ថ្ងៃ អង្គារ ទី ១៥ ខែ មិថុនា ឆ្នាំ ២០២១

កុំ​អាង​វ៉ាក់សាំង​ពេក ! ក្នុង​ជួរ​កងទ័ព​មាន​ករណី​អ្នក​ចាក់​វ៉ាក់សាំង Sinopharm ជំនួយ​របស់​ចិន​គ្រប់​ចំនួន​ពីរ​ដូ​ស​ហើយ ប៉ុន្តែ​នៅតែ​ឆ្លង​ជំងឺ COVID-19

ប្រភពព័ត៌មាន​ច្បាស់​ការណ៍​បាន​ឲ្យ​ដឹងថា ក្នុង​ស្ថាប័ន​កងយោធពល​ខេមរភូមិន្ទ​មាន​នាយទាហាន​ម្នាក់​ឈ្មោះ តារា សកល ជា​សិក្ខាកាម​នៅ​សាកលវិទ្យាល័យ​ការពារជាតិ​នៃ​ក្រសួងការពារជាតិ បាន​ចាក់​ថ្នាំ​វ៉ាក់សាំង​បង្ការ​ជំងឺ COVID-19 ឈ្មោះ ស៊ី​ណូ​ហ្វា​ម (Sinopharm) ដែលជា​ជំនួយ​របស់​ប្រទេស​ចិន​គ្រប់​ចំនួន​ពីរ​ដូ​ស​ហើយ ប៉ុន្តែ​នៅតែ​ឆ្លង​ជំងឺ COVID-19 ដដែល ។​

កន្លងមក មាន​នាយទាហាន​ម្នាក់​បម្រើ​ការងារ​ជា​ជំនួយការ​ការិយាល័យ​ហិរញ្ញវត្ថុ ខុទ្ទកាល័យ​អគ្គបញ្ជាការដ្ឋាន​កងយោធពល​ខេមរភូមិន្ទ គឺ​លោក​ព្រិន្ទបាលទោ លី ចាន់​សុវណ្ណ​បញ្ញា អាយុ​២៤​ឆ្នាំ បាន​ចាក់​វ៉ាក់សាំង Sinopharm ជំនួយ​របស់​ប្រទេស​ចិន​លើក​ទី​១ នា​ថ្ងៃទី​២២ ខែកុម្ភៈ ឆ្នាំ​២០២១ ហើយ​ក៏បាន​តេស្ត​រកឃើញ មានការ​ឆ្លង​ជំងឺ COVID-19 ក្នុង​ព្រឹត្តិការណ៍​សហគមន៍ ២០ កុម្ភៈ នៅ​ថ្ងៃទី​០៨ ខែមីនា ឆ្នាំ​២០២១ ។ ប៉ុន្តែ​ក្នុងករណីនេះ​អាច​ចាត់ទុកថា ការចាក់​វ៉ាក់សាំង​បង្ការ​ជំងឺ COVID-19 ទៅលើ​ខ្លួន​នាយទាហាន​រូបនេះ​មិនទាន់​ទទួលបាន​នូវ​ប្រសិទ្ធភាព ពីព្រោះ​មិនទាន់បាន​ចាក់​គ្រប់​ចំនួន​ដូ​ស​លើក​ទី​២​នៅឡើយ ។ ពាក់ព័ន្ធ​នឹង​ករណី​នេះដែរ គេ​មិនទាន់​បានដឹងថា តើ​ចំពោះ​នាយទាហាន លី ចាន់​សុវណ្ណ​បញ្ញា ដែល​ឆ្លង​ជំងឺ COVID-19 រួចទៅហើយ​បន្ទាប់ពី​ចាក់​វ៉ាក់សាំង Sinopharm ដូ​ស​លើក​ទី​១​នោះ​នឹង​តម្រូវ​ឲ្យ​មាន​ការចាក់​វ៉ាក់សាំង​សម្រាប់​ដូ​ស​ទី​២​ទៀត ឬ​មិន​តម្រូវ​ឲ្យ​ចាក់​ទៀត​ឬ​យ៉ាងណា ?

​វ៉ាក់សាំង Sinopharm COVID-19 ដែល​ផលិត​ដោយ​វិទ្យាស្ថាន Beijing institute of Biological Products Co.,Ltd. នៃ​សាធារណរដ្ឋ​ប្រជាមានិត​ចិន ត្រូវបាន​ក្រសួងសុខាភិបាល​អនុញ្ញាត​ឲ្យ​ប្រើប្រាស់​ជា​ផ្លូវការ​នៅ​ព្រះរាជាណាចក្រ​កម្ពុជា​ក្នុង​លក្ខខណ្ឌ​នៃ​ការប្រើប្រាស់​បន្ទាន់ (Emergency Use Authorization-EUA) កាលពី​ថ្ងៃទី​០៤ ខែកុម្ភៈ ឆ្នាំ​២០២១ ខណៈ​វ៉ាក់សាំង​ដែលជា​ជំនួយ​របស់​ប្រទេស​ចិន​នេះ​បាន​ចាក់​ទៅដល់​មនុស្ស​ចំនួន ២៥៤ ៣៩៨​នាក់​ហើយ គិត​ត្រឹម​ថ្ងៃទី​១៩ ខែមីនា ឆ្នាំ​២០២១ ។​

​មិនទាន់មាន​ប្រភព​ជាក់លាក់​ណាមួយ​បកស្រាយ​អំពី​មូលហេតុ​ដែល​នាំ​ឲ្យ​អ្នក​ចាក់​វ៉ាក់សាំង Sinopharm គ្រប់​ចំនួន​ដូ​ស​ហើយ បែរជា​នៅតែ​ឆ្លង​ជំងឺ COVID-19 ទៀត​នោះ​នៅឡើយ​ទេ ខណៈ​ប្រភព​ឯកសារ​ពី​បរទេស​មួយចំនួន​បាន​អះអាងថា ប្រសិទ្ធភាព​នៃ​វ៉ាក់សាំង Sinopharm របស់​ចិន គឺមាន​ត្រឹម​កម្រិត​ក្រោម​៩០%​ប៉ុណ្ណោះ ៕​

Filed in: Feature, ព័ត៌មានជាតិ, សុខភាព

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.