ថ្ងៃ ចន្ទ ទី ១៧ ខែ ធ្នូ ឆ្នាំ ២០១៨

​កំពូល​មន្ត្រី​ដែល​ស្រឡាញ់​ចូលចិត្ត ឬ​ឈ្លក់​នឹង​ឋានៈ និង​ងារ «​ឯកឧត្តម​» យ៉ាង​ងប់​ង​ល់ 

​នា​សម័យ​ព្រះរាជាណាចក្រ​កម្ពុ​ជាទី​២​ក្រោម​ការដឹកនាំ​របស់​សម្តេច​អគ្គមហាសេនាបតី​តេ​ជោ ហ៊ុន សែន ហៅ​បុរស​ខ្លាំង​ជា​នាយករដ្ឋមន្ត្រី មាន​មន្ត្រីរាជការ​ស៊ីវិល ប្រដាប់អាវុធ មេធាវី មេ​សហជីព និង​អ្នកជំនួញ​មិនតិច​នាក់​ទេ ដែល​ទទួលបាន​ការតែងតាំង​ជាទី​ប្រឹក្សា​រាជរដ្ឋាភិបាល ទីប្រឹក្សា​ថ្នាក់ដឹកនាំ​ស្ថាប័ន​ជាតិ (​ប្រធានព្រឹទ្ធសភា ប្រធានរដ្ឋសភា នាយករដ្ឋមន្ត្រី​…) ឲ្យ​មាន​ឋានៈ និង​ងារ​ជា «​ឯកឧត្តម​» ក្នុងនោះ ក៏មាន​មន្ត្រី​ថ្នាក់ក្រោម​ដែល​មិនមាន​ឋានៈ​ជា «​ឯកឧត្តម​» មួយចំនួន​ក៏​ទទួលបាន​ការតែងតាំង​ជាទី​ប្រឹក្សា​ថ្នាក់ដឹកនាំ​ស្ថាប័ន​ជាតិ ឡើង​ឋានៈ និង​ងារ​ជា «​ឯកឧត្តម​» បន្ថែម​លើ​មុខងារ​បច្ចុប្បន្ន​ផងដែរ ។​

​ព័ស្តុតាង​ជាក់ស្តែង​មួយ​ក្នុងចំណោម​ព័ស្តុតាង​ជាច្រើន​ទៀត​បាន​បង្ហាញថា លោក ធុល នាង ជា​ប្រធាន​មន្ទីរ​ការងារ និង​បណ្តុះបណ្តាល​វិជ្ជាជីវៈ​ខេត្តកណ្តាល ដែល​តែងតាំង​ដោយ​ត្រឹម​ប្រកាស​របស់​ក្រសួង​ការងារ និង​បណ្តុះបណ្តាល​វិជ្ជាជីវៈ​នោះ ទទួលបាន​ការតែងតាំង​ជាទី​ប្រឹក្សា​សម្តេច​អគ្គ​មហា​ពញា​ចក្រី ហេង សំរិន ប្រធានរដ្ឋសភា​នៃ​ព្រះរាជាណាចក្រ​កម្ពុជា​នីតិកាល​ទី​៥ មាន​ឋានៈ​ស្មើ​រដ្ឋលេខាធិការ​បន្ថែម​លើ​មុខងារ​បច្ចុប្បន្ន ដោយ​ព្រះរាជក្រឹត្យ​លេខ​នស​/​រកត​/១០១៣/១០៣៩ ចុះ​ថ្ងៃទី​២៤ ខែតុលា ឆ្នាំ​២០១៣ ពោលគឺ​មាន​ឋានៈ និង​ងារ​ជា «​ឯកឧត្តម​» យ៉ាង​ហ៊ឺហា ។ 

​ឋានៈ​ជា «​ឯកឧត្តម​» របស់លោក ធុល នាង ប្រធាន​មន្ទីរ​ការងារ និង​បណ្តុះបណ្តាល​វិជ្ជាជីវៈ​ខេត្តកណ្តាល ក្នុងនាម​ជាទី​ប្រឹក្សា​សម្តេច​អគ្គ​មហា​ពញា​ចក្រី ហេង សំរិន ប្រធានរដ្ឋសភា​នៃ​ព្រះរាជាណាចក្រ​កម្ពុជា មាន​ឋានៈ​ស្មើ​រដ្ឋលេខាធិការ​នោះ ធ្វើ​ឲ្យ​សមាជិក​រាជរដ្ឋាភិបាល​ដែលជា​រដ្ឋលេខាធិការ​ក្រសួង​ការងារ និង​បណ្តុះបណ្តាល​វិជ្ជាជីវៈ​មិនតិច​នាក់​ឡើយ​ត្រូវ «​រួញ​ខ្លួន​» នឹង​អំណាច​របស់ «​ឯកឧត្តម ធុល នាង​» ដែលជា​មន្ត្រីក្រោមឱវាទ​របស់ខ្លួន (Sic!) ។​

​ប្រការ​គួរ​ឲ្យ​ចាប់អារម្មណ៍​ពោរពេញ​ដោយ​ការរិះគន់​ទៀត​នោះ គឺ​រាល់​លិខិតស្នាម​ជា​លាយលក្ខណ៍អក្សរ ជាពិសេស​ក្រុម​សហជីព​ដែល​សរសេរ​ទៅកាន់​លោក ធុល នាង ជា​ប្រធាន​មន្ទីរ​ការងារ និង​បណ្តុះបណ្តាល​វិជ្ជាជីវៈ​ខេត្តកណ្តាល បើ​ហៅថា «​លោក ធុល នាង​» ត្រូវបាន​មន្ត្រី​ខាង​រដ្ឋបាល​របស់​មន្ទី​រកា​រងារ និង​បណ្តុះបណ្តាល​វិជ្ជាជីវៈ​ខេត្តកណ្តាល​មិន​ទទួលយក​ឡើយ ហើយ​ទាល់តែ​សរសេរ​ដាក់ថា «​ឯកឧត្តម ធុល នាង​» ទើប​ខាង​រដ្ឋបាល​របស់​មន្ទី​រកា​រងារ និង​បណ្តុះបណ្តាល​វិជ្ជាជីវៈ​ខេត្តកណ្តាល​ព្រម​ទទួលយក​យ៉ាង​រីករាយ រីកថ្លើម​រីក​ប្រមាត់ ខណៈ​មាន​មន្ត្រី​មួយចំនួន​ផ្សេងទៀត​ដែលមាន​ឋានៈ​ជា «​ឯកឧត្តម​» ក្នុងនាម​ជាទី​ប្រឹក្សា ឬ​ជំនួយការ​ថ្នាក់ដឹកនាំ​ស្ថាប័ន​ជាតិ​ដែរ បើ​ហៅ «​លោក​» សំដៅ​ទៅលើ​តួនាទី​មុខងារ​របស់​មន្ត្រី​នោះ ត្រូវបាន​ទទួលយក​មិន​ប្រកែក ឬ​ច្រានចោល​ដូច​ឯកឧត្តម ធុល នាង នោះទេ ។​

​សរុបសេចក្តី​មក លោក ធុល នាង ប្រធាន​មន្ទីរ​ការងារ និង​បណ្តុះបណ្តាល​វិជ្ជាជីវៈ​ខេត្តកណ្តាល គឺជា​កំពូល​មន្ត្រី​ម្នាក់​ដែល​ស្រឡាញ់​ចូលចិត្ត ឬ​ឈ្លក់​នឹង​ឋានៈ និង​ងារ​ជា «​ឯកឧត្តម​» យ៉ាង​ជ្រាលជ្រៅ ឬ​ង​ប់ង​ល់​បំផុត ៕​

Filed in: ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.