ពិត គឺមិនពិត មិនពិត គឺពិត អ្វីៗក៏អាចកើតមានឡើងដែរ នៅសម័យព្រះរាជាណាចក្រកម្ពុជាទី២ ដែលជាព្រះរាជាណាចក្រអច្ឆរិយៈ ទោះបីប្លែកពីគេ ធៀបនឹងបណ្តាប្រទេសនានា នៅលើពិភពលោក ក៏ដោយ ។ ឥឡូវនេះ មជ្ឈដ្ឋានជាច្រើន បាននាំគ្នាផ្តោតអារម្មណ៍ និងដាក់ជាសំណួរថា « តើគណបក្សសង្គ្រោះជាតិ នឹងត្រូវរលាយ ដែរ ឬទេ ? » បន្ទាប់ពី ក្រសួងមហាផ្ទៃ ដាក់ពាក្យប្តឹងសុំរំលាយ នាថ្ងៃទី០៦ ខែតុលា ឆ្នាំ២០១៧ ទៅស្ថាប័នតុលាការកំពូល តាមរយៈក្រុមមេធាវីតំណាងដោយអាណត្តិ ដោយយកមូលដ្ឋាន យោងតាមពាក្យបណ្តឹងរបស់គណបក្សហ្វ៊ុនស៊ិនប៉ិច និងគណបក្សយុវជនកម្ពុជា ដែលជាគណបក្សនយោបាយ ដង្ហែគាំទ្រគណបក្សប្រជាជនកម្ពុជា ( CPP ) ។
ចម្លើយ ៖ គណបក្សសង្គ្រោះជាតិ ( CNRP ) នឹងត្រូវរលាយ ពីព្រោះមានអ្នក « ចង់រំលាយ » ដោយមិនខ្វល់នឹងឆន្ទៈរបស់ប្រជាពលរដ្ឋ ជាម្ចាស់ឆ្នោតយ៉ាងតិចជាង៣លាននាក់ ក្នុងចំណោមសន្លឹកឆ្នោតបានការសរុប ចំនួនជាង៦លានសំឡេង ឡើយ ៕
