ថ្ងៃ អង្គារ ទី ១៨ ខែ ធ្នូ ឆ្នាំ ២០១៨

​រឿង​សមាជ​វិសាមញ្ញ​គណបក្សប្រឆាំង ! តើ​គណបក្ស​សង្គ្រោះ​ជាតិ​មិន​មើល ឬ​បំពាន​លក្ខន្តិកៈ​របស់ខ្លួន ឬ​ក្រសួងមហាផ្ទៃ​តាម​រុកកួន​ដំណើរការ​គណបក្ស​សង្គ្រោះ​ជាតិ ?

​ក្រោយ​ការប្រកាស​លាលែង​របស់​លោក សម រង្ស៊ី ពី​ប្រធាន​គណបក្ស​សង្គ្រោះ​ជាតិ​រយៈពេល​តែ​០១​ថ្ងៃ គឺ​នៅ​ថ្ងៃទី​១២ ខែកុម្ភៈ ឆ្នាំ​២០១៧​គណៈកម្មាធិការ​នាយក​គណបក្ស​សង្គ្រោះ​ជាតិ​បាន​បើក​កិច្ចប្រជុំ​សម្រេច​ប្រគល់​សិទ្ធិ​ជូន​ឯកឧត្តម កឹម សុខា អនុប្រធាន​គណបក្ស​ជា​ប្រធានស្តីទី​គណបក្ស​ដើម្បី​ដឹកនាំ​គណបក្ស​ទាំងមូល និង​បន្ទាប់មកទៀត នៅ​ថ្ងៃទី​០២ ខែមីនា ឆ្នាំ​២០១៧​គណបក្ស​សង្គ្រោះ​ជាតិ​ក៏បាន​ប្រារព្ធ​សមាជ​វិសាមញ្ញ​របស់ខ្លួន​មួយ​ដោយ​សម្រេច​ធ្វើ​វិសោធនកម្ម​ប្រការ​៤៥ និង​ប្រការ​៤៧ នៃ​លក្ខន្តិកៈ​គណបក្ស និង​សម្រេច​ជ្រើសតាំង​ឯកឧត្តម កឹម សុខា ជា​ប្រធាន​គណបក្ស ព្រមទាំង​មាន​អនុប្រធាន​គណបក្ស​ចំនួន​៣​នាក់ ។ មិនតែប៉ុណ្ណោះ អង្គសមាជ​វិសាមញ្ញ​ក៏បាន​សម្រេច​គាំទ្រ​គោលនយោបាយ​អាទិភាព​៥​ចំណុច​របស់​គណបក្ស​ក្រោម​ពាក្យស្លោក «​ដូរ​មេឃុំ​បម្រើ​បក្ស ដាក់​មេឃុំ​បម្រើ​រាស្ត្រ​» ទៀតផង ។​

​បន្ទាប់ពី​គណបក្ស​សង្គ្រោះ​ជាតិ​ដាក់ចេញ​នូវ​ពាក្យស្លោក​ដ៏​គួរ​ឲ្យ​ចាប់អារម្មណ៍ និង​ទាក់ទាញ​ថា «​ដូរ​មេឃុំ​បម្រើ​បក្ស ដាក់​មេឃុំ​បម្រើ​រាស្ត្រ​» រួចមក បាន​បង្ក​ឲ្យ​គណបក្ស​ប្រជាជន​កម្ពុជា​ដែលជា​គណបក្សនយោបាយ​កាន់កាប់​អំណាច​ដុះ​ស្លែ​នៅ​កម្ពុជា «​ឆេះដុំ​» មិន​ស្ទើរ​ឡើយ ហើយក៏​ទាមទារ​ឲ្យ​មានការ​ផ្លាស់ប្តូរ​ចេញ​ថែមទៀត ។​

​បន្តម​កទៀត ក្រោមរូបភាព​អះអាងថា «​តាមដាន​មើល​គណបក្សនយោបាយ​ណា​អនុវត្តតាម​លក្ខន្តិកៈ ឬ​មិន​អនុវត្តតាម​លក្ខន្តិកៈរ​បស់​ខ្លួន​» នោះ ស្រាប់តែ​ក្រសួងមហាផ្ទៃ​លើកយក​ស្មារតី​សមាជ​វិសាមញ្ញ​របស់​គណបក្ស​សង្គ្រោះ​ជាតិ​នា​ថ្ងៃទី​០២ ខែមីនា ឆ្នាំ​២០១៧ មក​ពិនិត្យ​យ៉ាងសកម្ម រួច​ក៏បាន​វាយតម្លៃថា ការសម្រេច​ជ្រើសតាំង​ឯកឧត្តម កឹម សុខា ជា​ប្រធាន​ថ្មី​នៃ​គណបក្ស និង​អនុប្រធាន​ថ្មី​ចំនួន​៣​នាក់​នៃ​គណបក្ស រួមមាន ឯកឧត្តម ប៉ុល ហំ​ម លោកជំទាវ មួរ សុខ​ហួរ និង​ឯកឧត្តម អេង ឆៃអ៊ាង គឺជា​ការបំពាន​ទៅនឹង​ប្រការ​៤៧​នៃ​លក្ខន្តិកៈ​ជា​ច្បាប់កំពូល​របស់​គណបក្ស​ដែល​តម្កល់ទុក​នៅ​ក្រសួងមហាផ្ទៃ​នា​ថ្ងៃទី​១០ ខែឧសភា ឆ្នាំ​២០១៣ សម្រាប់​ចុះបញ្ជី​គណបក្សនយោបាយ ។​

​អនុលោម​តាម​ទិដ្ឋភាព​ជាក់ស្តែង​បែបនេះ ធ្វើ​ឲ្យ​មជ្ឈដ្ឋាន​អ្នកវិភាគ​នយោបាយ​ឯករាជ្យ​នៅ​កម្ពុជា​ចោទ​ជា​សំណួរ​ថា តើ​គណបក្ស​សង្គ្រោះ​ជាតិ​ដែលជា​គណបក្សនយោបាយ​ប្រឆាំង​ដ៏​ធំ​តែមួយគត់​នៅ​កម្ពុជា និង​មាន​អាសនៈ​នៅក្នុង​រដ្ឋសភា​នីតិកាល​ទី​៥​រហូតដល់​៥៥​អាសនៈ មិន​មើល ឬ​បំពាន​លក្ខន្តិកៈ​របស់ខ្លួន​ពិតប្រាកដ​មែន ឬក៏​ក្រសួងមហាផ្ទៃ​មាន​ចេតនា​តាម​រុកកួន​ដំណើរការ​ប្រព្រឹត្តទៅ​រប​ស់​គណបក្ស​សង្គ្រោះ​ជាតិ ?

​លើសពីនេះ មាន​សំណួរ​មួយ​ទៀតថា ដើម្បី​កុំ​ឲ្យ​មាន​ភាព​ប្រទាំង​ប្រទើស​ជាមួយនឹង​ការយល់ឃើញ​របស់​ក្រសួងមហាផ្ទៃ​នោះ តើ​គណបក្ស​សង្គ្រោះ​ជាតិ​នឹងត្រូវ​គិតគូរ​យ៉ាងណា​ទៀត ឬក៏​តម្រូវ​ឲ្យ​មាន​ប្រធានស្តីទី​គណបក្ស​វិញ​ដើម្បី​ដឹកនាំ​គណបក្ស​ចូលរួម​ប្រកួតប្រជែង​ជាមួយ​គណបក្ស​ប្រជាជន​កម្ពុជា​សម្រាប់​ការបោះឆ្នោត​ជា​ហូរហែ​នាពេលខាងមុខ ? ៕​

Filed in: Feature, ទស្សនៈនយោបាយ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.