ថ្ងៃ ពុធ ទី ១២ ខែ ធ្នូ ឆ្នាំ ២០១៨

ហួសចិត្ត​ឥត​អ្វី​ថ្លែង ! សំណុំរឿង​ឃាតកម្ម​មេដឹកនាំ​សហជីព ជា វិជ្ជា​, រស់ សុ​វណ្ណា​រ៉េត និង ហ៊ី វុទ្ធី គឺ​រាជរដ្ឋាភិបាល​បាន​ត្រឹម​ពោល​ពាក្យ «​សោកស្តាយ​» និង​ទម្លាក់កំហុស​លើ​ក្រុមគ្រួសារ​ជនរងគ្រោះ​ថា «​ខ្វះ​ការសហការ​»

សំណុំរឿង​ឃាតកម្ម​បាញ់សម្លាប់​លើ​លោក ជា វិជ្ជា អតីត​មេដឹកនាំ​សហជីព​សេរី​កម្មករ​នៃ​ព្រះរាជាណាចក្រ​កម្ពុជា (FTUWKC) ដ៏​ល្បីឈ្មោះ​នៅ​កណ្តាល​រាជធានី​ភ្នំពេញ​កាលពី​អំឡុង​ឆ្នាំ​២០០៤ រហូតមក​ទល់នឹង​ពេលនេះ​មាន​រយៈពេល​ជិត​១៤​ឆ្នាំ​ហើយ ខណៈ​អាជ្ញា​ធរមាន​សមត្ថកិច្ច​ពាក់ព័ន្ធ​មិនទាន់បាន​វែកមុខ និង​ចាប់ខ្លួន​ឃាតក​ដៃដល់​យកមក​ផ្តន្ទាទោស​តាមច្បាប់​នៅឡើយ បែរជា​តំណាង​រាជរដ្ឋាភិបាល​កម្ពុជា​បាន​ត្រឹម​ពោល​ពាក្យ​ថា «​សោកស្តាយ​» និង​ទម្លាក់កំហុស​ទៅលើ​ក្រុមគ្រួសារ​ជនរងគ្រោះ​ថា «​ខ្វះ​ការសហការ​» ទៅវិញ ជាហេតុ​ធ្វើ​ឲ្យ​ក្រុមគ្រួសារ​សាច់ញាតិ​ជនរងគ្រោះ​សម្តែង​នូវ​ការហួសចិត្ត​ឥត​អ្វី​ថ្លែង ។​

​បទ​អន្តរាគមន៍​របស់​ឯក​ឧ​ត្ត​ម ហ៊ូ វុ​ឌ្ឍី អនុរដ្ឋលេខាធិការ​ក្រសួង​ការងារ និង​បណ្តុះបណ្តាល​វិជ្ជាជីវៈ តំណាង​រាជរដ្ឋាភិបាល​កម្ពុជា​ដែល​កត់ត្រា​នៅក្នុង​សម្រង់​របាយការណ៍​នៃ​គណៈកម្មាធិការ​ជំនាញ​ឆ្នាំ​២០១៧​ករណី​ការអនុវត្ត​អនុសញ្ញា​លេខ​៨៧​របស់​ព្រះរាជាណាចក្រ​កម្ពុជា​ក្នុង​សន្និសីទ​អន្តរជាតិ​វិស័យ​ការងារ​លើក​ទី​១០៦​ពាក់ព័ន្ធ​នឹង​ករណី​ឃាតកម្ម​លើ​មេដឹកនាំ​សហជីព ជា វិជ្ជា​, រស់ សុ​វណ្ណា​រ៉េត និង ហ៊ី វុទ្ធី ថា «​រាជរដ្ឋាភិបាល​ពិតជា​សោកស្តាយ​ដែល​មិនអាច​ជំរុញ​ការស៊ើបអង្កេត​ដោយមាន​បញ្ហា​ប្រឈម​ជាច្រើន រួមទាំង​កង្វះខាត​ការសហការ​ពី​ក្រុមគ្រួសារ​ជនរងគ្រោះ ។​» ។

​លោក ជា វិជ្ជា អតីត​ប្រធាន​សហជីព​សេរី​កម្មករ​នៃ​ព្រះរាជាណាចក្រ​កម្ពុជា ដែល​ព្រះ​បរម​រតន​កោដ្ឋ នរោត្តម សីហនុ អតីត​ព្រះមហាវីរក្សត្រ​នៃ​ព្រះរាជាណាចក្រ​កម្ពុជា​កាល​នៅមាន​ព្រះជន្ម ទ្រង់​ចាត់ទុកជា​អ្នកស្នេហាជាតិ​ដ៏​ប្រសើរ​មួយរូប​តាម​ព្រះរាជសារ​ចុះ​ថ្ងៃទី​០៧ ខែសីហា ឆ្នាំ​២០០៥​នោះ ត្រូវបាន​ឃាតក​យង់ឃ្នង​បាញ់សម្លាប់​នា​ថ្ងៃទី​២២ ខែមករា ឆ្នាំ​២០០៤ នៅមុខ​តូប​លក់​កាសែត​ក្បែរ​របង​វត្ត​លង្កា ក្នុងភូមិ​សាស្ត្រ​ខណ្ឌចំការមន រាជធានី​ភ្នំពេញ ។

​ជាមួយនឹង​ការសម្រេច​បង្គាប់​ឲ្យ​ដោះលែង​បុរស​វ័យក្មេង​ពីរ​នាក់​ឈ្មោះ ប៊​ន សំណាង និង​ឈ្មោះ សុខ សំអឿន ដែល​សមត្ថកិច្ច​នគរ​បាល​យុត្តិធម៌​ចាប់ខ្លួន និង​ស្ថាប័ន​តុលាការ​ផ្តន្ទាទោស​ដាក់ពន្ធនាគា​រ​ពីបទ​ឃាតកម្ម​គិតទុក​ជាមុន​លើ​លោក ជា វិជ្ជា អស់​រយៈពេល​ច្រើន​ឆ្នាំ​ទាំង​អយុត្តិធម៌​មាន​សេរីភាព​វិញ​តាម​អំណាច​សាលដីកា​ព្រហ្មទណ្ឌ​លេខ​២៣៩ ចុះ​ថ្ងៃទី​២៥ ខែកញ្ញា ឆ្នាំ​២០១៣ របស់​តុលាការ​កំពូល គឺ​តុលាការ​កំពូល​ក៏បាន​សម្រេច​បង្គាប់​ឲ្យ​ព្រះរាជអាជ្ញា​អម​សាលាដំបូង​រាជធានី​ភ្នំពេញ​បើក​ការស៊ើបអង្កេត​ប្រឆាំង​លើ​ជនល្មើស​មិន​ស្គាល់មុខ​ដែល​បាន​ធ្វើឃាត​លោក ជា វិជ្ជា ផងដែរ ។​

​យោងតាម​អំណាច​សាលដីកា​ព្រហ្មទណ្ឌ​លេខ​២៣៩ ចុះ​ថ្ងៃទី​២៥ ខែកញ្ញា ឆ្នាំ​២០១៣​របស់​តុលាការ​កំពូល តំណាង​អយ្យការ​អម​សាលាដំបូង​រាជធានី​ភ្នំពេញ​ក៏​បានចេញ​លិខិតផ្លូវការ​លេខ​៦៩​អយខ ចុះ​ថ្ងៃទី​២៨ ខែមករា ឆ្នាំ​២០១៤​គោរព​ជូន​ឯកឧត្តម​នាយ​ឧ​ត្ត​ម​សេនីយ៍ នេ​ត សាវឿន អគ្គស្នងការ​នៃ​អគ្គស្នងការដ្ឋាន​នគរ​បាល​ជាតិ​ក្រសួងមហាផ្ទៃ ស្នើ​ឲ្យ​មានការ​ស្រាវជ្រាវ ស៊ើបអង្កេត​កំណត់​អត្តសញ្ញាណ​ជន​ប្រព្រឹត្ត​បទល្មើស​ដែល​បាន​ធ្វើឃាត​លោក ជា វិជ្ជា និង​ប្រមូល​ព័ស្តុតាង​បញ្ជូនមក​អយ្យការ​អម​សាលាដំបូង​រាជធានី​ភ្នំពេញ​ដើម្បី​ចាត់ការ​តាម​នីតិវិធី ។

​លើសពីនេះ យោងតាម​សំណើ​របស់​ឯកឧត្តម អ៊ិត សំហេង រដ្ឋមន្ត្រីក្រសួង​ការងារ និង​បណ្តុះបណ្តាល​វិជ្ជាជីវៈ រាជ​ដ្ឋា​ភិ​បាល​កម្ពុជា​ដែលមាន​សម្តេច​អគ្គមហាសេនាបតី​តេ​ជោ ហ៊ុន សែន ជា​ប្រមុខ​ធ្លាប់បាន​សម្រេច​តែងតាំង​សមាសភាព​នៃ​គណៈកម្មការ​អន្តរក្រសួង​ស៊ើបអង្កេត​ពិសេស​លើ​ករណី​បណ្តឹង​លេខ​២៣១៨​ស្តីពី​ករណី​ឃាតកម្ម​លើ​មេដឹកនាំ​សហជីព ជា វិជ្ជា​, ហ៊ី វុទ្ធី និង រស់ សុ​វណ្ណា​រ៉េត ដោយ​សេចក្តីសម្រេច​លេខ​៧៣​សសរ ចុះ​ថ្ងៃទី​១៥ ខែកញ្ញា ឆ្នាំ​២០១៥ ផងដែរ ប៉ុន្តែ​រហូតមកទល់​ប​ច្ចុ​ប្បន្ន​មាន​រយៈពេល​ជិត​២​ឆ្នាំ​ហើយ ក៏មាន​សភាព «​ស្ងាត់ឈឹង​ដូច​ចោរលួច​សេះ​» ដដែល ។​

​លោក ជា មុនី សមាជិក​គណៈកម្មាធិកា​រ​នាយក អតីត​ប្រធាន​សហជីព​សេរី​កម្មករ​នៃ​ព្រះរាជាណាចក្រ​កម្ពុជា និង​ត្រូវជា​ប្អូនប្រុស​បង្កើត​របស់​សព​លោក ជា វិជ្ជា បាន​មានប្រសាសន៍ប្រាប់​គេហទំព័រ​សារព័ត៌មាន​ដើមត្នោត​តាម​ទូរ​ស័​ទ្ទ​នា​រសៀល​ថ្ងៃទី​៣០ ខែសីហា ឆ្នាំ​២០១៧​នេះ​ឲ្យ​ដឹងថា «​រូបខ្ញុំ​ជា​តំណាង​ដើម​បណ្តឹងរដ្ឋប្បវេណី​នៅក្នុង​សំណុំ​រឿងក្តី​ឃាតកម្ម​លោក ជា វិជ្ជា នៅ​ស្ថាប័ន​តុលាការ​ជា​ហូរហែ​កន្លងមក មិនមាន​ឈ្មោះ​នៅក្នុង​សមាសភាព​នៃ​គណៈកម្មការ​អន្តរក្រសួង​ស៊ើបអង្កេត​ពិសេស​លើ​ករណី​បណ្តឹង​លេខ​២៣១៨​ស្តីពី​ករណី​ឃាតកម្ម​លើ​មេដឹកនាំ​សហជីព ជា វិជ្ជា​, ហ៊ី វុទ្ធី និង រស់ សុ​វណ្ណា​រ៉េត ដែល​បង្កើត​ដោយ​រាជរដ្ឋាភិបាល​កម្ពុជា​នោះទេ ។ ខ្ញុំ​មិនដែល​បានទទួល​ព័ត៌មាន​អ្វី​សូម្បីតែ​បន្តិច​ពី​គណៈកម្មាធិការ​អន្ត​ក្រសួង​ដើម្បី​ចូលរួម​សហការ ។ ដូច្នេះ ការណ៍​ដែល​តំណាង​រាជរដ្ឋាភិបាល​កម្ពុជា​លើកឡើងថា ខ្វះ​ការសហការ​ពី​ក្រុមគ្រួសារ​ជនរងគ្រោះ​នោះ គឺជា​រឿង​ភូតភរ​បំផ្លើស​ខុស​ការពិត​ទាំងស្រុង ។ » ។

​គួរបញ្ជាក់​ជូន​ដែរ​ថា លោក រស់ សុ​វណ្ណា​រ៉េត អតីត​មេដឹកនាំ​សហជីព​សេរី​កម្មករ​នៃ​រោងចក្រ​ទ្រី​នុង​ហ្គា​ល កូ​មា​រា ត្រូវបាន​ឃាតក​បាញ់សម្លាប់​នា​ថ្ងៃទី​០៧ ខែឧសភា ឆ្នាំ​២០០៤ នៅ​រាជធានី​ភ្នំពេញ និង​លោក ហ៊ី វុទ្ធី អតីត​មេដឹកនាំ​សហជីព​សេរី​កម្មករ​នៃ​រោងចក្រ​សាន់​តិច (Sun Tex) ត្រូវបាន​ឃាតក​បាញ់សម្លាប់​នា​ថ្ងៃទី​២៤ ខែកុម្ភៈ ឆ្នាំ​២០០៧ នៅ​រាជធានី​ភ្នំពេញ ៕​

Filed in: Feature, តុលាការ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.