ថ្ងៃ អង្គារ ទី ២០ ខែ សីហា ឆ្នាំ ២០១៩

បុរស​កំពូល​ហេង ! អតីត​ចៅក្រម​ម្នាក់​ទទួលបាន​ការលើក​លែង​ទោស​ក្នុង​រឿង​ពុករលួយ និង​ត្រូវបាន​អនុញ្ញាត​ឲ្យ​បន្ត​មុខងារ​ក្នុង​ក្របខ័ណ្ឌ​អង្គចៅក្រម​វិញ

អតីត​ចៅក្រម​សាលាដំបូង​ខេត្តកណ្តាល​ម្នាក់​ដែល​ធ្លាប់​ទទួលរង​ការផ្តន្ទាទោស​ដាក់ពន្ធនាគា​រ​អស់​រយៈពេល​១​ឆ្នាំ (​ផ្តន្ទាទោស​កំណត់​២​ឆ្នាំ ដោយ​ដាក់ពន្ធនាគារ​១​ឆ្នាំ និង​ព្យួរទោស​១​ឆ្នាំ​) ក្រោម​ការចោទប្រកាន់​ពីបទ​ប្រព្រឹត្ត​ស៊ីសំណូក​ពុករលួយ​ដោយ​ចៅក្រម​នា​ដើមឆ្នាំ​២០១២ គឺ​លោក ហួត ហ៊ាង អាយុ​៤៩​ឆ្នាំ ត្រូវបាន​ព្រះករុណា​ព្រះបាទ​សម្តេច​ព្រះបរមនាថ នរោត្តម សីហមុនី ព្រះមហាក្សត្រ​នៃ​ព្រះរាជាណាចក្រ​កម្ពុជា ទ្រង់​ត្រាស់បង្គាប់​លើកលែងទោស​ទាំងស្រុង​ហើយ​អនុញ្ញាត​ឲ្យ​បន្ត​មុខងារ​ជា​ចៅក្រម​នៅក្នុង​ក្របខ័ណ្ឌ​នៃ​អង្គចៅក្រម​វិញ​តាម​សេចក្តីក្រាបបង្គំទូលថ្វាយ​របស់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ​នស​/​រកត​/១២១៨/១៤០០ ចុះ​ថ្ងៃទី​១៧ ខែធ្នូ ឆ្នាំ​២០១៨ ។​

​គួរ​រំលឹក​ជូន​ថា លោក ហួត ហ៊ាង អតីត​ចៅក្រម​សាលាដំបូង​ខេត្តកណ្តាល​ត្រូវបាន​មន្ត្រីនគរបាល​យុត្តិធម៌​នៃ​អង្គភាព​ប្រឆាំង​អំពើពុករលួយ (ACU) ចាប់​ឃាត់ខ្លួន​នៅក្នុង​បន្ទប់ធ្វើការ​តែម្តង​នា​ថ្ងៃទី​២០ ខែមករា ឆ្នាំ​២០១២ ក្នុង​រឿង​ស៊ីសំណូក​ពុករលួយ​ជាក់ស្តែង​មាន​ទំហំ​ទឹកប្រាក់​ចំនួន​៥ ០០០​ដុល្លារ​អាមេរិក ។ ក្រោយមក​នៅ​ថ្ងៃទី​២៦ ខែកញ្ញា ឆ្នាំ​២០១២​ចៅក្រម​ជំនុំជម្រះ​សាលាដំបូង​ខេត្តកណ្តាល​បានប្រកាស​សាលក្រម​ព្រហ្មទណ្ឌ​សម្រេច​ផ្តន្ទាទោស​លោក​ចៅក្រម ហួត ហ៊ាង ដាក់ពន្ធនាគារ​កំណត់​រយៈពេល​២​ឆ្នាំ តែ​អនុវត្ត​ទោស​ក្នុង​ពន្ធនាគារ​ត្រឹម​រយៈពេល​១​ឆ្នាំ និង​១​ឆ្នាំ​ទៀត​ជា​ទោស​ព្យួរ​ពីបទ​ស៊ីសំណូក​ពុករលួយ​ដោយ​ចៅក្រម ។ ទីបំផុត សំណុំ​រឿងក្តី​ពុករលួយ​របស់លោក​ចៅ​ក្រម ហួត ហ៊ាង ក៏បាន​ទៅដល់​សាលាឧទ្ធរណ៍​សម្រេច​ផ្តន្ទាទោស​តាម​អំណាច​សាលដីកា​ព្រហ្មទណ្ឌ​លេខ​០៨​ក្រ​IV​ត ចុះ​ថ្ងៃទី​១៨ ខែមករា ឆ្នាំ​២០១៣ ។

​លោក ហួត ហ៊ាង កើត​ថ្ងៃទី​១០ ខែមករា ឆ្នាំ​១៩៧០ មាន​កម្រិតវប្បធម៌​បរិញ្ញាបត្រ​ច្បាប់ និង​បាន​ចូល​បម្រើ​ការងារ​រដ្ឋ​នា​អំឡុង​ឆ្នាំ​១៩៩៥ ។ លោក ហួត ហ៊ាង ជា​សិស្ស​ចៅក្រម​ជំនា​ន់ទី​២​សាលា​ភូមិន្ទ​ចៅក្រម​នៃ​រាជបណ្ឌិត្យសភា​វិជ្ជាជីវៈ​តុលាការ និង​ត្រូវបាន​ចាត់​ឲ្យ​ទៅ​បម្រើ​ការងារ​ជា​ចៅក្រម​កម្មសិក្សា​សាលាដំបូង​ខេត្តកណ្តាល ដោយ​ព្រះរាជក្រឹត្យ​លេខ​នស​/​រកត​/០៧០៨/៨៥៩ ចុះ​ថ្ងៃទី​១៤ ខែកក្កដា ឆ្នាំ​២០០៨ ។ ក្រោយមក លោក​ចៅក្រម ហួត ហ៊ាង ក៏​ត្រូវបាន​តាំងស៊ប់​ក្នុង​ក្របខ័ណ្ឌ​អង្គចៅក្រម និង​ចាត់​ឲ្យ​បម្រើ​ការងារ​ជា​ចៅក្រម​សាលាដំបូង​ខេត្តកណ្តាល ដោយ​ព្រះរាជក្រឹត្យ​លេខ​នស​/​រកត​/០២១០/១២៧ ចុះ​ថ្ងៃទី​០៤ ខែកុម្ភៈ ឆ្នាំ​២០១០ ។​

​ប្រការ​គួរ​ឲ្យ​កត់សម្គាល់​នោះ គឺ​នៅត្រង់ថា ទោះបី​ទទួលរង​ការផ្តន្ទាទោស​ពាក់ព័ន្ធ​នឹង​សំណុំរឿង​ស៊ីសំណូក​ពុករលួយ​ក្តី ក៏​លោក​ចៅក្រម ហួត ហ៊ាង មិន​ត្រូវបាន​លុបឈ្មោះ​ចេញពី​ក្របខ័ណ្ឌ​ដូច​ចៅក្រម និង​ព្រះរាជអាជ្ញា​មួយចំនួន​ជាអាទិ៍ លោក​ចៅក្រម អាំង មាលតី អតីត​ប្រធាន​សាលាដំបូង​រាជធានី​ភ្នំពេញ (​លុបឈ្មោះ​ចេញពី​ក្របខ័ណ្ឌ​អង្គចៅក្រម ដោយ​ព្រះរាជក្រឹត្យ​លេខ​នស​/​រកត​/០២១៧/១៦០ ចុះ​ថ្ងៃទី​០៩ ខែកុម្ភៈ ឆ្នាំ​២០១៧) និង​លោក តុ​ប ច័ន្ទ​សិរី​វុ​ធ អតីត​ព្រះរាជអាជ្ញា​នៃ​អយ្យការ​អម​សាលាដំបូង​ខេត្តពោធិ៍សាត់ (​លុបឈ្មោះ​ចេញពី​ក្របខ័ណ្ឌ ដោយ​ព្រះរាជក្រឹត្យ​លេខ​នស​/​រកត​/០១១៥/០៨៩ ចុះ​ថ្ងៃទី​២២ ខែមករា ឆ្នាំ​២០១៥) … ឡើយ ៕​

Filed in: Feature, តុលាការ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.