ថ្ងៃ អង្គារ ទី ១៥ ខែ មិថុនា ឆ្នាំ ២០២១

មុនពេល​ធ្លាក់​ក្នុង​ដៃឯក​ជន ! អាង​ស្តុក​ទឹក​បឹងត្របែក​ទំហំ​ជាង​១៤​ហិកតា ស្ថិតក្នុង​រាជធានី​ភ្នំពេញ​ត្រូវបាន​រាជរដ្ឋាភិបាល​កំណត់​ជា​សម្បត្តិ​សាធារណៈ​របស់​រដ្ឋ​

រាជរដ្ឋាភិបាល​កម្ពុជា​ដែលមាន​សម្តេច​អគ្គមហាសេនាបតី​តេ​ជោ ហ៊ុន សែន ជា​ប្រមុខ​បានសម្រេច​ចេញ​អនុក្រឹត្យ​លេខ​២២១​អនក្រ​.​បក ចុះ​ថ្ងៃទី​៣០ ខែធ្នូ ឆ្នាំ​២០២០ ដោយ​កំណត់​ផ្ទៃ​អាង​ស្តុក​ទឹក​បឹងត្របែក​ទំហំ​១៤៥ ៦២៧​ម៉ែត្រក្រឡា ស្ថិតក្នុង​រាជធានី​ភ្នំពេញ​ជា​សម្បត្តិ​សាធារណៈ​របស់​រដ្ឋ ។​

​នៅមុន​ពេលចេញ​អនុក្រឹត្យ​លេខ​២២១​អនក្រ​.​បក ចុះ​ថ្ងៃទី​៣០ ខែធ្នូ ឆ្នាំ​២០២០ ស្តីពី​ការកំណត់​ផ្ទៃ​អាង​ស្តុក​ទឹក​បឹងត្របែក ស្ថិតក្នុង​រាជធានី​ភ្នំពេញ​ជា​សម្បត្តិ​សាធារណៈ​របស់​រដ្ឋ​នេះ រាជរដ្ឋាភិបាល​កម្ពុជា​ធ្លាប់បាន​យល់ព្រម​អនុញ្ញាត​ជាគោលការណ៍​ឲ្យ​រដ្ឋបាល​រាជធានី​ភ្នំពេញ​ធ្វើការ​ស្ថាបនា​ជញ្ជាំង​ទប់​ដី​អំពី​បេតុងអារម៉េ​(Concrete Sheet-Pile) ព័ទ្ធជុំវិញ​អាង​ស្តុក​បឹងត្របែក​ទំហំ​១៣,៣​ហិកតា ដើម្បី​កុំ​ឲ្យ​មានការ​រំលោភ​បន្តទៀត​តាម​ស្មារតី​លិខិត​លេខ ១១០៣​សជណ​.​ម​យ ចុះ​ថ្ងៃទី​២៤ ខែធ្នូ ឆ្នាំ​២០២០ របស់​ទីស្តីការគណៈរដ្ឋមន្ត្រី ។ លើសពីនេះ រាជរដ្ឋាភិបាល​ក៏បាន​យល់ព្រម​អនុញ្ញាត​ជាគោលការណ៍​ឲ្យ​រដ្ឋបាល​រាជធានី​ភ្នំពេញ​ជីក​ស្តា​រអាង​ស្តុក​ទឹក​បឹងត្របែក​ខាងលើ​ឲ្យ​មាន​ជម្រៅ​ជ្រៅ​ជាង​ពេលបច្ចុប្បន្ន ដើម្បី​មាន​សមត្ថភាព​គ្រប់គ្រាន់​ក្នុងការ​ស្តុក​ទឹកភ្លៀង​ឲ្យ​ស្របតាម​លក្ខណៈ​បច្ចេកទេស​ដើម្បី​ឲ្យ​ស្ថានីយ​បូមទឹក​អាច​បូម​ទម្លាក់​បន្តទៅ​កាន់​ប្រព័ន្ធ​បង្ហូរទឹក​នៅ​តំបន់​ភាគខាងត្បូង​រាជធានី​ភ្នំពេញ និង​ចាត់វិធានការ​រដ្ឋបាល និង​វិធានការ​ច្បាប់​ឲ្យ​បាន​ម៉ឺងម៉ាត់ និង​មិន​លើកលែង​ចំពោះ​អ្នក​ដែល​រំលោភ​កាន់កាប់​ហើយ​មក​ធ្វើ​ការតវ៉ា និង​រារាំង​អាជ្ញាធរ​ក្នុងពេល​ចុះ​អនុវត្ត​គម្រោង​ខាងលើនេះ​ផងដែរ ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.