ថ្ងៃ ព្រហស្បតិ៍ ទី ១៥ ខែ វិច្ឆិកា ឆ្នាំ ២០១៨

កាត់​បន្ថែម ! ផ្ទៃដី​បឹងទំពុន​៣៥​ហិកតា ត្រូវបាន​រាជរដ្ឋាភិបាល​កាត់​ចេញពី​ទ្រព្យសម្បត្តិ​សាធារណៈ​របស់​រដ្ឋ​ឲ្យ​ទៅ​ក្រុមហ៊ុន​ឯកជន​សាច់ញាតិ​«​យាយ​ភូ​»

កាលពី​ពាក់កណ្តាល​ខែកញ្ញា ឆ្នាំ​២០១៨​កន្លងទៅ​ថ្មីៗ​នេះ រាជរដ្ឋាភិបាល​កម្ពុជា​ដែលមាន​សម្តេច​អគ្គមហាសេនាបតី​តេ​ជោ ហ៊ុន សែន ជា​ប្រមុខ បានសម្រេច​ធ្វើ​អនុ​ប​យោគ​នូវផ្ទៃដី​ទំហំ​៣៥​ហិកតា ឋិត​នៅ​សង្កាត់​បឹងទំពុន ខណ្ឌមានជ័យ រាជធានី​ភ្នំពេញ ពី​ទ្រព្យសម្បត្តិ​សាធារណៈ​របស់​រដ្ឋ​ទៅជា​ទ្រព្យសម្បត្តិ​ឯកជន​របស់​រដ្ឋ និង​ធ្វើ​ប្រទានកម្ម​ជា​កម្មសិទ្ធិ​ជូន​ក្រុមហ៊ុន ភ្នំពេញ ព្រី​ខាស ផ្លេ​ន (Phnom Penh Precast Plants Co.,Ltd.) មាន​លោក​ឧកញ៉ា ជឹ​ង ធាន​សេង ត្រូវជា​ប្អូនប្រុស​លោកជំទាវ​ឧកញ៉ា ជឹ​ង សុភាព ហៅ «​យាយ​ភូ​» អនុប្រធាន​កាកបាទក្រហមកម្ពុជា និង​ត្រូវជា​ភរិយា​របស់​ឯកឧត្តម​ឧកញ៉ា ឡាវ ម៉េង​ឃី​ន ជា​ប្រធាន​ក្រុមហ៊ុន​ក្រោមរូបភាព «​អភិវឌ្ឍន៍​» ។​

​ទាក់ទង​នឹង​ការ​កាត់​ផ្ទៃដី​បឹងទំពុន​ពី​ទ្រព្យសម្បត្តិ​សាធារណៈ​របស់​រដ្ឋ​ទៅ​ឲ្យ​ក្រុមហ៊ុន​ឯកជន​ឈ្មោះ Phnom Penh Precast Plants Co.,Ltd. របស់លោក​ឧកញ៉ា ជឹ​ង ធាន​សេង ធ្វើជា​កម្មសិទ្ធិ​នេះ​ត្រូវបាន​រាជរដ្ឋាភិបាល​បញ្ជាក់​យ៉ាងច្បាស់​ថា «​រាល់​ឯកសារ​ពាក់ព័ន្ធ​នឹង​ការកាន់កាប់ និង​ឯកសារ​លក់​- ទិញ​កន្លងមក ត្រូវ​ទុកជា​មោ​ឃៈ ។​» ។​

​ដោយឡែក នៅសល់​ផ្ទៃ​ទំហំ​១២,៩​ហិកតា​ប៉ុណ្ណោះ ត្រូវបាន​រាជរដ្ឋាភិបាល​សម្រេច​កំណត់​ជា​ផ្ទៃ​អាង​ស្តុក​ទឹក​បឹងទំពុន​ដែលជា​ទ្រព្យសម្បត្តិ​សាធារណៈ​របស់​រដ្ឋ ។​

​គួរ​រំលឹក​ជូន​ដែរ​ថា កាលពី​អំឡុង​ឆ្នាំ​២០១៥​កន្លងទៅ រាជរដ្ឋាភិបាល​ធ្លាប់បាន​សម្រេច​ផ្តល់​សិទ្ធិ​ឲ្យ​ក្រុមហ៊ុន​ឯកជន​ឈ្មោះ ING Holding Co.,Ltd. របស់លោក​ឧកញ៉ា អ៊ឹង ប៊ុន​ហ៊ូ​វ អនុវត្ត​គម្រោង​អភិវឌ្ឍន៍​ទីក្រុង​រណប​នៅ​តំបន់​បឹងទំពុន និង​តំបន់​ជើងឯក លើ​ផ្ទៃដី​ទំហំ​២ ៥៧២​ហិកតា គ្របដណ្តប់​ក្នុងភូមិ​សាស្ត្រ​ខណ្ឌមានជ័យ​ជាង​១ ០០០​ហិកតា ខណ្ឌដង្កោ រាជធានី​ភ្នំពេញ​ជាង​១ ២០០​ហិកតា និង​ក្រុង​តាខ្មៅ ខេត្តកណ្តាល​ប្រមាណ​៣៧១​ហិកតា ដោយ​រាជរដ្ឋាភិបាល​បានសម្រេច​ទៀតថា «​អ្នក​ដែល​បាន​គ្រប់គ្រង​ផ្ទៃដី​ពាក់ព័ន្ធ​នឹង​តំបន់​អភិវឌ្ឍន៍​ទាំងមូល​ចាំបាច់​ត្រូវ​ចូលរួម​បដិភាគ​ក្នុងការ​អនុវត្ត​គម្រោង និង​ប្រជាពលរដ្ឋ​ដែល​រស់​នៅលើ​ផ្ទៃ​បឹង ត្រូវ​បដិភាគ​ចំនួន​២០% ជាមួយ​ក្រុមហ៊ុន ING Holding Co.,Ltd. ក្នុង​ការចាក់​បំពេញ​ដី​នៅ​តំបន់​អភិវឌ្ឍន៍ និង​ការរៀបចំ​ប្រព័ន្ធ​ហេដ្ឋារចនាសម្ព័ន្ធ ។​» ៕

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.