ថ្ងៃ សុក្រ ទី ១៩ ខែ សីហា ឆ្នាំ ២០២២

​ឈើ​ខ្មែរ​តែ​យួន​ធ្វើ​អាជីវកម្ម ! បន្ទាប់ពី​ឈ្មួញ​ឈើ «​យាយ​ព្រឿង​» ត្រូវបាន​ដោះលែង នៅមាន​ឈ្មួញ​ឈើ​ជនជាតិ​យួន​ម្នាក់ទៀត​ឈ្មោះ «​យាយ​ម៉ា​យ​» អាជ្ញាធរ​ស្ទាក់ស្ទើរ​ក្នុងការ​ចាប់ខ្លួន 

​បន្ទាប់​ស្ត្រី​ឈ្មួញ​ឈើ​ជនជាតិ​យួន​ឈ្មោះ «​យាយ​ព្រឿង​» និង​មានឈ្មោះ​ជា​ភាសា​ខ្មែរ​ថា «​ហេង សំនៀង​» ដ៏​ល្បីល្បាញ​ដុះ​ស្លែ​ប្រចាំខេត្ត​ស្ទឹងត្រែង​ត្រូវបាន​ចាប់ និង​ឃុំខ្លួន​ដាក់ពន្ធនាគារ «​មួយ​ខ្យល់​» កាលពី​ថ្ងៃទី​១៦ ខែតុលា ឆ្នាំ​២០១៦​កន្លងទៅ ហើយ​ត្រូវបាន​ដោះលែង​វិញ​ពាក់ព័ន្ធ​នឹង​បទល្មើស​ព្រៃឈើ​នោះ គឺ​នៅមាន​ស្ត្រី​ឈ្មួញ​ឈើ​ជនជាតិ​យួន​ល្បីឈ្មោះ​ម្នាក់ទៀត​ឈ្មោះ ង្វៀង ធី​ម៉ា​យ ហៅ «​យាយ​ម៉ា​យ​» ដែល​ពាក់ព័ន្ធ​នឹង​បទល្មើស​ព្រៃឈើ​ដូចគ្នា ប៉ុន្តែ​អាជ្ញាធរ​កម្ពុជា​ហាក់​ស្ទាក់ស្ទើរ​ក្នុងការ​ចាប់ខ្លួន​ឈ្មួញ​ឈើ​ជនជាតិ​យួន​រូបនេះ​យកមក​ផ្តន្ទាទោស​នៅឡើយ ។ 

​ដោយមាន​សេចក្តីរាយការណ៍​ជាក់លាក់​ពី​បណ្តាញ​អ្នកសារព័ត៌មាន​ច្រើនលើកច្រើនសា​នោះ កាលពី​ថ្ងៃទី​១៦ ខែឧសភា ឆ្នាំ​២០១៧​កន្លងទៅ​ថ្មីៗ សមត្ថកិច្ច​បាន​បង្ខំចិត្ត​ចុះបង្ក្រាប​ទីតាំង​ស្តុក និង​ច្រៀក​ឈើ​គ្រញូង​របស់ «​យាយ​ម៉ា​យ​» ក្នុងព្រៃ​ភូមិសាស្ត្រ ភូមិ​ក្បាល​ទន្សោង ឃុំ​ផ្អាវ ជាប់​ព្រំប្រទល់​នឹង​ស្រុក​ត្រពាំង​ប្រាសាទ និង​ស្រុក​អន្លង់វែង ខេត្ត​ឧ​ត្ត​រ​មានជ័យ ខណៈ​ទីតាំង​ប្រ​ព្រឹទ្ធ​បទល្មើស​ព្រៃឈើ​របស់ «​យាយ​ម៉ា​យ​» នេះ​នាពេល​កន្លងមក មិនមាន​សមត្ថកិច្ច​ពា​ក់​ព័ន្ធ​ណា​ហ៊ាន​ទៅជិត​ទេ កុំថាឡើយ​ដល់​ចុះបង្ក្រាប​នោះ (Sic!) .

​បេសកកម្ម​ទាំង​បង្ខំចិត្ត​របស់​សមត្ថកិច្ច​ក្នុងការ​ចុះបង្ក្រាប​ទីតាំង​ស្តុក និង​អាជីវកម្ម​ច្រៀក​ឈើ​គ្រញូង​របស់ «​យាយ​ម៉ា​យ​» នោះ រឹបអូស​បាន​វត្ថុតាង​ល្មើស​ជាច្រើន រួមមាន ឈើ​គ្រញូង​ច្រៀក​រួច​រាប់សិប​ដុំ និង​ឧបករណ៍ សម្ភារៈ​ច្រៀក​ឈើ​ជាច្រើន​គ្រឿង​ទៀត រីឯ «​យាយ​ម៉ា​យ​» ជា​ម្ចាស់​ឈើ មេការ កម្មករ និង​មនុស្ស​ពាក់ព័ន្ធ​បាន​រត់គេចខ្លួន​បាត់ស្រមោល ព្រមទាំង​មានការ​ជញ្ជូន​ជន្លៀស​ឈើ​ចេញ​អស់​ជាមុន​យ៉ាងច្រើន​ផង របៀប​ដូច «​ខ្មោច​ក្នុង​ឲ្យ​ដៃ​ជាមុន​» ។​

​ទោះបី​ស្ត្រី​ឈ្មួញ​ឈើ​ជនជាតិ​យួន​ឈ្មោះ «​យាយ​ម៉ា​យ​» ធ្លាប់​បញ្ជា​ឲ្យ​បក្ខពួក​ប្រើ​អំពើហិង្សា​លើ​សមត្ថកិច្ច និង​អ្នកសារព័ត៌មាន ព្រមទាំង​បង្ក្រាបបាន​បទល្មើស​ជាក់ស្តែង​ហើយក៏​ដោយ ក៏​រហូតមក​ដល់ពេលនេះ​អាជ្ញាធរ​ខ្មែរ​ហាក់​ស្ទាក់ស្ទើរ​ក្នុងការ​ចាប់ខ្លួន​ស្ត្រី​ឈ្មួញ​ឈើ​ជនជាតិ​យួន​នេះ​នៅឡើយ ។​

​គួរ​រំលឹក​ជូន​ថា កាលពី​ថ្ងៃទី​១២ ខែតុលា ឆ្នាំ​២០១៦​កន្លងទៅ សមត្ថកិច្ច​បាន​ចុះ​ស្រាវជ្រាវ​រកឃើញ​គំនរ​ឈើ​ប្រណីត​យ៉ាងច្រើន​ដែល​គេ​លួចលាក់​ទុក​នៅ​ស្រុក​សៀម​បូក ខេត្តស្ទឹងត្រែង ហើយ​ឈើ​ល្មើស​ទាំងនោះ ត្រូវបាន​សមត្ថកិច្ច​ប្រមូល​ដឹកជញ្ជូន​យកមក​រក្សា​ទុកជា​វត្ថុ​តាង​បទល្មើស​នៅ​សង្កាត់រដ្ឋបាល​ព្រៃឈើ​អូរ​ពងមាន់ ខេត្តស្ទឹងត្រែង ។ ស្រាប់តែ​នៅ​ព្រលឹម​ថ្ងៃទី​១៣ ខែតុលា ឆ្នាំ​២០១៦​បែរជា​លេចចេញ​វត្តមាន​ឈ្មួញ​ឈើ​ជនជាតិ​យួន​ឈ្មោះ «​យាយ​ព្រឿង​» រួមជាមួយ​កម្មករ​៧​នាក់ និង​រថយន្ត​ចំនួន​២​គ្រឿង​ធ្វើ​សកម្មភាព​រំដោះ​យក​ឈើ​វត្ថុតាង និង​ឡោមព័ទ្ធ​កងកម្លាំង​យាមកាម​ឈើ​ទៀតផង ទើបត្រូវ​សមត្ថកិច្ច​ចាប់ខ្លួន​ឈ្មួញ​ឈើ​ដុះ​ស្លែ និង​ថ្លើមធំ​នេះ​ក្នុង​បទល្មើស​ជាក់ស្តែង​បញ្ជូនមក​តុលាការ​តែម្តង ។ បន្ទាប់ពី​បើក​ការ​ស៊ើបសួរ​រួចរាល់ នៅ​ព្រលប់​ថ្ងៃទី​១៦ ខែតុលា ឆ្នាំ​២០១៦ ចៅក្រម​ស៊ើបសួរ​សាលាដំបូង​រាជធានី​ភ្នំពេញ (​ផ្ទេរ​សមត្ថកិច្ច​ពី​សាលាដំបូង​ខេត្តស្ទឹងត្រែង​មក​សាលាដំបូង​រាជធានី​ភ្នំពេញ​) សម្រេច​ឃុំខ្លួន «​យាយ​ព្រឿង​» ដាក់ពន្ធនាគារ​បណ្តោះអាសន្ន​ក្រោម​ការចោទប្រកាន់​ចំនួន​៣​បទល្មើស​គឺ ៖ ១-​បទ​ប្រមូល​អនុផល​ព្រៃឈើ ដោយ​គ្មាន​លិខិតអនុញ្ញាត ,២- បទ​ប៉ុនប៉ង​លួច និង ៣-​បទ​ប្រឆាំងនឹង​អ្នករាជការ​សាធារណៈ​ដោយមាន​ស្ថាន​ទម្ងន់ទោស ប្រព្រឹត្ត​នៅ​ស្រុក​សៀម​បូក ខេត្តស្ទឹងត្រែង នា​ថ្ងៃទី​១២-១៣ ខែតុលា ឆ្នាំ​២០១៦ ។ ប៉ុន្តែ នៅ​ទីបំផុត ក្រោយ​ការឃុំខ្លួន​ដាក់ពន្ធនាគារ​បានត្រឹមតែ «​មួយ​ខ្យល់​» ឈ្មួញ​ឈើ​ជនជាតិ​យួន​ឈ្មោះ «​យាយ​ព្រឿង​» ក៏ត្រូវ​បាន​ដោះលែង​ឲ្យ​មាន​សេរីភាព​វិញ​ទល់​សព្វថ្ងៃ ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.