ថ្ងៃ ពុធ ទី ០៥ ខែ សីហា ឆ្នាំ ២០២០

​គោលដៅ​ចិន ! ២​ករណី​ចម្បង​ដែល​មហាអំណាច​ចិន​ត្រូវ​ច្បាម​យក​ទាល់តែ​បាន​មិន​ឲ្យ​របូត​ពី​ដៃ ទោះបី​ប្រឈម​នឹង​មហាអំណាច​អាមេរិក​ក៏ដោយ​

​ក្នុងនាម​ប្រទេស​ជាប់​លំដាប់ថ្នាក់​មហាអំណាច​សេដ្ឋកិច្ចពិភពលោក និង​មហាអំណាច​យោធា​ផង គឺ​សហរដ្ឋអាមេរិក និង​ចិន គង់​មានការ​ប៉ះទង្គិច​គ្នា​ខ្លះៗ​ទាក់ទង​នឹង​វិស័យ​ការបរទេស និង​វិស័យ​ពាណិជ្ជកម្ម ប៉ុន្តែ​មាន​២​ករណី​ចម្បង​ដែល​មហាអំណាច​ចិន​ត្រូវ​ច្បាម​យក​ទាល់តែ​បាន​មិន​ឲ្យ​របូត​ពី​ដៃ ទោះបី​ប្រឈម​នឹង​មហាអំណាច​អាមេរិក​ក៏ដោយ ដែល​២​ករណី​ចម្បង​របស់​មហាអំណាច​ចិន​នោះ គឺ ៖

១-​នយោបាយ​ចិន​តែមួយ​«One China Policy» ៖ ក្រៅពី​ហុងកុង​ដែល​ចាក​ផុតពី​អាណានិគម​អង់គ្លេស​កាលពី​ឆ្នាំ​១៩៩៧​ហើយ​បាន​ឋិត​មក​នៅក្រោម​ការគ្រប់គ្រង​របស់​ចិន​វិញ គឺ​កោះ​តៃវ៉ាន់​ដែលមាន​ទំហំ​៣៦ ១៩៣​គីឡូម៉ែត្រ​ក្រឡា មាន​ប្រជាពលរដ្ឋ​រស់នៅ​ជាង​២០​លាន​នាក់​នោះ ដាច់ខាត​ចិន​ត្រូវ​ចាត់ទុកជា​ដែន​កោះ​មួយ​របស់ខ្លួន​ក្រោមរូបភាព​«​នយោបាយ​ចិន​តែមួយ​» ។​

​មាន​បណ្តា​ប្រទេស​ជាច្រើន​ធ្លាប់បាន​ទទួលស្គាល់​រួចហើយ​នូវ​«​នយោបាយ​ចិន​តែមួយ​» សូម្បី​លោក Donald Trump ប្រធានាធិបតី​ទី​៤៥​របស់​សហរដ្ឋអាមេរិក​ទើប​ឡើងកាន់តំណែង​ថ្មីៗ​ដែល​ធ្លាប់​បង្ហាញ​នូវ​ជំហរ​ស្ទាក់ស្ទើរ​លើ​ការគាំទ្រ​«​នយោបាយ​ចិន​តែមួយ​» ដោយ​ចង់​ដោះដូរ​ជា​ថ្នូរ​ជាមួយ​ប្រទេស​ចិន​នូវ​«​សម្បទាន​ពាណិជ្ជកម្ម​» នោះ ក៏បាន​ងាក​មក​គាំទ្រ​«​នយោបាយ​ចិន​តែមួយ​» នេះ​ឡើងវិញ​ដែរ ។​

​ទីក្រុង​តៃប៉ិ​«Taipei» របស់​កោះ​តៃវ៉ាន់​ដែលមាន​ចម្ងាយ​ប្រមាណ​ត្រឹម​ជាង​២០០​គីឡូម៉ែត្រ​ពី​តំបន់ Quanzhou នៃ​ខេត្ត Fujian របស់​ចិន​នោះ គឺ​សក្តានុពល​នៃ​ការ​«​ការពារ​ខ្លួន​» បាន​ពឹងផ្អែក​ទាំងស្រុង​ទៅលើ​សហរដ្ឋអាមេរិក ។ ដូច្នេះ បើ​មហាអំណាច​អាមេរិក​គាំទ្រ​«​នយោបាយ​ចិន​តែមួយ​» ទៅហើយ គឺ​ចង់ ឬ​មិន​ចង់ និង​យូរ ឬ​ឆាប់ កោះ​តៃវ៉ាន់​នឹង​ក្លាយជា​ដែន​អធិបតេយ្យភាព​របស់​ម​ហា​អំណាច​ចិន ។​

២-​តំបន់​ដែនសមុទ្រ​ចិន​ខាងត្បូង​«South China Sea» ៖ សមុទ្រ​ចិន​ខាងត្បូង​មាន​ទំហំ​ប្រមាណ​៣ ៥០០ ០០០​គីឡូម៉ែត្រ​ក្រឡា កំពុងមាន​ជម្លោះ​រវាង​ប្រទេស​ចិន​ជាមួយ​តៃវ៉ាន់​ផង និង​បណ្តា​ប្រទេស​ចំនួន​៥​ក្នុង​សមាគម​ប្រជាជាតិ​អាស៊ីអាគ្នេយ៍​(ASEAN) រួមមាន វៀតណាម ប្រ៊ុយណេ ម៉ាឡេស៊ី ឥណ្ឌូនេស៊ី និង​ហ្វីលីពីន​ផង ។ 

​ជម្លោះ​រវាង​ប្រទេស​ហ្វីលីពីន និង​ប្រទេស​ចិន​នៅ​តំបន់​ដែនសមុទ្រ​ចិន​ខាងត្បូង​ធ្លាប់​ត្រូវបាន​តុលាការ​ម​ជ្ឈ​ត្ត​កម្ម​អចិន្ត្រៃយ៍ (Permanent Court of Arbitration) ទីក្រុង​ឡាអេ សម្រេច​កាលពី​ថ្ងៃទី​១២ ខែកក្កដា ឆ្នាំ​២០១៦​កន្លងទៅ បដិសេធ​សិទ្ធ​គ្រប់គ្រង​ផ្តាច់មុខ​របស់​ចិន​លើ​តំបន់​ដែនសមុទ្រ​ចិន​ខាងត្បូង ពោលគឺ​វិនិច្ឆ័យ​ឲ្យ​ប្រទេស​ចិន​ចាញ់ក្តី​ប្រទេស​ហ្វីលីពីន ។ ទោះបី​តុលាការ​ទី​ក្រុងឡាអេ​បានសម្រេច​ដូច្នេះ​ក៏ដោយ ក៏​ជាក់ស្តែង​ប្រទេស​ចិន​មិនបាន​ទទួលស្គាល់​ដឹងឮ និង​ចូលរួម​អនុវត្ត​សេចក្តីសម្រេច​របស់​តុលាការអន្តរជាតិ​នោះឡើយ ហើយ​ចិន​បែរជា​បន្តធ្វើ​ការសាងសង់​ហេដ្ឋារចនាសម្ព័ន្ធ​ជាច្រើន​នៅលើ​កោះ​សិប្ប​និមិត្ត​របស់ខ្លួន​ក្នុង​ប្រជុំ​កោះ Spralty រួមទាំង​ទីតាំង​យុទ្ធសាស្ត្រ​យោធា​ដ៏​រឹងមាំ ដូចជា​ព្រលានយន្តហោះ ប្រព័ន្ធ​ខែល​ការពារ​មី​ស៊ី​ល និង​បង្កើត​តំបន់​ការពារ​ដែនអាកាស (ADIZ) ថែមទៀត ។​

​អ្នកឯកទេស​យោធា និង​សន្តិសុខ​អន្តរជាតិ​បាន​វិភាគ និង​បញ្ជាក់​ឲ្យ​ដឹងថា តំបន់​ដែនសមុទ្រ​ចិន​ខាងត្បូង​មាន​ជម្រៅ​ទឹក​រាប់ពាន់​ម៉ែត្រ និង​មាន​រូងភ្នំ​ជ្រៅ​នៅ​បាតសមុទ្រ ក្លាយជា​ការចាប់អារម្មណ៍​យ៉ាងខ្លាំង​របស់​ចិន​ក្នុង​ការកសាង​មូលដ្ឋានទ័ព​ក្រោម​បាតសមុទ្រ ដោយ​ងាយស្រួល​ដល់​ការលាក់ខ្លួន​របស់​នាវា​មុជទឹក​ដើម្បី​គេច​ផុតពី​ការចាប់​បាន​របស់​ប្រព័ន្ធ​រ៉ា​ដាស​ត្រូវ ជាពិសេស​ប្រព័ន្ធ​រ៉ា​ដា​ត្រួតពិនិត្យ​របស់​សហរដ្ឋ​អាមេរិក​នៅ​តំបន់​មហាសមុទ្រ​ប៉ាស៊ីហ្វិក ។​

​សារព័ត៌មាន The Mirror របស់​អង់គ្លេស​ធ្លាប់បាន​ផ្សព្វផ្សាយ​កាលពី​ថ្ងៃទី​០៩ ខែមិថុនា ឆ្នាំ​២០១៦​កន្លងទៅ​ឲ្យ​ដឹងថា ចិន​មាន​គម្រោង​សាងសង់​មូលដ្ឋានទ័ព​ដ៏​រឹងមាំ​នៅក្រោម​ជម្រៅ​ទឹក​ជាង​៣​គីឡូម៉ែត្រ​យក​លំនាំ​តាម​អគារ​ដូច​ក្នុង​រឿង James Bond ដ៏​ល្បី​នៅ​តំបន់​សមុទ្រ​ចិន​ខាងត្បូង ក្រោម​ការបកស្រាយ​បង្វែងដាន​ថា ជា​គម្រោង​រុករក​រ៉ែ​នៅក្រោម​បាតសមុទ្រ ។​

​ទិន្នន័យ​ទទួលបាន​តាមរយៈ​ផ្កាយរណប​បានបង្ហាញ​ឲ្យ​ឃើញថា យន្តហោះ​ចម្បាំង​របស់​ចិន​ជាច្រើន​គ្រឿង​បាន​សាកល្បង និង​ប្រចាំការ​ចុះចត​រួចទៅហើយ​នៅលើ​ព្រលានយន្តហោះ​ដ៏​រឹងមាំ​ក្នុង​តំបន់​ដែនសមុទ្រ​ចិន​ខាងត្បូង​កំពុងមាន​ជម្លោះ​នោះ ។​

​ក្រៅពី​ចំណូល​ពាណិជ្ជកម្ម​អន្តរជាតិ​ដែល​ចិន​អះអាងថា​មាន​ប្រមាណ​៥​ពាន់​លាន​ដុល្លារ​អាមេរិក​ក្នុង​១​ឆ្នាំៗ និង​ធនធាន​រ៉ែ​ប្រេងកាត ឧស្ម័ន​មហាសាល​នៅ​តំបន់​ដែនសមុទ្រ​ចិន​ខាងត្បូង គឺ​ចិន​បានចាត់ទុក​តំបន់​ដែនសមុទ្រ​ចិន​ខាងត្បូង​កំពុងមាន​ជម្លោះ ជាទី​តាំង​យុទ្ធសាស្ត្រ​យោធា​របស់ខ្លួន​យ៉ាងសំខាន់​បំផុត​ដែល​ចិន​ត្រូវ​ច្បាម​យក និង​ការពារ​មិន​ឲ្យ​របូត​ចេញពី​ដៃ​បានឡើយ រហូតដល់​ថ្នាក់​លោក​ឧ​ត្ត​ម​សេនីយ៍ Chang Wanquan រដ្ឋមន្ត្រី​ការពារ​ជាតិចិន​ធ្លាប់បាន​ប្រកាស​ទប់ទល់​ទៅនឹង​ការ​លូកដៃ​ចូល​ជ្រៀតជ្រែក​ណាមួយ​ពី​សំណាក់​សហរដ្ឋអាមេរិក​នៅក្នុង​ជម្លោះដែនសមុទ្រ​ចិន​ខាងត្បូង​ថា​«​ចិន​បាន​ត្រៀមខ្លួន​រួចជាស្រេច​ហើយ​ក្នុងការ​ធ្វើសង្គ្រាម​ដែនសមុទ្រ និង​សង្គ្រាម​នុយក្លេអ៊ែរ​» ៕

 

Filed in: Feature, អន្តរជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.