តារាចម្រៀង ព្រាប សុវត្ថិ ដ៏ល្បីឈ្មោះ ក្នុងផលិតកម្ម រស្មីហង្សមាស មិនត្រឹមតែមានក្របខ័ណ្ឌជានាយទាហាន នៃកងយោធពលខេមរភូមិន្ទ ប៉ុណ្ណោះទេ គឺជាតារា ដ៏មានពន្លឺរះ នៅក្នុងគណបក្សប្រជាជនកម្ពុជា ដែលជាគណបក្សនយោបាយកាន់កាប់អំណាចដុះស្លែ មានទ្រព្យសម្បត្តិមហាសាល និងមានកម្លាំងរឹងមាំ ប្រទាក់ក្រឡាពីលើដល់ក្រោម ។
នាថ្ងៃបិទបញ្ចប់ ការឃោសនាបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៤ ឆ្នាំ២០១៧ កាលពីថ្ងៃទី០២ ខែមិថុនា ឆ្នាំ២០១៧ម្សិលមិញ ក្រៅពីសិល្បៈករ សិល្បការិនី និងតារាដទៃទៀត គឺតារាចម្រៀង ព្រាប សុវត្ថិ ក៏បានចូលរួមដង្ហែក្បួនឃោសនា របស់គណបក្សប្រជាជនកម្ពុជា ដឹកនាំដោយសម្តេចអគ្គមហាសេនាបតីតេជោ ហ៊ុន សែន ជាប្រធានគណបក្ស និងជានាយករដ្ឋមន្ត្រី នៃព្រះរាជាណាចក្រកម្ពុជា យ៉ាងស្វាហាប់់ ។
ដំណាលពេលគ្នា នឹងស្ត្រីវ័យក្មេង ធី សុវណ្ណថា អតីតប្រធានអង្គការយុវជនកិច្ចការសង្គម ( បច្ចុប្បន្នសុំចុះចូលបម្រើជីវភាពនយោបាយ ក្នុងគណបក្សប្រជាជនកម្ពុជា ) តារាចម្រៀង មាស សុខសោភា និងតារាចម្រៀង ស៊ុន ស្រីពេជ្រ គឺតារាចម្រៀង ព្រាប សុវត្ថិ ទទួលបាននូវការបំពាក់មេដាយមុនីសារាភ័ណ្ឌ ថ្នាក់ធិបឌិន្ទ ពីរាជរដ្ឋាភិបាលកម្ពុជា ដោយអនុក្រឹត្យលេខ ៨៦៨អនក្រ.តត ចុះថ្ងៃទី១២ ខែសីហា ឆ្នាំ២០១៦ ៕
