ថ្ងៃ អង្គារ ទី ២៥ ខែ កញ្ញា ឆ្នាំ ២០១៨

​រកឃើញ​តម្រុយ​ដ៏​អស្ចារ្យ​ហើយ ! មន្ត្រី​តុលាការ​អាទិភាព​ផុត​កំពូល​ម្នាក់​ដែល​ធ្លាយ​រឿង​កម្មសិក្សា​នៅ​ខេត្ត​ប៉ៃលិន តែ​ទទួល​បានការ​តាំងស៊ប់​នៅ​ខេត្តកណ្តាល គឺជា​កូនស្រី​ឯកឧត្តម ស៊ូ ភិរិន្ទ និង​ត្រូវជា​ភរិយា​ឯកឧត្តម ឡាយ វណ្ណៈ 

​នាពេល​កន្លងមក មជ្ឈដ្ឋាន​អ្នកច្បាប់​ឯករាជ្យ​នៅ​កម្ពុជា​បាន​សម្តែង​នូវ​ការចាប់អារម្មណ៍​យ៉ាងខ្លាំង​ទៅលើ​ព្រះរាជអាជ្ញារង​កម្មសិក្សា​ម្នាក់ គឺ​លោកស្រី ស៊ូ សុជាតា ជា​ព្រះរាជអាជ្ញារង​កម្មសិក្សា​បម្រើ​ការងារ​នៅ​អយ្យការ​អម​សាលាដំបូង​ខេត្ត​ប៉ៃលិន ប៉ុន្តែ​បែរជា​ទទួលបាន​ការតាំង​ស៊ប់​ក្នុង​ក្របខ័ណ្ឌ​ព្រះរាជអាជ្ញា ឋានន្តរស័ក្តិ​អនុ​ព្រះរាជអាជ្ញា​ថ្នាក់​លេខ​៤ បម្រើ​ការងារ​នៅ​អយ្យការ​អម​សាលាដំបូង​ខេត្តកណ្តាល របៀប​សិស្ស​ប្រឡង​នៅ​មណ្ឌល​ខេត្ត​ប៉ៃលិន បែរជា​ទទួលបាន​លទ្ធ​ផល​ជាប់​នៅ​មណ្ឌល​ខេត្តកណ្តាល​ទៅវិញ ខណៈ​ចៅក្រម​-​ព្រះរាជអាជ្ញារង​កម្មសិក្សា​រួម​ជំនាន់​ចំនួន​៥៤​នាក់​ផ្សេងទៀត ទទួលបាន​ការតាំង​ស៊ប់​នៅ​បណ្តាល​សាលាជម្រះក្តី​នានា​ដែល​ខ្លួន​ទទួលបាន​ការតែងតាំង​ឲ្យ​ធ្វើ​កម្មសិក្សា​នៅ​ទីនោះ​គ្រប់ៗ​គ្នា ប្រដូច​ទៅនឹង​សិស្ស​ប្រឡង​នៅ​មណ្ឌល​ណា ត្រូវ​ជាប់​នៅ​មណ្ឌល​នោះ​អ៊ីចឹង​ដែរ ប្រសិនបើ​សិស្ស​ប្រឡង​ជាប់ (​ចៅក្រម​-​ព្រះរាជអាជ្ញារង​កម្មសិក្សា​ដែល​បាន​បំពេញ​កម្មសិក្សា​ចប់​ដោយ​ជោគជ័យ​) ។​

​លើសពីនេះ មជ្ឈដ្ឋាន​អ្នកច្បាប់​ថែមទាំង​បាន​សម្តែង​នូវ​ការងឿងឆ្ងល់​ដែរ​ថា តើ​មកពី​កត្តា ឬ​មូល​ហេតុអ្វី​ពិតប្រាកដ​ដែល​នាំ​ឲ្យ​លោកស្រី ស៊ូ សុជាតា ជា​ព្រះរាជអាជ្ញារង​កម្មសិក្សា​នៅ​ខេត្ត​ប៉ៃលិន បែរជា​ទទួល​បានការ​តាំងស៊ប់​ជា​ព្រះរាជអាជ្ញារង​នៅ​ខេត្តកណ្តាល​ប្លែក​ពី​គេឯង​ដ៏​គួរ​ឲ្យ​ភ្ញាក់ផ្អើល ខណៈ​ជាង​១០​ឆ្នាំ​មកហើយ​ទើប​កើតមាន​១​ករណី​ក្នុង​ស្ថាប័ន​តុលាការ​កម្ពុជា (​ចាប់តាំងពី​មានការ​តាំងស៊ប់​ចៅក្រម​-​ព្រះរាជអាជ្ញារង​កម្មសិក្សា​ជំនា​ន់ទី​១​មក​) បែបនេះ​ទៅវិញ ? 

​ឥឡូវនេះ លេចចេញ​តម្រុយ​មូលហេតុ​ដែល​នាំ​ឲ្យ​លោកស្រី ស៊ូ សុជាតា ជា​ព្រះរាជអាជ្ញារង​កម្មសិក្សា​នៅ​អយ្យការ​អម​សាលាដំបូង​ខេត្ត​ប៉ៃលិន បែរជា​មានឱកាស​ទទួល​បានការ​តាំងស៊ប់​ក្នុង​ក្របខ័ណ្ឌ​ព្រះរាជអាជ្ញា​ជា​ព្រះរាជអាជ្ញារង​នៅ​អយ្យការ​អម​សាលាដំបូង​ខេត្តកណ្តាល​ដ៏​ចម្លែក​របៀប «​មួយ​ប្រទេស​មានតែ​មួយ​» នោះ​ហើយ គឺ​ដោយសារ​លោកស្រី ស៊ូ សុជាតា ជា​កូនស្រី​របស់​ឯកឧត្តម ស៊ូ ភិរិន្ទ សមាជិក​គណៈកម្មាធិកា​រ​កណ្តាល​គណបក្ស​ប្រជាជន​កម្ពុជា និង​ជា​រដ្ឋលេខាធិការ​ទីស្តីការគណៈរដ្ឋមន្ត្រី ដ៏​មាន​ឥទ្ធិពល និង​ត្រូវជា​ភរិយា​របស់​ឯកឧត្តម ឡាយ វណ្ណៈ សមាជិក​គណៈកម្មាធិកា​រ​កណ្តាល​គណបក្ស​ប្រជាជន​កម្ពុជា និង​ជា​អភិបាល​នៃ​គណៈ​អភិបាល​ខេត្តតាកែវ ពោលគឺ លោកស្រី ស៊ូ សុជាតា មាន​ឋានៈ​ជា «​ជំទាវ​» ម្នាក់​ផង ។​

​លោកស្រី ស៊ូ សុជាតា ជា​សិស្ស​ព្រះរាជអាជ្ញា​ជំនា​ន់ទី​៦ ដែល​បាន​ប្រឡង​ជាប់​បញ្ចប់​ការបណ្តុះបណ្តាល​វិជ្ជាជីវៈ​នៅ​សាលា​ភូមិន្ទ​ចៅក្រម​នៃ​រាជបណ្ឌិត្យសភា​វិជ្ជាជីវៈ​តុលាការ និង​ត្រូវបានតែងតាំង​ជា​ព្រះរាជអាជ្ញារង​កម្មសិក្សា​នៅ​អយ្យការ​អម​សាលាដំបូង​ខេត្ត​ប៉ៃលិន ដោយ​ព្រះរាជក្រឹត្យ​លេខ​នស​/​រកត​/០៧១៥/៧៣៦ ចុះ​ថ្ងៃទី​២១ ខែកក្កដា ឆ្នាំ​២០១៥ ។ ចាប់តាំងពី​ត្រូវបានតែងតាំង​ជា​ព្រះរាជអាជ្ញារង​កម្មសិក្សា​នៅ​អយ្យការ​អម​សាលាដំបូង​ខេត្ត​ប៉ៃលិន​មក គឺ​លោកស្រី ស៊ូ សុជាតា មិនត្រូវ​បាន​ផ្ទេរ​ភារកិច្ច​ឲ្យ​ទៅ​បម្រើ​ការងារ​ក្រោមរូបភាព​ជា​ព្រះរាជអាជ្ញារង​កម្មសិក្សា​នៅ​សាលាជម្រះក្តី​ណាមួយ​ផ្សេង​ទៀតឡើយ ។ ក្រោយមក យោងតាម​សេចក្តីក្រាបបង្គំទូលថ្វាយ​របស់​ឯកឧត្តម អង្គ វង្សវឌ្ឍានា រដ្ឋមន្ត្រី​ក្រសួងយុត្តិធម៌​ផង និង​ជា​សមាជិក​ឧ​ត្ត​ម​ក្រុមប្រឹក្សា​នៃ​អង្គចៅក្រម​ផង បន្ទាប់ពី​បាន​ពិគ្រោះ​យោបល់​ជាមួយ​ឧ​ត្ត​ម​ក្រុមប្រឹក្សា​នៃ​អង្គចៅក្រម​នា​សម័យប្រជុំ​ថ្ងៃទី​២៧ ខែកុម្ភៈ​ឆ្នាំ​២០១៧​នោះ ស្រាប់តែ​លោកស្រី ស៊ូ សុជាតា ដែលជា​ព្រះរាជអាជ្ញារង​កម្មសិក្សា​នៅ​អយ្យការ​អម​សាលាដំបូង​ខេត្ត​ប៉ៃលិន ត្រូវបាន​ព្រះករុណា​ព្រះមហាក្សត្រ​ទ្រង់​ត្រាស់បង្គាប់​តាំងស៊ប់​ក្នុង​ក្របខ័ណ្ឌ​ព្រះរាជអាជ្ញា ឋានន្តរស័ក្តិ​អនុ​ព្រះរាជអាជ្ញា​ថ្នាក់​លេខ​៤ នៅ​អយ្យការ​អម​សាលាដំបូង​ខេត្តកណ្តាល​ដ៏​គួរ​ឲ្យ​ចម្លែក និង​ភ្ញាក់ផ្អើល​ទៅវិញ ដោយ​ព្រះរាជក្រឹត្យ​លេខ​នស​/​រកត​/០២១៧/២៥២ ចុះ​ថ្ងៃទី​២៨ ខែកុម្ភៈ ឆ្នាំ​២០១៧ ។​

​ដូច្នេះ ការតាំង​ស៊ប់​លោកស្រី ស៊ូ សុជាតា ព្រះរាជអាជ្ញារង​កម្មសិក្សា​នៅ​អយ្យការ​អម​សាលាដំបូង​ខេត្ត​ប៉ៃលិន ក្នុង​ក្របខ័ណ្ឌ​ព្រះរាជអាជ្ញា​ជា​ព្រះរាជអាជ្ញារង​នៅ​អយ្យការ​អម​សាលាដំបូង​ខេត្តកណ្តាល ដោយ​ព្រះរាជក្រឹត្យ​លេខ​នស​/​រកត​/០២១៧/២៥២ ចុះ​ថ្ងៃទី​២៨ ខែកុម្ភៈ ឆ្នាំ​២០១៧​នោះ គឺជា​រូបភាព​ដែល​ជាង​១០​ឆ្នាំ​កន្លងទៅ​ទើបតែ​កើតមាន​មួយ​ករណី​ប៉ុណ្ណោះ និង​តាមរបៀប «​មួយ​ប្រទេស​មានតែ​មួយ​» ។ មានន័យថា លោកស្រី​ព្រះរាជអាជ្ញារង​រូបនេះ គឺជា​មន្ត្រី​តុលាការ​ជាប់​លំដាប់​អាទិភាព​ផុត​កំពូល​តែ​ម្នាក់​គត់ ។​

​គួរ​រំលឹក​ជូន​ដែរ​ថា ឯកឧត្តម ឡាយ វណ្ណៈ អភិបាល​នៃ​គណៈ​អភិបាល​ខេត្តតាកែវ និង​ត្រូវជា​ស្វាមី​របស់លោក​ស្រី ស៊ូ សុជាតា ក៏​ធ្លាប់​បង្កើត​នូវ​រឿងរ៉ាវ​ដ៏​គួរ​ឲ្យ​ភ្ញាក់ផ្អើល​ក្នុង​រូបភាព​ប្រើ​អំណាច​រំលោភបំពាន​យ៉ាងធ្ងន់ធ្ងរ​ទៅលើ​អំណាច​ឯករាជ្យ​របស់​ស្ថាប័ន​តុលាការ «​លូក​កប់​ក្លៀក​» ប្រកបដោយ​ការរិះគន់​ព្រោងព្រាត​រួចមកហើយ ដ្បិត​កាលពី​ថ្ងៃទី​០៧ ខែតុលា ឆ្នាំ​២០១៤ កន្លងទៅ ឯកឧត្តម​ចៅហ្វាយ​ខេត្តតាកែវ​រូបនេះ បាន​សរសេរ​លិខិត​ផ្ទាល់ដៃ​កោះអញ្ជើញ​លោក​ចៅក្រម ប្លង់ ឆ្លាម (​អតីត​ប្រធាន​សាលាដំបូង​ខេត្តតាកែវ​) និង​លោក ច្រឹង ខ្មៅ (​អតីត​ព្រះរាជអាជ្ញា​នៃ​អយ្យការ​អម​សាលាដំបូង​ខេត្តតាកែវ​) ឲ្យ​ចូលខ្លួន​មក​បំភ្លឺ​នៅ​ចំពោះមុខ​ចៅហ្វាយខេត្ត​នា​ថ្ងៃទី​១៤ ខែតុលា ឆ្នាំ​២០១៤ ពាក់ព័ន្ធ​នឹង​របាយការណ៍​របស់​អធិការដ្ឋាន​នគរបាល​ស្រុក​សំរោង ស្តីពី​ការសម្រេច​មិន​ឃុំខ្លួន​ជនសង្ស័យ​ចំនួន​ពីរ​នាក់ ពីបទ​រក្សាទុក និង​ប្រើប្រាស់​គ្រឿងញៀន​ខុសច្បាប់ (Sic!) ៕​

Filed in: Feature, តុលាការ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.