ថ្ងៃ ពុធ ទី ២៥ ខែ ឧសភា ឆ្នាំ ២០២២

UN នឹង​ផ្ដល់ប្រាក់​ចំនួន​៧​ម៉ឺន​ដុល្លារ​ក្នុង​ម្នាក់ៗ ដល់​គ្រួសារ​សព​ទាហាន​មួក​ខៀវ​កម្ពុជា​ដែល​ពលី​នៅ​អាហ្វ្រិក​កណ្ដាល​

​ប្រភពពី​មជ្ឈមណ្ឌល​ជាតិ​កងកម្លាំង​រក្សា​សន្តិភាព និង​បោសសម្អាត​កាកសំណល់​សង្គ្រាម ដែលមាន​ឯកឧត្តម​នាយ​ឧ​ត្ត​ម​សេនីយ៍ សែម សុវណ្ណនី ជា​អគ្គនាយក​បាន​ឲ្យ​ដឹងថា អង្គការសហប្រជាជាតិ (UN) នឹង​ផ្ដល់​ថវិកា​ចំនួន​៧​ម៉ឺន​ដុល្លារ​អាមេរិក​ក្នុង​ម្នាក់ៗ​ដល់​គ្រួសារ​សព​ទាហាន​មួក​ខៀវ​កម្ពុជា​ទាំង​៤​នាក់​ដែល​ពលី​នៅក្នុង​ការបំពេញ​បេសកកម្ម​រក្សា​សន្តិភាព​នៅ​ប្រទេស​អាហ្វ្រិក​កណ្ដាល ដោយសារ​ការវាយប្រហា​រ​ពី​សំណាក់​ក្រុម​ឧទ្ទាម​កាលពី​រាត្រី​ថ្ងៃទី​០៨ ខែឧសភា ឆ្នាំ​២០១៧​កន្លងទៅ​ថ្មីៗ ។​

​ក្រៅពី​ថវិកា​របស់​UN គឺ​គ្រួសារ​សព​ទាហាន​មួក​ខៀវ​កម្ពុជា​ទាំង​៤​នាក់ ក៏​នឹង​ទទួលបាន​នូវ​ថវិកា​បន្ថែម​តាម​គោល​របប​នៃ​ឋានន្តរស័ក្ដិ​ពី​រាជរដ្ឋាភិបាល​កម្ពុជា​ផងដែរ ។ លើសពីនេះ ក្រសួងការពារជាតិ​រួមជាមួយ​មជ្ឈមណ្ឌល​ជាតិ​កងកម្លាំង​រក្សា​សន្តិភាព និង​បោសសម្អាត​កាកសំណល់​សង្គ្រាម នឹង​រៀបចំ​ពិធី​បុណ្យសព​ទៅតាម​សំណូមពរ​របស់​ក្រុមគ្រួសារ​សព ដើម្បី​ធ្វើយ៉ាងណា​ឲ្យ​ស័ក្ដិសម​ទៅនឹង​កិត្តិយស និង​តម្លៃ​នៃ​ការ​ពលី​ជីវិត​ក្នុង​បេសកកម្ម​ស្វែង​រក្សា​សន្តិភាព​លើ​ឆាក​អន្តរជាតិ ។​

​ឯកឧត្តម​នាយ​ឧ​ត្ត​ម​សេនីយ៍ សែម សុវណ្ណនី បានបញ្ជាក់​ប្រាប់​បណ្ដាញ​សារព័ត៌មាន​ឲ្យ​ដឹង​ដែរ​ថា សាកសព​ទាហាន​មួក​ខៀវ​កម្ពុជា​ទាំង​៤​នាក់ នឹងត្រូវ​ដឹកបញ្ជូន​មកដល់​មាតុភូមិ​កម្ពុជា​យ៉ាង​លឿន​បំផុត​ក្នុង​រយៈពេល​២​សប្ដាហ៍ បន្ទាប់ពី​UN រៀបចំ​ពិធី​គោរព​វិញ្ញាណក្ខន្ធ​សព​ទាហាន​មួក​ខៀវ​កម្ពុជា​ទាំង​៤​នាក់​ប្រកបដោយ​កិត្តិយស​រួចរាល់ ។​

​ទាហាន​មួក​ខៀវ​កម្ពុជា​ទាំង​៤​នាក់​ដែល​បាន​ពលី​នៅ​ប្រទេស​អាហ្វ្រិក​កណ្ដាល​ក្រោម​ស្នាដៃ​វាយប្រហារ​របស់​ក្រុម​ឧទ្ទាម​នោះ រួមមាន ៖ លោក​អនុសេនីយ៍ទោ អ៊ឹម សំ ត្រូវបាន​សម្លាប់​នៅ​កន្លែង​ឆ្មក់​វាយប្រហារ​តែម្ដង , លោក​អនុសេនីយ៍ឯក ម៉ៅ អេង , លោក​ព្រិន្ទបាលទោ ស៊ា​ង នរិន្ទ និង​លោក​ព្រិន្ទបាលទោ មុំ តុលា ត្រូវបាន​រកឃើញ​សាកសព​នៅ​ចម្ងាយ​ប្រមាណ​២​គីឡូម៉ែត្រ​ពី​ទីតាំង​វាយប្រហារ ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.