ថ្ងៃ ព្រហស្បតិ៍ ទី ២៨ ខែ តុលា ឆ្នាំ ២០២១

ករណី​ពិសេស​ទៀតហើយ ! ចៅក្រម​ម្នាក់​ដែល​ធ្លា​ប់រង​ទណ្ឌកម្ម​វិន័យ និង​ទើប​ផ្ទេរ​ភារកិច្ច​ប្រមាណ​០៦​ខែ ត្រូវបាន​ផ្ទេរ​មុខតំណែង​ថ្មី​មកជា​អនុប្រធាន​សាលាដំបូង​រាជធានី​ភ្នំពេញ

ចៅក្រម​ម្នាក់​ដែល​ទើប​ផ្ទេរ​មុខតំណែង​ពី​អនុប្រធាន​សាលាដំបូង​ខេត្តស្វាយរៀង​មកជា​អនុប្រធាន​សាលាដំបូង​ខេត្តកំពង់ឆ្នាំង​បាន​ប្រមាណ​០៦​ខែ និង​ធ្លាប់​ទទួលរង​ទណ្ឌកម្ម​វិន័យ​កាលពី​អំឡុង​ឆ្នាំ​២០០៥​កន្លងទៅ​កាល​នៅ​បំពេញការងារ​ជា​អតីត​ចៅក្រម​សាលាដំបូង​រាជធានី​ភ្នំពេញ គឺ​លោក ហម ម៉េង​សែ ទទួលបាន​ការផ្ទេរ​មុខតំណែង​ពី​អនុប្រធាន​សាលាដំបូង​ខេត្តកំពង់ឆ្នាំង​ឲ្យ​មក​បម្រើ​ការងារ​ជា​អនុប្រធាន​សាលាដំបូង​រាជធានី​ភ្នំពេញ ដោយ​ព្រះរាជក្រឹត្យ​លេខ​នស​/​រកត​/០៨១៧/៦០៨ ចុះ​ថ្ងៃទី​១២ ខែសីហា ឆ្នាំ​២០១៧ ខណៈ​មជ្ឈដ្ឋាន​អ្នកច្បាប់​ឯករាជ្យ និង​អ្នកវិភាគ​កិច្ចការ​សង្គម​នៅ​កម្ពុជា​ឈ្វេងយល់​ឃើញថា «​ជា​ករណី​ពិសេស​» ។

​លោក ហម ម៉េង​សែ អាយុ​៥៣​ឆ្នាំ ចូល​បម្រើ​ការងារ​រដ្ឋ​នា​ឆ្នាំ​១៩៨៣ និង​ត្រូវបានតែងតាំង​ក្នុង​ក្របខ័ណ្ឌ​អង្គចៅក្រម ដោយ​ព្រះរាជក្រឹត្យ​លេខ​ជ​ស​/​រកត​/០១៩៨/០០៨ ចុះ​ថ្ងៃទី​១២ ខែមករា ឆ្នាំ​១៩៩៨ ។ ក្រោម​ឥទ្ធិពល​នៃ​ប្រតិកម្ម​របស់​ក្រសួងមហាផ្ទៃ​នា​ដើមឆ្នាំ​២០០៥​កន្លងទៅ លោក ហម ម៉េង​សែ អតីត​ចៅក្រម​សាលាដំបូង​រាជធានី​ភ្នំពេញ (​អតីត​តុលាការ​ក្រុងភ្នំពេញ​) ត្រូវបាន​ឯកឧត្តម ឌិ​ត មុន្ទី ប្រធាន​តុលាការ​កំពូល និង​ជា​ប្រធាន​ក្រុមប្រឹក្សាវិន័យ​នៃ​ឧ​ត្ត​ម​ក្រុមប្រឹក្សា​នៃ​អង្គចៅក្រម ស៊ើបអង្កេត​ស្រាវជ្រាវ​រកឃើញថា បាន​ដោះលែង​ជនជាប់ចោទ​មិន​ប្រក្រតី​ចំនួន​០៩​នាក់ និង​ឃុំខ្លួន​មនុស្ស​ខុសច្បាប់​កំណត់​ចំនួន​០៦​នាក់ មាន​ទាំង​អនីតិជន ទាំង​បទមជ្ឈិម ។ លទ្ធផល​នៃ​ការអង្កេត​ស្រាវជ្រាវ​របស់​ឯកឧត្តម ឌិ​ត មុន្ទី ក៏បាន​ធ្វើ​របាយការណ៍​គោរព​ជូន​សម្តេច​អគ្គមហាសេនាបតី​តេ​ជោ ហ៊ុន សែន (​អតីត​សម្តេច ហ៊ុន សែន​) នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​ផងដែរ តាម​របាយការណ៍​ចុះ​ថ្ងៃទី​០៧ ខែមីនា ឆ្នាំ​២០០៥ ។

​បន្ទាប់មក លោក​ចៅក្រម ហម ម៉េង​សែ ត្រូវបាន​ទទួលរង​ការដាក់ទណ្ឌកម្ម​វិន័យ​ក្រោមរូបភាព​ព្យួរ​ពី​ការងារ​មិន​ឲ្យ​មាន​បៀវត្សរ៍​ក្នុង​រយៈពេល​កំណត់​១​ឆ្នាំ និង​ផ្លាស់​ដោយ​បង្ខំ​ចេញពី​សាលាដំបូង​រាជធានី​ភ្នំពេញ (​អតីត​តុលាការ​ក្រុងភ្នំពេញ​) ដោយ​ព្រះរាជក្រឹត្យ​លេខ​នស​/​រកត​/០៨០៥/៣៤៣ ចុះ​ថ្ងៃទី​០២ ខែសីហា ឆ្នាំ​២០០៥ ។​

​រយៈពេល​ប្រមាណ​ជិត​២​ឆ្នាំ​ក្រោយមក លោក​ចៅក្រម ហម ម៉េង​សែ ក៏ត្រូវ​បានអនុញ្ញាត​ឲ្យ​ចូល​បម្រើ​ការងារ​វិញ និង​ចាត់​ឲ្យ​ទៅ​បម្រើ​ការងារ​ជា​ចៅក្រម​សាលាដំបូង​ខេត្តកោះកុង ដោយ​ព្រះរាជក្រឹត្យ​លេខ​នស​/​រកត​/០២០៧/០៧០ ចុះ​ថ្ងៃទី​១៦ ខែកុម្ភៈ ឆ្នាំ​២០០៧ ។

​ក្រោយមក លោក​ចៅក្រម ហម ម៉េង​សែ ត្រូវបាន​ផ្ទេរ​ភារកិច្ច​ពី​ចៅក្រម​សាលាដំបូង​ខេត្តកោះកុង​ឲ្យ​មក​បម្រើ​ការងារ​ជា​ចៅក្រម​សាលាដំបូង​ខេត្តស្វាយរៀង ដោយ​ព្រះរាជក្រឹត្យ​លេខ​នស​/​រកត​/០៧១១/៦៩៥ ចុះ​ថ្ងៃទី​២៥ ខែកក្កដា ឆ្នាំ​២០១១ និង​តម​កទៀត លោក​ចៅក្រម​រូបនេះ​ទទួលបាន​ការតែងតាំង​ជា​អនុប្រធាន​សាលាដំបូង​ខេត្តស្វាយរៀង ដោយ​ព្រះរាជក្រឹត្យ​លេខ​នស​/​រកត​/០៧១៥/៧៣៣ ចុះ​ថ្ងៃទី​២១ ខែកក្កដា ឆ្នាំ​២០១៥ ។

​ប្រមាណ​ជិត​២​ឆ្នាំក្រោយ​មកទៀត លោក​ចៅក្រម ហម ម៉េង​សែ ត្រូវបាន​ផ្ទេរ​មុខតំណែង​ពី​អនុប្រធាន​សាលាដំបូង​ខេត្តស្វាយរៀង​ឲ្យ​មក​បម្រើ​ការងារ​ជា​អនុប្រធាន​សាលាដំបូង​ខេត្តកំពង់ឆ្នាំង ដោយ​ព្រះរាជក្រឹត្យ​លេខ​នស​/​រកត​/០២១៧/២៤៦ ចុះ​ថ្ងៃទី​២៨ ខែកុម្ភៈ ឆ្នាំ​២០១៧ ។

​ឥឡូវនេះ ស្រាប់តែ​ទើប​ផ្ទេរ​មុខតំណែង​មក​បម្រើ​ការងារ​ជា​អនុប្រធាន​សាលាដំបូង​ខេត្តកំពង់ឆ្នាំង​ប្រមាណ​០៦​ខែ​ប៉ុណ្ណោះ លោក ហម ម៉េង​សែ ឧ​ត្ត​ម​ចៅក្រម​ថ្នាក់​លេខ​៥ ក៏​ទទួលបាន​ការផ្ទេរ​មុខតំណែង​ពី​អនុប្រធាន​សាលាដំបូង​ខេត្តកំពង់ឆ្នាំង​ឲ្យ​មក​បម្រើ​ការងារ​ជា​អនុប្រធាន​សាលាដំបូង​រាជធានី​ភ្នំពេញ​តែម្តង ៕​

Filed in: Feature, តុលាការ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.