ថ្ងៃ ចន្ទ ទី ១៧ ខែ ធ្នូ ឆ្នាំ ២០១៨

​រឿង​គួរ​អស់សំណើច ! បទ​ចម្រៀង «​សល់​តែ​ចិត្ត​ស្មោះ​» របស់​ផលិតកម្ម «​អង្គរ​អមតៈ​» បែរជា​អាជ្ញាធរ​បញ្ឈប់​ការផ្សព្វផ្សាយ​បទ​ចម្រៀង​របស់​ផលិតកម្ម «​ខ្មែរ​អមតៈ​» ទៅវិញ

ក្រោម​ការលើក​ហេតុផល​ថា ចម្រៀង​កាយវិការ​ខារ៉ាអូខេ​ខ្មែរ​មាន​ចំណងជើង «​សល់​តែ​ចិត្ត​ស្មោះ​» របស់​ផលិតកម្ម «​អង្គរ​អមតៈ -Angkor Amatak» ច្រៀង​ដោយ​តារាចម្រៀង​លោកស្រី កែវ ច័ន្ទ​សម្ផស្ស ធ្វើ​ឲ្យ​ប៉ះពាល់​ដល់​តម្លៃ​ការងារ​របស់​អ្នកបម្រើ​ការងារ​តាម​ផ្ទះ​នាពេល​បច្ចុប្បន្ននេះ ទើប​កាលពី​ថ្ងៃទី​០៣ ខែកញ្ញា ឆ្នាំ​២០១៨​កន្លងទៅ ឯកឧត្តម អ៊ិត សំហេង រដ្ឋមន្ត្រីក្រសួង​ការងារ និង​បណ្តុះបណ្តាល​វិជ្ជាជីវៈ បានចេញ​លិខិតផ្លូវការ​ស្នើសុំ​ឯកឧត្តម​រដ្ឋមន្ត្រីក្រសួង​ព័ត៌មាន និង​លោកជំទាវ​រដ្ឋមន្ត្រីក្រសួង​វប្បធម៌ និង​វិចិត្រសិល្បៈ​ចាត់វិធានការ​ផ្អាក​ការផ្សព្វផ្សាយ​ជា​បន្តទៅទៀត ។​

​បន្ទាប់មក ក្រសួង​ព័ត៌មាន​ដែលមាន​ឯកឧត្តម ខៀវ កាញារីទ្ធ ជា​រដ្ឋមន្ត្រី​ក៏បាន​ចេញ​លិខិតផ្លូវការ​មួយ​លេខ​១២៣៣​ព​.​ម ចុះ​ថ្ងៃទី​១៧ ខែកញ្ញា ឆ្នាំ​២០១៨​កន្លងទៅ​ថ្មីៗ​ជម្រាប​មក​ម្ចាស់​ប្រព័ន្ធ​ផ្សព្វផ្សាយ​ទាំងអស់​ឲ្យ​បញ្ឈប់​ការចាក់ផ្សាយ​បទ​ចម្រៀង​មាន​ចំណងជើង​ថា «​សល់​តែ​ចិត្ត​ស្មោះ​» ច្រៀង​ដោយ​លោកស្រី កែវ ច័ន្ទ​សម្ផស្ស ចាប់​ពីថ្ងៃ​ជូនដំណឹង​តទៅ ។

​ប្រការ​គួរ​ឲ្យ​ចាប់អារម្មណ៍ និង​អស់សំណើច​នោះ នៅត្រង់ថា បទ​ចម្រៀង «​សល់​តែ​ចិត្ត​ស្មោះ​» ច្រៀង​ដោយ​តារាចម្រៀង​លោកស្រី កែវ ច័ន្ទ​សម្ផស្ស គឺជា​របស់​ផលិតកម្ម «​អង្គរ​អមតៈ – Angkor Amatak» បែរជា​ក្រសួង​ការងារ និង​បណ្តុះបណ្តាល​វិជ្ជាជីវៈ​ស្នើសុំ​ឲ្យ​បញ្ឈប់​ការផ្សព្វផ្សាយ​ដោយ​បញ្ជាក់ថា ជា​បទ​ចម្រៀង​របស់​ផលិតកម្ម «​ខ្មែរ​អមតៈ​» និង​ផ្តល់នូវ​ទិន្នន័យ Link តាម​ប្រព័ន្ធ​ផ្សព្វផ្សាយ​សង្គម Youtube ខុសឆ្គង​ពី​ការពិត​ទៅវិញ (Sic!) ។

(នេះជាបទចម្រៀងទុកជាព័ស្តុតាង មិនមែនមានបំណងចង់ផ្សព្វផ្សាយផ្គើនទៅនឹង​បម្រាមរបស់ក្រសួងព័ត៌មាននោះទេ) ៕

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.