កាលពីថ្ងៃទី១៤ ខែមករា ឆ្នាំ២០២១ ត្រូវនឹងថ្ងៃព្រហស្បតិ៍ ១កើត ខែមាឃ ឆ្នាំជូត ទោស័ក ព.ស.២៥៦៤កន្លងទៅថ្មីៗនេះ ឯកឧត្តម អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ក្នុងនាមតំណាងថ្នាក់ដឹកនាំ និងមន្ត្រីរាជការក្រសួងការងារ និងបណ្តុះបណ្តាលវិជ្ជាជីវៈ (ជាក្រសួងល្បីល្បាញខាងមានទីប្រឹក្សាអមក្រសួងច្រើនសំពីងសំពោងរហូតដល់ខ្ទង់រយនាក់ ទាំងការតែងតាំងដោយព្រះរាជក្រឹត្យ ទាំងការតែងតាំងដោយអនុក្រឹត្យ) បានធ្វើសារលិខិតជូនពរមួយលេខ០២៩/២១ក.ប/ខ.ល ដើម្បីគោរពជូនពរសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងខួបលើកទី៣៦ នៃការឡើងកាន់តំណែងជានាយករដ្ឋមន្ត្រីនៃព្រះរាជាណាចក្រកម្ពុជា (១៤ មករា ១៩៨៥ – ១៤ មករា ២០២១) ។
ប្រការគួរឲ្យចាប់អារម្មណ៍នោះ គឺនៅក្នុងសារលិខិតជូនពរលេខ០២៩/២១ក.ប/ខ.ល ចុះថ្ងៃទី១៤ ខែមករា ឆ្នាំ២០២១របស់ឯកឧត្តម អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានសរសេរពាក្យថា «ឡើងកាន់តំណែង» ជា «ឡើងកាន់ដំណែង» ទៅវិញ ។
មាត្រា៥នៃរដ្ឋធម្មនុញ្ញដែលជាច្បាប់កំពូលនៃព្រះរាជាណាចក្រកម្ពុជា បានចែងបញ្ញត្តិថា «ភាសា និងអក្សរដែលប្រើជាផ្លូវការ គឺភាសា និងអក្សរខ្មែរ ។» និងមាត្រា១២នៃអនុក្រឹត្យរបស់រាជរដ្ឋាភិបាលកម្ពុជាលេខ១៤៦អនក្រ.បក ចុះថ្ងៃទី៣១ ខែសីហា ឆ្នាំ២០១៧ ស្តីពីការរៀបចំ និងការប្រព្រឹត្តទៅនៃក្រុមប្រឹក្សាជាតិភាសាខ្មែរ សរសេរកាត់ថា «ក.ជ.ភ.ខ» បានចែងថា «ក.ជ.ភ.ខត្រូវប្រើវចនានុក្រមខ្មែររៀបរៀងដោយសម្តេចព្រះសង្ឃរាជ ជួន ណាត ដែលបានបោះពុម្ពផ្សាយដោយវិទ្យាស្ថានពុទ្ធសាសនបណ្ឌិត្យ គ្រាទី៥ ឆ្នាំ១៩៦៧ជាគោល ។» ។
ព័ស្តុតាងជាក់ស្តែងបានបង្ហាញថា វចនានុក្រមខ្មែររៀបរៀងដោយសម្តេចព្រះសង្ឃរាជ ជួន ណាត បានបញ្ជាក់អំពីរបៀបលំដាប់កិត្តិយសមន្ត្រី, មុខក្រសួង, មុខរបរ, មុខការ…..គឺត្រូវសរសេរថា «តំណែង» ដែលជា (នាម) ។ រីឯពាក្យសរសេរថា «ដំណែង» ដែលជា (កិរិយាសព្ទ) គឺ កាឡាខ្លួន, ប្រែកាឡា, ប្រែភេទឲ្យមានបែបផ្សេងទីទៃពីរូបដើម ឬពីភេទដើម ….។
ដូច្នេះ អនុលោមមាត្រា៥នៃរដ្ឋធម្មនុញ្ញនៃព្រះរាជាណាចក្រកម្ពុជា, មាត្រា១២នៃអនុក្រឹត្យលេខ១៤៦អនក្រ.បក ចុះថ្ងៃទី៣១ ខែសីហា ឆ្នាំ២០១៧ ស្តីពីការរៀបចំ និងការប្រព្រឹត្តទៅនៃក្រុមប្រឹក្សា ជាតិភាសាខ្មែរ និងតាមវចនានុក្រមខ្មែររៀបរៀងដោយសម្តេច ព្រះសង្ឃរាជ ជួន ណាត គឺបានឆ្លុះបញ្ចាំងឲ្យឃើញថា សារលិខិតជូនពររបស់ឯកឧត្តម អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈសរសេរពាក្យ «តំណែង» ទៅជា «ដំណែង»មិនត្រឹមត្រូវទេ ស្មើនឹងអំពើលែងខ្វល់នឹងអក្សរខ្មែរ ហើយសរសេរ ឲ្យតែរួចពីដៃប៉ុណ្ណោះ ឬមួយក៏រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈចង់បញ្ជាក់ឲ្យដឹងថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាចេះ «ប្រែកាឡាខ្លួនដូចយក្សដែលដំណែងខ្លួនជាប្រើសមាស» ? ៕
