ថ្ងៃ ពុធ ទី ២៧ ខែ មករា ឆ្នាំ ២០២១

រឿងរ៉ាវ​នៃ​ព្រឹត្តិការណ៍​ចម្លងជំងឺ COVID-19 ចូល​សហគមន៍​នៅ​កម្ពុជា ! ១៤​ថ្ងៃ​ចុងក្រោយ​គ្មាន​ករណី​ឆ្លង​ថ្មី​ទេ​ដែល​អាច​ឈានទៅ​បិទ​បញ្ចប់​ព្រឹត្តិការណ៍​សហគមន៍​២៨ វិច្ឆិកា ឆ្នាំ​២០២០​នេះ ខណៈ​មាន​អ្នកជំងឺ​សេសសល់​០៣​នាក់​កំពុង​ព្យាបាល​

ករណី​ចម្លងជំងឺ COVID-19 ចូលក្នុង​សហគមន៍​នៅ​ប្រទេស​កម្ពុជា​ជា​លើកដំបូង គឺ​កើតមានឡើង​ចាប់ពី​ថ្ងៃទី​២៨ ខែវិច្ឆិកា ឆ្នាំ​២០២០​ចេញពី​ក្រុមគ្រួសារ​របស់​ឯកឧត្តម​ឧ​ត្ត​ម​អគ្គានុរក្ស​ថ្នាក់​លេខ​១ ឆែម សាវុធ អត្តលេខ​០០២៥ អគ្គនាយក​នៃ​អគ្គនាយកដ្ឋាន​ពន្ធនាគា​រ​ក្រសួងមហាផ្ទៃ ហើយ​ត្រូវបាន​អាជ្ញាធរ​កម្ពុជា​ប្រសិទ្ធ​នាម​ថា «​ព្រឹត្តិការណ៍​សហគមន៍ ២៨ វិច្ឆិកា​» ។​

​គិត​ត្រឹម​ថ្ងៃទី​២៧ ខែធ្នូ ឆ្នាំ​២០២០​ម្សិលមិញ​នេះ គឺមាន​រយៈពេល​០១​ខែ​ហើយ​ដែលមាន​ករណី​ចម្លងជំងឺ COVID-19 ចូល​សហគមន៍​នៅ​កម្ពុជា​ដោយមាន​អ្នក​ឆ្លង​សរុប​ចំនួន​៤១​នាក់ (​ប្រុស​២២​នាក់ និង ស្រី​១៩​នាក់​) និង​ក្នុងនោះ​មាន​អ្នកទទួលបាន​ការព្យាបាល​ជាសះស្បើយ​សរុប​ចំនួន​៣៨​នាក់ (​ប្រុស​២០​នាក់ និង​ស្រី​១៨​នាក់​) ។ លើសពីនេះ ប្រការ​គួរ​ឲ្យ​ចាប់អារម្មណ៍​នោះ គឺ​ក្នុង​រយៈពេល​១៤​ថ្ងៃ​ចុងក្រោយ​គ្មាន​ករណី​ចម្លងជំងឺ COVID-19​ក្នុង​សហគមន៍​ថ្មី​ទៀតឡើយ ។​

I-​អ្នក​ដែល​ទទួល​ការឆ្លង​ចុងក្រោយ​គេ និង​ទទួល​បានការ​ជាសះស្បើយ​លឿន​មុនគេ​បង្អស់​នៅក្នុង​ព្រឹត្តិការណ៍​សហគមន៍ ២៨ វិច្ឆិកា គឺ ៖ កុមារា​ម្នាក់ អាយុ​០១​ឆ្នាំ​ដែល​ត្រូវជា​កូនប្រុស​របស់​បុរស​អ្នកជំងឺ COVID-19 អាយុ​៣៤​ឆ្នាំ និង​ស្ត្រី​អ្នកជំងឺ COVID-19 អាយុ​៣០​ឆ្នាំ (​តេស្ត​ឃើញ​មាន​ផ្ទុកមេរោគ COVID -19 និង​ដាក់​ឲ្យ​សម្រាក​ព្យាបាល​ជំងឺ​នៅ​ថ្ងៃទី​១៤ ខែធ្នូ និង​ទទួល​បានការ​ជាសះស្បើយ​នៅ​ថ្ងៃទី​១៨ ខែធ្នូ ឆ្នាំ​២០២០) ។​

II-​អ្នក​ដែល​សម្រាក​ព្យាបាល​ជំងឺ​មាន​រយៈពេល​យូរ​ជាងគេ​បង្អស់​នៅក្នុង​ព្រឹត្តិការណ៍​សហគមន៍ ២៨ វិច្ឆិកា គឺ ៖ លោកជំទាវ ហេង គង់ អាយុ​៥៦​ឆ្នាំ ត្រូវជា​ភរិយា របស់​ឯកឧត្តម​ឧ​ត្ត​ម​អគ្គានុរក្ស​ថ្នាក់​លេខ​១ ឆែម សាវុធ អគ្គនាយក​នៃ​អគ្គនាយកដ្ឋាន​ពន្ធនាគា​រ​ក្រសួងមហាផ្ទៃ (​តេស្ត​ឃើញ​មាន​ផ្ទុកមេរោគ COVID-19 និង​ដាក់​ឲ្យ​សម្រាក​ព្យាបាល​ជំងឺ​នៅ​ថ្ងៃទី​២៨ ខែវិច្ឆិកា ឆ្នាំ​២០២០​រហូតមកទល់​ថ្ងៃទី​២៧ ខែធ្នូ ឆ្នាំ​២០២០​មិនទាន់​ជាសះស្បើយ​នៅឡើយ​) ។

III-​អ្នក​ដែល​កំពុង​សម្រាក​ព្យាបាល​ជំងឺ​ហើយ​មិនទាន់​ជាសះស្បើយ​ក្នុង​ព្រឹត្តិការណ៍​សហគមន៍ ២៨ វិច្ឆិកា សរុប​មាន​ចំនួន​០៣​នាក់ គឺ ៖ ១-​លោកជំទាវ ហេង គង់ អាយុ​៥៦​ឆ្នាំ (​អ្នកជំងឺ​សម្រាក​ព្យាបាល​យូរ​ជាងគេ​) ២-​បុរស​ឈ្មោះ អ៊ី តារា អាយុ​២១​ឆ្នាំ (​តេស្ត​ឃើញ​មាន​ផ្ទុកមេរោគ និង​ដាក់​ឲ្យ​សម្រាក​ព្យាបាល​ជំងឺ​នៅ​ថ្ងៃទី​០៦ ខែធ្នូ ឆ្នាំ​២០២០) និង ៣-​បុរស​ឈ្មោះ ខន ប្រសើរ អាយុ​៣៧​ឆ្នាំ (​តេស្ត​ឃើញ​មាន​ផ្ទុកមេរោគ និង​ដាក់​ឲ្យ​សម្រាក​ព្យាបាល​ជំងឺ​នៅ​ថ្ងៃទី​០៩ ខែធ្នូ ឆ្នាំ​២០២០) ។​

IV-​អ្នក​ដែល​ក្លាយជា​ប្រភព​នៃ​ការចម្លង​ជំងឺ COVID-19 ដំបូង​គេ​បង្អស់​ចូលក្នុង​សហគមន៍​បង្កើតបានជា «​ព្រឹត្តិការណ៍​សហគមន៍ ២៨ វិច្ឆិកា​» គឺ ៖ ១-​លោកស្រី ឆែម សុនី​តា អាយុ​៣០​ឆ្នាំ ត្រូវជា​កូនស្រី​ឯកឧត្តម​ឧ​ត្ត​ម​អគ្គានុរក្ស​ថ្នាក់​លេខ​១ ឆែម សាវុធ អគ្គនាយក​នៃ​អគ្គនាយកដ្ឋាន​ពន្ធនាគា​រ​ក្រសួងមហាផ្ទៃ និង ២-​លោក តាំង សេ​វិ​ន​អាប់ អាយុ​៤២​ឆ្នាំ បម្រើ​ការងារ​នៅ​នាយកដ្ឋាន​ព័ត៌មានវិទ្យា​នៃ​ក្រសួងមហាផ្ទៃ ។ អ្នក​ទាំងពីរ​ត្រូវបាន​ក្រសួងសុខាភិបាល​ធ្វើការ​សន្និដ្ឋានថា ជា​ប្រភព​ទី​១​នៃ​ការ​ចម្លងជំងឺ​ពី​ករណី​នាំ​ចូលមក​កម្ពុ​ជានា​អំឡុង​ខែតុលា ឆ្នាំ​២០២០ ។

V-​គិត​ត្រឹម​ថ្ងៃទី​២៧ ខែធ្នូ ឆ្នាំ​២០២០​ម្សិលមិញ​នេះ ព្រះរាជាណាចក្រ​កម្ពុ​ជាមាន​ករណី​ឆ្លង​ជំងឺ COVID-19​សរុប​ចំនួន​៣៦៤​នាក់ (​ប្រុស​២៧៧​នាក់ និង​ស្រី​៨៧​នាក់​) ក្នុងនោះ​មាន​ករណី​ឆ្លង​ចូល​សហគមន៍​សរុប​ចំនួន​៤១​នាក់ (​ប្រុស​២២​នាក់ និង​ស្រី​១៩​នាក់​) ករណី​ជាសះស្បើយ​សរុប​ចំនួន​៣៦០​នាក់ (​ប្រុស​២៧៤​នាក់ និង​ស្រី​៨៦​នាក់​) ក្នុងនោះ​ករណី​ជាសះស្បើយ​ពាក់ព័ន្ធ​នឹង​ព្រឹត្តិការណ៍​សហគមន៍ ២៨ វិច្ឆិកា ចំនួន​៣៨​នាក់ (​ប្រុស​២០​នាក់ និង​ស្រី​១៨​នាក់​) និង​ករណី​កំពុង​សម្រាក​ព្យាបាល​ជំងឺ​សរុប​ចំនួន​០៤​នាក់ (​ប្រុស​០៣​នាក់ និង​ស្រី​០១​នាក់​) ក្នុងនោះ​ពាក់ព័ន្ធ​នឹង​ព្រឹត្តិការណ៍​សហគមន៍ ២៨ វិច្ឆិកា ចំនួន​០៣​នាក់ (​ប្រុស​០២​នាក់ និង​ស្រី​០១​នាក់​) ។

VI-​ចំណុច​ខ្វះខាត​របស់​អាជ្ញាធរ​ក​ន្ល​ង​មក គឺ ៖ ភាព​ធូររលុង​ក្នុងការ​ធ្វើ​ច​ត្តា​ឡី​ស័ក (​ធ្វើ​មិន​ពេញលេញ​មិន​ស្របតាម​និយាម​សុខាភិបាល​នៃ​អង្គការ​សុខភាព​ពិភពលោក​) និង​ការ​លាក់បាំង​ព័ត៌មាន​ជ្រុល​ហួសហេតុ​ពាក់ព័ន្ធ​នឹង​ជំងឺ COVID-19 ។

VII-​ការសន្និដ្ឋាន ៖ រាជរដ្ឋាភិបាល​កម្ពុជា​គ្រប់គ្រង​បាន​ទាំងស្រុង​ទៅលើ​ព្រឹត្តិការណ៍​សហគមន៍ ២៨ វិច្ឆិកា ក្នុង​រយៈពេល​០១​ខែ​កន្លងទៅនេះ ហើយក៏​ជា​ពេលវេលា​ដ៏​ស័ក្តិសម​នាំ​ឲ្យ​រាជរដ្ឋាភិបាល​ប្រកាស​បិទ​បញ្ចប់​នូវ​ព្រឹត្តិការណ៍​ចម្លងជំងឺ COVID-19 ចូលក្នុង​សហគមន៍ ២៨ វិច្ឆិកា ផងដែរ ៕​

Filed in: Feature, ព័ត៌មានជាតិ, សុខភាព

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.