ថ្ងៃ អង្គារ ទី ០៧ ខែ មេសា ឆ្នាំ ២០២០

ទីបំផុត​គឺ​ចប់ ! រឿងក្តី​ក្រុម​មេធាវី​៦១​នាក់ និង​មេ​រង​ពន្ធដារ វ៉ាន់ ពុទ្ធិ​ពល ត្រូវបាន​បញ្ចប់​ក្រោម​ការសម្របសម្រួល​រប​ស់​កូនប្រុស​បុរស​ខ្លាំង​ម្នាក់​ជា​ទាហាន​ពាក់​ផ្កាយ​២

ប្រភពព័ត៌មាន​ច្បាស់​ការណ៍​បាន​ឲ្យ​ដឹងថា វិវាទ​ផ្ទាល់ខ្លួន​រវាង​លោក វ៉ាន់ ពុទ្ធិ​ពល អគ្គនាយករង​នៃ​អគ្គនាយកដ្ឋាន​ពន្ធដារ​នៃ​ក្រសួង​សេដ្ឋកិច្ច និង​ហិរញ្ញវត្ថុ និង​ក្រុម​សមាជិក សមាជិកា​គណៈមេធាវី​នៃ​ព្រះរាជាណាចក្រ​កម្ពុជា (BAKC) ចំនួន​៦១​នាក់ ក្លាយជា​សំណុំ​រឿងក្តី​នៅ​ស្ថាប័ន​អយ្យការ​អម​សាលាដំបូង​រាជធានី​ភ្នំពេញ​នោះ ត្រូវបាន​បញ្ចប់​ហើយ​ក្រោម​ការសម្របសម្រួល​ពី​សំណាក់​ឯកឧត្តម​ឧ​ត្ត​ម​សេនីយ៍​ទោ​យោធា ហ៊ុន ម៉ានិត នាយករង​ខុទ្ទកាល័យ​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ហៅ​បុរស​ខ្លាំង អគ្គលេខាធិការរង​ទី​១​នៃ​អគ្គលេខាធិការដ្ឋាន​អាជ្ញាធរ​ជាតិដោះស្រាយ​ទំនាស់​ដីធ្លី អនុប្រធាន​គណៈកម្មកា​រ​សម្រាប់​ដោះស្រាយ​បញ្ហា​កូដកម្ម បាតុកម្ម នៅតាម​គ្រប់​មុខសញ្ញា (​គក​ប​) និង​ត្រូវជា​កូនប្រុស​បង្កើត​រប​ស់បុ​រស​ខ្លាំង ។​

​សេចក្តីរាយការណ៍​បាន​ឲ្យ​ដឹងថា សំណុំ​រឿងក្តី​ព្រហ្មទណ្ឌ​រវាង​ក្រុម​មេធាវី​ចំនួន​៦១​នាក់ និង​លោក វ៉ាន់ ពុទ្ធិ​ពល នៅ​ស្ថាប័ន​អយ្យការ​អម​សាលាដំបូង​រាជធានី​ភ្នំពេញ​នេះ​ត្រូវបាន​បញ្ចប់​ក្រោម​ការសម្របសម្រួល​ពី​សំណាក់​ឯកឧត្តម​ឧ​ត្ត​ម​សេនីយ៍​ទោ​យោធា ហ៊ុន ម៉ានិត កូនប្រុស​បង្កើត​របស់​នាយករដ្ឋមន្ត្រី​កម្ពុជា ដោយ​ភាគី​លោក វ៉ាន់ ពុទ្ធិ​ពល ជា​ជនសង្ស័យ​ធ្វើការ «​សុំទោស​» និង​ភាគី​ក្រុម​មេធាវី​ជាដើម​បណ្តឹងរដ្ឋប្បវេណី​ក្នុង​បទ​ជេរប្រមាថ​ជា​សាធារណៈ យល់ព្រម «​ដក​ពាក្យ​ប្តឹង​» ។

​កាលពី​ថ្ងៃទី​២២ ខែសីហា ឆ្នាំ​២០១៧​ម្សិលមិញ ឯកឧត្តម​មេធាវី លី ច័ន្ទ​តុលា សមាជិក​គណៈមេធាវី​នៃ​ព្រះរាជាណាចក្រ​កម្ពុជា អត្តលេខ​៥៨១ និង​ជា​សមាជិក​ក្រុមប្រឹក្សា​អ្នកច្បាប់​នៃ​ទីស្តីការគណៈរដ្ឋមន្ត្រី​មាន​ឋានៈ​ស្មើ​អនុរដ្ឋលេខាធិការ ដែល​តំណាង​ឲ្យ​ក្រុម​មេធាវី​ចំនួន​៦០​នាក់​ផ្សេងទៀត​ជាដើម​បណ្តឹង​នោះ​បានដាក់​ពាក្យសុំ​ដក​បណ្តឹង​ជា​ផ្លូវការ​ទៅ​អយ្យការ​អម​សាលាដំបូង​រាជធានី​ភ្នំពេញ​រួចហើយ ដើម្បី​ឈានទៅ​បញ្ចប់​សំណុំ​រឿងក្តី ។

​អនុលោម​តាម​បញ្ញត្តិ​មាត្រា ៣០៩ កថាខណ្ឌ​ទី​៣ នៃ​ក្រមព្រហ្មទណ្ឌ​នៃ​ព្រះរាជាណាចក្រ​កម្ពុជា ស្តីពី​នីតិវិធី​បណ្តឹង​ចំពោះ​បទ​បរិហារកេរ្តិ៍ និង​បទ​ជេរប្រមាថ គឺ​ការដក​ពាក្យ​ប្តឹង​វិញ​របស់​អ្នកប្តឹង​នាំ​ឲ្យ​បណ្តឹងអាជ្ញា​រលត់ ។ មានន័យថា សំណុំ​រឿងក្តី​ក៏ត្រូវ​បញ្ចប់​ជា​ស្ថាពរ​ដែរ ។​

​មុននឹង​ឈានដល់​មាន​ការដក​ពាក្យ​ប្តឹង​របស់​ក្រុម​មេធាវី​ចំនួន​៦១​នាក់​ជាដើម​បណ្តឹងរដ្ឋប្បវេណី ក្រោម​ការសម្របសម្រួល​ពី​សំណាក់​ឯកឧត្តម​ឧ​ត្ត​ម​សេនីយ៍​ទោ​យោធា ហ៊ុន ម៉ានិត កូនប្រុស​បង្កើត​របស់​បុរស​ខ្លាំង​នោះ គឺ​សំណុំ​រឿងក្តី​នេះ​ធ្លាប់​ត្រូវបាន​គណៈមេធាវី​នៃ​ព្រះរាជាណាចក្រ​កម្ពុជា​ដឹកនាំ​ដោយ​ឯកឧត្តម​មេធាវី សួន វិសាល អត្តលេខ​១៤៣ ជា​ប្រធាន​គណៈមេធាវី និង​ជា​សមាជិក​ក្រុមប្រឹក្សា​អ្នកច្បាប់​នៃ​ទីស្តីការគណៈរដ្ឋមន្ត្រី​មាន​ឋានៈ​ស្មើ​រដ្ឋលេខាធិការ និង​អគ្គនាយកដ្ឋាន​ពន្ធដារ​ដឹកនាំ​ដោយ​អគ្គនាយកដ្ឋាន​ពន្ធដារ​នៃ​ក្រសួង​សេដ្ឋកិច្ច និង​ហិរញ្ញវត្ថុ​ដឹកនាំ​ដោយ​ឯកឧត្តម គង់ វិបុល ប្រតិភូ​រាជរដ្ឋាភិបាល​ទទួលបន្ទុក​ជា​អគ្គនាយក​នៃ​អគ្គនាយកដ្ឋាន​ពន្ធដារ​បើក​កិច្ចប្រជុំ​កាលពី​ថ្ងៃទី​០៧ ខែសីហា ឆ្នាំ​២០១៧​កន្លងទៅ​សម្រេច​ស្នើ​ឲ្យ​មានការ​បញ្ចប់​វិវាទ​ផ្ទាល់ខ្លួន​រវាង​លោក វ៉ាន់ ពុទ្ធិ​ពល អគ្គនាយករង​នៃ​អគ្គនាយកដ្ឋាន​ពន្ធដារ និង​ក្រុម​សមាជិក សមាជិកា​គណៈមេធាវី​ចំនួន​៦១​នាក់ ដោយ​សន្តិវិធី និង​យោគយល់​គ្នា​ក្នុង​កម្រិត​ខ្ពស់បំផុត ។

​គួរ​រំលឹក​ជូន​ថា កាលពី​ថ្ងៃទី​០៤ ខែសីហា ឆ្នាំ​២០១៧​កន្លងទៅ សមាជិក សមាជិកា​គណៈមេធាវី​ចំនួន​៦១​នាក់ បាន​ចុះហត្ថលេខា​រួមគ្នា​ដាក់ពាក្យ​បណ្តឹង​ទៅកាន់​ស្ថាប័ន​អយ្យការ​អម​សាលាដំបូង​រាជធានី​ភ្នំពេញ ដោយ​ប្តឹង​លោក វ៉ាន់ ពុទ្ធិ​ពល អគ្គនាយករង​នៃ​អគ្គនាយកដ្ឋាន​ពន្ធដារ​នៃ​ក្រសួង​សេដ្ឋកិច្ច និង​ហិរញ្ញវត្ថុ ពីបទ​ជេរប្រមាថ​ជា​សាធារណៈ ប្រព្រឹត្ត​នា​ថ្ងៃទី​០៣ ខែសីហា ឆ្នាំ​២០១៧ នៅ​រាជធានី​ភ្នំពេញ​តាម​បណ្តាញ​ទំនាក់ទំនង​សង្គម Facebook ។ ដើម​បណ្តឹងរដ្ឋប្បវេណី​ដែលជា​មេធាវី​ទាំង​៦១​នាក់​បាននាំគ្នា​ទាមទារ​សំណង​ជំងឺ​ចិត្ត​ពី​លោក វ៉ាន់ ពុទ្ធិ​ពល ជា​ទឹកប្រាក់​ចំនួន​៤០​លាន​រៀល​ចំពោះ​មេធាវី​ម្នាក់ៗ​ដែលជា​ហត្ថលេខី​នៃ​ពាក្យបណ្តឹង ពោលគឺ​សរុប​ទឹកប្រាក់​ស្មើនឹង​ប្រមាណ​៦១​ម៉ឺន​ដុល្លារ​អាមេរិក ។

​ដើមហេតុ​ដែល​នាំ​ឲ្យ​លោក វ៉ាន់ ពុទ្ធិ​ពល ទទួលរង​ការ​ប្តឹងផ្តល់​ពី​សំណាក់​សមាជិក សមាជិការ​គណៈមេធាវី​ចំនួន​៦១​នាក់​នោះ គឺ​បន្ទាប់ពី​គណៈមេធាវី​បានរៀបចំ​សិក្ខាសាលា​មួយ​កាលពី​ថ្ងៃទី​០៣ ខែសីហា ឆ្នាំ​២០១៧​កន្លងទៅ​ថ្មីៗ​ក្រោម​ប្រធានបទ​ស្តីពី «​កាតព្វកិច្ច​បង់ពន្ធ​» ក្រោម​អធិបតីភាព​ឯកឧត្តម អ៊ូ រ៉ាស៊ី អនុរដ្ឋលេខាធិការ​ក្រសួងយុត្តិធម៌ តំណាង​ដ៏​ខ្ពង់ខ្ពស់​ឯកឧត្តម អង្គ វង្សវឌ្ឍានា រដ្ឋមន្ត្រី​ក្រសួងយុត្តិធម៌ ជាមួយនឹង​វត្តមាន​សមាជិក សមាជិកា​គណៈមេធាវី​ចូលរួម​ចំនួន​២០៥​នាក់ ។ នៅក្នុង​អង្គសិក្ខាសាលា​នេះ លោក វ៉ាន់ ពុទ្ធិ​ពល អគ្គនាយករង​នៃ​អគ្គនាយកដ្ឋាន​ពន្ធដារ តំណាង​ក្រសួង​សេដ្ឋកិច្ច និង​ហិរញ្ញវត្ថុ បាន​ចូលរួម​ធ្វើជា​វាគ្មិន​ធ្វើ​បទ​បង្ហាញ​លើ​ប្រធានបទ​ស្តីពី «​កាតព្វកិច្ច​សារពើ​ពន្ធចំពោះ​វិជ្ជាជីវៈ​មេធាវី និង​សារការី » ដែល​បទ​បង្ហាញ​របស់លោក វ៉ាន់ ពុទ្ធិ​ពល បានធ្វើ​ឲ្យ​សិក្ខាកាម​មួយចំនួន​មិន​ពេញចិត្ត ព្រមទាំង​បាន​ឈានទៅ​ជជែក​ខ្វែងគំនិត​តឹងសរសៃក​ដាក់គ្នា​យ៉ាងខ្លាំង ប៉ុន្តែ​ក៏មាន​ការសម្របសម្រួល​គ្នា​វិញ ។ លុះដល់​វេលា​ល្ងាច​នា​ថ្ងៃទី​០៣ ខែសីហា ឆ្នាំ​២០១៧​ដដែល លោក វ៉ាន់ ពុទ្ធិ​ពល បាន Post តាម​បណ្តាញ​ទំនាក់ទំនង​សង្គម Facebook ដោយ​ប្រើប្រាស់ Account ឈ្មោះ «Puthipol Vann » មាន​ខ្លឹមសារ​ថា​«​ថ្ងៃនេះ​ថ្នាក់លើ​ប្រើ​ឲ្យ​ទៅ​ប្រមូល​គោ​បញ្ចូល​ក្រោល​ដើម្បី​ថែរក្សា​ឲ្យ​គត់មត់ ។ គោ​មួយចំនួនធំ​បាន​ចូល​ក្រោល​ត្រឹមត្រូវ វៀរលែងតែ​អា​ពាល អា​ត្នោត និង​អា​ទែ​ក វា​ធ្លាប់តែ​នៅ​ធ្វើ​ព្យុះ​ធ្វើ​ភ្លៀង​ខាងក្រៅ ដើរ​ជាន់​ដំណាំ ស៊ី​ដំណាំ​អ្នកស្រុក កៀច​មិន​ព្រម​ចូល​ក្រោល ។ មិន​ត្រឹមតែ​កៀច វា​ចង់​ជល់​ហើយ​ធាក់​ខ្ញុំ​ទៀត ។ សុំ​សួរ​ប្រិយមិត្ត តើ​អា​៣​ក្បាល​ហ្នឹង​សម​នឹង​ចាក់​កន្លុះ​ឲ្យ​តឹង ហើយ​សំពង​នឹង​ទំ​ពក់​រនាស់​ឲ្យ​បាក់​លោង​ទេ ? សើច ! » ។​

​ម្ចាស់​បណ្តឹង​ជា​មេធាវី​ទាំង​៦១​នាក់ បានចាត់ទុក​ការ Post របស់លោក វ៉ាន់ ពុទ្ធិ​ពល តាម Facebook ជាការ​ប្រៀបធៀប​សមាជិក សមាជិកា​គណៈមេធាវី​ដែលជា​អ្នក​ប្រកប​វិជ្ជាជីវៈ​ឯករាជ្យ ជាមួយនឹង​សត្វ​គោ​ស្នែង​ទែ​ក សត្វ​គោ​ពពាល និង​សត្វ​គោ​សម្បុរ​ត្នោត ដែលជា​ការប្រមាថ​យ៉ាងធ្ងន់ធ្ងរ​ធ្វើ​ឲ្យ​ប៉ះពាល់​ដល់​កិត្តិយស និង​សេចក្តីថ្លៃថ្នូរ​នៃ​វិជ្ជាជីវៈ​ឯករាជ្យ​មួយ​នេះ ហើយ​មិនអាច​ទទួលយកបាន និង​អត់ឱន​ឲ្យ​បានឡើយ ព្រមទាំង​មិន​ត្រឹមតែ​ប៉ះពាល់​ដល់​កិត្តិយស​សមាជិក សមាជិកា​គណៈមេធាវី​ប៉ុណ្ណោះ​ទេ ប៉ុន្តែ​ថែម​ធ្វើ​ឲ្យ​ប៉ះពាល់​ដល់​មុខមាត់ កិត្តិយស និង​សេចក្តីថ្លៃថ្នូរ​របស់​ស្ថាប័ន​គណៈមេធាវី​នៃ​ព្រះរាជាណាចក្រ​កម្ពុជា​ទាំងមូល​ផងដែរ ។​

​តាមរយៈ Facebook ប្រើប្រាស់ Account ឈ្មោះ «Bun Honn» ឯកឧត្តម​មេធាវី ប៊ុន ហុន អតីត​ប្រធាន​គណៈមេធាវី​នៃ​ព្រះរាជាណាចក្រ​កម្ពុជា និង​បច្ចុប្បន្ន​ជា​អនុរដ្ឋលេខាធិការ​ក្រសួងមហាផ្ទៃ និង​ជា​សមាជិក​ក្រុមប្រឹក្សា​អ្នកច្បាប់​នៃ​ទីស្តីការគណៈរដ្ឋមន្ត្រី បាន Post តប​ទៅនឹង​សារ​របស់លោក វ៉ាន់ ពុទ្ធិ​ពល វិញ​ថា «​នេះ​ជា​អំពើ​ជេរប្រមាថ​ជា​សាធារណៈ ដែល​មិនអាច​អត់ឱន​ឲ្យ​បានឡើយ ។ ក្នុងឋានៈ​ជា​បញ្ញវន្ត និង​ជា​មន្ត្រីរាជការ​មួយរូប​មិនអាច​មក​ប្រៀបធៀប​មេធាវី​ជា​សត្វ​គោ​ទេ ។ តើ​លោក​ជា​អ្វី ។ មនុស្ស​បែបនេះហើយ​ដែល​ធ្វើ​ឲ្យ​គេ​ក្តៅក្រហាយ ។ ខ្ញុំ​សូម​ថ្កោលទោស​ចំពោះ​សំដី​ពាល​អសីលធម៌​បែបនេះ ។​» លើសពីនេះ ឯកឧត្តម ប៊ុន ហុន បានលើកឡើង​ទៀតថា «​សំដៅ​បែបនេះ គួរតែ​ជា​សំដី​ជនពាល​ដែល​មិន​ធ្លាប់​ចូល​សាលា​អប់រំ ។ វា​មិន​សមជា​សំដី​អ្នករាជការ​បម្រើ​រាស្ត្រ​ទេ ។ អ្នករាជការ គេ​ប្រើ​ច្បាប់​មក​ដោះស្រាយ​គ្នា មិនដែល​ជេរប្រមាថ​គ្នា​តាម Facebook និង​ប្រមាថ​គេ​ជាទូទៅ​បែបនេះ​ទេ ។ ល្មម​ឲ្យ​គាត់​ស្គាល់​តម្លៃ​ច្បាប់​ខ្លះ កុំ​អាង​ខ្លួន​មាន​លុយ មានអំណាច ។​» ។​

​ដោយឡែក ពាក់ព័ន្ធ​នឹង​ករណី​ខាងលើ គណៈមេធាវី​ក៏បាន​បើក​កិច្ចប្រជុំ​ក្រុមប្រឹក្សា​គណៈមេធាវី​លើក​ទី​១៧​ជាបន្ទាន់​នៅ​ថ្ងៃទី​០៥ ខែសីហា ឆ្នាំ​២០១៧​នេះ តាម​ការកោះអញ្ជើញ​រប​ស់​ឯកឧត្តម​មេធាវី សួន វិសាល ប្រធាន​គណៈមេធាវី និង​ជា​សមាជិក​ក្រុមប្រឹក្សា​អ្នកច្បាប់​នៃ​ទីស្តីការគណៈរដ្ឋមន្ត្រី ដោយបាន​សម្រេច​បង្កើត​គណៈកម្មការ​មួយ​ដើម្បី​ស៊ើបអង្កេត​ចាត់ការ​នីតិវិធី​បន្ត មាន​ឯកឧត្តម​មេធាវី សួន វិសាល អត្តលេខ​១៤៣ ជា​ប្រធាន​គណៈកម្មការ និង​សមាជិក​ក្រុមប្រឹក្សា​គណៈមេធាវី​ចំនួន​៤​នាក់​ទៀត ជា​សមាជិក​គណៈកម្មកា​រ រួមមាន ៖ លោក​មេធាវី ជូ ចាន់​ធី​រ៉ា អត្តលេខ​០៧០ , លោក​មេធាវី ឈី សម្បត្តិ អត្តលេខ​២៩៨ , លោក​មេធាវី សាំង វណ្ណៈ អត្តលេខ​៣៥៧ និង​លោកស្រី​មេធាវី លឹម ច័ន្ទ​លីដា អត្តលេខ​៨០៣ ។​

​ជា​កិច្ច​ឆ្លើយតប​ទៅនឹង​ប្រតិកម្ម​របស់​ក្រុម​មេធាវី​វិញ លោក វ៉ាន់ ពុទ្ធិ​ពល បាន​បកស្រាយ​តាម Facebook ថា [​ខ្ញុំ​គិតថា ជាការ​យល់ច្រឡំ​ដូច​ពាក្យចាស់​ថា «​អូសសម្រាស់​ប្រទះ​ពាក្យ​» ខ្ញុំ​សរសេរ​រឿង​គោ គឺ​សំដៅ​ទៅលើ​មន្ត្រីក្រោមឱវាទ​មួយចំនួន​ដែល​មិន​ព្រម​សម្រប​ខ្លួន​តាម​កំណែទម្រង់រដ្ឋបាល​សារពើពន្ធ ស្របតាម​គោលដៅ​យុទ្ធសាស្ត្រ​កៀរគរ​ចំណូល​របស់​រាជរដ្ឋាភិបាល ដោយ​ឆ្លៀត​យក​សិទ្ធិអំណាច​របស់ខ្លួន​ទៅ​អនុវត្ត​ខុសច្បាប់ និង​ក្រមសីលធម៌​របស់​មន្ត្រី​រាជការ ដើម្បី​ផលប្រយោជន៍​ផ្ទាល់ខ្លួន ។ ខ្ញុំ​សូមបញ្ជាក់ថា សំណេរ​របស់ខ្ញុំ​ពុំមាន​ពាក្យ​«​មេធាវី » ហើយក៏​ពុំបាន​សំដៅ​ដល់​ស្ថាប័ន​មេធាវី ដែលជា​ស្ថាប័ន​ឯករាជ្យ​នោះទេ ។ ការប្រើ​ពាក្យ​គោ ក្នុង​ទស្សនៈ​ធៀប​ទៅនឹង​ការប្រើប្រាស់​មន្ត្រីក្រោមឱវាទ ដូចជា ប្រើគោ​ឲ្យ​ស៊ី​ស្មៅ​ផង ប្រើ​មើល​តែ​គោ ក្របី ។​ល​។ ម្យ៉ាងទៀត ពាក្យ​គោ ក៏​មិនមែនជា​ពាក្យ​អាក្រក់​ដែរ ឥណ្ឌា​ខ្លះ​គោរព​គោ​ជា​អាទិទេព ខ្មែរ​យើង​មាន​ជំនឿ​លើ​គោ (​ឧសភរាជ​) ក្នុងការ​ព្យាករណ៍​ផល​កសិកម្ម ។ អាស្រ័យហេតុនេះ ប្រសិនបើ​សំណេរ​របស់ខ្ញុំ​មានការ​ប៉ះពាល់​ដល់​មេធាវី​ដោយ​កត្តា​ណាមួយ ខ្ញុំ​សូម​ឯកឧត្តម អស់លោក លោកស្រី នាង​កញ្ញា ដែលជា​មេធាវី​ទាំងអស់ មេត្តា​អភ័យទោស​ដល់​រូបខ្ញុំ ។ ] ។​

​លោក វ៉ាន់ ពុទ្ធិ​ពល អតីត​ប្រធាន​នាយកដ្ឋាន​គ្រប់គ្រង​អ្នក​ជាប់ពន្ធ​ធំ ទទួលបាន​ការតែងតាំង​ជា​អគ្គនាយករង​នៃ​អគ្គនាយកដ្ឋាន​ពន្ធដារ​នៃ​ក្រសួង​សេដ្ឋកិច្ច និង​ហិរញ្ញវត្ថុ ដោយ​អនុក្រឹត្យ​របស់​រាជរដ្ឋាភិបាល​លេខ​៩៨៥​អនក្រ​.​ត​ត ចុះ​ថ្ងៃទី​២១ ខែសីហា ឆ្នាំ​២០១២ ៕​

Filed in: Feature, តុលាការ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.