត់វិធានការ​ផ្លូវច្បាប់​ទៅលើ​លោក ផែង វណ្ណៈ តាម​បណ្តឹង​របស់​ឯកឧត្តម​រដ្ឋមន្ត្រីក្រសួង​ធម្មការ និង​សាសនា ៕​

Filed in: Feature, តុលាការ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.