សេចក្តីរាយការណ៍បានឲ្យដឹងថា មីស៊ីលបាញ់ឆ្លងទ្វីប (ICBM) របស់សហរដ្ឋអាមេរិកដែលគ្រោងបាញ់តេស្តសាកល្បងនោះ នឹងប្រព្រឹត្តទៅនៅថ្ងៃអង្គារ ទី៣០ ខែឧសភា ឆ្នាំ២០១៧សប្តាហ៍ក្រោយ ដោយបាញ់ចេញពីមូលដ្ឋានទ័ពអាកាស Vandenberg នៃរដ្ឋ California សំដៅទៅគោលដៅកំណត់ក្នុងលំហមហាសមុទ្រប៉ាស៊ីហ្វិក ។
ទោះយ៉ាងណា សេចក្តីរាយការណ៍នោះមិនបានបញ្ជាក់អំពីប្រភេទមីស៊ីល ICBM ដែលសហរដ្ឋអាមេរិកគ្រោងបាញ់ធ្វើតេស្តសាកល្បងនៅឡើយទេ ខណៈមជ្ឈដ្ឋាននានាបានកត់សម្គាល់ឃើញថា បន្ទាប់ពីទទួលរងការគំរាមកំហែងដោយអាវុធមីស៊ីលបំពាក់ក្បាលគ្រាប់នុយក្លេអ៊ែររបស់ប្រទេសកូរ៉េខាងជើងម្តងហើយម្តងទៀត គឺសហរដ្ឋអាមេរិកតែងធ្វើការបាញ់តេស្តសាកល្បងនូវអាវុធមីស៊ីលគ្រប់ប្រភេទរបស់ខ្លួនច្រើនលើកច្រើនសាផងដែរ ក្រោមរូបភាពអះអាងថា «ត្រៀមទប់ទល់នឹងការអភិវឌ្ឍអាវុធមីស៊ីលរបស់កូរ៉េខាងជើង» ។
ព្រោះតែរឿងរ៉ាវសព្វាវុធរបស់ប្រទេសកូរ៉េខាងជើងនេះដែរ សហរដ្ឋអាមេរិកក៏កំពុងមានវិធានការដាក់ពង្រាយនូវប្រព័ន្ធខែលការពារមីស៊ីលចំនួន៨បន្ថែមទៀតនៅទីតាំងបាញ់មីស៊ីល Fort Greely នៃរដ្ឋ Alaska ព្រមទាំងរៀបចំកែប្រែឲ្យកាន់តែប្រសើរឡើងនូវប្រព័ន្ធរ៉ាដា (X-band Radar) ដើម្បីទប់ទល់ទៅនឹងការគំរាមកំហែងអាវុធមីស៊ីលវាយលុករបស់ប្រទេសកូរ៉េខាងជើង ឲ្យមានប្រសិទ្ធភាព និងទាន់ពេលវេលា ។
បច្ចុប្បន្ន សហរដ្ឋអាមេរិកមានមីស៊ីលបាញ់ឆ្លងទ្វីបបំពាក់ក្បាលគ្រាប់នុយក្លេអ៊ែរ ចំនួន២ប្រភេទដ៏មានអានុភាព គឺ Trident II ឬហៅថា Trident D5 (UGM-133) និង Minuteman III (LGM-30) ។
មីស៊ីលធុន Trident II ឬហៅថា Trident D5 (UGM-133) ជាមីស៊ីលជំនាន់ទី៦របស់សហរដ្ឋអាមេរិកផលិតដោយក្រុមហ៊ុន Lockheed Martin Space Systems ដែលជាប្រភេទមីស៊ីលបាញ់ចេញពីនាវាមុជទឹក (SLBM) ។ វាមានប្រវែងជាង១៣ម៉ែត្រ ទម្ងន់៥៩តោន ក្នុង១គ្រាប់ អាចបំពាក់ក្បាលគ្រាប់នុយក្លេអ៊ែរបានជាង១០គ្រាប់ អាចបាញ់បានក្នុងរយៈចម្ងាយជាង១២ ០០០គីឡូម៉ែត្រ ជាមួយនឹងល្បឿនជិត៣០ ០០០គីឡូម៉ែត្រក្នុង១ម៉ោង និងមានតម្លៃរហូតដល់ជាង៣៧លានដុល្លារអាមេរិកក្នុង១គ្រាប់ ។ មីស៊ីលប្រភេទនេះបានធ្វើតេស្តសាកល្បងទទួលបានជោគជ័យចំនួន១៦១លើកមកហើយចាប់តាំងពីអំឡុងឆ្នាំ១៩៨៩មក ដែលការបាញ់តេស្តសាកល្បងលើកទី១៦១ បានប្រព្រឹត្តទៅកាលពីចុងឆ្នាំ២០១៦កន្លងទៅថ្មីៗ ។
មីស៊ីលធុន Minuteman III (LGM-30) ជាប្រភេទមីស៊ីលដែលធ្វើទំនើបកម្មពីមីស៊ីលធុន Minuteman II និងបានដំឡើងកម្រិត Version ថ្មីនាឆ្នាំ២០១៧ផលិតដោយក្រុមហ៊ុន Boeing ហើយបានបាញ់ធ្វើតេស្តសាកល្បងប្រកបដោយជោគជ័យកាលពីថ្ងៃទី២៦ ខែមេសា ឆ្នាំ២០១៧កន្លងទៅថ្មីៗ ។ មីស៊ីលដែលអាចបាញ់ចេញពីផ្ទៃដីប្រភេទនេះមានប្រវែង១៨,២ម៉ែត្រ ទម្ងន់ជាង៣៥តោន អាចបាញ់បានរយៈចម្ងាយជាង១៣ ០០០គីឡូម៉ែត្រ ជាមួយនឹងល្បឿនជិត៣០ ០០០គីឡូម៉ែត្រក្នុង១ម៉ោង ៕
