ថ្ងៃ អាទិត្យ ទី ១៩ ខែ មករា ឆ្នាំ ២០២០

Donald Trump រិះគន់​អតីត​ប្រធានាធិបតី​អាមេរិក​Barack Obama​ថា បណ្តោយ​ឲ្យ​ចិន​សាងសង់​សំណង់​ផ្សេងៗ​នៅ​សមុទ្រ​ចិន​ខាងត្បូង​ដោយ​មិន​ទប់ស្កាត់ 

​គេហទំព័រ​Taipeitimes របស់​តៃវ៉ាន់​បាន​ផ្សព្វផ្សាយ​កាលពី​ថ្ងៃទី​២៥ ខែកុម្ភៈ ឆ្នាំ​២០១៧​ម្សិលមិញ​ឲ្យ​ដឹងថា លោក Donald Trump ប្រធានាធិបតី​ទី​៤៥​របស់​សហរដ្ឋអាមេរិក​បច្ចុប្បន្ន បានធ្វើការ​រិះគន់​ទៅលើ​អតីត​លោក​ប្រធានាធិបតី Barack Obama ថា បណ្តែតបណ្តោយ​ឲ្យ​ចិន​សាងសង់​សំណង់​ហេដ្ឋារចនាសម្ព័ន្ធ​ផ្សេងៗ រួមទាំង​ទីតាំង​យោធា​ជាច្រើន​នៅ​តំបន់​ដែនសមុទ្រ​ចិន​ខាងត្បូង​កំពុងមាន​ជម្លោះ​ដោយ​មិន​ទប់ស្កាត់​ទាន់ពេលវេលា  ។​

​លោក Donald Trump បានបញ្ជាក់​សង្កត់ធ្ងន់​ថា «​ការសាងសង់​ទីតាំង​យោធា​នៅ​កណ្តាល​ដែនសមុទ្រ​ចិន​ខាងត្បូង​កំពុងមាន​ជម្លោះ​ដោយ​អាជ្ញាធរ​ចិន​យ៉ាងសកម្ម​តាំងពី​ប្រមាណ​៣​ឆ្នាំមុន គឺជា​កំហុសឆ្គង​របស់លោក​អតីត​ប្រធានាធិបតី Barack Obama» ។​

​ពាក់ព័ន្ធ​នឹង​ស្ថានភាព​នៅ​តំបន់​ដែនសមុទ្រ​ចិន​ខាងត្បូង​ដែល​កំពុងមាន​ជម្លោះ​រវាង​ចិន និង​បណ្តា​ប្រទេស​ជាច្រើន​ឋិត​នៅក្នុង​សមាគម​ប្រជាជាតិ​អាស៊ីអាគ្នេយ៍ (ASEAN)​នោះ ត្រូវបាន​មន្ត្រី​ជំនាញ​យោធា​សហរដ្ឋអាមេរិក​ប្រកាស​ឲ្យ​ដឹងថា ចិន​បានសម្រេច​លើ​ការដ្ឋាន​សំណង់​ចំនួន​២០​ផ្សេងៗ​គ្នា ក្នុងនោះ​មាន​ទាំង​ការបង្កើត​កោះ​សិប្ប​និមិត្ត​ខុសច្បាប់​ផង ។​

​តំបន់​ដែនសមុទ្រ​ចិន​ខាងត្បូង​ដែលមាន​ទំហំ​ប្រមាណ​៣ ៥០០ ០០០​គីឡូម៉ែត្រ​ក្រឡា​កំពុងមាន​ជម្លោះ​នោះ ក្រៅពី​អះអាងថា​នាំមក​នូវ​ចំណូល​ប្រមាណ​៥​ពាន់​លាន​ដុល្លារ​អាមេរិក​ក្នុង​១​ឆ្នាំៗ គឺ​មហាអំណាច​ចិន​បានចាត់ទុក​ទីតាំង​ដែនសមុទ្រ​នេះ ជា​មូលដ្ឋាន​យុទ្ធសាស្ត្រ​យោធា​ដ៏​សំខាន់បំផុត​របស់ខ្លួន ដូច្នេះហើយ​ទើប​ចិន​បាន​សាងសង់​កោះ​សិប្ប​និមិត្ត និង​ហេ​រដ្ឋា​រចនាសម្ព័ន្ធ​ផ្សេងៗ​ទៀត​នៅ​កណ្តាល​សមុទ្រ​មិន​ខ្វល់​នឹង​ការជំទាស់ ឬ​រារាំង​ពី​មជ្ឈដ្ឋាន​ណា​ឡើយ ។​

​កាលពី​ថ្ងៃទី​១៥ ខែកុម្ភៈ ឆ្នាំ​២០១៧ ក្រសួងការបរទេស​ចិន​ធ្លាប់បាន​ព្រមាន​ទៅលើ​សហរដ្ឋអាមេរិក​ទា​ម​ទារ​ឲ្យ​បញ្ឈប់​នូវ​ការបញ្ជូន​នាវាចម្បាំង​មក​ធ្វើ​ចរាចរណ៍​តាម​ផ្លូវទឹក​កំពុងមាន​ជម្លោះ​នៅ​ដែនសមុទ្រ​ចិន​ខាងត្បូង ។ ដោយ​មិន​អើពើ​ទៅនឹង​ការព្រមាន​របស់​ចិន​នោះ កាលពី​ថ្ងៃទី​១៨ ខែកុម្ភៈ ឆ្នាំ​២០១៧ កន្លងទៅ​ថ្មីៗ សហរដ្ឋអាមេរិក​បាន​ដាក់ពង្រាយ​នាវា​ផ្ទុក​យន្តហោះ​ដ៏​ទំនើប​ធុន​USS Carl Vinson និង​នាវា​ពិឃាត​ធុន​USS Wayne E. Meyer របស់ខ្លួន​ធ្វើ​សកម្មភាព​ល្បាត​នៅក្នុង​ដែនសមុទ្រ​ចិន​ខាងត្បូង​ក្រោម​ការ​អះអាងថា «​ការពារ​ដែនទឹក​អន្តរជាតិ​» ៕​

 

Filed in: Feature, អន្តរជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.