ថ្ងៃ អាទិត្យ ទី ១៧ ខែ កម្ភៈ ឆ្នាំ ២០១៩

​រួច​ទោស​បាត់ ! ទណ្ឌិត​ជា​ឧកញ៉ា អតីត​ទីប្រឹក្សា​-​មេបញ្ជាការ​អង្គរក្ស​អតីត​មេបក្ស CPP និង​អតីត​ទាហាន​ផ្កាយ​៣​ឈ្មោះ ឈឿន ចាន់ថន ហៅ​ម៉ៅ ទទួលបាន​ការលើកលែង​ទោស​ទាំងស្រុង​

ទណ្ឌិត​ម្នាក់​មាន​ងារ​ជា​ឧកញ៉ា​ឈ្មោះ ឈឿន ចាន់ថន ហៅ​ម៉ៅ អតីត​ជា​នាយទាហាន​ថ្នាក់​ឧ​ត្ត​ម​សេនីយ៍​ឯក (​ផ្កាយ​៣) នៃ​កងយោធពល​ខេមរភូមិន្ទ​ក្រសួងការពារជាតិ អត្តលេខ​០០៣៣៦១ អតីត​ជាទី​ប្រឹក្សា និង​ជា​មេបញ្ជាការ​អង្គរក្ស​សម្តេច​អគ្គ​មហា​ធម្ម​ពោធិ​សាល ជា ស៊ីម អតីត​ប្រធាន​គណបក្ស​ប្រជាជន​កម្ពុជា (CPP) និង​ជា​អតីត​ប្រធានព្រឹទ្ធសភា​នៃ​ព្រះរាជាណាចក្រ​កម្ពុជា ដែល​ត្រូវបាន​ស្ថាប័ន​តុលាការ​សាលាដំបូង​រាជធានី​ភ្នំពេញ និង​តុលាការយោធា​ចាប់ឃុំខ្លួន​កាលពី​ថ្ងៃទី​១៣ ខែសីហា ឆ្នាំ​២០១១ ព្រមទាំង​ផ្តន្ទាទោស​ពីបទ​រំលោភ​លើ​ទំនុកចិត្ត បំ​ផ្លិ​ញ​បំផ្លាញ​ដោយ​ចេតនា និង​គៃបំបាត់​ដោយ​ទុច្ចរិត លក់ដូរ និង​ចែកចាយ​អាវុធ បំផ្លិចបំផ្លាញ​សម្ភារៈ​យោធា​សម្រាប់​បម្រើការ​ប្រយុទ្ធ និង​ខ្វះ​ស្មារតី​ទទួលខុសត្រូវ​ក្នុង​ការដឹកនាំ​គ្រប់គ្រង​អង្គភាព ទទួលបាន​ការលើកលែង​ទោស​ជា​ស្ថាពរ​ហើយ ដោយ​ព្រះរាជក្រឹត្យ​លេខ​នស​/​រកត​/១១១៨/១២៣៤ ចុះ​ថ្ងៃទី​១២ ខែវិច្ឆិកា ឆ្នាំ​២០១៨ តាម​សេចក្តីក្រាបបង្គំទូលថ្វាយ​របស់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ។​

​លោក ឈឿន ចាន់ថន ហៅ​ម៉ៅ អតីត​ជា​នាយទាហាន​ថ្នាក់​ឧ​ត្ត​ម​សេនីយ៍​នៃ​កងយោធពល​ខេមរភូមិន្ទ​ក្រសួងការពារជាតិ អត្តលេខ​០០៣៣៦១ ឋានន្តរស័ក្តិ​ថ្នាក់​ឧ​ត្ត​ម​សេនីយ៍​ឯក (​ផ្កាយ​៣) ទទួលបាន​ការតែងតាំង​ជា​ឧកញ៉ា ដោយ​ព្រះរាជក្រឹត្យ​លេខ​នស​/​រកត​/០៩០៦/៣៧២ ចុះ​ថ្ងៃទី​១២ ខែកញ្ញា ឆ្នាំ​២០០៦ និង​ទទួលបាន​ការតែងតាំង​ជាទី​ប្រឹក្សា​សម្តេច​អគ្គ​មហា​ធម្ម​ពោធិ​សាល ជា ស៊ីម អតីត​ប្រធានព្រឹទ្ធសភា​នៃ​ព្រះរាជាណាចក្រ​កម្ពុជា មាន​ឋានៈ​ស្មើ​រដ្ឋមន្ត្រី​បន្ថែម​លើ​មុខងារ​ជា​មេបញ្ជាការ​កង​អង្គរក្ស​សម្តេច​អគ្គ​មហា​ធម្ម​ពោធិ​សាល ជា ស៊ីម និង​ជា​នាយរង​សេនាធិការ​ចម្រុះ​នៃ​កងយោធពល​ខេមរភូមិន្ទ ដោយ​ព្រះរាជក្រឹត្យ​លេខ​នស​/​រកត​/០២០៧/០៧៤ ចុះ​ថ្ងៃទី​១៧ ខែកុម្ភៈ ឆ្នាំ​២០០៧ ។​

​បន្ទាប់ពី​មានរឿង​អាស្រូវ​រហូតដល់​ស្ថាប័ន​តុលាការ​ចាប់ឃុំខ្លួន​នា​ថ្ងៃទី​១៣ ខែសីហា ឆ្នាំ​២០១១ លោក​ឧកញ៉ា ឈឿន ចាន់ថន ហៅ​ម៉ៅ ដែល​ធ្លាប់មាន​ងារ និង​ឋានៈ​ជា «​ឯកឧត្តម​ឧ​ត្ត​ម​សេនីយ៍​ឯកឧកញ៉ា​» ក៏ត្រូវ​បាន​រាជរដ្ឋាភិបាល​សម្រេច​ប​ញ្ច​ប់​ភារកិច្ច និង​លុបឈ្មោះ​ចេញពី​មេបញ្ជាការ​កងឯកភាព​អង្គរក្ស​សម្តេច​អគ្គ​មហា​ធម្ម​ពោធិ​សាល ជា ស៊ីម និង​ពី​នាយរង​សេនាធិការ​ចម្រុះ​នៃ​កងយោធពល​ខេមរភូមិន្ទ​វិញ ដោយ​អនុក្រឹត្យ​លេខ​៩៥៨​អនក្រ​.​ត​ត ចុះ​ថ្ងៃទី​១២ ខែសីហា ឆ្នាំ​២០១១ ។ លើសពីនេះ លោក​ឧកញ៉ា ឈឿន ចាន់ថន ហៅ​ម៉ៅ ក៏ត្រូវ​បាន​ដកហូត​មុខតំណែង​ពី​ទីប្រឹក្សា​សម្តេច​អគ្គ​មហា​ធម្ម​ពោធិ​សាល ជា ស៊ីម វិញ ដោយ​ព្រះរាជក្រឹត្យ​លេខ​នស​/​រកត​/០៨១១/៧៦៩ ចុះ​ថ្ងៃទី​១៣ ខែសីហា ឆ្នាំ​២០១១ ព្រមទាំង​ដកហូត​ឋានន្តរស័ក្តិ​ថ្នាក់​ឧ​ត្ត​ម​សេនីយ៍​ឯក (​ផ្កាយ​៣) និង​លុបឈ្មោះ​ចេញពី​ក្របខ័ណ្ឌ​នៃ​កងយោធពល​ខេមរភូមិន្ទ​វិញ ដោយ​ព្រះរាជក្រឹត្យ​លេខ​នស​/​រកត​/០៨១១/៧៦៨ ចុះ​ថ្ងៃទី​១៣ ខែសីហា ឆ្នាំ​២០១១ ។

​គួរ​រំលឹក​ជូន​ថា កាលពី​ថ្ងៃទី​០២ ខែតុលា ឆ្នាំ​២០១៧​ក្រុមប្រឹក្សា​ជំនុំជម្រះ​តុលាការ​កំពូល​បាន​បើកសវនាការ​ជំនុំជម្រះ​ទោស​ជនជាប់ចោទ​ឈ្មោះ ឈឿន ចាន់ថន ហៅ​ម៉ៅ និង​នៅ​ថ្ងៃទី​០៩ ខែតុលា ឆ្នាំ​២០១៧​ក៏បាន​ប្រកាស​សាលដីកា​ព្រហ្មទណ្ឌ​លេខ​៣២២ ចុះ​ថ្ងៃទី​០៩ ខែតុលា ឆ្នាំ​២០១៧​សម្រេច​តម្កល់​សាលដីកា​ព្រហ្មទណ្ឌ​លេខ​៦៥​ក្រ​IV​អ ចុះ​ថ្ងៃទី​១២ ខែសីហា ឆ្នាំ​២០១៤​របស់​សាលាឧទ្ធរណ៍ ដោយ​ផ្តន្ទាទោស​ជនជាប់ចោទ​ឈ្មោះ ឈឿន ចាន់ថន ហៅ​ម៉ៅ ដាក់ពន្ធនាគារ​កំណត់​១៥​ឆ្នាំ ពីបទ​រំលោភ​លើ​ទំនុកចិត្ត បំ​ផ្លិ​ញ​បំផ្លាញ​ដោយ​ចេតនា និង​គៃបំបាត់​ដោយ​ទុច្ចរិត លក់ដូរ និង​ចែកចាយ​អាវុធ បំផ្លិចបំផ្លាញ​សម្ភារៈ​យោធា​សម្រាប់​បម្រើការ​ប្រយុទ្ធ និង​ខ្វះ​ស្មារតី​ទទួលខុសត្រូវ​ក្នុង​ការដឹកនាំ​គ្រប់គ្រង​អង្គភាព ប្រព្រឹត្ត​នៅ​រាជធានី​ភ្នំពេញ​នា​អំឡុង​ឆ្នាំ​២០០៧ ធ្វើ​ឲ្យ​ជនជាប់ចោទ​រូបនេះ​ជាប់​ឈ្មោះ​ជា​ទណ្ឌិត ។​

​ឥឡូវនេះ ក្រោយ​ជាប់ពន្ធនាគារ​អស់​រយៈពេល​ជាង​៧​ឆ្នាំ គឺ​ទណ្ឌិត ឈឿន ចាន់ថន ហៅ​ម៉ៅ អាយុ​៤៩​ឆ្នាំ ដែលមាន​ងារ​ជា​ឧកញ៉ា ទទួលបាន​ការលើកលែង​ទោស​ជា​ស្ថាពរ​ហើយ ដោយ​បន្សល់ទុក​នូវ​ទ្រព្យសម្បត្តិ​ច្រើន​គួរសម​បន្ទាប់ពី​បាន​ចំណាយ​ក៏​អស់​ច្រើន​រួចមក​ផងដែរ ៕​

Filed in: Feature, តុលាការ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.