ថ្ងៃ ចន្ទ ទី ២៤ ខែ មករា ឆ្នាំ ២០២២

​កើប​លុយ​ដាក់​ហោប៉ៅ​ផ្ទាល់ខ្លួន តែ​រំខាន​អ្នកដទៃ ! ផ្ទះសំណាក់ «​មហា​ហេង​» ក្លាយជា «​មហា​ទំនើង​» ត្រូវ​អាជ្ញាធរ​មើលរំលង 

​ប្រជាពលរដ្ឋ​ដែល​ធ្វើដំណើរ​ឆ្លងកាត់​តាម​បណ្តោយ​វិថី​លេខ​១៣៤ សង្កាត់​មិត្តភាព ខណ្ឌ​៧​មករា រាជធានី​ភ្នំពេញ តែង​នាំគ្នា​រអ៊ូរ​រទាំ​ចំពោះ​ការកកស្ទះ​ចរាចរណ៍​លំបាក​ក្នុងការ​ធ្វើដំណើរ​ដោយសារ​មានផ្ទះ​សំណាក់​មួយ​យីហោ «​មហា​ហេង​» ដាក់តាំង​ស្លាក​យីហោ​របស់ខ្លួន​នៅលើ​ផ្លូវ​សាធារណៈ​តែម្តង ។ ជាក់ស្តែង កាលពី​ថ្ងៃទី​១៩ ខែមេសា ឆ្នាំ​២០១៧​កន្លងទៅ នៅត្រង់ចំណុច​មុខផ្ទះ​សំណាក់ «​មហា​ហេង​» នេះ មានការ​កកស្ទះ​ចរាចរណ៍​អស់​រយៈពេល​ជាច្រើន​ម៉ោង ។​

​សេចក្តីរាយការណ៍​ពី​ប្រជាពលរដ្ឋ​រស់នៅ​ក្បែរ​ខាង​ផ្ទះសំណាក់​យីហោ «​មហា​ហេង​» បាន​បង្ហើប​ប្រាប់​ឲ្យ​ដឹងថា មិន​ត្រឹមតែ​យក​ផ្លូវ​សារ​ធា​រណៈ​ម​ប្រើ​សេវាកម្ម​កើប​លុយ​ដាក់​ហោប៉ៅ​ផ្ទាល់ខ្លួន​រយៈពេល​២៤​ម៉ោង​លើ​២៤​ម៉ោង គឺ​ស្មើនឹង​១​ថ្ងៃ​ពេញ​ប៉ុណ្ណោះ​ទេ អ្នកគ្រប់គ្រង​ផ្ទះសំណាក់​យីហោ «​មហា​ហេង​» តែងមាន​ចេតនា​បង្ករឿង​ជាមួយ​អ្នក​ប្រកប​របរ​អាជីវកម្ម​បើក​ផ្ទះសំណាក់​ឋិត​នៅ​ជិតខាង​គ្នា​ទៀតផង ។​

​ប្រភពព័ត៌មាន​ពី​មន្ត្រី​អាជ្ញាធរ​មូលដ្ឋាន​មួយរូប​បាន​ឲ្យ​ដឹង​ដែរ​ថា ម្ចាស់​ទីតាំង​ជួល​ឲ្យ​មាន​ការបើក​ផ្ទះសំណាក់​យីហោ «​មហា​ហេង​» នោះ គឺ​អះអាង​ខ្លួនឯង​ថា ជាម​ន្ត្រី​ជំនួយការ​កងរាជអាវុធហត្ថ​ម្នាក់​ឈ្មោះ ឈុន ហ៊ាង ដែលជា​អ្នកចេះ​បកប្រែ​ភាសា​ចិន​មាន​ឋានន្តរស័ក្តិ​ថ្នាក់​វរសេនីយ៍ ។ ទំនងជា​អាង​អំណាច​ម្ចាស់​ផ្ទះជួល​ជា​ជំនួយការ​ប៉េអឹម​ដូច្នេះហើយ ទើប​ថៅកែ​ផ្ទះសំណាក់​យីហោ «​មហា​ហេង​» មាន​ចរិត​ទំនើង​មិន​ខ្វល់​នឹង​ការរំខាន​ដល់​អ្នកដទៃ​ប្រើប្រាស់​ផ្លូវ​សាធារណៈ និង​អ្នករស់នៅ​ជិតខាង​អ្វី​ឡើយ រហូតដល់​ផ្ទះសំណាក់​យីហោ «​មហា​ហេង​» ត្រូវបាន​អ្នករស់នៅ​ក្បែរ​ខាង​ហៅថា ផ្ទះសំណាក់ «​មហា​ទំនើង​» ។​

​ក្រុម​ប្រជាពលរដ្ឋ​ធ្លាប់​ធ្វើដំណើរ​ឆ្លងកាត់​តាម​បណ្តោយ​វិថី​លេខ​១៣៤ សង្កាត់​មិត្តភាព ខណ្ឌ​៧​មករា រាជធានី​ភ្នំពេញ និង​អ្នករស់នៅ​ជិតខាង​ផ្ទះសំណាក់​យីហោ «​មហា​ហេង​» បាន​សំណូមពរ​ឲ្យ​អាជ្ញាធរ​មូលដ្ឋាន​ក៏ដូចជា​អភិបាល​នៃ​គណៈ​អភិបាល​រាជធានី​ភ្នំពេញ​មេត្តា​ចុះ​ត្រួត​ពិនិត្យមើល និង​មាន​វិធានការ​ទៅលើ​ថៅកែ​ផ្ទះសំណាក់​យីហោ «​មហា​ហេង​» ដែលមាន​រហស្សនាម​ថា ផ្ទះសំណាក់ «​មហា​ទំនើង​» នោះ​ផង ដើម្បី​ទប់ស្កាត់​កុំ​ឲ្យ «​ទំនើង​» តទៅទៀត និង​ម្យ៉ាង​កុំ​ឲ្យ​ប្រជាពលរដ្ឋ​ចោទប្រកាន់ថា អាជ្ញាធរ​ក៏​ចូលរួម​សមគំនិត​ជាមួយ​ម្ចាស់​ផ្ទះសំណាក់ «​មហា​ទំនើង​» ដែល​រកស៊ី​កើប​លុយ​ផ្ទាល់ខ្លួន​តែ​រំខាន​ដល់​អ្នកដទៃ​នោះដែរ ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.