ថ្ងៃ អាទិត្យ ទី ១៧ ខែ តុលា ឆ្នាំ ២០២១

​ចៅក្រម​តុលាការ​កំពូល​ដែលមាន​អាយុ​ចាប់ពី​៦៦​ឆ្នាំ រហូតដល់​៧៧​ឆ្នាំ​ចំនួន​៥​នាក់ ត្រូវបាន​អនុញ្ញាត​ឲ្យ​នៅ​បន្តការងារ (​មិន​ចូលនិវត្តន៍​) 

​យោងតាម​សេចក្តីក្រាបបង្គំទូលថ្វាយ​របស់​ឯកឧត្តម អង្គ វង្សវឌ្ឍានា រដ្ឋមន្ត្រី​ក្រសួងយុត្តិធម៌ និង​ជា​សមាជិក​ឧ​ត្ត​ម​ក្រុមប្រឹក្សា​នៃ​អង្គចៅក្រម​បន្ទាប់ពី​បានការ​សម្រេច​របស់​ឧ​ត្ត​ម​ក្រុមប្រឹក្សា​នៃ​អង្គចៅក្រម នា​សម័យប្រជុំ​ថ្ងៃទី​២៧ ខែកុម្ភៈ ឆ្នាំ​២០១៧ ព្រះករុណា​ព្រះបាទ​សម្តេច​ព្រះបរមនាថ នរោត្តម សីហមុនី ព្រះមហាក្សត្រ​នៃ​ព្រះរាជាណាចក្រ​កម្ពុជា ត្រាស់បង្គាប់​អនុញ្ញាត​ឲ្យ​ចៅក្រម​បម្រើ​ការងារ​នៅ​តុលាការ​កំពូល​ដែលមាន​អាយុ​ចាប់ពី​៦៦​ឆ្នាំ​រហូតដល់​៧៧​ឆ្នាំ ចំនួន​៥​នាក់​បាន​នៅ​បន្តការងារ​តទៅទៀត (​មិន​ដាក់​ឲ្យ​ចូលនិវត្តន៍​) ដោយ​ព្រះរាជក្រឹត្យ​លេខ​នស​/​រកត​/០២១៧/២៤៨ ចុះ​ថ្ងៃទី​២៨ ខែកុម្ភៈ ឆ្នាំ​២០១៧ ។​

​ចៅក្រម​តុលាការ​កំពូល​មាន​អាយុ​ចាប់ពី​៦៦​ឆ្នាំ​រហូតដល់​៧៧​ឆ្នាំ​ទាំង​៥​នាក់ ដែល​ត្រូវបាន​អនុញ្ញាត​ឲ្យ​នៅ​បន្ត​បម្រើ​ការងារ​តទៅទៀត (​មិន​ដាក់​ឲ្យ​ចូលនិវត្តន៍​) នោះ រួមមាន ៖ 

១-​ឯកឧត្តម ឌិ​ត មុន្ទី (​អាយុ​ដាក់​ក្នុង​ក្របខ័ណ្ឌ​សមាជិក​គណៈមេធាវី​នៃ​ព្រះរាជាណាចក្រ​កម្ពុជា គឺ​៧៦​ឆ្នាំ និង​អាយុ​ដាក់​ក្នុង​ក្របខ័ណ្ឌ​អង្គចៅក្រម​គឺ ៧៣​ឆ្នាំ​) ប្រធាន​តុលាការ​កំពូល និង​ជា​សមាជិក​ឧ​ត្ត​ម​ក្រុមប្រឹក្សា​នៃ​អង្គចៅក្រម ។ នៅក្នុង​ក្របខ័ណ្ឌ​ការងារ​គណបក្សនយោបាយ គឺ​ឯកឧត្តម ឌិ​ត មុន្ទី ជា​សមាជិក​គណៈអចិន្ត្រៃយ៍​នៃ​គណៈកម្មាធិការ​កណ្តាល​គ​ណ​បក្ស​ប្រជាជន​កម្ពុជា ។​

២-​ឯកឧត្តម ឃឹម ប៉ុណ្ណ អាយុ​៧៧​ឆ្នាំ ជា​អនុប្រធាន​តុលាការ​កំពូល ។ នៅក្នុង​ក្របខ័ណ្ឌ​ការងារ​គណបក្សនយោបាយ គឺ​ឯកឧត្តម ឃឹម ប៉ុណ្ណ ជា​សមាជិក​គណៈកម្មាធិកា​រ​កណ្តាល​គណបក្ស​ប្រជាជន​កម្ពុជា ។​

៣-​ឯកឧត្តម ជីវ កេង អាយុ​៦៦​ឆ្នាំ ជា​អនុប្រធាន​តុលាការ​កំពូល និង​ជា​សហប្រធាន​ក្រុមអធិការកិច្ច​នៃ​ឧ​ត្ត​ម​ក្រុមប្រឹក្សា​នៃ​អង្គចៅក្រម (​អតីត​ប្រធាន​សាលាដំបូង​រាជធានី​ភ្នំពេញ​រយៈពេល​ជិត​១០​ឆ្នាំ​) ។ នៅក្នុង​ក្របខ័ណ្ឌ​ការងារ​គណបក្សនយោបាយ គឺ​ឯកឧត្តម ជីវ កេង ជា​សមាជិក​គណបក្ស​ប្រជាជន​កម្ពុជា​ចុះ​ពង្រឹង​មូលដ្ឋាន​នៅ​ខេត្តតាកែវ​យ៉ាងសកម្ម ។​

៤-​លោក ទី ណេង អាយុ​៧៣​ឆ្នាំ ជា​ចៅក្រម​តុលាការ​កំពូល និង​ជា​អតីត​ចៅក្រម​សាលាឧទ្ធរណ៍ ។​

៥-​លោក យស់ សូ​ខឿន អាយុ​៧២ ជា​ចៅក្រម​តុលាការ​កំពូល ។​

​មាត្រា​៦២ កថាខណ្ឌ​ទី​១ និង​កថាខណ្ឌ​ទី​២​នៃ​ច្បាប់​ស្តីពី​លក្ខន្តិកៈ​នៃ​ចៅក្រម និង​ព្រះរាជអាជ្ញា ដែល​ប្រកាស​ឲ្យ​ប្រើ​ដោយ​ព្រះរាជក្រម​លេខ​នស​/​រកម​/០៧១៤/០១៦ ចុះ​ថ្ងៃទី​១៦ ខែកក្កដា ឆ្នាំ​២០១៤ បានចែង​ទាំង​របៀប «​មិន​ដាច់​ណាត់​ច្បាស់លាស់​» ថា «​ចៅក្រម​ទាំង​ពីរភេទ​ត្រូវ​ចូលនិវត្តន៍​នៅពេល​គ្រប់​អាយុ​៦០​ឆ្នាំ ។ ចៅក្រម​ទាំង​អស់នៃ​តុលាការ​កំពូល​ដែលមាន​អ​យុ​៦០​ឆ្នាំ​ឡើងទៅ ត្រូវ​ចូលនិវត្តន៍​តាម​ការស្នើ​សុំ​របស់​សាមីខ្លួន ។ ប៉ុន្តែ នៅពេល​ដល់​អាយុ​៦៥​ឆ្នាំ ឧ​ត្ត​ម​ក្រុមប្រឹក្សា​នៃ​អង្គចៅក្រម​ត្រូវ​សម្រេច​ពី​ការបន្ត​ការងារ​របស់​ចៅក្រម​ទាំង​អស់នៃ​តុលាការ​កំពូល​តាម​ការ​ស្នើសុំ​របស់​សាមីខ្លួន ។​» ។ 

​អនុលោម​តាម​មាត្រា​៦២ កថាខណ្ឌ​ទី​១ និង​កថាខណ្ឌ​ទី​២​នៃ​ច្បាប់​ស្តីពី​លក្ខន្តិកៈ​នៃ​ចៅក្រម និង​ព្រះរាជអាជ្ញា​ខាងលើ គឺ​បានបង្ហាញ​ឲ្យ​ឃើញថា ចៅក្រម​តុលាការ​កំពូល​ទាំង​៥​នាក់​ដែលមាន​អាយុ​ចាប់ពី​៦៦​ឆ្នាំ​ដល់​៧៧​ឆ្នាំ​ដែល​មិនទាន់​ត្រូវ​បានដាក់​ឲ្យ​ចូលនិវត្តន៍ តែ​ធ្លាប់​ត្រូវបាន​ពន្យារពេល​ចូលនិវត្តន៍​តាមរយៈ​ការសុំ​នៅ​បន្តការងារ​នោះ គឺ​សុទ្ធតែ​ចង់​នៅ​បម្រើ​ការងារ​តទៅទៀត ដោយ​មិន​កំណត់​អាយុ ៕​

Filed in: Feature, តុលាការ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.