ថ្ងៃ អាទិត្យ ទី ២៦ ខែ ឧសភា ឆ្នាំ ២០១៩

​រដ្ឋាករទឹក​ស្វយ័ត​ក្រុងភ្នំពេញ​ប្រកាស​សូម​អភ័យទោស​ចំពោះ​កំហុសឆ្គង​ក្នុងការ​គណនា​ថ្លៃ​ទឹក​ថ្មី​បន្ទាប់ពី​ប្រតិកម្ម​របស់​នាយករដ្ឋមន្ត្រី

នៅ​ថ្ងៃទី​២៨ ខែសីហា ឆ្នាំ​២០១៧​នេះ រដ្ឋាករទឹក​ស្វយ័ត​ក្រុងភ្នំពេញ​បានចេញ​លិខិត​លេខ​១៩៤​សជណ ជូនដំណឹង​អំពី​ការ​សូម​អភ័យទោស​ចំពោះ​កំហុសឆ្គង​ក្នុងការ​គណនា​ថ្លៃ​ទឹក​ថ្មី​ដែល​បានធ្វើ​ឲ្យ​មាន​ផលប៉ះពាល់​ដល់​អតិថិជន​ទាំងអស់ (​អ្នកប្រើប្រាស់​ទឹក​នៅ​រាជធានី​ភ្នំពេញ និង​ទីក្រុង​តាខ្មៅ ខេត្តកណ្តាល​) ។ លើសពីនេះ ជាមួយនឹង​ការអះអាង​ថា នឹងមិន​ឲ្យ​មានការ​ខុសឆ្គង​ជា​លើក​ទី​២​នោះ រដ្ឋាករទឹក​ស្វយ័ត​ក្រុងភ្នំពេញ​ក៏បាន​ប្រកាសថា នឹងធ្វើ​ការកែ​តម្រូវកា​រ​គណនា​តម្លៃ​ទឹក​ត្រឡប់​ទៅតាម​របៀប​គណនា​ចាស់ និង​សង​ជូន​អតិថិជន​វិញ​នូវ​រាល់​ទឹកប្រាក់​លម្អៀង​ជាបន្ទាន់​ផងដែរ ។

​ការប្រកាស​សូម​អភ័យទោស​របស់​រដ្ឋាក​រ​ទឹក​ស្វយ័ត​ក្រុងភ្នំពេញ​ចំពោះ​អតិថិជន​របស់ខ្លួន​យ៉ាង​តក់ក្រហល់​នេះ គឺ​កើតឡើង​បន្ទាប់ពី​មានប្រតិកម្ម​របស់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​តាម Facebook ដែលមាន​ខ្លឹមសារ​ថា «​ថ្ងៃនេះ ខ្ញុំ​ទើបបាន​ដឹងថា តម្លៃ​ទឹក​នៅ​ទីក្រុង​ភ្នំពេញ​មានការ​កើនឡើង​ដែល​អ្នកប្រើប្រាស់​ទឹក​តិច និង​អ្នកប្រើប្រាស់​ច្រើន​បង់ថ្លៃ​ដូចៗ​គ្នា ធ្វើ​ឲ្យ​នយោបាយ​អនុគ្រោះ​សម្រាប់​ប្រជាជន​ក្រីក្រ​មិនអាច​អនុវត្តន៍​បាន ។ នេះ​ជាការ​ដើរ​ខុស​ជាមួយ​ការអំពាវនាវ​របស់ខ្ញុំ​ឲ្យ​បញ្ចុះ​ថ្លៃ​ទឹក ។ ខ្ញុំ​បាន​បញ្ជា​ឲ្យ​ទេសរដ្ឋមន្ត្រី ចម ប្រសិទ្ធ និង​រដ្ឋលេខាធិការ ឯក សុន​ចាន់ ចុះ​ធ្វើការ​ជាមួយ​រដ្ឋាករទឹក​ដើម្បី​វិលត្រឡប់​ទៅ​អនុវត្តន៍​រូបមន្ត​ដើម​វិញ និង​ត្រូវ​សង​ប្រាក់​ទៅ​ប្រជាជន​វិញ​នូវ​ទឹកប្រាក់​ដែល​បាន​យក​លើសពី​ប្រជាជន​តាមរបៀប​ថ្មី ។ សូម​អរគុណ​ចំពោះ​បងប្អូន​ប្រជាជន​ដែល​ផ្តល់ដំណឹង​នេះ​ដល់​រូបខ្ញុំ ។ » ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.